QULLAAWU MAXAAFI XAꞌMONNA DAWARo
Baalanti ammaꞌno Magano hagiirsiissanno?
Baadire odoote kullanna macciishshatto wote ammaꞌnote suꞌminni assinoonni bunshe daafira macciishshootto woti heeꞌrara dandaanno. Halaalaanchu Magani irko afidhinoti baalanta ammaꞌno diꞌꞌikkitino. (Maatewoosi 7:15) Isinni rooru manni soꞌrote doogo haꞌranni no.—1 Yohaannisi 5:19 nabbawi.
Ikkollana, dancha coyenna halaale baxannoha suwashshu wodani noonsa manna Maganu dideanno. (Yohaannisi 4:23) Maganu togoo manni Qullaawu Maxaafi halaale rosanno gede koyisanni no.—1 Ximootewosi 2:3-5 nabbawi.
Halaalaancho ammaꞌno badde afa dandaattohu hiittoonniiti?
Maganu Yihowa addi addi ammaꞌno harunsanno manni halaale afanno gedenna mimmito baxa rosanno gede asse gamba assanni no. (Mikkiyaasi 4:2, 3) Konni daafira halaalu ammaꞌno harunsanno manna mimmitoho noonsa baxillinni badde afa dandaatto.—Yohaannisi 13:35 nabbawi.
Maganu Yihowa halaalu magansiꞌra widoonni duuchunku gari mannira mittimma heedhannonsa gede assanni no.—Faarso 133:1
Halaalu ammaꞌno harunsanno manni ammananna heeshsho Qullaawu Maxaafi aana xintantinote. (2 Ximootewosi 3:16) Qolteno insa Maganu suꞌma ayirrissanno. (Faarso 83:18) Hattono mannu oosora hexxo Maganu Mangiste calla ikkitinota dudubbanno. (Daanieeli 2:44) Insa olliichinsara danchare assite Yesuusi gede ‘xawaabbinsa xawanno’ gede assitanno. (Maatewoosi 5:16) Konni daafira, addu Kiristaani Maganu Mangisteha dancha duduwo shaqqillunni kulate yee minunni mine haꞌranno daafira baxxe leellanno.—Maatewoosi 24:14; Hawaariyaatete Looso 5:42; 20:20 nabbawi.