Maatete Daafira Yaada

Janeeti togo yitino: “Anniꞌya reyihunni shiima yanna gedensaanni, minaanniꞌya wole galte kalaqiꞌrara kainota kulie. Hakkunni gedensaanni lede mittoreno yiiekki holginni uduunnesi xinqisiisiꞌre lame qaaqquulle angaꞌya hune haꞌri.” Janeeti looso afidhinoha ikkirono, afidhanno woxi baankete asalese baaxxate diꞌꞌikkannoho. Isera miinju qarrano agurranna wole mitiimmano iillitinose. Ise togo yitino: “Haarote lexxinoeha loosu qeecha baalanka callichoꞌya duqqa hasiissinoe daafira yaaddo wolqaꞌyara aleenni ikkitue. Qaaqquulliꞌyara wolu anninna ama assanno gede hasiisannonsare wonsha hoogoomma daafira aneneeto bushiisheemma. Xa nafanni wolu manni anenna qaaqquulleꞌya ma garinni laꞌꞌannokka yee yaadeemma. Mannu, galteꞌya diigantinohu ani asseemmari gatinohura ikkinohu gede asse hedakka?”

Huuccatto Jaaneeti macciishshantannose hedo qeeꞌla dandiitanno gedenna Yihowa ledo noose fiixoomi lophanno gede kaaꞌlitinose. Ise togo yitino: “Hashsha baaluri qaxaqaꞌa yaanno wote, yaaddo batidhannoe daafira hashshannanni heeshsho qarraho. Huuccatto assiꞌraꞌyanna Qullaawa Maxaafa nabbawaꞌya goxicho afiꞌreemma gede kaaꞌlitannoe. Lowo geeshsha baxeemma qummeeshshuwa giddo mitte Filiphisiyusi 4:6, 7; qummeeshshu togo yaanno: ‘Aye coyirano yaaddinoonte; hatteentenni baalunku coyira huuccattotenninna eeggifatatenni galatu ledo dhiwinoꞌne coye Maganoho kulle; wodancha baalanta roortannoti Maganu salaame, wodanaꞌnenna surreꞌne Kiristoosi Yesuusinni agartanno.’ Duucha hashsha huucciꞌranni galoomma woti no; konni daafira Yihowa salaame shesho afiꞌreemma gede assitinoe.”

Yesuusi Ilaalu Sibikatesi yannara huuccattote daafira coyiꞌrinoti jawaachishshanno hedo duuchunku gari yaaddora kaaꞌlitannote: “Anniꞌne mayi hasiisannoꞌnero huuccidhinara albaanni nafa afino.” (Maatewoosi 6:8) Hige hasiisannonke coye huucciꞌra nooreentilla. ‘Maganunniwa shiqa’ dandiineemmoti qara doogo huuccattote. Tini mayi ikkanno gede assitanno? “Isino [ninkewa] shiqanno.”—Yaaqoobi 4:8.

Huuccatto yaachishinonkere hasaaphineenna dancha hedo macciishshantannonke gede assitannota calla diꞌꞌikkitino. ‘Huuccatto macciishshanno Magani’ Yihowa ammanatenni iso hasidhannorira huuccidhinore wonshanno. (Faarso 65:2) Yesuusi harunsaanosi ‘ayewoteno huuccidhanno gedenna hexxo mudhite agurtannokki’ gede rosiisinohu iseraati. (Luqaasi 18:1) Maganu ammanatenni huucciꞌneemmore wonshannota addaxxine, biddishshasinna kaaꞌlosi afiꞌrate ganyine huucciꞌra hasiissannonke. Isira huucciꞌnoommore wonshate hasatto woy wolqa noosita horonta huluullama dihasiissannonke. Konni garinni ‘agurrummokki huucciꞌranke’ addu ammana noonketa leellishshanno.—1 Teselonqe 5:17.

AMMANATE YAA MAYYAATE?

Ikkina, ammanate yaa isi mayyaate? Ammana ‘Magano seekke afate.’ (Yohaannisi 17:3) Tennera kaaꞌlannonkehu umi coyi Qullaawa Maxaafa horoonsiꞌne Maganu hedo afate. Konni garinni, isi ninke mitto mittonka laꞌꞌannonketanna kaaꞌlankera hasiꞌrannota huwanteemmo. Ikkollana, addu ammana Maganu daafira mitore afa calla diꞌꞌikkitino. Togoo ammana heedhunkero, Maganu ledo muli jaaloomi heeꞌrannonke yaate. Mittu manchi ledo shiima yanna giddo lubbora jaalooꞌmineemmokkinte gede, togoo jaaloomirano yanna hasiissanno. Maganu daafira lende ronsummo kiiro, ‘iso hagiirsiisannore assinummo’ kiiro, hattono heeshshonke giddo kaaꞌlosi afiꞌnummo kiiro “ammananke lexxitanni hadhanno.” (2 Qorontoosi 10:15; Yohaannisi 8:29) Jaaneeti yaaddose qeeltanno gede kaaꞌlitinoseti togoo ammanaati.

Ise togo yitino: “Ammanaꞌya jawaata ikkitanno gede kaaꞌlinoehu qaru coyi asseemmahu mittu mittunku coyira Yihowa kaaꞌlo afiꞌraꞌyaati. Mannu saꞌne anfeemmokkiha lawannoha gariweelo coye asse duucha hige miicinonke. Lowo geeshsha huucciꞌroomma daafira, Yihowa woꞌmanka wote ani umiꞌyanni horonta afiꞌra dandeemmakkita fulleemmo furcho qixxeessinonke. Iso galaxxeemma wote, isi anera mageeshshi coye assinoero qaageemma. Isi ayewoteno kaaꞌlo hasiisse noonke yannara kaaꞌlinonke. Qoleno, addu Kiristaana ikkitinore halaalaancho jaalla afiꞌreemma gede assinoe. Insa duuchanka wote irkissannoe; qoleno oosoꞌyara dancha lawishsha ikkitino.”a

“Yihowa Milkiyaasi 2:16 aana ‘Galte diingannita giweemmo’ yiinohu mayiraatiro xa leellinoe. Beebbaataame galtera, kuni lowo geeshsha xissiisanno coyeeti. Minaanniꞌya hune haꞌrienku lowo diro ikkino; ikkirono, xaano mito wote callimmanna waagu nooekkita ikkoommohu gede ikke macciishshamannoe. Hattoo yannara, wole manna kaaꞌlate mitore assate woꞌnaaleemma; hatto assaꞌya duucha wote kaaꞌlitinoe.” Jaaneeti konni garinni Qullaawu Maxaafi biddishsha harunsite mannunniwa gamba yaase yaaddose ajjanno gede kaaꞌlitinose.b—Lawishsha 18:1.

Jaaneeti togo yitino: “Baalunkurinni roore sheshifachishshannoeti, Maganu ‘annu nookkirira anna ikkinotanna gunnootaho agaraancho’ ikkinota afaꞌyaati. Isi minaanniꞌya gede horonta tuge diagurannonke.” (Faarso 68:5) Jaaneeti Maganu ‘bushu coyinni fonqolannonkekkita’ affino. Isi hayyo “baalunkura shaqqillunni” aanno; qoleno, yaaddonke gargadhate “mannu wolqara aleenni ikkitino wolqa” aannonke.—Yaaqoobi 1:5, 13; 2 Qorontoosi 4:7.

Ikkina dano iillitannonke yine yaandanni heeꞌnoommohalla ikki?