Maganu Ledo Loosa Lowo Geeshsha Hagiirsiissanno

1. Yihowa duuchunkura Aliidiha ikkirono, wolootu maa assitara koyisino?

YIHOWA duuchunkura Aliidiho, baalankare Kalaqinoho, hattono gawalo nookki hayyonna wolqa noosiho. Iyyoobino tenne huwatino. Yihowa kalaqote loosisi daafira xaꞌmisihu gedensaanni Iyyoobi togo yee qolino: “Ati baalanka coye assa dandaattotanna hedoottore baalankare assa hoogattokkita xa afummo.” (Iyo. 42:2) Yihowa hasiꞌrinore baala mittuno kaaꞌlisikki assa dandaannoha ikkirono, hedosi wonshate hanafotenni kayise wolootu ledosi loossanno gede koyise baxillesi leellishino.

2. Yihowa Yesuusi hiikkonne kaajja looso loosanno gede koyisino?

² Maganu kalaqinohu umi kalaqami mitto Beettosiiti. Yihowa wole baalanka kalaqama yaano heeshsho noonsareno noonsakkireno kalaqi yannara Beettisi isi ledo loosanno gede fajjino. (Yoh. 1:1-3, 18) Hawaariya Phaawuloosi Yesuusi daafira coyiꞌranni togo yiino: “Iimanna uulla noohu wolu baalunku coyi kalaqaminohu isi widoonniiti; illete leeltannorinna leeltannokkiri, zuufaannano ikkito mootumma woy gashshootuno ikko silxaanna, baalunku kalaqantinohu isi widoonniiti. Wolu baalunku coyi kalaqaminohu isi widoonniitinna isiraati.” (Qol. 1:15-17) Konnira Yihowa Beettisi kalaqote looso isi ledo loosanno gede asse, hattono Yesuusiha kaajja loosu qeecha wolootu affanno gede asse Beettosi ayirrisannota leellishino.

3. Yihowa Addaami maa assanno gede koyisino? Mayira?

³ Yihowa mannu oosono ledosi loossanno gede koyisino. Lawishshaho, Addaami saadate suꞌma fushshanno gede fajjino. (Kal. 2:19, 20) Addaami tenne baala saada laꞌꞌasi, akattansa xiinxallasinna insara malino suꞌma doorasi lowo geeshsha hagiirsiissinositi egennantinote! Yihowa kalaqino saadara suꞌma fushsha diqarrissannosi. Ikkirono, isi insara suꞌma Addaami fushshanno gede asse shaqqado ikkinota leellishino. Qoleno, Maganu Addaamira uulla woꞌma Gannate assate looso uyinosi. (Kal. 1:27, 28) Gedensaanni kayinni Addaami Maganu ledo loosa agurino; tini qolte isirano ikko oososi baalantera buutote qarra abbitino; tini dadillissannote.—Kal. 3:17-19, 23.

4. Wolu manni Maganu fajjo assate isi ledo loosinohu hiittoonniiti?

⁴ Yannate gedensaanni Maganu wole mannano hedosi wonshate ledosi loosanno gede koyisino. Nohi umosino ikko minisi manna Baote Wayinni gatisate markaawe seekkino. Muse Isiraeelete daga Gibitsete borojjimmanni fushshino. Iyyaasu qole hattee daga Hexxote Gobba eessino. Salamooni Yerusaalamete Beetemeqidese minino. Maariyaami Yesuusira ama ikkitino. Kurino ikko wolu batinyu ammanamino manni Yihowa fajjo assate isi ledo loosino.

5. Maganu ledo hiikkonne looso loosate qoosso afiꞌnoommo? Yihowara konne looso loosate ninke kaaꞌlo hasiissannosi? (Hanafote noo misile lai.)

⁵ Xaa yannara, Yihowa woꞌma wolqankenni Kiristoosi Gashshino Mangistera kaaꞌlinammora koyisinonke. Maganoho soqqama dandiineemmoti batinye qullaawa soqqansho no. Baalunku mittu gari soqqansho soqqama dandiineemmokkiha ikkirono, Mangistenniha dancha duduwo kayinni sabbaka dandiineemmo. Hige konne looso loosate Yihowara ninke kaaꞌlo dihasiissannosi. Isi hasiꞌriro iima heeꞌre uullate aana noo manna xaaddote coyishshiisha dandaanno. Yesuusi, Yihowa kinna nafa Mesihichu daafira wolootaho kultanno gede assa dandaannota coyiꞌrino. (Luq. 19:37-40) Ikkirono, Yihowa ‘ledosi loonsammora’ fajjinonke. (1 Qor. 3:9) Hawaariya Phaawuloosi togo yee borreessino: “Isi ledo loonseemmore ikkinoommohura, Maganu elto adhitine kaꞌine mayira adhitinoonniro deꞌinannikki gede qaagiissineemmoꞌne.” (2 Qor. 6:1) Maganu ledo loosanke lowo ayirrinyeetinna tashshi assitannote. Hanni hatto yineemmohu mayiraatiro laꞌno.

MAGANU LEDO LOOSA HAGIIRSIISSANNONKE

6. Maganunnihu bayiru Beetti Annisi ledo loosasinni mayi macciishshaminosita coyiꞌrino?

⁶ Hundinni kayisse, Yihowa soqqamaano isi ledo loosse baasa hagiidhitanni keeshshitino. Maganunnihu umi Beetti uullara daara albaanni togo yee coyiꞌrinota xawinsoonni: “Yihowa doogosira umiha asse kalaqie . . . Hakkawaro ani ledosi qara loosaasincho ikke noommo. Barru barrunku iso tashshi asseemmosi; anino albasiinni duuchanka wote hagiidheemmo.” (Law. 8:22, 30) Yesuusi Annisi ledo hagiirrunni loosino; loosino loosinna Yihowa tashshi assanni noota afasi hagiidhanno gede assitinosi. Ninkena?

7. Sabbakate loosi hagiirsiisannonkehu mayiraati?

⁷ Yesuusi aano adhano hagiirsiissannota coyiꞌrino. (Looso 20:35) Halaale macciishshine adhinummo yannara hagiidhinoommo; anfoommo halaale mannaho kulano hattonni hagiirsiissannonke. Qullaawu Maxaafi halaale wolootaho kulleemmo wote, ayyaanaamittetenni hudiꞌrino manni Maganonkenna Qaalisi giddo nooha muxxe halaale afe hagiidhanna laꞌneemmo. Insa alba heddannonna heedhanno gara biddi assidhanna laꞌneemmo woteno tashshi yaannonke. Dancha duduwo duduwate loosi lowo geeshsha hasiisannoha ikkinota huwanteemmo. Kuni loosi mannu Maganu ledo araarame hegere heeshsho afiꞌranno faro fanannoho. (2 Qor. 5:20) Mannu hegere heeshshowa massitanno doogo haꞌranno gede kaaꞌlatenni roore tashshi assannohu wolu loosi mama no?

8. Yihowa ledo loonse afiꞌnanni hagiirri daafira mitu roduuwi mayitino?

⁸ Hagiidhineemmohu mannu kulleemmonsa halaale macciishshe adhanno daafira calla ikkikkinni, Yihowa hagiirsiinsanni heeꞌnoommotanna isira soqqamate sharrammeemmo sharro isi naadannota anfoommo daafiraati. (1 Qorontoosi 15:58 nabbawi.^[1]) Ixaaliyaho heeꞌrannohu Maarko yinanni rodii togo yiino: “Yihowara mittoreno gatisiꞌrummokki aanni noommotanna konne aanni noommohuno assinire bayichonko hawannohura ikkinokkita afaꞌya lowo geeshsha hagiirsiissannoe.” Ixaaliyaho soqqamannohu Firaanko yinanni rodiino togo yiino: “Assineemmori garire ikkinokkihu gede assine hendeemmoha ikkirono, Yihowa kayinni barru baala Qaalisinna wole ayyaanaamittete qixxaawosi widoonni, baxannonketanna isira assineemmo coye baalanka naadannota qaagiissannonke. Yihowa ledo loosa hagiirsiissannoehunna heeshshoꞌya alaamu noota ikkitinohu iseraati.”

MAGANU LEDO LOOSA ISIWANNA MANNUNNIWA SHIQATE KAAꞌLITANNONKE

9. Yihowanna Yesuusi mereero hiittoo jaaloomi no? Mayira?

⁹ Banxeemmo manni ledo loonseemmo wote, insawa shinqeemmo hattono ayimmansanna akattansa albinni roore anfeemmo. Insa maa loosa baxxannoro calla ikkikkinni, hakkoye looso loosanno garano huwanteemmo. Yesuusi lowo biliyoone ikkanno diro Yihowa ledo loosino; konni garinni mimmitoho jawaatunna baꞌꞌannokki baxilli noonsa. Yesuusi jaaloominsa mageeshshi geeshsha muliha ikkinoro coyiꞌranni, “Aninna Anniꞌya mittoho” yiino. (Yoh. 10:30) Lamunkura kaajja mittimma noonsa; hattono loossannore baala sumuu yite loossanno.

10. Sabbakate loosi Yihowawanna wolootunniwa shiqate kaaꞌlannonkehu hiittoonniiti?

¹⁰ Yesuusi, Yihowa rosaanosi agarannonsa gede huuccatto assino. Mayira? Isi “Ninke mitto ikkinoommonte gede insano mitto ikkitanno gede” yee huuccino. (Yoh. 17:11) Maganunnite xintu seerubba ledo sumuu yine heeꞌneemmohanna sabbakate looso loonseemmoha ikkiro, baxissanno akattasi huwanteemmo. Qoleno, Magano addaxxanna biddishshasi harunsa hayyo ikkitinohu mayiraatiro leellannonke. Maganunniwa shinqummoro isino ninkewa shiqanno. (Yaaqoobi 4:8 nabbawi.^[2]) Qoleno Kiristaanu roduuwinkewa shinqeemmo; korkaatuno iillannonke qarri mitto danaati, afiꞌneemmo hagiirrinna mixonkeno mittu garite. Ee, loonseemmohu, hagiidhineemmohunna qarra dandiine saꞌneemmohu mitteenniiti. Biritaaniyaho heedhannoti Okitaaviya yinanni rodoo togo yitino: “Yihowa ledo loosaꞌya wolootunniwa shiqeemma gede kaaꞌlitinoe; korkaatuno jaaloominke mulla iimi addiha diꞌꞌikkino; hatteentenni mittu gari alaamanna doogo harunsineemmoreeti.” Aterano hatto dilawannohe? Roduuwinke Yihowa hagiirsiisate sharrantanno gara laꞌneemmo wote insawa albinni roore shinqeemmo.

11. Haaro alame giddo Yihowawanna roduuwinkewa albinni roore shinqeemmohu mayiraati?

¹¹ Xaa yannara Maganunna mannu ledo noonke baxilli jawaata ikkara dandaanno; albillitte keeraanchimma woꞌmitinote haaro alamera kayinni baxillinke roore jawaatanno. Hanni albillitte loonseemmoha dhaggete looso hedi! Hakkawote reyotenni kaꞌꞌanno manninni galagalle xaandeemmo, hattono Yihowa doogo rosiinseemmonsa. Qoleno uulla gannate assate looso loonseemmo. Konne shaaꞌꞌa ikkinokki looso mitteenni kaaꞌlamme loosanna Kiristoosi Gashshino Mangiste hunda guuta ikkate widira haꞌra lowo geeshsha hagiirsiissannota ikkitanno! Hatte yannara, mannu baalunku insa insaneewanna ‘heeshshote kalaqami baalunku hasatto wonshanno’ Maganiwa albinni roore shiqanno.—Far. 145:16.

MAGANU LEDO LOOSA AGAROOSHSHE IKKITANNONKE

12. Sabbakate loosi agarooshshe ikkannonkehu hiittoonniiti?

¹² Yihowa ledo noonke jaaloomi baꞌꞌannokki gede agadha hasiissannonke. Heeꞌnoommo alame Sheexaanu Daawuloosi gashshinota ikkitinohuranna guuntete xeꞌne noonkehura, gara ikkinokkire hedanna tenne alame amanyoote rosa diqarrissannote. Alamete ayyaana ninke hasiꞌnoommokki raga qole xiiwannonke lagi ledo heewisiisa dandiinanni. Lagu adhe haꞌrannonkekki gede gargadhate, noonke dhuki baalunkunni alillitte daaha hasiissannonke. Hatteente gede, Sheexaanu alame ayyaani adhe haꞌrannonkekki gede sharrama hasiissannonke. Wolootaho sabbankeemmoha ikkiro, ammananke shoshshoggishannore ikkikkinni horoomannonkehu ayyaanaamittete coyi aana illachinsheemmo. (Fil. 4:8) Sabbakate looso loosa, Maganu eino qaalenna baxillu aana xintamino seerasi qaangeemmo gede assitannonkehura ammananke jawaattanno. Qoleno kuni loosi ayyaanaamittennihu olu uduunninke xeannokki gede agadhate kaaꞌlannonke.—Efesooni 6:14, 15 nabbawi;^[3] Efe. 6:16, 17.

13. Mittu Awustiraaliyaho heeꞌranno rodii sabbakate looso ma garinni laꞌꞌanno?

¹³ Sabbakate loosiranna wole ayyaanaamittete millimmora diinaggaambeemmoha ikkiro, uminke qarri daafira quwa saꞌne yaandeemmo yanna diheedhannonke; tini qolte agarooshshe ikkitannonke. Awustiraaliyaho heeꞌrannohu Joeeli togo yiino: “Sabbakate loosi noo coye deꞌꞌeemmokki gede kaaꞌlannoe. Kuni loosi mannaho iillanni noo qarranna ani heeshshoꞌya giddo Qullaawu Maxaafi biddishsha harunsaꞌyanni afiꞌroommo horo qaageemmo gede kaaꞌlannoe. Sabbakate loosi shooshaqa ikkate sharrameemmo gede assinoe; hattono Yihowanna roduuwaꞌya addaxxeemmo faro fanannoe.”

14. Sabbakate looso loonsanni keeshshanke Maganu ayyaani ledonke noota leellishshanno yineemmohu mayiraati?

¹⁴ Sabbakate loosi Maganu ayyaani ledonke noota ammanneemmo gedeno assannonke. Hanni qooxeessikkira noo mannira dancha daabbo beehate looso uyinoonnihe gede assite hedi. Konni loosira woxe dibaantannihe; fushshootto woxe qolateno uyinanniheri dino. Qoleno, shiima yanna gedensaanni mannu beekkanni nootto daabbo baxinokkitanna mitu manni isinni tenne daabbo beehoottotera giwannoheta afitto. Konne looso loossanni mageeshsha keeshshatto? Mannu ikkito hexxo mudhatto gede assitannohehura konne looso loossanni lowo yanna keeshshate dhuka hoogattora dandaatto. Ikkirono, ninke galata baino manni mishanninna qacifatanni heeꞌreennankenni hattono uminke woxe fushshinanni lowo diro sabbankanni keeshshinoommo. Tini Maganu ayyaani kaaꞌlanni noonketa leellishshannota diꞌꞌikkitino?

MAGANU LEDO LOOSANKE ISONNA MANNA BANXEEMMOTA LEELLISHSHANNO

15. Dancha duduwo duduwa Maganu mannaho hedino hedo ledo mayi xaadooshshe afidhino?

¹⁵ Hanni dancha duduwo duduwate loosi Yihowa mannaho hedinori ledo xaadanno gara hedi. Isi hedo mannu uullate aana reyo nookkiha heeꞌranno gedeeti; Addaami cubbo loosinoha ikkirono tini hedosi xaano disoorrantino. (Isa. 55:11) Isinni Maganu mannu cubbunna reyote borojjimmanni fulanno qixxaawo qixxeessino. Tenne Maganu hedo ledo sumuu yaanno garinni, Yesuusi uullara daye hajajamanno mannira heeshshosi kakkalo asse shiqishino. Ikkollana, kuni manni Maganoho hajajamate isi insa ma assitara hasiꞌrannoro afa hasiissannonsa. Konnira, Yesuusi mannaho Maganu ma assitara hasiꞌrannoro rosiisino; rosaanosino tenne assitara hajajino. Mannu Maganu ledo araaramanno gede kaaꞌlineemmo wote, Maganu mannu ooso cubbunninna reyotenni gatisate qixxeessino qixxaawora ledosi loonsanni heeꞌnoommo yaate.

16. Sabbakate loosi Maganunnite baalanta roortanno hajajo ledo xaadannohu hiittoonniiti?

¹⁶ Wolootu hegere heeshshowa massitanno doogo aana hadhanno gede kaaꞌlanke Yihowanna manna banxeemmota leellishshanno; isi “fajjo duuchunku gari manni gatanno gedenna halaalunnita gara ikkitino egenno afiꞌranno gedeeti.” (1 Xim. 2:4) Yesuusi Isiraeelete uyinoonni higge baalantenni roortannoti hiitteetiro xaꞌminisi yannara togo yee qolino: “‘Maganokki Yihowa woꞌmu wodanikkinni, woꞌma lubbokkinninna woꞌma surrekkinni baxi.’ Baalanta roortannotinna umi hajajo tenneeti. Layinkitino tenne labbannotenna togo yitannote: ‘Jaalakki umikki gede assite baxi.’” (Mat. 22:37-39) Sabbakate looso loonse tenne lamenta hajajo ayirrinseemmota leellisha dandiineemmo.—Hawaariyaatete Looso 10:42 nabbawi.^[4]

17. Dancha duduwo duduwate ayirrinye afiꞌroottohura mayi macciishshamannohe?

¹⁷ Addaho, ninke lowo geeshsha maassammoommoreeti! Yihowa hagiirsiisannoha, isiwanna wolu manniwa shinqeemmo gede kaaꞌlannohanna ayyaanaamittenkera agarooshshe ikkanno looso uyinonke. Kuni loosi Maganonna manna banxeemmota leellinsheemmo farono fanannonke. Xaa yannara uullate aana Maganu manni heeꞌranno gari lowo geeshsha babbaxxinoho; ikkirono ajuno akkaluno, dureessuno buxichuno, dhuku noonsarino noonsakkirino ammanansa wolootaho kulate sharrantanni no. Atino Faransayete heedhannoti Chanteeli yinanni rodoo coyidhino hedo ledo sumuu yaattoti egennantinote. Ise togo yitino: “Kalqete alame woꞌmate giddo Wolqaataamu, duuchunku coyi Kalaqaanchinna hagiirraamu Magani togo yiinoe: ‘Haꞌri! Coyiꞌri! Ane daafira coyiꞌri! Woꞌmu wodanikkinni coyiꞌri. Ani wolqa, Qaaleꞌya Qullaawa Maxaafa, sokkaanote kaaꞌlo, uullate aana miilla, lexxanni haꞌranno qajeelshanna maltino yannara xawe leellanno biddishsha eemmohe.’ Yihowa asse yaannonkere assanna Maganinke ledo mitteenni loosa kaajja qoossooti!”