Maganu Uyinoꞌne Hexxora Nooꞌne Ammana Kaajjishidhe

1, 2. (a) Addu Kiristaani hexxanno hexxo alamete manni hexxanno hexxonni baxxitannohu hiittoonniiti? (b) Konni birxichira hiikkuri xaꞌmuwa daafira ronseemmo?

ADDU Kiristaanira kaajja hexxo noonsa! Ninke baalunku yaano, buuramino Kiristaanino “wolu geꞌreewi” wido ikkinoommorino iimano uullano Maganu fajjo woꞌmiteenna, hattono suꞌmisi qullaaweenna laꞌꞌate hexxineemmo. (Yoh. 10:16; Mat. 6:9, 10) Tini mannu hexxanno hexxo baala roortannote! Qoleno Maganu ‘haaru gordinna’ ‘haaro baatto’ wido ikkitinorira hegere heeshsho aansara eino qaale hexxotenni agadhinanni heeꞌnoommo. (2 Phe. 3:13) Hakka geeshsha kayinni, Maganu manni ayyaanaamittetenni lophanni haꞌranno gede hexxineemmo.

² Yannankera batinyu manni mito coye hexxanno; ikkirono hexxino coyi woꞌmannoronna teꞌee huluullamanno. Lawishshaho, lowo miliyoone ikkannohu qumaare gaꞌnanno manni lotore fultannonke yee hexxannoha ikkirono tenne huluullamanno. Addu ammana noosi manchi kayinni Maganu uyino hexxo ‘hawaqiꞌranno’ woy woꞌmitinohu gede asse hedanno. (Ibi. 11:1) Ikkina, Maganu uyino hexxora noonke ammana kaajjishiꞌra dandiineemmohu hiittoonniiti? Maganu uyino hexxora noonke ammana kaajjishiꞌra maaho kaaꞌlitannonke?

3. Addu Kiristaani Maganu eino qaale wonshannota ammanannohu mayiraati?

³ Ammana cubbaataammu mannu ooso adhite ilantannota woy umisenni lophitannota diꞌꞌikkitino. Mittu Kiristaanchira ammana heedhannosihu Maganunnihu qullaawu ayyaani massagannosi gede assiꞌrannoha ikkirooti. (Gal. 5:22) Qullaawu Maxaafi giddo Yihowara ammana noosita woy isira ammana hasiissannosita kultanno base dino. Yihowa baalankare dandaannohanna hayyicha ikkinohura hedinore wonshannota hoolannosiri dino. Iimi Anninke Yihowa abbeemmo yiino atooti woꞌmannota horo huluullamannokkihura, kuni atooti woꞌminohu gede asse hedanno. Konni daafira, Yihowa eino qaali “Kune woꞌmino!” yiino. (Yohaannis Ajuuja 21:3-6 nabbawi.) Kiristaanu Yihowa “ammanamino Magano” ikkinota afinohura, isi eino qaale wonshannota ammananno; Yihowa aye woteno eino qaale wonshanno.—Mar. 7:9.

KAAJJADO AMMANA NOONSAHU HUNDI MANNI LAWISHSHINNI ROSSE

4. Kiristinnu yannara albaanni heedhinoti Maganu soqqamaano hiikkonne coye hexxitino?

⁴ Ibiraawootu maxaafa fooliishsho 11te giddo kaajjado ammana noonsaha 16 labballinna meenti suꞌma kulloonni. Ayyaanunni konne maxaafa borreessihu insanna wole “ammanansa daafira janjoonni” manna qummi assino. (Ibi. 11:39) Insa baalunku, Maganu abbeemmo yee qaale eino “sirchi” widoonni Sheexaanenna isita busha alame hunatenna umo hedinore wonshate eino qaale ‘hawaqidhino’ woy konne qaale wonshannota dihuluullantino. (Kal. 3:15) Kuni ammanamino manni reyinohu, Maganu abbeemmo yee qaale eino sirchi yaano Yesuusi Kiristoosi iimi heeshsho faro fanara albaanniiti. (Gal. 3:16) Ikkirono, huluullammannikki hexxo uyino Magani Yihowa galatamona, insa reyotenni kaꞌuhu gedensaanni guuta ikkite gannate ikkitino uullara hegerera heedhanno.—Far. 37:11; Isa. 26:19; 25:8.

5, 6. Abirihaaminna minisi manni hiittenne hexxo aana illachishino? Insa ammanansa kaajjishiꞌre heeꞌranno gede mayi kaaꞌlinonsa? (Hanafote noo misile lai.)

⁵ Ibiraawoota 11:13 Kiristinnu yannara albaanni heedhino soqqamaano daafira kultanni togo yitanno: “Kuri baalu ammaꞌnite heedhe reyitino. Maganu uyinonsa hexxono diafidhino. Ikkollana xeertote heedhe laꞌe, afidhinohu gede assite hagiidhite adhitino.” Insa giddo mittu Abirihaamiiti. Isi Maganu abbeemmo yee qaale eino “sirchi” yaano Kiristoosi gashshooti hunda heeꞌnannita hagiirraame heeshsho aana illachishino? Yesuusi gibbannosirira coyiꞌrinori tenne xaꞌmora dawaro ikkanno; Isi togo yiino: “Anniꞌne Abirihaami ane barra lae hagiidhate halchino; afe kae hagiidhino.” (Yoh. 8:56) ‘Maganu akeekinonna minino katama’ yaano Mangiste hexxitinori lawishshaho, Saara, Yisihaaqi, Yaiqoobinna wolu batinyu mannino, Abirihaami gede Kiristoosi gashshannote Maganu Mangiste hunda heeꞌnannite hagiirraame heeshsho aana illachishino.—Ibi. 11:8-11.

⁶ Abirihaaminna minisi manni ammanansa kaajjishiꞌre heeꞌranno gede kaaꞌlinonsari maati? Insa Maganu daafira rosinohu lowo diro heeꞌrinohu ammanamino manniwiinni, haaqetenni, woy huluullammannikkite hundi borro nabbawe ikkara dandaanno. Insa Maganu daafira rosinore dihawino, hatteentenni Maganu eino qaalenna isi fajjo seekke hedino. Kuri ammanamino labballinna meenti hexxonsa woꞌmitannota horo huluullaminokkihura, Maganoho ammaname heeꞌrate yee buutote qarra baala dandee saꞌꞌate murciꞌrino.

7. Ayyaanaamittenke kaajjishiꞌneemmo gede Yihowa qixxeessinonke qixxaawo hiitteeti? Tenne qixxaawonni horo afiꞌrate maa assa hasiissannonke?

⁷ Yihowa ammananke kaajjishiꞌne heeꞌneemmo gede Qaalesi Qullaawa Maxaafa uyinonke. ‘Baꞌraaꞌra’ woy hagiirre afiꞌratenna ‘assiꞌneemmori qinaannonke’ gede dandaaminke deerrinni Maganu Qaale barru baala nabbawa hasiissannonke. (Far. 1:1-3; Soqqamaasinete Looso 17:11 nabbawi.) Kiristinnu yannara albaanni heedhinote Yihowa soqqamaano gede, ninkeno Maganu eino qaale ganyine hiincanna biddishshasi harunsa hasiissannonke. Qoleno, Yihowa “ammanaminohunna wodanaamu borojjichi” widoonni falakkinota ayyaanaamittete sagale aanni noonke. (Mat. 24:45, NW) Konni daafira, Yihowa qixxeessinonkete ayyaanaamittete qixxaawonni ronseemmo rosi aana illachinsheemmoha ikkiro, Maganu Mangiste ‘hawaqiꞌrinohu’ woy hexxo assiꞌrinohu hundi manni faale haꞌneemmo.

8. Huuccatto ammananke kaajjishiꞌneemmo gede kaaꞌlitannonkehu hiittoonniiti?

⁸ Kiristinnu yannara albaanni heeꞌrino manni ammanansa kaajjishiꞌre heeꞌranno gede kaaꞌlinonsahu wolu coyi huuccattote. Insa Maganu huuccattonsara dawaro qolinota afansa ammanansa kaajjado ikkitanno gede kaaꞌlitinonsa. (Neh. 1:4, 11; Far. 34:4, 15, 17; Dan. 9:19-21) Ninkeno, Yihowa huuccattonke macciishshannotanna qarra hagiirrunni cincine saꞌneemmo gede kaaꞌlannonketa anfoommohura, yaachishinonkere baala isira kuꞌla dandiineemmo. Yihowa huuccattonkera dawaro qolanno wote ammananke albinni roore kaajjitanno. (1 Yohaannisi 5:14, 15 nabbawi.) Ammana ayyaanu gumi akatta giddo mitte ikkitino daafira, Maganu ayyaana afiꞌrate ‘huucciꞌra’ hasiissannonke; Yesuusino tenne assineemmo gede kulinonke.—Luq. 11:9, 13.

9. Uminkera huuccatto assiꞌnanni heeꞌnenni, ayeoorano huucca hasiissannonke?

⁹ Ikkollana, huuccatto assiꞌneemmo yannara uminkera calla huucciꞌra dihasiissannonke. Yihowa ‘hasaambenna coyiꞌne guda dandiinannikkiha’ “maalaꞌlinanni coye” assinohura iso galatanna guwisiꞌra hasiissannonke! (Far. 40:5) Qoleno, huuccatto assiꞌneemmo yannara usurantinore ‘ledonsa usurammoommohu gede’ assine hende insara huucca hasiissannonke. Hattono alame woꞌmate noo roduuwinkera hakko iso ‘sooreeyyete’ yaano mereeronke albisa ikkite noorira huucca hasiissannonke. Yihowa huuccattonkera dawaro qolanno gara laꞌneemmo wote ammananke kaajjitanno!—Ibi. 13:3, 7.

YIHOWARA AMMANANTE HEEDHINO

10. Maganoho ammaname heeꞌrino manni lawishsha kuli. Insa Maganoho ammaname heeꞌranno gede kaaꞌlinonsari maati?

¹⁰ Ibiraawoota fooliishsho 11 aana soqqamaasinchu Phaawuloosi suꞌmansa kulloonnikkiti batinye Maganu soqqamaano cincite saꞌino qarra qummi assino. Lawishshaho, Phaawuloosi qaaqquullensa shiiꞌrinoha ammanamino meento qummi assino; insa qaaqquulli reyotenni kaino. Isi aanche “roore kao afiꞌrate yite, fafisidhe heeꞌra gibbe gawajjante” reyitinore qummi assino. (Ibi. 11:35) Phaawuloosi tenne coyiꞌrinohu ayeoo hede ikkinoro bande afa hoongummorono, mito manna lawishshaho Naabutenna Zakkaariyaasi Maganoho hajajantinohuranna isi fajjo assitinohura kinnatenni ganne shinoonninsa. (1 Mot. 21:3, 15; 2 Dud. 24:20, 21) Daanieelinna miillasi hasidhoommero Maganoho ammanama agurte “fafisidhe” heeꞌra dandiitanno. Kayinni insara Maganu wolqara noonsa ammana lawishshu yaattonni ‘doobbiyu afoo cuffannonna’ ‘giirate wolqa xoyissitanno’ gede assitinonsa.—Ibi. 11:33, 34; Dan. 3:16-18, 20, 28; 6:13, 16, 21-23.

11. Mite masaalaanora ammanansanni kainohunni mayi qarri tuncu yiinonsa?

¹¹ Masaalaano lawishshaho, Mikayanna Ermiyaasino ammanansanni kainohunni ‘qacifantoonnisa’; hattono “usuru mine tungoonninsa.” Wole masaalaanono “halallitte gobbaranna gaarrate raataabbino; goddatenna ballate giddo heedhino”; insa giddo mittu Eeliyaasiiti. Insa qarra cincite saꞌinohu Maganu uyinonsa hexxo ‘hawaqidhinohuraati’ woy tini hexxo woꞌmitannota huluullantinokkihuraati.—Ibi. 11:1, 36-38; 1 Mot. 18:13; 22:24-27; Erm. 20:1, 2; 28:10, 11; 32:2.

12. Baalunku manninni roore qarru yannara cincate dancha lawishsha ikkannonkehu ayeti? Isi qarra cince saꞌꞌanno gede mayi kaaꞌlinosi?

¹² Phaawuloosi kaajjado ammana noonsa labballonna meento kulihu gedensaanni, baalunku manninni roore ammanate kaajja lawishsha ikkannonkeha Mootichanke Yesuusi Kiristoosa qummi assino. Qullaawu Maxaafi isi daafira kulanni togo yaanno: “Isi albasiinni noo hagiirri daafira yee, shollinye waajjikkinni masiqalu [“qarru haqqi,” NW] aana ree, ayirradu Maganu barcimira qiniiteenni ofollino.” (Ibi. 12:2 ) Ee, buutote qarri tuncu yiinkerono, ammanate lawishsha ikkannoha Yesuusa ‘qaaga’ hasiissannonke. (Ibiraawoota 12:3 nabbawi.) Yesuusi gede, umi xibbi diro heeꞌrino Kiristaanano, Maganoho ammanaminohura shinoonninsa; insa giddo mittu Antiphaasiiti. (Aju. 2:13) Insa reyotenni kae iimira haꞌrino; tini kao kaajjado ammana noonsari Kiristinnu yannara albaanni heedhinori afidhanno kao ‘roorete.’ (Ibi. 11:35) Maganu Mangiste 1914nni gashsha hanaffuhunni shiima yanna gedensaanni, hakkuyira albaanni reyinohu buuramino Kiristaani Yesuusi ledo uulla gashshate iimira haꞌrino.—Aju. 20:4.

KAAJJADO AMMANA NOONSAHA YANNANKE MANNA

13, 14. Roduu Rudoolfi Girayishenira mayi qarri iillinosi? Isi qarra cince saꞌꞌanno gede kaaꞌlinosiri maati?

¹³ Yannankera nooti lowo miliyoone ikkitannoti Maganu soqqamaano Yihowa uyinonsa hexxo aana illachishshe, hattono qarru ammanansa shoshshoggishannokki gede assidhe Yesuusi lawishsha harunsitanni no. Hanni 1925nni Jarmanete gobbara ilaminohu Rudoolfi Girayisheni yinanni rodii lawishsha laꞌno. Isi alba minisi giddo girgiddaho sutantinota Qullaawu Maxaafi sokka amaddino misilla qaaganno. Isi togo yiino: “Hattenne misilla giddo mitte, hiyyeeyyichonna geꞌreewu wiliiꞌlicho, dagunchonna meu wiliiꞌlicho, siitonna doobbiichu salaametenni shiimu qaaqqi bobbaasanna leellishshannote. . . . Hatti misilla wodaniꞌyara qaꞌmite gattino.” (Isa. 11:6-9) Rudoolfira umo Naatsi Gestaphonna yannate gedensaanni Jarmanennihu Koministi Shitaazi gashshooti lowo diro buutote darte iillishinosiha ikkirono, Maganu uyinosi hexxora noosi ammana kaajjishiꞌre heeꞌrino.

¹⁴ Rudoolfira woluno buutote qarri tuncu yiinosi; lawishshaho amasi Ravensibiruki yinannite usuranyu heeꞌranno kaampera heedhe ussu dhibbinni reyitino; hattono annisi Yihowa Farciꞌraasincho ikkinota kaade furma ganino. Rudoolfi usuru mininni fulihu gedensaanni, woradu aliidi laꞌꞌaancho ikke soqqamino; hattono Giliyaadi Rosi Mine rosanno gede koyinsoonnisi. Hakkiinni, isi Chiili yinanni gobbara misiyoone ikke wirro woradu aliidi laꞌꞌaancho ikke soqqamanno gede sonkoonnisi. Rudoolfira wolu qarrino iillinosi. Isi Patisi yinannita isinte gede misiyoone ikkite soqqantanno rodoo adhe ilinoti danqa qaaqqo reyitino. Gedensoonni, minaamasi 43 diriti heedhe reyitino. Rudoolfi konne baala qarra cince saino; isi geedhinohanna dhibbu waadannosiha ikkirono, Woxawaajje 1, 1997nnite Agarooshshu Shaera (Amaaru Afoo), qoola 20-25 aana heeshshosi dhagge fultu yannara woꞌma yanna suwisaancho ikke soqqamanni no.^[1]

15. Yannankera darte hagiirrunni cincite keeshshitinota Maganu soqqamaano lawishsha kuli.

¹⁵ Yihowa Farciꞌraasine buutote qarri aana aanaho iillinsarono, Maganu hexxo uyinonsahura tashshi yaannonsa. Lawishshaho batinyu roduuwinke Ertiraho, Singaapooriranna Wodiidi Kooriyira usurante no; insa giddo rooru usurantinohu Yesuusi ola olammeemmokki gede uyino hajajo agadhitinohuraati. (Mat. 26:52) Konni lowo xibbe ikkanno roduuwinke giddo mitu lawishshaho, Yisaaqi, Negedenna Phaawuloosi Ertiraho 20 saꞌꞌanno diro usurante keeshshitino! Kuri roduuwi geedhino annansanna amansa towaaxxitannokkinna maate kalaqidhannokki gede hoolloonninsaha ikkirono, Maganoho ammanante keeshshitino. Jw.org yinanni webisayitenkera fultino foto aana laꞌneemmohu hisatu albinsa insa hexxo mudhitinokkita leellishanno. Usuru mine insa agartara worroonni agaraasine nafa ayirrissannonsa.

16. Kaajjado ammana agarooshshe ikkitannonkehu hiittoonniiti?

¹⁶ Xaa yannara noori Yihowa Farciꞌraasinera aleenni qummi assini roduuwi gedee darti iilla hoogansara dandaanno. Ikkollana, insara wolu ammanansa fonqolanno qarri tuncu yiinonsa. Insa giddo batinyu buximate ledo sharrantanno, hattono olu woy kalaqamu danonni daanno qarri iillinonsa. Wolootu qolte Musenna wolu ammanamino manni gede alamete giddo maccaha ikka facci assite agurtino. Insa maalaamittete coye baxanna meessira calla hedate akata qeeꞌlate sharrama hasiissinonsa. Insa tenne assitanno gede kaaꞌlinonsari maati? Yihowara noonsa baxilleetinna isi eino qaale wonshannota ammanansaati; Isi taashshote xeꞌne baala hunatenna ammanantino soqqamaanosira keeraanchimma woꞌmitinote haaro alame giddo hegere heeshsho heedhanno gede assate qaale eino.—Faarso 37:5, 7, 9, 29 nabbawi.

17. Maa assate murciꞌrootto? Aananno birxichira maa ronseemmo?

¹⁷ Konni birxichira Maganu uyino hexxo hiincanna ganyine huuccatto assiꞌra ammananke kaajjishiꞌneemmo gede kaaꞌlitannonketa ronsoommo. Qoleno tenne assanke, Maganu uyinonke hexxo ‘hawaqiꞌne’ ammananke fonqolanno qarri tuncu yaannonke yannara cincine saꞌneemmo gede kaaꞌlitannonke. Ikkollana Qullaawu Maxaafi ammana kawiinni sainore ikkitinota kulanno; aananno birxichira tenne ronseemmo.