Yaaddo Qeelle Saꞌꞌa Dandiineemmo Gara

YAADDO wodaninkera lowo duha ikkitara dandiitanno. (Law. 12:25) Yaaddo lowo geeshsha qarrisse egentinohe? Yaaddo waaddeennahe ‘Xaate coyi wolqaꞌyara aleenniiti’ yite egennootto? Hatto ikkiro, togoo coyi iillinohehu ate calla diꞌꞌikkootto. Ninke giddo batinyu maatenke miila dhiwansiisiꞌnanni heeꞌnoommoha, shiiꞌnoommoha, kalaqamu dano gawajjitinonkeha woy wolu qarri amadinonkeha ikkara dandaanno; togoo coyi wolqa baꞌneemmo gede hattono yaandeemmonna dadillineemmo gede assinonkeha ikkara dandaanno. Ikkina yaaddo qeelle saꞌꞌa dandiineemmo gede kaaꞌlannonkeri maati?a

Moote Daawiti lawishsha xiinxalline yaaddo qeelle saꞌꞌate daafira lowore ronseemmo. Daawitira heeshshosi giddo lowo qarri iillinosi; iso shinasira kaꞌnoonni woyiti nafa no. (1 Sam. 17:34, 35; 18:10, 11) Daawiti yaaddo qeele sainohu hiittoonniiti? Ninke isi lawishsha harunsa dandiineemmohu ma garinniiti?

DAAWITI YAADDO QEELE SAINOHU HIITTOONNIITI?

Daawitira qarru aana aanaho iillinosi. Hanni isi shaasira hasanni noohu Moote Saaooliwiinni xooqanni noo yannara ikkinore laꞌno. Daawitinna mannisi olu bayichinni higgu woyite, diinnansa jajjansa moortinota, minensa giirtinotanna maatensa qafadde adhite hadhinota affuti lowo geeshsha massino. Daawiti hiitto ikkiyya? Isinna mannisi, “qaale fushshiꞌra hoogga geeshsha raarte [wiꞌlitino].” Daawiti ammaꞌnanno manni iso “shaara maꞌlinota” afiti roore yaadino. (1 Sam. 30:1-6) Daawitira sasu buutote qarri aana aanaho iillinosi: Maatesi qarru giddo ubbino, mannisi shaasira hasiꞌrino daafira waajjino hattono Moote Saaooli shorra diagurinosi. Daawiti mageeshshi geeshsha yaadinoro heda dandaatto!

Daawiti hakkiinni aanche maa assiyya? Isi bayichonkonni, “Maganisi Kaaliiqinni [jawaatino].” Isi tenne assinohu hiittoonniiti? Daawitira, kaaꞌlannosi gede Yihowa huucciꞌratenna isi konni albaanni kaaꞌlinosi gara hiincate rosichi noosi. (1 Sam. 17:37; Far. 18:2, 6) Daawiti, Yihowa biddishshi hasiisannosita huwatino daafira, maa assa hasiissannosiro kulasira Yihowa huucciꞌrino. Daawiti Yihowa biddishsha afiꞌrihu gedensaanni, bayichonkonni loosoho kaino. Hakko daafira isonna mannasi Yihowa maassiꞌrinonsa hattono maatensanna jajjansa wirro qoꞌlitino. (1 Sam. 30:7-9, 18, 19) Daawiti assinoha sase coye wodanchootto? Isi kaaꞌlannosi gede Yihowa huucciꞌrino, Yihowa konni albaanni kaaꞌlinosi gara hiincino hattono Yihowa biddishsha harunse loosoho kaino. Daawiti lawishsha harunsa dandiineemmohu hiittoonniiti? Hanni sase doogo laꞌno.

YAACHISHANNO COYI IILLANNOꞌNE WOYITE DAAWITI LAWISHSHA HARUNSE

1. Huuccatto assiꞌri. Yaachishanno coyi iillannonke woyite kaaꞌlonna hayyo afiꞌrate woꞌmanka woyite Yihowa huucciꞌra dandiineemmo. Yaachishannonke coye baala huuccattotenni Yihowara hasaaphine duhanke shaashshiꞌra dandiineemmo. Woy heeꞌnoommo gari injaa hooginkero huuro fushshinummokki harancho huuccatto assiꞌra dandiineemmo. Kaaꞌlannonke gede Yihowa huucciꞌnummo kiiro, ninkeno Daawiti gede iso addaxxineemmota leellinsheemmo; isi togo yiino: “Kaaliiqi goloꞌyaati; qiishoꞌyaatinna gatisaanchoꞌyaati; Maganiꞌya maaxameemmo godaꞌyaati.” (Far. 18:2) Addinta huuccatto kaaꞌlitanno? Kaaliya yinanniti suwisaancho rodoo togo yitino: “Huuccatto assiꞌrummahu gedensaanni salaame afiꞌreemma. Huuccatto hedoꞌya Yihowate gedeeta assiꞌreemma gede kaaꞌlitannoe; hattono albinni roore iso addaxxeemma.” Addanko, huuccatto yaaddo qeelle saꞌꞌa dandiineemmo gede kaaꞌlitannonkete Yihowa qixxeessinonkete kaajja qixxaawooti.

2. Hiinci. Albi heeshshokki hedatto woyite iillinohe qarra Yihowa calla kaaꞌleennahe dandiite saootto yanna qaagatto? Yihowa ninkeno ikko alba soqqamaanosi kaaꞌlino gara hiincinummoro jawaante afiꞌneemmo hattono albinni roore iso addaxxineemmo. (Far. 18:17-19) Jooshuwa yinanni cimeessi, togo yiino: “Yihowa dawaro qolinoe huuccatto borreessiꞌre wodhoommo. Tini Yihowa bade kule huucciꞌreenna hasiisannoe coye uyinoe yanna qaageemmo gede kaaꞌlitinoe.” Ee, Yihowa alba assinonkere hiincineemmo woyite, iillinonkeha yaachishanno coye dandiine saꞌneemmo gede kaaꞌlitannonke jawaante afiꞌneemmo.

3. Loosoho kai. Mitto coye assate kaꞌnammora albaanni roore addaxxinanni biddishsha afiꞌrate Maganu Qaale xiinxalla dandiineemmo. (Far. 19:7, 11) Batinyu roduuwi, mitto qummeeshsha seekkite xiinxallansa heeshshonsa giddo loosu aana hosiissannohu hiittoonniitiro huwattanno gede kaaꞌlitinonsa. Jeeroodi yinannihu songote cimeessi togo yiino: “Seekke xiinxallaꞌya qummeeshshu hedo roore huwateemmo gedenna Yihowa kulanni nooeri maatiro wodancheemmo gede kaaꞌlitinoe. Tini nabbawanni noommore seekke ammaneemmo gedenna Yihowa biddishsha loosu aana hosiiseemmo gede assitannoe.” Qaalisi giddonni Yihowa biddishsha hasiꞌneemmohanna konne biddishsha harunsineemmoha ikkiro, yaachishannonke coye albinni roore qeelle saꞌꞌa dandiineemmo.

YIHOWA QINAANNOHE GEDE KAAꞌLANNOHE

Daawiti iillinosiha yaachishanno coye qeele saꞌꞌate Yihowa kaaꞌlo hasiissannosita afino. Isi Yihowa kaaꞌlo lowo geeshsha naadino daafira togo yiino: “Maganiꞌyanni qiisho tayise eꞌꞌeemmo. Wolqa aannoehu  . . Kaaliiqaati.” (Far. 18:29, 32) Iillannonke qarri tayinse saꞌnannikki qiisho lawe leellankera dandaanno. Ikkollana Yihowa kaaꞌlonni qiishote gedee qarra baala qeelle saꞌꞌa dandiineemmo! Ee, kaaꞌlannonke gede Yihowa huucciꞌneemmoha, assinonke coye hiincineemmohanna biddishshasi harunsine loosoho kaꞌneemmoha ikkiro, isi yaaddo qeelle saꞌꞌate kaaꞌlitannonke jawaantenna hayyo aannonketa addaxxa dandiineemmo!