1 Qarra Hooꞌlate Kaaꞌlitanno Amaale

AGO QUWA SAYISE AGA

Sai birxichira qummi assiniti Soofiya yaaddo amaddannose wote, ago quwa sayisidhe aga hanaffino. Qullaawu Maxaafi bikkunni angannita dihoolanno; ikkirono “Agaasinete ledo hossooti” yee amaalannonke. (Lawishsha 23:20) Ago quwa sayise aga fayyimma gawajjitanno; qoleno wolootu ledo noonke aante huntanno, hattono diru kiiro lowo miliyoone ikkanno manni barriweelo reyanno gede assitanno. Mannu Qullaawu Maxaafi amaale harunsannoha ikkoommero togoo qarri iillannonsakki gede hooꞌla dandaanno.

Soofiya Qullaawu Maxaafi amaale harunsitino. Ise xa togo yitino: “Quwa sae aga yaadeemmakki gede assitannoekkita buuxoomma. Filiphisiyusi Sokka 4:​6, 7 aana noo amaale harunsumma; qummeeshshu togo yaanno: ‘Baalunku coyira huuccidhinanni hasidhinoonni coye Maganoho kuꞌle ikkinnina, mittu coyiꞌranno yaaddinoonte.’ Hashsha surreꞌya giddora yaachishannoeri daanno wote Yihowa huucciꞌreemma. Hanqisinoere, xissiisinoere, hexxo mudheemma gede assinoerenna macciishshaminoere bala xawise Isira kuꞌleemma, hattono danchare hedeemma gede kaaꞌlaera huucciꞌreemma. Soodo danchare calla hedate woꞌnaaleemma. Ganye Yihowa huucciꞌraꞌya nooekkire agure nooeri aana illachisheemma gede kaaꞌlitinoe. Ago aga hoogate murciꞌroomma. Afiꞌroomma salaame muxxe ikkitino daafira, tenne salaame huꞌna dihasiꞌreemma.”

FOORA

Foorre yaaddotenna buutote qarri giddo tugganno. Qullaawu Maxaafi amaale kayinni togoo qarri giddo umbeemmokki gede kaaꞌlitannonke; Maganu Qaali foorrenniwa qole massannoriwiinni xeertiꞌneemmo gede kulannonke; lawishshaho gara ikkinokki baxille leellinsheemmokkinna teeda baꞌino misilla laꞌneemmokki gede qorowisiisannonke. Saamueeli yinanni beetti togo yiino: “Alba ani seenneho gara ikkinokki baxille leellisheemmo. Mitte beetto hakkeeshsha baxa hoogummorono, ise baxxinoeta kayi afa dandeemmo; togoo beettora gara ikkinokki baxille leellisha hagiirsiissannoe.” Saamueeli gara ikkinokki baxille leellishinokki yannarano duucha wote hatto assannohu gede assine suꞌmasi hunnannita huwatino; konninni kainohunni gara ikkinokki baxille leellishate murciꞌre kaino. Ikkollana kuni rosichi gawajjinosi. Isi togo yiino: “Kuni gawajjanno rosichooti; korkaatuno meessaneeto calla banxannire ikkinanni gede assanno.”

Saamueeli jw.org webisayitera wedellaho qixxeessinoonni birxicho nabbawino. Isi Lawishsha 20:11 nooha “Qaaqquullu danchummanna bunshe loossanno loosinni anfanni” yaanno qummeeshsha hiincino. Kuni qummeeshshi kaaꞌlinosihu hiittoonniiti? Saamueeli Seenneho gara ikkinokki baxille leellisha dancha ikkitinokkita buuxino. Isi xa togo yiino: “Gara ikkinokki baxille leellishanno wedelli, albillittete mine kalaqiꞌranno wote mereeronsa qarru kalaqamara dandaannota huwatoommo. Hattono konni kaꞌa seenne adhummoro wole beettora gara ikkinokki baxille leellishanna galteꞌya laꞌuro mayi macciishshamannosero hedoommo. Kuni rosichi gawajjannoha ikkinota buuxoommo. Gara ikkinokki baxille leellisha shota ikkitino daafira calla togo assa digawajjitanno yaa diꞌꞌikkino.” Saamueeli hedosi biddi assiꞌrino. Isi gara ikkinokki baxille leellisha agurasi foorretewiinni xeertiꞌranno gede kaaꞌlitinosi.

Antooniyora foorrenniwa qole massannori fonqolo ikkinosi; isira teeda baꞌino misilla laꞌꞌanna togoo borro nabbawa araado ikkitinosi. Antooniyora lowo geeshsha baxanno minaama noosiha ikkirono teeda baꞌino misilla laꞌꞌa diagurino. Isi 1 Pheexiroosi 5:8 lowo geeshsha kaaꞌlitinosita coyirino; qummeeshshu togo yaanno: “Jilbunni heedhe; balala gede ikkitinoonte! Diiniꞌne Daawuloosi egemmannoha hasiꞌranni ittananno doobbiichi gede qooxeessiꞌnera doyanni no.” Antooniyo togo yiino: “Teeda baꞌino misilla alamete aana woꞌmite no; qoleno tini misilla surrete giddo qaꞌmidhe keeshshitanno. Kuni qummeeshshi konne fonqolo ikkanno coyiꞌra kaima ikkinohu ayetiro afeemmo gede kaaꞌlinoe. Teeda baꞌino misillara buicho ikkinohu Daawuloosi ikkinota woꞌmanka wote qaaga hasiissinoe. Xa ‘balala gede’ ikka hoogate kaaꞌlannoehu Yihowa calla ikkinota huwatoommo; Yihowa surreꞌyanna wodaniꞌya qeeꞌleemmo gedenna galteꞌya ledo salaametenni heeꞌreemmo gede kaaꞌlinoe.” Antooniyo hasiisse noosi kaaꞌlo afiꞌrino; hakkuyi gedensaanni tenne araado agurino. Tini qolte buutote qarri giddo uwannokki gede kaaꞌlitinosi.

Ee, Qullaawu Maxaafi buutote qarra hooꞌlate kaaꞌlitanno amaale aannonke. Kayinni iillinonke qarri rumuxxinohalla ikki? Hanni Qullaawu Maxaafi togoo qarri iillannonke yannara kaaꞌlannonkehu hiittoonniitiro laꞌno.