3 Qarra Dandee Heeꞌrate Kaaꞌlitanno Amaale

DARGA ASSIꞌRINO DHIBBA

Roozi togo yitino: “Sirchunni saꞌꞌanno dhibbi nooe; kuni dhibbi yanna baala waadannoe daafira dadillaame heeshsho heeꞌreemma.” Ise mito wote Qullaawa Maxaafa nabbabbannonna wole ayyaanaamittete coye assitanno wote konni coyi aana illachisha didandiitanno; tini qolte lowo geeshsha yaachishshannose. Ikkollana Yesuusi Maatewoosi 19:26 te aana coyiꞌrinori lowo geeshsha kaaꞌlinose; qummeeshshu, “Maganu . . . baalankare dandaanno” yaanno. Roozi xiinxallinanniti wole doogo noota huwattino. Ise xissannose wote nabbawa didandiitanno; konni daafira Qullaawa Maxaafanna Qullaawu Maxaafi aana xintantino borro qoonqote qaddaꞌnoonnita macciishsha hanaffino.a Roozi, “Togoo qixxaawo hooggoommero ayyaanaamitteꞌya kaajjishiꞌra didandeemma” yitino.

Roozi alba assitannore assa hoogasenni dadillitanno woti nooha ikkirono, 2 Qorontoosi 8:12 sheshifachishshinose; qummeeshshu togo yaanno: “Aate halchiniro, nookkihu aaninni ikkikkinni afiꞌnoonnihu bikkinni aa danchate.” Tini ise dandiiture assituro Maganu hagiidhannota wodanchitanno gede kaaꞌlitinose.

XISSO

Sai birxichira kulliti Soofiya 18 diri beettose shiidhu yannara macciishshaminosere qaagge togo yitino: “Beettoꞌya shiirumma gedensaanni xisso baasa batidhinoe daafira, albillittete lubbote heeꞌre afeemmaha nafa lawa giwinoe. Hatte yannara nooere baala hoogoomma.” Ikkollana faarsaasinchu Faarso 94:19 te aana borreessinori sheshifachishinose; isi Magano togo yino: “Yaaddonna dadillu amadie yannara, sheshifachishshe, hagiirsiisoottoe.” Soofiya togo yitino: “Xissoꞌyanni beedho afiꞌreemma gede kaaꞌlannoere assammara Yihowa huucciꞌroomma.”

Soofiya umise fajjonni woloota kaaꞌla hanaffino. Ise umose chookete ledo heewisiissino; hiiqqaqqantino chookenni nafa borreessa dandiinanni. Iseno chookete gede hiqqantinoha lawiseronno, wole manna kaaꞌla dandiitannota huwattino. Soofiya togo yitino: “Qullaawa Maxaafa xiinxalliseemma manna sheshifachishate Qullaawu Maxaafi biddishshanna Qullaawa Borro amaale horoonsiꞌreemma wote Yihowa hakkaanni qole ane umoꞌya sheshifachishanni nooeta huwatoomma.” Soofiya Qullaawu Maxaafi giddo kulloonniha dadillu iillinonsa manni suꞌma borreessidhino. Soofiya “Insa baalunku ganyite huuccatto assidhannoreeti” yitino. Qoleno “Qullaawa Maxaafa nabbawa hoongummoro xissonkera shesho afiꞌra dandiineemmokkita” buuxxino.

Soofiya Qullaawa Maxaafa xiinxallase sainore agurte albillittete daafira illachishshanno gede kaaꞌlitinose. Soqqamaasinete Looso 24:15 aana kulloonni hexxono sheshifachishshinose; qummeeshshu “Maganu cubbaataammanna keeraano reyotenni kayisanno” yaanno. Soofiya Yihowa beettose reyotenni kayisannota ammantinohu mayiraati? Ise togo yitino: “Albillittete qaaqqoꞌya ledo xaadeemma. Ise ledo xaadeemma barra ‘dinyinoonni;’ hakku barri Anniꞌya [Yihowa] kalaanderera borreessame noohu gedeeti. Qaaqqoꞌya ilantino barra haweemmakkinte gede, albillitte ise ledo Gannatete mitteenni heeꞌneemmo yanna xabbe leeltannoe.”