Nabbawaano Xaꞌmitanno Xaꞌmo

Yihowa Farciꞌraasine qixxeessitino borro wole webisayitera wora fajjinannikkihu mayiraati?

Qullaawu Maxaafi aana xintantino borruwanke mannaho woxe baatikki uyineemmo daafira, mitootu webisayitenke aana fulinore uminsa webisayitera wora woy wole dagoomittete webisayite widoonni tuqisa dandiinanniha lawannonsa. Ikkollana togo assa webisayitenke aana noo Sheemaatea diigate; qoleno tini lowo qarra kalaqqino. Sheemaatu hunda kulloonni garinni “tenne webisayitera noo misilla, borro, daddalu malaate, muuziiqa, fotta, viidiyubba woy wolere haaꞌne Interneetete aana (lawishshaho aye webisayitera, fayilla guto horoonsiꞌnanni webisayitera, woy dagoomittete webisayite aana) wora difajjinanni.” Togo assa fajjinannikkihu mayiraati?

Webisayitenke aana fulannori baaluri qoosso higgetenni agarantinote. Gibbannonkeri borronke uminsa webisayitera fushshite Yihowa Farciꞌraasineno ikko wole manna sorisiisate woꞌnaaltanno. Insa webisayite qixxessidhinohu mannu huluullamanno gede assateeti. (Far. 26:4; Law. 22:5) Wolootu qolte borronke aana fulannore woy jw.org malaate egensiishshaho, shaqaxensa hiratenna elekitiroonikisete aana noo appilikeeshiinensa aana horoonsidhino. Ninkeno koppete qoossonkenna daddalu malaatenke higge affinoha assanke, mitootu webisayitenke aana fulannorenna malaatenke garimale horoonsidhannokki gede higgete doogonni gargadhineemmo gede kaaꞌlitinonke. (Law. 27:12) Ikkollana wolu manni wole agurina ammanate roduuwinke nafa elekitiroonikisete uduunnichinni horoonsiꞌnara fushshinoommore uminsa webisayitera wortara woy jw.org malaate horoonsidhe shaqaxensa egensiisidhara fajjinummoro yoote minna gibbannonkerinna wole daddalu dirijjitta webisayitenke garimale horoonsidhannokki gede hooltankera xaꞌmiꞌnummoro maahoyye yaa gibbankera dandaanno.

Borronke jw.org aaninni agurranna wole webisayitenni dirrisiꞌra gawajjitannote. Yihowa ayyaanaamittete sagale shiqishanno gede shoominohu “ammanaminohonna wodanaamo borojjicho” callaho. (Mat. 24:45, NW) Kuni “borojjichi” ayyaanaamittete sagale shiqishate higge affino webisayittanke yaano, www.jw.org, tv.jw.org nna wol.jw.org calla horoonsiꞌranno. Qoleno higge affino appilikeeshinuwanke, JW Languweji,^® JW Layibirerii^® nna JW Layibirerii Sign Language^® yinanni appilikeeshiine callate. Kuri webisayituwanna appilikeeshinuwa alamete egensiishshinninna Sheexaanu alamenni dibooraabbinote. Kuri webisayituwankenna appilikeeshinuwanke agurranna wolewa fultannoti ayyaanaamittete sagale dibattaabbinote yaa didandiinanni.—Far. 18:26; 19:8.

Qoleno kaihu baalu hedosi xawisanno webisayitera borronke wora, kaadaasinenna wolu ninke daafira totaꞌannori Yihowa dirijjite daafira mannu wodanira huluullo kalaqqanno faro fantara dandiitanno. Mitu roduuwi interneetete widoonni heewisantanno; tini qolte Yihowa suꞌmi lede xonamanno gede assitanno. Qoleno interneetete widoonni ‘gibbannonkere shaqqillunni amaalate’ woꞌnaala gara diꞌꞌikkitino. (2 Xim. 2:23-25; 1 Xim. 6:3-5) Qoleno mitootu dirijjitenke, aliidi bisinna, aliidi bisi miilla suꞌminni dagoomittete webisayitera uminsa akkaawunte faꞌnitino. Ikkollana mittuno aliidi bisi miilira umisi webisayite dinosi, woy dagoomittete webisayite horoonsiꞌrannohu mittuno aliidi bisi miili dino.

Wolootu jw.org horoonsidhanno gede jawaachisha “Dancha Duduwo” halashshate kaaꞌlitanno. (Mat. 24:14) Soqqanshote horoonsiꞌneemmota elekitiroonikisete uduunnichi aana fultanno borro yannate kiiro woyyeessinanni. Baalunku manni tennenni horo afiꞌrara hasiꞌneemmo. Konni daafira, webisayitenkera noo Sheemaati leellishanno garinni, borro, viidiyonna qoonqotenni qaddaꞌnoonniri noo linke wolootaho imeeletenni soya dandiinanni. Hasatto noonsa manni higge affino webisayitenke horoonsiꞌranno gede jawaachinsheemmoha ikkiro, ayyaanaamittete sagalera addu buicho ikkinohu “ammanaminohunna wodanaamu borojjichi” qixxeessanno sagale afidhanno gede kaaꞌlineemmo.