Qullaawu Maxaafi Xiinxallo Hagiirsiissannota Assiꞌra Dandiinanni Gara

Iyyaasu seera nabbawanni no; Reaabi mini uurre heeˈreenna Iyaarkote katami baino; Iyyaasu anga kayise huucciˈranni no

IYYAASURA lowo fonqoli iillinosi. Isi lowo qarra qeele Israeelete daga Hexxote Gobba eessa hasiissannosi. Yihowa coyi qinaannosita kule qaale einosi; hattono togo yee jawaachishinosi: ‘Waajjitooti, jawaati. Seeraꞌya agadhi. Konne Seera aye yannarano nabbawa agurtooti. Isi giddo borreessinoonniha baala wonsha dandaatto gede, hashshanna barra wodanchi. Hatto assittoro baalunku coyi qinaannohe.’—Iya. 1:7, 8.

Tenne heeꞌnoommote “qarrissanno yannara” ninkerano lowo fonqoli iillannonke. (2 Xim. 3:1) Yihowa Iyyaasura uyino amaale harunsinummoro, ninkerano Iyyaasu gede qinaannonke. Qullaawa Maxaafa ganyine nabbawanna fonqolu iillannonke woyite Qullaawu Maxaafiha xintu seera harunsa hasiissannonke.

Ikkollana danchu xiinxallate rosichi noonkekkiha woy xiinxalla gari geeshsha baxisannonkekkiha ikkara dandaanno. Ikkollana Qullaawa Maxaafa xiinxallanke lowo geeshsha hasiissannota ikkitino daafira, “Aane Noore Assate Woꞌnaali” yitanno saaxinera kulloonnita Qullaawu Maxaafi xiinxallonke roore hagiirsiissannota assiꞌrate kaaꞌlitanno hedo xiinxalla hasiissannonke.

Faarsaasinchu “Hajajokki tashshi yitannoe daafira, wonsheemmo gede kaaꞌlie” yee faarsino. (Far. 119:35) Maganu Qaale nabbabbe lowo hagiirre afiꞌra dandaatto. Qullaawa Maxaafa ganyite xiinxallittoro, batinye ayyaanaamittete jiro afiꞌratto.

Iyyaasu gede mitte gaꞌre massagattoha ikka hoogirono, aterano lowo fonqoli iillannoheti egennantinote. Konni daafira, Iyyaasu gede Maganu Qaale xiinxalli, hattono rosoottore loosunni leellishi. Hatto assittoro, aterano coyi qinaannohe, hattono assattore baala hayyotenni assa dandaatto.

AANE NOORE ASSATE WOꞌNAALI

Xiinxallattora albaanni huuccatto assiꞌri. Qullaawu Maxaafi woꞌmanka dandaanno Magani atera yee borreessiisino hedo amadino maxaafaati. Konni daafira, Qullaawa Maxaafa nabbawatto woyite nabbawattore huwata, qaaganna, heeshshokki giddo harunsa dandaatto gede kaaꞌlahera huucciꞌri.—Izi. 7:10.
Ateneeto xaꞌmi. Qullaawa Maxaafa woy Qullaawu Maxaafi aana xintantino borro nabbawatto woyite ateneeto togo yite xaꞌmi: ‘Nabbawanni noommori Yihowa daafira maa kulannoe? Tini hedo Qullaawu Maxaafi sokka ledo sumuu yitannohu hiittoonniiti? Tenne hedo horoonsiꞌre woloota kaaꞌla dandeemmohu hiittoonniiti?’
Xiinxallattore hiinci. Taxxi yiitto gedensaanni togo yite hedi: ‘Nabbawanni noommori hiittoo hedo macciishshantannoe gede assannoe? Togoo hedo maccciishshantinoehu mayiraati? Albi heeshshoꞌya, xa noommo heeshshonna albillittete heeshshoꞌya ledo mayi xaadooshshe afiꞌrino. Konne Qullaawu Maxaafiha xintu seeranna amaale heeshshoꞌya giddo harunsa dandeemmohu hiittoonniiti?’ (Iyo. 23:5; Far. 49:3) Yihowa mannasi mito coye assannota hoolannohu mayiraatironna Isira hajajama giwa mayi qarra abbitannoro, nabbabbanni noottore horoonsidhe xawisa dandaattoronna teꞌee hedi.—Mar. 32:28, 29.
Hedate dandookki horoonsiꞌri. Lawishshaho, hanni Yooseefi roduuwi iso Ismaeelete daddalaasinera hirtu woyite ikkinore hedate woꞌnaali. (Kal. 37:18-28) Tenne xagge nabbawatto woyite, mayi leellannohe? Mayi macciishshamannohe? Woy hiittoo fooli eannohe? Ateneeto insa bayicho worte insa heddannorenna macciishshaminonsare hedate woꞌnaali. Konni garinni xiinxallakki, xiinxallokkinni hagiirrenna horo afiꞌratto gede kaaꞌlitannohe.
Xiinxallate kaaꞌlitanno borro horoonsiꞌri. Tini borro xiinxallokkinni roore horo afiꞌrate kaaꞌlitannohe. Interneetete aana nootano ikko attammoonnita ate afiinni qixxaabbino borro seekkite horoonsiꞌri. Kuri borro horoonsiꞌnanni gara afate wole manna xaꞌma dandaatto. Lawishshaho, Agarooshshu Shae Borro Indekse woy Yihowa Farciꞌraasine Borro Xiinxallate Kaaꞌlitanno Biroshere addi addi hajo lainohunni fultino borronna batinye qummeeshshuwa xawinsoonni borro afiꞌrate kaaꞌlitannohe. Mitte ikkito woꞌmitino bayicho, yanna, hattono alba horoonsiꞌnanni keenaasinenna wolere afate Maganu Qaale Xiinxalli yitanno buukileete horoonsiꞌri.
Qarra qara hedo wirro lai. Togo assakki qaagatto gede kaaꞌlitannohe. Rosoottore wolootaho kulakkino kaaꞌlitannohe. Soqqanshonniwa horoonsiꞌratto hedo afiꞌroottoha ikkara dandaanno. Kuri coyibba assakki, qara qara hedo wodanikkira qaꞌmitanno gede kaaꞌlitannohe; hattono xiinxalloottore horoonsidhe woloota kaaꞌlatto gede assitannohe.