Qaaggooshshu Ayyaanira Manna Koyisate Badheessa 17⁠nni Zamacha Jammarreemmo

1. Badheessa 17⁠nni mayi zamacha jammarreemmo?

¹ Diru dirunku ayirrinsannihu Qaaggooshshu ayyaani Yesuusi reyo duduwate lowonta kaaꞌlanno. (1 Qor. 11:26) Konni daafira, wolu mannino ninke ledo konni ayyaanira gamba yaaranna Yihowa baxillunni qixxeessinote wodote kakkalore macciishshara hasiꞌneemmo. (Yoh. 3:16) Tayixehura Qaaggooshshu ayyaanira manna koyisate zamacha jammarreemmohu Badheessa 17⁠nni Qidaamete barraati. Hakko zamachi taaera dandiitto deerrinni soqqamate qixxaawootto?

2. Koyishshu woraqata elate mayyaa dandiineemmo?

² Mayine Koyinseemmo? Manna coyishiinsheemmo wote haranchore calla coyiꞌra woyyate. Togo yaa dandiineemmo: “Keere galtini? Muli barra Badheessa 27⁠nni mitto baxxino ayyaana ayirrinseemmo. Kiꞌneno hakko ayyaanira dagginara koyishshu woraqata haaꞌne dangoommo. Hakko barra Maganu Qaalinni Yesuusi reyo maa assitinoronna isi xa maa assanni nooro kullanni. Ayyaana ayirrinsanni basenna yanna koye borreessinoonni.” Qidaamenna Sambata koyishshu woraqata tuqinseemmo wote, hasiisiha ikkiro metseettano ela dandiineemmo.

3. Dandiinummo deerrinni lowo manna koyisate ma assineemmo?

³ Lowo Manna Koyisate Jawaati: Hasattonke dandiinummo deerrinni lowo manna koyisateeti. Konni daafira Qullaawa Maxaafa xiinxallisattore, konni albaanni hasaawisoottore, fiixakki, ledokki loossannore, ledokki tamaartannore, ollaakkinna wole egennootto manna koyisi. Songote cimeeyye killile loose guda dandiinanni gara kultannohe. Diru dirunku Qaaggooshshu ayyaanira manna koyisate fulleemmo zamachi mulla daafuro diꞌꞌikkino. Niro mitte mancho ayyaana ayirrinseemmowa daggeenna, mittu soqqamaanchi koyisinose manni ledo xaadisasera hasiꞌrannota kulise. Ise kayinni hakko noo manni giddo mittono egentinokkitanna koyishshu woraqata beꞌro gede mittu minunni mine soqqamanni uyinoseta kultusi.

4. Zamachu taaera diinaggaambe soqqammeemmo gede assannonkeri maati?

⁴ Qaaggooshshu ayyaana daanno manni giddo mittu ati koyisseenna daannoha ikkara dandaanno. Koyisootto manchi dayirono daa hoogirono, diinaggaabbe soqqamakki naqaashe ikkitanno. Tuqisatto woraqati Yesuusi xaa yannara ayirrado Nugusa ikkinota xawisanno. Diinaggaabbe soqqamakki laꞌannorira baalaho, yaano killilete giddo noo mannira, ammanate roduuwikkiranna duuchunkunni roore Yihowara wodote kakkalo lowonta kaffi assite laꞌꞌattota leellishshanno.—Qol. 3:15.