Kaphunni Xeertiꞌra Hasiissannonkehu Mayiraati?
1 Kaphoho yaa, “1. roorenka manna dogate hasiꞌne dhara ikkino coye coyiꞌrate woyi assate . . . 2. nookkire ammannanni gede assanno coyi woyi nookkire ammananni gede assate hende coyiꞌnoonni woyi assinoonni coyi baalunku kaphoho.” Kaphanno manchi mitto coye halaale ikkinokkita afanni heeꞌrenni mannu ammanara hasiꞌranno. Kuni manchi kapho coyiꞌre woyi gama wido adda ikkinore coyiꞌre, noo coye afa gabbaꞌannonsa manna doganno.
2 Mannu Kaphannohu Mayiraati? Mannu kaphannohu batinyu korkaatinniiti. Mitu manni heewo woꞌmitinote tenne alame giddo woloota roorate kapha hasiissannoe yee hedanno. Mitu qole soꞌronsa kaphunni diwe saꞌꞌate woꞌnaalanno. Wolu manni qole, loosinokkire loosino yine hendanni gede assate nookkire rippoorte assanno. Qoleno mannu suꞌma hunate, saala gatate, konni albaanni coyiꞌrino kapho maaxate, woyi woxe wire adhate yee kaphanno manni no.
3 Mito wote kaphate rosi nookki mannino waajjatenni kainohunni, lawishshaho xawo fule reqecci yaa waajje, qixaate waajje woyi woleno togoore waajje kaphara dandaanno. Tini guuntete xeꞌne abbitino laanfeeti. Tenne laanfe qeelle halaale coyiꞌrate qodhine kaꞌneemmo gede kaaꞌlannonkeri maati?
4 Kaphunni Xeertiꞌra Hasiissannonkehu Mayiraati? Halaalu, bayiru Kalaqaanchi assaawa dandaanno kalaqami baalunkura fushshino seeraati. Qaalisi, yaano Qullaawu Maxaafi Ibiraawuyaani 6:18 aana, “Maganu kapha didandaanno” yaanno. Uullate aana Magano wokkale heeꞌrinohu Maganu Beetti Yesuusi Kiristoosino konne seera ayirrise heeꞌrino. Yesuusi shitasira hasidhannore Yihudunnire ammaꞌnote maroota togo yiino: “Kiꞌne Maganuwiinni macciishshoommo halaale kuloommoꞌneha ane shitinaera hasidhinoonni. . . . Ani iso diegennoommo yuummoro, kiꞌne gede kaphaancho ikkeemmo.” (Yoh. 8:40, 55) “Isi mitto cubbono diloosino, qoleno afiisira dogate qaali dino”; konni garinni ninkera dancha lawishsha ikkinonke.–1 Phe. 2:21, 22.
5 Lawishsha 6:16-19 xawinse kulloonninte gede, suꞌmisi Yihowa ikkinohu Kalaqaanchinke kapho effire giwanno. Kuni halaalu Magani iso hagiirsiisate konne seera ayirrinse heeꞌnammora hasiꞌranno. Ayyaanunni borreessamino Qaalisi togo yee hajajannonke: “Kuꞌu kuꞌuyira kapho coyidhinoonte. Akkala mannimma loosise ledo fushshitine hunne.” (Qolasiyaasi 3:9) Maganu kapho coyiꞌrate rosonsa agurate maahoyye yaannokki manna dihasiꞌranno; togoo manni heeshsho diafiꞌranno. Faarso 5:6 isinni xawisse, Maganu “kapho coyidhannore gudanno” yitanno. Qoleno Ajuuja 21:8, “kaphaano baalante” qeechi “layinki reyo” ikkitinota kultanno; tini hegere reyooti. Konni daafira kapho Maganu giwanno garinni giwanke halaale coyiꞌrate baqete korkaata ikkitannonke.
(Sadaasa 15, 1992 Agarooshshu Shae, qoola 22 nna 23 aaninni haaꞌnoonni)