Xaa Yannara Yihowa Fajjo Assitanni Noori Ayeooti?
Yitanno Biroshere Horoonsiꞌnanni Gara Qullaawa Maxaafa Xiinxallitannore Yihowa Dirijjite Affanno Gede Kaaꞌlate Qixxeessinoonnita Haaro Biroshere
1. Yihowa Fajjo yinanni biroshere qixxeessinoonnihu hiikkonne sase coye hendeeti?
1 Xaa Yannara Yihowa Fajjo Assitanni Noori Ayeooti yinannita haaro biroshere horoonsiꞌra jammartinoonni? Tenne biroshere qixxeessinoonnihu, (1) Qullaawa Maxaafa xiinxallitannori Yihowa Farciꞌraasine hiittoo mannaatiro affanno gede kaaꞌlateeti, (2) loonseemmo looso affanno gede assateetinna, (3) dirijjitenke loossanno gara affanno gede kaaꞌlateeti. Yihowa Fajjo yinanni biroshere mittu mittunku qoolira ontunni kayise tonnu daqiiqi geeshsha hasaambe guda dandiinanni roso amaddino.
2. Yihowa Fajjo yinanni biroshere qixxeessinoonni garanna giddose noore xawisi.
2 Qixxeessinoonni Gara: Tini biroshere sase gafa afidhino, aleenni kulloonninte gede mittu mittunku gafira addi addire Yihowa dirijjitere xawinsoonni. Lemiina settunku rosi birxicho xaꞌmote garinni worroonni; qoleno duꞌminse borreessinoonniri cinaano birxichuwa hatte xaꞌmora dawarote. Hattono 50 saꞌanno gobbanni haaꞌnoonni fotta loosinke alamete deerrinni loosamannoha ikkinota leellishshanno. Hakkiinni saeno haammatu rosira Qullaawa Maxaafa xiinxallitannore jawaachishate kaaꞌlitannoti “Egenno Lexxi” yitanno saaxine no.
3. Yihowa Fajjo yinanni biroshere horoonsiꞌra dandiineemmohu hiittoonniiti?
3 Horoonsiꞌnanni Gara: Xaꞌmote gede assine worroonni birxicho leellishshe hasaawa jammari. Hakkiinnino, roso mitteenni nabbabbinanni wote, duꞌminse borreessinoonnita cinaano birxichuwa seekkite xawisi. Jeefissinanni wote qoolaho hundaho borreessinoonnita killasu xaꞌmuwa hasaabbe. Mitto roso gudissine nabbabbine kaꞌine hasaawa woy mitte mittenta gufo nabbabbinanni hasaawa dandiitinanni. Hakko noo xiqisubba giddo hiittee nabbawa woyyitannoro doorre. Fottanna “Egenno Lexxi” yinanni saaxinera noore hasaawa deꞌinoonte. Roore wote, mitto mittonka roso aante aantetenni hasaawa woyyitanno. Ikkollana, xiinxallissinanni manni roore afate quqquxamanno roso fantine hasaawa dandiitinanni. Lawishshaho jajjabbu gambooshshi shiqe nooha ikkiro, roso 11 hasaawa dandiitinanni.
4. Konne haaro uduunnicho afiꞌranke hagiirsiissannonkehu mayiraati?
4 Mitto mancho Qullaawa Maxaafa xiinxallinseemmo wote iimi Anninke ledo egennamanno gede kaaꞌlinanni heeꞌnoommosi. Ikkollana, Yihowa dirijjitereno rosiisa hasiissannonke. (Law. 6:20) Tennera kaaꞌlannonkeha haaro uduunnicho afiꞌnoommo daafira lowo geeshsha tashshi yiinonke!