Dancha Duduwo Yitanno Biroshere Horoonsiꞌne Rosiisa
1. Dancha Duduwo yitanno biroshere qixxeessinoonnihu hiittoonniiti?
1 Maaju aganite Maganu Mangiste Soqqanshonkera hasaambummonte gede, rosiisate horoonsiꞌneemmo uduunnichi giddo mittu Maganuwiinni Dayinoha Dancha Duduwo! yitanno biroshereeti. Tenne biroshere xiinxallitannori Qullaawa Maxaafa fante nabbabbanno gede, qummi assinoonni qummeeshshi yaannore hakko giddo diborreessinoonni. Batinye xiinxallisate horoonsiꞌneemmo borronke qixxeessinoonnihu nabbawanno manni uminsanni rosa dandaanno garinniiti, tenne biroshere kayinni xiinxallisannohu hasiisanno. Konni daafira, qaete anni dancha duduwo Qullaawu Maxaafi giddonni rosa mageeshsha hagiirsiissannoro afanno gede, tenne biroshere elleemmo wote xiinxallinseemmo gara leellishate woꞌnaala hasiissannonke.—Mat. 13:44.
2. Manna umo coyishiinsheemmo wote Dancha Duduwo yitanno biroshere horoonsiꞌra dandiineemmohu hiittoonniiti?
2 Manna Umo Coyishiinsheemmo Wote: Togo yaa dandaatto: “Tenne alame ikkito manna yaachishshanno daafira mannu ledo isere hasaambanni heeꞌnoommo. Tini alame woyyaabbannoha lawannohe? [Dawaro qola geeshsha agari.] Qullaawu Maxaafi albillittete yannare kulannoha dancha duduwo amadino. Qullaawu Maxaafi dawaro qolanno xaꞌmuwa giddo gama kuriiti.” Qaete annira biroshere uyite, badhiidi qooli aana noo xaꞌmuwa giddonni afa hasiꞌrannota doodhanno gede koyisi. Hakkiinnino hakko rosita umi gufo horoonsidhe xiinxallinseemmo gara leellishi. Woy ati doorootto rosi giddonni qaete anni afate quqquxamanno xaꞌmo xaꞌmi, hakkiinnino tini biroshere tenne xaꞌmora Qullaawu Maxaafi qolanno dawaro afate kaaꞌlitannosihu hiittoonniitiro leellishi. Hakko rosi ledo xaado afidhino viidiyo jw.org, aana nooha ikkiro mite halashshaano viidiyo fante leellishanno.
3. Dancha duduwo yitanno biroshere horoonsiꞌne xiinxallinsanni gara xawisi.
3 Qullaawa Maxaafa Xiinxallinsanni Gara: (1) Qaete anni qara naxiwe aana illachishanno gede kaaꞌlitannota duꞌminse borreessinoonni xaꞌmuwa nabbawi. (2) Hakkiinnino aante noo gufo nabbawi. (3) Haawiissine borreessinoonni qummeeshshuwa nabbawi, hakkiinnino qaete anna kuri qummeeshshuwa duꞌminse borreessinoonni xaꞌmora dawaro qoltannohu hiittoonniitiro afate kaaꞌlitannosi xaꞌmo hayyotenni xaꞌmi. (4) Xaꞌmote woroonni wole gufono nooha ikkiro, aleenni 2kinna 3kki kiiro aana kullire ledde assi. Tenne xaꞌmo ledo xaado afidhino viidiyo nooha ikkironna fante leellishoottokkiha ikkiro hasaabbinanni wote fante leellishi. (5) Jeefote, qaete annira rosinori leellinosironna teꞌee afate duꞌminse borreessinoonni xaꞌmora dawaro qolanno gede xaꞌmi.
4. Konne lowo geeshsha kaaꞌlanno uduunnicho dancha gede horoonsiꞌra dandiineemmo gede kaaꞌlannonkeri maati?
4 Konne lowo geeshsha kaaꞌlanno uduunnicho horoonsiꞌratto gara seekkite rosi. Horoonsiꞌrate injiitanno yanna baala horoonsiꞌri. Xiinxallisattora albaanni rosaanchikki daafira hedanna rosu giddo qummi assinoonni qummeeshshuwa horoonsidhe roso huwatanno garinni hasaawisatto gara hedi. (Law. 15:28; Looso. 17:2, 3) Tenne biroshere horoonsiꞌnanni gara roore affanni haꞌratto wote, mannaho halaale rosiisate horoonsiꞌratto uduunnichi giddo lowo geeshsha baxatto uduunnicho ikkitannoheti dihuluullissannote!