Macciishshitine Rosse

1. Awuraajju gambooshshiwa macciishshine rosate wolu wotinni roore sharrama hasiissannonkehu mayiraati?

¹ Muli yanna giddo 2013⁠nnihu awuraajju gambooshshi jammaranno. Alame woꞌmate noo roduuwanke hende qixxeessinanni heeꞌnoonnihu konni gambooshshi qixxaawo haxo haaꞌnoonni. Sasenka barra woꞌma konne gambooshshe haꞌrate qixxaabbinoonni? Jajjabbu gambooshshiwa hedo bebbeehantanno gede assannori lowori heeꞌrara dandaanno daafira hixamanyine macciishshate wolu wotinni roore sharrama hasiissannonke. Gambooshshu pirogiraame yannara songote gambooshshinni roore seeda yanna ofollineemmo daafira seekke macciishsha qallaale diꞌꞌikkitino. Qoleno haꞌne marreemmo doogonna woluri daafursankera dandaanno. Pirogiraame hixamanyine macciishshineemmonna ronseemmo gede kaaꞌlannonkeri maati?—Marro 31:12.

2. Awuraajju gambooshshira wodananke qixxeessiꞌra dandiineemmohu hiittoonniiti?

² Gambooshshu Barri Daara Albaanni: www.pr2711.com yinannite higge affino webisayitenke aana gambooshshu pirogiraame, yaano baalante nigiggire birxichuwanna nigiggirennita mitte woy lame qara xiqise worroonni. Qooxeessinkera interneete nooha ikkiro tenne pirogiraame balanxe laꞌꞌanke wodananke gambooshsheho qixxeessiꞌrate kaaꞌlitannonke. (Izi. 7:10) Maateꞌne awuraajju gambooshshe quqquxante agadhitanno gede assate Maatete Magansiꞌra yannara yanna gaaꞌmitine hasaabbe.

3. Seekkine macciishshate kaaꞌlannonkeri maati?

³ Gambooshshu Yannara: Dandaamannoha ikkiro shumate minira pirogiraame jammartara albaanni haꞌra danchate. Pirogiraamete yannara mitu dowwolanni woy sokka borreessanni rabbashannoꞌnekki gedenna kiꞌneno hatto assa yorsiisannoꞌnekki gede mobayileꞌne cuffe. Miteekkite cuffinannikki gede assitannoꞌne hajo heedhannoha ikkiro kayinni roduuwa rabbashshannokki gede assitine wodha dandiitinanni. Gambooshshu yannara wole elekitirooniksete uduunnicho horoonsidhinanniha ikkiro, roduuwa rabbashannokki garinni horoonsidhe. Pirogiraamete yannara ita gara diꞌꞌikkitino. (Mek. 3:1) Madirakete coyiꞌrannoha ille wortine harunse. Xiqise nabbambanni wote Qullaawa Maxaafaꞌne faꞌnitine harunse. Shiqanno rosita qara qara assaawe borreessidhe.

4. Annuwunna amuwu oosonsa macciishshite rossanno gede kaaꞌla dandiitannohu hiittoonniiti?

⁴ Gambooshshunniwa qaaqquullinkeno macciishsharanna rosara hasiꞌneemmo. Lawishsha 29:15, “Yeꞌe yinoonnikki beetti amasi saalsiisanno” yitanno. Konni daafira, annuwunna amuwu oosonsa mule wodhe ofolliro danchaho; togo assansa qaaqquullinsa hasaawa, godoꞌla woy kae haꞌrama agure pirogiraame seekke macciishshanni nootanna teꞌee afate kaaꞌlitannonsa. Oosoꞌne danquulle ikkitinohura kullannire baalankare wodancha hoogguro nafa, baqqi yitinore ikkitanno gedenna seerunni ofolla rossanno gede qajeelsa dandiitinanni.

5. Ronsoommore haaro ikkine laꞌꞌa maaho kaaꞌlitannonke? Togo assa dandiineemmohuna hiittoonniiti?

⁵ Mittu Mittunku Barri Pirogiraame Gooffuhu Gedensaanni: Gobba hashshiishidhinoonte. Dancha gede fooliishshiꞌrate yannante goxxe. Habbinannikki gede barra rossinoonnire haaro ikkitine laꞌe. Konni daafira mitto mittonka hashsha miniꞌne manni ledo rossinoonnire shiima daqiiqa hasaawa xaqqantannoꞌne. Roduuwu ledo hoteele woy shaete minira hadhinanniha ikkiro, borreessidhinoonni qaagiishsha anga adhitine hadhine roore hagiirsiissinoꞌneta mitte lame assaawe kultininsaro danchaho. Gambooshshu goofeenna qae higginihu gedensaanni rossinoonnire maatete deerrinni hiittoonni loosu aana hosiisa dandiitinanniro Maatete Magansiꞌra yannara boode yanna gaaꞌmitine hasaabbe. Qoleno haarote fultino borro heedhuro saammintete kiiro boode gafa xiinxallate yanna gaaꞌma dandiitinanni.

6. Awuraajju gambooshshe haꞌra calla baqeteni? Xawisi.

⁶ Mittu jilira mannu sagale ita hoogiro woy itino sagale daahante mannimmate kaaꞌla hoogguro jilloonni jili waaga diafiꞌrino. Awuraajju gambooshshira shiqannonkeha ayyaanaamo jilano lishshi assine ita hoongummoro hatto ikkella gatanno. Shiqqannota mitte mittenta kifile seekkine macciishshineemmohanna loosu aana hosiinseemmoha ikkiro lowo xiqime afiꞌra dandiineemmo.