“Manna Gamba Assi”
1. Awuraajjunna daga dagiyyote gambooshshi, Isiraeele Gibitsetenni fultanni heedhenni gamba yitino gambooshshi ledo mitto ikkannohu mayinniiti?
1 Isiraeele Gibitsetenni fultanni heedheenna, Yihowa Muse ‘manna Siina ilaalira gamba assanno’ gede hajajino; tenne assinohu qaalesi macciishshite Iso waajjitanno gedeetinna oosonsara doogosi rosiissanno gedeeti. (Marro 4:10-13) Hakku gambooshshi ammana jawaachishannohanna hambannikkiha ikkinoti dihuluullissannote. Albankeenni noo agannara, Yihowa daga isi rosiisannonsa gede awuraajjunna daga dagiyyote gambooshshira gamba yitanno. Konni gambooshshi yannara roore xiqime afiꞌrate maa assa hasiissannonke?
2. Awuraajju gambooshshira ‘qixxaawate’ maa assa dandiineemmo?
2 “Qixxaabbe”: Yihowa Isiraeele Siina Ilaalira dhaggete gambooshshira ‘qixxaabbanno’ gede hajajino. (Wol. 19:10, 11) Hattonni, awuraajju gambooshshira kifile heedhannonsari calla ikkikkinni gamba yitannori baalunku balaxxe qixxaawa hasiissannonsa. Lawishshaho, mitu roduuwi loossanno basenni fajjo xaꞌmiꞌra hasiissannonsa. Ate garino Nehimiyara tuncu yiinori gedeeha ikkara dandaanno. Isi Yerusaalame mare huxxa gatamara kaaꞌlate yee, Nugusu Arxekisisira woyine xorshate loososi agure haꞌra hasiꞌrino; tenne assate kainohu kayinni nugusu fajjasirano fajja hoogasirano dandaannota afanni heeꞌrenniiti. Nehimiya huuccatto assiꞌre kae, waajjikki awu afiinni fajjo xaꞌmiꞌrino. Nugusu haꞌrara fajjisi; hakkiino sae, huxxaho hasiisannore kaaꞌlinosi! (Neh. 2:1-9) Loosiisaanchoꞌne fajjo xaꞌmiꞌrano agurranna, wocete kaffaꞌlitinannirenna galtinanni base qixxeessidhinoonni? Kaaꞌlo hasiissannonsare cimeeyye kaaꞌlitara dandiitanno. Baalante gambooshshu pirogiraamera yannante iillate iqqide fushshidhe; hattono macciishshitinanni coye “albinni roore hixamanyitine” harunsate qixxaabbe.—Ibi. 2:1.
3. Gambooshsheho wodananke qixxeessiꞌrate kaaꞌlannonkeri maati?
3 Shiqqanno pirogiraame macciishshine roso afiꞌra dandiineemmo gede wodananke qixxeessiꞌrano lowo geeshsha hasiissannote. (Izi. 7:10) Nigiggirete birxichuwanna mitte woy lame qara xiqise amaddinoti awuraajju gambooshshi pirogiraame jw.org aana yannante fultanno. Tini qolte, gambooshshu jammarara albaanni noo saamintuwara Maatete Magansiꞌranke yannara gambooshshu daafira hasaawate kaaꞌlitannonke. Mite halashshaano pirogiraame attante adhite gambooshshu yannara harancho qaagiishsha borreessiꞌrate horoonsidhanno.
4. Annuwunna amuwu awuraajju gambooshshe horoonsidhe oosonsa rosiisiꞌra dandiitannohu hiittoonniiti?
4 ‘Oosoꞌne Rosiisse’: Siina Ilaali gambooshshe qixxeessinoonni alaami giddo mittu, Isiraeele ‘oosonsa rosiissanno gedeeti.’ (Marro 4:10) Awuraajju gambooshshinkeno annuwunna amuwu oosonsa rosiissanno gede kaajja faro fanannonsa. Annuwunna amuwu gambooshshu yannara oosonsa ledonsa ofolte macciishshitanno gede assa hasiissannonsa. Maate mittu mittunku barri jeeforanna gambooshshu goofi gedensaanni maatete magansiꞌransa yannara, gambooshshunnire kayisse hasaawa dandiitanno.
5. Daannohu awuraajjunna daga dagiyyote gambooshshira gamba yaanke maaho kaaꞌlitannonke?
5 Siina Ilaalira qixxaawinohu dhaggete gambooshshi, Isiraeele baxxitinota Maganu daga ikkate qoossonsa kaffi assite laꞌanno gede assinonsa. (Marro 4:7, 8) Daannohu awuraajjunna daga dagiyyote gambooshshino hakko garinni kaaꞌlankera hende qixxeessinoonniho. Sase barra woꞌma, halallittenna moola Sheexaanu alamenni fulle ayyaanaame gannatenkera ayyaanaamittete fooliishsho afiꞌneemmo; hattono roduuwinke ledo dancha yanna sayinseemmo. (Isa. 35:7-9) Yihowa barri gambise dayinota hendanni, mimmito jawaachishate kaaꞌlannonkehura konni gambooshshira gamba yaa deꞌnoonke!—Ibi. 10:24, 25.