Awuraajju Gambooshshinke Halaalu Xawe Leellanno Gede Assanno

1. Hundi Isiraeele diru dirunku ayirrissanno ayyaanna, hiikkoye ayyaanaamo coye hasaawatenna hiincate faro fantannonsa?

¹ Biꞌree Isiraeele diru kiiro sase higge ayyaanna ayirrisate gamba yitanno. Ayyaanaho gamba yaa hasiissannonsari labballo ikkiturono roore wote maate gudisidhe Yerusaalame hadhe konni gambooshshinni hagiidhitanno. (Marro 16:15, 16) Togoo gambooshshi ayyaanaamo coye hasaawatenna hiincate faro fanannonsa. Hasaabbannonna hiincitanno coyi giddo mitu mitu hiikkonneeti? Mittu, Yihowa shaqqadonna baxillunni danchare aannoha ikkasiiti. (Marro 15:4, 5) Wolu qole, isi mannasi marraꞌꞌannonna agaranno yine addaxxinanni Magano ikkasiiti. (Marro 32:9, 10) Qoleno, Isiraeele Yihowa suꞌminni woshshantannore ikkitino daafira, isita xalallete doogo harunsa hasiissannonsata hiinca dandiitanno. (Marro 7:6, 11) Yannankera diru dirunku daannohu awuraajju gambooshshino hattoo horo aannonke.

2. Awuraajju gambooshshi albinni roore halaalu xawanno gede assannohu hiittoonniiti?

² Halaalu Roore Xawanno Gede Assanno: Konni gambooshshi yannara Qullaawu Maxaafi halaale albinni roore huwanteemmo gedenna loosu aana hosiinseemmo gede kaaꞌlitanno nigiggirubba, diraamu, loonse leellinshanni ikkitonna qaalu xaꞌmuwa shiqqanno. (Yoh. 17:17) Daannoha awuraajju gambooshshe qixxeessate loosu xa haxo haaramino. Yihowa dirijjite konne gambooshshe, roorenka xaa yannara alamete aana noo mannira hasiisannore seekkite assaabbe baalanka kaaꞌlate qixxeessitino. (Maat. 24:45-47) Tenne qixxaawo laꞌꞌatenna macciishshate quqquxantinoonni?

3. Gambooshshunni horo afiꞌrate ma assa hasiissannonke?

³ Konni gambooshshinni roore horo afiꞌneemmohu kayinni lamenka barra dangummorootinna seekkine macciishshinummorooti. Loosiisaanchiꞌne gambooshshu barra faqqadannoꞌne gede xaa geeshsha xaꞌmidhinoonnikkiha ikkiro xaꞌmidhe. Pirogiraame danchu garinni harunsa dandiitinanni gede hashsha hashsha dancha gede fooliishshidhe. Batinyu roduuwi nigiggire shiqishanno rodoo laꞌꞌansanna qara qara assaawe borreessiꞌransa hixamanyite macciishshate kaaꞌlitinonsa. Mobayileꞌne woyi peejereꞌne woloota rabbashshannokki gede qorophe. Gambooshshu yannara hasaawa, mobayilete sokka borreessanna ita dihasiissanno.

4. Annuwunna amuwu qaaqquullinsa gambooshshu yannara garunni macciishshanno gede maa assa dandaanno?

⁴ Sambatu diro Daasu Ayyaani yannara Isiraeelete maate “qaaqquullinsa” ledo gamba yite, higge nabbambanna “macciishshitanno hattono rossanno.” (Marro 31:12) Ninke yannarano gambooshshu yannara maate qaaqquullinsa ledo mitteenni ofolte hixamanyite macciishshitanna laꞌꞌa lowo geeshsha hagiirsiissanno! Mitto mittonka hashsha borreessidhinoonnire laꞌinironna hagiirsiisinoꞌne coye maateꞌne ledo hasaabbiniro lowo geeshsha danchaho. “Gowwimma qaaqqu wodani giddo usurantino” daafira annuwunna amuwu shiimmaadda ikko naggi yiino qaaqquullensa sagalete yannara ikko galtannowa callootansa “facci asse agura” dihasiissannonsa.—Law. 22:15; 29:15.

5. Galleemmo hoteelera dancha amanyoote leellishanke halaale gaamaarsitannohu hiittoonniiti?

⁵ Danchu Amanyootinke Halaale Gaamaarsanno: Awuraajju gambooshshe haꞌneemmo katamira dancha amanyoote leellishanke halaale gaamaarsitanno. (Tito 2:10) Hoteelete soqqamaano insawa maranno manni hoteelensa wodho ayirrisannota, amanyoote seyinoha ikkinota, hattono cincaaleessanna awu afiinni coyiꞌrannoha ikkinota huwattanno. (Qol. 4:6) Mitte hoteelete halaafitte togo yitino: “Manniꞌne danchuulle ikkino daafira hoteelenke daannota lowo geeshsha banxeemmo. Qoleno amanyoote seyinohonna danchaho; hattono duuchanka wote soqqamaanonke ayirrisanno, hoteelenke danchu garinni amadanno.”

6. Gambooshshu noo katamira uddiꞌrankenni halaale gaamaarsa dandiineemmohu hiittoonniiti?

⁶ Awuraajju gambooshshi baaje wodhanke, gambooshshenke egensiissannotanna wolewiinni dayino roduuwi ayimmanke afanno gede assitannota calla ikkitukki, laꞌꞌanno mannirano kultannori no. Marreemmo katamira noo manni baaje wodhinoommota laꞌꞌanno wote, alamete aana rosantinota gara baꞌinotanna teeda leellishshanno uddano ikkikkinni, danchanna likkanya uddano uddiꞌnoommotano wodanchanno. (1 Xim. 2:9, 10) Konni daafira, gambooshshu noo katamira keeshshineemmo wote uddiꞌrankenna seesinke gara seekke layiꞌra hasiissannonke. Gambooshshu bayichi caalshiishannori nookkihanna fooggashshannoha ikkiro nafa, uddanonke gari mishiishshannokkiha ikka hasiissannosi. Pirogiraame gooffu gedensaanni uddano soorriꞌne sagalete minira haꞌra hasiꞌnummoro, hakkawoteno ikkiro gambooshshe dangoommo wosina ikkinoommota anfe mishiishshannokki uddano uddiꞌra hasiissannonketa deꞌnoonke.

7. Gambooshshu yannara roduuwinke ledo mitteenni hagiidhate assa dandiineemmo coyi giddo mittu maati?

⁷ Isiraeele diru ayyaanna yannara wole gobbanni dagginori Yihowa magansidhannori ledo gamba yitanno wote mimmito Jawaachishshannonna hagiidhitanno; tini qolte mereeronsa noo mittimma kaajjitanno gede assitanno. (Soq. Los. 2:1, 5) Awuraajju gambooshshi yannara xaggenniti rodiimmate mittimmanke woꞌmunni woꞌma xabbe leeltanno. Tini hagiirsiissannoti ayyaanaame gannatenke laꞌꞌannoha roore manna maalaꞌlissanno. (Far. 133:1) Sagalete yannara sagale itate gambooshshu base agurre haꞌneemmokki gede boode sagale adhe daanke mulenke ofoltino roduuwi ledo egennamatenna hasaawate dancha faro fantannonke!

8. Dandiineemmoha ikkiro gambooshshu basera looso kaaꞌlanke mayi horo afidhino?

⁸ Gambooshshinke danchu garinni darajjainohanna seera afiꞌrinoha ikkinota laꞌꞌanno manni roore wote maalaꞌlanno; baalanka looso roduuwinke uminsa fajjonni loossannota afiro isinni roore maalaꞌlanno. Atina, gambooshshu basera ‘umikki fajjonni’ looso kaaꞌla dandaatto? (Faarso 110:3) Roore wote maate gudisidhe uminsa fajjonni togoo looso kaaꞌlitanno; tini qolte oosonsa owaata ikkitanno gede qajeelsate kaaꞌlitannonsa. Manna qase laꞌꞌa waajjattoha ikkittoro, gambooshshu basera looso kaaꞌlakki wolu roduuwi ledo egennamate dancha faro fantannohe. Mitte rodoo togo yitino: “Maateꞌyanna shiima jaallaꞌya agurranna hakko wolu egennoommahu dino. Gambooshshu base feya kaaꞌlaꞌya kayinni batinyu roduuwi ledo egennameemma gede assitinoe. Tini qolte lowo geeshsha hagiirsiissinoe!” Gambooshshu basera looso kaaꞌline jaalla haammachishiꞌranke lowo hagiirre abbitannonke. (2 Qor. 6:12, 13) Togoo basera looso kaaꞌlite egennoottokkiha ikkiro kaaꞌlate maa assa hasiissannohero cimeeyye xaꞌmi.

9. Mannu gambooshshe daanno gede koyinseemmohu hiittoonniiti?

⁹ Halaale Macciishshanno Gede Manna Koyisse: Niri gede tayixeno gambooshshu barri daara sase saamminte gatte heedheenna manna koyisate zamacha jammarreemmo. Songuwa dandiitu deerrinni lowo killile koyishshu woraqatinni loosse guda hasidhannoti dihuluullissannote. (“Mayine Koyisa Dandiineemmo?” yitanno saaxine lai.) Gatinoha koyishshu woraqata gambooshshu base haare daa hasiissanno. Konne woraqata gambooshshe daanno roduuwinke tuncu yaanno manna koyisate horoonsiꞌranno.

10. Manna koyisate fulleemmo zamachi beebbate daafuro ikke gatannokkita leellishshanno temokkiro kuli.

¹⁰ Manna koyisate fulleemmo zamachi beebbate daafurooti? Mitte hige mittu soqqamaanchi awuraajju gambooshshe dayino minaanniranna minaamara ofoltanno base uyinsa. Kuri minaanninna minaama, koyishshu woraqati iillinonsatanna kuni woraqati “quqquxantanno gede assinonsata” kultusi. Insa konne gambooshshe dagginohu 300 kiilomeetire aleenni ikkitanno doogo makeenunni hadheeti! Mitte rodoo qolte kayinni minunni mine soqqantanni heedhe gambooshshe daate hasatto noosi manchira koyishshu woraqata uyitu. Hakkiinnino koyishshu woraqati amadino sokkare konni manchi ledo hasaabbu. Boodu barri saihu gedensaanni tini rodoo kuni manchinna jaalisi awuraajju gambooshshiwa haarote fultino borro anga adhite noore affu!

11. Awuraajju gambooshshe haꞌra lowo geeshsha hasiissinota ikkitinohu mayiraati?

¹¹ Yihowa baxillunni qixxeessinoti diru dirunni ayirrinsanni ayyaanna Isiraeelete gosa “iso mishiishannori nookkihanna halaalunni” magansidhanno gede kaaꞌlitinonsa. (Iya. 24:14) Hatteente gede diru dirunku daannohu awuraajju gambooshshinkeno “halaalu giddonni” fullummokki heeꞌneemmo gede kaaꞌlannonke; qoleno Yihowa magansiꞌneemmote qara doogooti. (3 Yo. 3) Halaale baxxannori baalunku konne gambooshshe dagge horo afiꞌra dandiitanno gede Yihowa kaaꞌlonsa!

[Qoola 4 noota murre haaꞌnoonni assaawe]

Awuraajju gambooshshe haꞌneemmo katamira dancha amanyoote leellishanke halaale gaamaarsitanno

[Qoola 5 noota murre haaꞌnoonni assaawe]

Gambooshshu barri daara sase saamminte gatte heedheenna manna koyisate zamacha jammarreemmo

[Qoola 3-6 noo saaxine]

2012nnihu Awuraajju Gambooshshi Qaagiishsha

◼ Pirogiraame Jammartanno Yanna: Lamenka barra pirogiraame jammartannohu soodo 3:20⁠nniiti. Waalcho fannannihu kayinni soodo lame saatenniiti. Pirogiraame jammartinota kulanno muuziiqi jammaranno wote, baalunku bayicho bayichonke ofolla hasiissannonke; togo assanke pirogiraame siraatunni jammartanno gede assitanno. Qidaamete barra pirogiraame gooffannohu 10:55⁠nniiti; Sambatu barra kayinni 9:40⁠nni gooffanno.

◼ Bayicho Amada: Ofollinanni base amada dandiitinannihu miniꞌne mannira, woyi Qullaawa Maxaafa xiinxallissinanni mannira calla ikkinota huwatte.—1 Qor. 13:5.

◼ Barri Sagale: Barri fooliishsho yannara gambooshshu base agurtine hadhinannikki gede boode sagale adhitine amme. Boodu uduunnichira abbidhine ofoltinanni xarapheezzi woroonni wodha dandiitinanni. Xarmusete gedeere hiiqqamanno uduunne adhe daa difaqqandanni.

◼ Fushsho: Alamete doyicho looso kaaꞌlate Mangistete Harinkera ikko awuraajju gambooshshi yannara uminke fajjonni woxe fushshine konni gambooshshira galatu noonketa leellisha dandiineemmo. Gambooshshu basera cheeketenni fushsho fushshitannori baalunku “Yeyihowa Misikiroch” yite borreessa hasiissannonsa.

◼ Yannate Geeshshi Hikkiminna: Gambooshshu basera hedeweelcho hikkiminnu hasiisannoꞌne gede assannoꞌneri tuncu yiiꞌnero yannate geeshsha shiima hikkiminnu kaaꞌlo afiꞌrate muleꞌne noo soqqamaancho coyishiishshe.

◼ Xagicho: Akime hajajjeenna egemmitinanni heedhinoonni xagga nooro togoo xagga gambooshshu basera nookkihura adhitine daa habbinoonte.

◼ Caamma: Caammunni kainohunni diru dirunku haammatu mannira gudaatu iillino. Daraja fulate, eelallitte dirratenna alillitte fulate injaanno caamma wodha lowo geeshsha danchate.

◼ Sagalete Mine: Sagalete mine dancha akata leellinsheemmoha ikkiro Yihowa suꞌmi ayirranno gede assineemmo. Rosaminoha ikkiro hakko soqqantannorira mitore saantete gedeere aa danchate.

◼ Hoteele: Dandiitinanniha ikkiro hoteelete galle.

(1) Galtinannita agurranna wole kifile leddine amaddinoonte; mitte kifilera faqqandanni manni aleenni gashshitinoonte.

(2) Hoteelete kifile amaddine kaꞌine agurtinoonte. Agurtinanni gede assannoꞌnehu hedeweelchu coyi tuncu yiiꞌnero hoteelete halaafichira hakkawontenni kulle.—Maat. 5:37.

(3) Hoteelete giddo sagale assidhinanniha ikkiro faqqandanni kifilera calla assidhe.

(4) Hoteelete giddo loosanno manna qullaawu ayyaani guma laaltinoonnita leellishanno garinni coyishiishshensa. Insa lowo mannira soqqantanni daafurtanno daafira, shaqqillenke, cincankenna quwa saꞌneemmokkire ikkinoommota laꞌanno wote hagiidhitanno.

(5) Annuwunna amuwu qaaqquullinsa hoteelete giddo afimala gede ikkitannokki gede illaallisa hasiissannonsa.

◼ Mangistete Hara: Mangistete Hara galate horoonsiꞌra hoogginiro woyyate. Horo qarrame galannohu heeꞌriro Mangistete Hara ishinannokki gedenna caqaamurrannokki gede agara hasiissannosi. Gonxoonni maꞌna garunni erre kayisa, duꞌnaminore bayichonko feya, uwino ishini heeꞌriro bayichonko kayisanna ishine tunganni qircaate giddo tuga hasiissanno.

◼ Ballo Faana Gantine Kaaꞌlesi (S-43) Yinanni Forme: Gambooshshu yannara tunceenyunni farcidhinoonni manni hasatto noonsare ikkituro, Ballo Faana Gantine Kaaꞌlesi yinanni forme wonsha hasiissannoꞌne. Wonshitine kaꞌiniro Borrote Kifilera massitine aa woyi qaera higgini gedensaanni songoꞌne borreessaanchira aa hasiissannoꞌne.—Onkoleessu 2011⁠nnita Maganu Mangiste Soqqanshonke qoola 3 laꞌe.

◼ Gambooshshu Base Feya: Gambooshshu Base Fiitanno Gaamo yanna yannatenni fiitannoha ikkirono, ninke baalinke Yihowa mannisi xuru nookkiha ikkara lowonta hasiꞌrannota anfe tennera kaaꞌlama hasiissannonke. Konni daafira ayewoteno woraqatu woyi wolu ishini gambooshshu basera uwiro hakkawotenni hoola hasiissannonke. Ishinu uwiro ishine tugate worroonni qircaatera tuga hasiissannonke; hatto assinummoha ikkiro gambooshshu basenke pirogiraamete yannara ikko fooliishshote yannara laꞌꞌate baxxissannota ikkitanno. Qoleno ofollinoommo bayicho agurre haꞌneemmo wote ofollinoommowa uwinori nooro laꞌne kayinse hoollummoro danchaho.

◼ Meessi Fajjonni Soqqama: Gambooshshu basera looso kaaꞌlineemmoha ikkiro, awuraajju gambooshshinni afiꞌneemmo hagiirri roore lexxanno. (Soq. Los. 20:35) Togoo looso kaaꞌla hasidhannori baalunku, Uminsa Fajjonni Soqqantannori Kifilera kula hasiissannonsa. Tonaa-lee diro ikkinonsakki ooso nafa anninsanna amansa ledo woyi wolu naggi yiinohu ledo loossannoha ikkiro lowore kaaꞌla dandiitanno.

[Qoola 6 noo saaxine]

Mayine Koyisa Dandiineemmo?

Killilenke loose gudate haranchore coyiꞌnummoro danchaho. Keere haaꞌnummo gedensaanni togo yaa dandiineemmo: “Alame woꞌmate konne koyishshu woraqata mannaho tuqinsanni heeꞌnoommo. Kuni koyishshu woraqati ateho. Roore coye woraqatu umisi kulannohe.” Manna koyissinanni wote faasiiqqine coyishiishshe. Qidaamenna sambata manna koyissinanni wote hasatto noonsa mannira metseeteno ela dandiitinanni.