Mangistete Duduwo Kir. 38 Bocaasu Aganira Zamachunni Tuqinseemmo!
1. Mannu reyino mannire hedanno wote mayyee xaꞌmanno? Tenne xaꞌmuwara Bocaasu aganira dawaro qollannihu hiittoonniiti?
1 Mannu harunsanno ammaꞌno baxxutano ikkituro, reyo mannu baalunku diinaati. (1 Qor. 15:26) Batinyu manni, ‘Reyino manni isi hiikka higanno? Reyino manninni galagalle xaandanni yanna heedhakka?’ yee xaꞌmanno. Konni daafira, alame woꞌmate noo songuwa Reyino Manni Addinta Kaꞌꞌanno? yaannoha Mangistete Duduwo Kir. 38, mitto agana woꞌma zamachunni tuqissanno. Kuni baxxino zamachi Bocaasa 1nni jammaranno. Konni baxxino zamachi gedensaanni Mangistete Duduwo Kir. 38, wole tiraaktuwante gede soqqanshonkera horoonsiꞌneemmo.
2. Mangistete Duduwo Kir. 38 qixxeessinoonnihu ma garinniiti?
2 Qixxeessinoonni Gara: Mangistete Duduwo Kir. 38 qixxeessinoonnihu, afate quqquxanno birxichi, hattono “Ate dawaro hiitteeti? . . . ee kaꞌꞌanno, dikaꞌꞌanno, kaꞌꞌarano hoogarano dandaanno” yaanno doorshi iimaanni leellanno gede assine erate injaanno garinniiti. Nabbawanno manchi Mangistete Duduwo fananno wote xaꞌmote garinni qixxeessinoonni birxichira Qullaawu Maxaafi qolanno dawaro laꞌꞌanno; hattono Qullaawu Maxaafi giddo noo hexxo ammanasi kaaꞌlitannosihu hiittoonniitiro huwatanno. Qoleno Qullaawu Maxaafi yaannore ammananno gede assannosiha addi addi korkaata laꞌꞌanno. Mangistete Duduwira badhiidi qoolira, taxxi yee hedanno gede assitannosi xaꞌmo worroonni, hattono roore afate kaꞌꞌanno gede koyinsoonnisi.
3. Mangistete Duduwo Kir. 38 tuqinsannihu hiittoonniiti?
3 Tuqinseemmo Gara: Mangistete Duduwo Kir. 38 tuqinseemmohu Qaagooshshu Ayyaanihanna awuraajju gambooshshiha koyishshu woraqata tuqinseemmo garinniiti. Cimeeyye sonkoonninsate Dotteessa 1, 2013 dabdaabbe ledo sumuu yaanno garinni, songonsa killilera tenne tiraakte tuqinsanni gara kulanno biddishsha uyitanno. Shiima killile noonsa songuwa batinye killile afidhino songowa kaaꞌla dandiitanno. Mangistete Duduwo Kir. 38 tuqisate adhitinanni wote mitte higgine mitte saammintera ikkitannoꞌneta calla adhitinannita habbinoonte. Zamachu yannara minunni mine haꞌne tuqinseenna killile gooffu gedensaanni tenne tiraakte gudumaaleho farciꞌrateno horoonsiꞌra dandiineemmo. Aganu goofikkinni tiraakte balaxxe gooffuro, hakko aganira ellanni borro soqqanshote horoonsiꞌra dandiinanni. Hakko aganite umi Qidaamera Qullaawu Maxaafi xiinxallo jammarsiisantenni zamachunni tiraakte tuqisate aana illachinsheemmo. Hasiisanno wote, Qidaamenna Sambata metseettano elleemmo. Konni baxxino zamachi yannara woꞌma wolqaꞌnenni soqqamate, xaanni qixxaabbinanni heedhinoonni?