Webisayitenke Qaaqquulleꞌne Rosiisiꞌrate Horoonsidhe
1. Webisayitenkera nooha “Children” yaanno birxicho qixxeessinoonni alaami maati?
1 Jw.org yinanni webisayitenke qixxeessinoonnihu aja akkala baxissanno gede assineeti. Webisayitenke aana, “Children” yaanno gafi, qaaqquullunna annunna ama mimmitunniwanna Yihowawa roore shiqanno gede kaaꞌlannoho (Balaxxe, “Bible Teachings” yaannoha faꞌni, hakkiinnino “Children” yaannoha faꞌni). (Marro 6:6, 7) Konne gafa qaaqquulleꞌne rosiisiꞌrate horoonsiꞌra dandiitinannihu hiittoonniiti?
2. Qaaqquulliꞌnera dirinsa deerrinni rosiisate kaaꞌlannore doora dandiitinannihu hiittoonniiti?
2 Oosoꞌnera Injaannore Doorre: Addi addi qaaqquullira hasiissannori addi addireeti. (1 Qor. 13:11) Ikkina, qaaqquulleꞌne xiinxallissinannire dirinsa deerrinni doora dandiitinannihu hiittoonniiti? Kiꞌneneeto togo yitine xaꞌme: ‘Qaaqquulleꞌya baxisannori maati? Mageeshshi geeshsha wodanchitanno? Hedonsa bebbeehantukki rossannohu mageeshshi geeshshaati? Sase diro ikkinonsari woy hakkuyi woro noo qaaqquulli ledo hasaawate, “My Bible Lessons” yaanno birxichi hunda noota addi addi xagge horoonsiꞌra dandiitinanni. Wole maate “Teach Your Children” yaanno birxichi hunda noota Qullaawu Maxaafi xagge hasaawa baxxanno. Qoleno aantete noota wole doogga laꞌe.
3. Annuwunna amuwu “Maatete Magansiꞌra Pirojekte” yaanno birxichi hunda noota addi addi xaggenna rosiishshuwa danchu garinni horoonsiꞌra dandaannohu hiittoonniiti?
3 Maatete Magansiꞌra Pirojekte: Tini pirojekte annuwunna amuwu qaaqquullensa xiinxallisate horoonsidhara qixxeessinoonnite. Mitte mittente pirojektera noo xaggenna rosiishsha horoonsiꞌnanni gara afate, “Download” yaannoha qassini gedensaanni, “Parents’ Guide” yaannohu hunda noo biddishsha nabbabbe. Qaaqquulleꞌne rosiisate misilete rosiishsha, lawishshaho misilla buurranni loonsanni rosiishsha horoonsiꞌra dandiitinanni. Shiimare naggi yiino qaaqquulliꞌne xiinxallote rosiishsha loosanno gede kaaꞌlensa. Mitte mittente pirojekte hunda uyinoonni rosiishshi, mitte Qullaawu Maxaafi xagge woy rosi aana xintaminoho; konni daafira mitte maatete magansiꞌra pirojektera babbaxxino diri deerrira noo qaaqquulli baalunku beeqqa dandaanno.
4. “Yihowa Jaala Ikki” yaanno birxichi hunda maa maa worranni?
4 Yihowa Jaala Ikki: Webisayitenkera konni birxichi hunda worranniti addi addi viidiyo, faarsonna rosiishshi, annuwunna amuwu Maganu Qaali qaaqquullinsa wodanira qaꞌmiꞌranno gede assate kaaꞌlitannonsa. (Marro 31:12) Mitte mittenti viidiyo mitto umo afiꞌrino roso rosiissanno. Hanni-Hasse-Afi yinanni godoꞌle rosu amadino horo xabbe leeltanno gede assitanno. Roore wote qaaqquullu faarso faarsa baxxannohuranna faarso rossinore qaagate kaaꞌlitannonsa daafira Maganu Mangiste faarsonna qaaqquulleho yine qixxeessinanni faarsuwa ganyine webisayitenke aana worranni.
5. Annuwunna amuwu qaaqquullinsara halaale rosiisiꞌrate kaaꞌlannonsa gede Yihowa huucciꞌra hasiissannonsahu mayiraati?
5 Annuwanna amuwa, Yihowa qaaqquulleꞌne danchu garinni lossidhinara hasiꞌranno. Konni daafira qaaqquulliꞌnera halaale rosiisiꞌrate kaaꞌlannoꞌne gede iso huuccidhe. (Mes. 13:8) Yihowa kaaꞌlannoꞌne daafira, qaaqquulliꞌne ‘Kiristoosi Yesuusi ammanne afiꞌnannita gatote hayyo’ afiꞌranno gede assitine qajeelsiꞌra dandiitinanni.—2 Xim. 3:15; Law. 4:1-4.