Soqqanshonke Isilanchimma Woyyeessiꞌra—Dancha Miila Ikka

Hasiissannohu Mayiraati? Yesuusi soqqanshote miili mageeshshi geeshsha kaaꞌlannoro afino. Konni daafira 70 rosaanosi iso balaxxe hadhe sabbakkara soyi wote, lame lame asse gaamino. (Luq. 10:1) Soqqanshote miili hasiisanno wote lawishshaho ledosi soqqamannohura qarrisanno coyi tuncu yiisiro woy mayyee qolannoro baisiro kaaꞌlasira dandaanno. (Mek. 4:9, 10) Qoleno temokkirosi kule jawaachisha dandaanno; hattono soqqanshote roore guma afiꞌranno gede kaaꞌlitannosi assaawe sae sae kulasira dandaanno. (Law. 27:17) Hakkiinni saeno, mittu mininni wolu minira hadhanno wote, jawaachishannore kayise hasaawasira dandaanno.—Fil. 4:8.