Mulla Miila Ikkatenni Sainore Assi
1. Wolootu ledo soqqammeemmo wote hawaariya Phaawuloosi lawishsha harunsa dandiineemmohu ma garinniiti?
1 Hawaariya Phaawuloosi ammanate roduuwisi ledo sayisanno yanna ‘mimmito jawaachishate’ kaaꞌlitannota huwatino. (Rom. 1:12) Mittu halashshaanchi ledo soqqamatto wote, yannakki iso jawaachishatenna kaaꞌlate horoonsiꞌratto? Mulla miila calla ikkite sammi yaantenni, soqqanshote kaaꞌlinohere kulittosiro woyyanno.
2. Soqqanshote miilinke didandeemmo yitanno hedo qeelanno gede kaaꞌlate ma assa dandiineemmo? Tini maaho kaaꞌlitanno?
2 Worbimma Heedhannosi Gede Kaaꞌlisi: Mite halashshaanora dancha gede farciꞌra dandeemmo yitanno hedo dinonsa. Mito wote, albansa laꞌnenna qoonqonsa gara wodanchine tenne afa dandiinanni. Hattoo halashshaano assitanni noorira giddonkenni galantensa didandeemmo yitanno hedo qeeltanno gede assa dandiineemmo. Tennera insa kaaꞌlate wolere ma assa dandiineemmo? Mittu songuwa towaatannohu aliidi laꞌꞌaanchi, isi umisi waajjannotanna waajja qeelate ganye huuccatto assiꞌrannota ledosi soqqamanno rodiira maaxikki kulanno. Wolu rodii qole waajja qeelate kaaꞌlinosire kulanni togo yiino: “Coyiꞌrammora kaummoro, muushshi yeemmo. Tini mullare labbannota ikkiturono, hatto ikkate huucciꞌra hasiissannoe woti no.” Ati soqqanshote yannara waajja qeelatto gede kaaꞌlinoheri no? Mayi kaaꞌlinohero soqqanshote miilikkira kulisi.
3. Soqqanshote miilinke dancha guma afiˈranno gede kaaꞌlannosire maa maa kullammosira dandiineemmo?
3 Mite Hayyo Kulisi: Soqqanshote yannara hasaawa jammarate horoonsidheenna dancha guma abbino bitimi no? Woy hasaawa jammarate kaaꞌlannota huwatoottohu baxxino coyi qooxeessiꞌnera no? Hasaawa jammarate kaaꞌlara qixxeessinoonni lawishshi giddo qooxeessiꞌnera injaanno gede assite biddi assidheenna dancha guma abbinohu no? Hatto ikkiro tenne soqqanshote miilikkira kulisi. (Law. 27:17) Mitto mancho galagale hasaawisate hadhinanni wote, hakko barra ma assite daate qixxaawoottoronna tenne ma garinni assate hedoottoro kayisse miilikkira kula dandaatto. Qullaawa Maxaafa xiinxallissine kaꞌinoonniha ikkiro, mitte naxiwe, xiqise, woy rosiisate hayyo badde horoonsiꞌroottohu mayiraatiro miilikkira kula dandaatto.
4. Soqqanshote miillanke kaaꞌla dancha ikkitinohu mayiraati?
4 Umi xibbi diri sawaakooti illachishshinohu ammantinokkire kaaꞌlate aana calla diꞌꞌikkino. Insa mimmito jawaachishanna kaaꞌla lowo horo afidhinota huwattino. (Looso 11:23; 15:32) Hawaariya Phaawuloosi wedellicha Ximootewosi qajeelsino; qoleno, Ximootewosino rosino coye wolu roduuwira kulanno gede amaalino. (2 Xim. 2:2) Soqqanshote yannara ammanate roduuwinkera danchare assa deꞌneemmokkiha ikkiro, hagiirrinsa lexxanno gede assineemmo, hattono soqqanshote dancha guma afidhanno gede kaaꞌlineemmo. Hakkiinni saeno, iimi Annanke hagiirsiinseemmo.—Ibi. 13:15, 16.