Keeshshitinikki Kaaꞌlensa

Webisayittanke gamba assine mitte haaro Webisayitera qollinku, Qullaawa Maxaafa xiinxallinsansara interneetete widoonni xaꞌmiꞌranno manni kiiro lowonta lexxitanni hadhino. Qoleno gudumaaleho haaru garinni farciꞌra jammarrummota xiinxallo hasiꞌranno manni lexxino. Sinu biiro togoo manna dandaami deerrinni rakke kaaꞌlitanno. Lawishshaho mittu manchi xiinxalla hasiꞌrannota jw.org widoonni kuliro, sinu biiro roore wote konni manchi qooxeessira noo cimeeyyera lamu barri gedensaanni kultanno. Ikkollana, addi addi rippoorte leellishshanno garinni, Qullaawa Maxaafa xiinxallinsara hasiꞌrannohu mitu manni hasaawisannonsaha afiꞌrikki haammata lamala saꞌanno. Xiinxallo hasiꞌranno manchi hasattosi baꞌukki kaaꞌlo afiꞌranno gede assa dandiineemmohu hiittoonniiti?—Marq. 4:14, 15.

Coyishiishshinoonnihu hasatto noosi manchi killileꞌnera gobbayidinni dayinoha ikkiro, Ballo Faana Gantine Kaaꞌlesi (S-43) yitanno forme hakkawontenni wonshe; hakkiinni tenne forme aane noo gambooshshiꞌne geeshsha songote borreessaanchira uuyye. Borreessaanchu qole mittu woy lamu barri giddo tenne mashalaqqe hasiissanno songora aa woy jw.org aana Songo yaanno gafa horoonsiꞌre sinu biirora soya hasiissannosi. Cimeeyye sonkoonniri nooro afate webisayite ganyite laꞌꞌa hasiissannonsa. Hasatto noosi mancho kaaꞌlitanno gede kultanno mashalaqqe iillitunsaro, keeshshitukki faana gana hasiissannonsa. Mittu halashshaanchi faana gane coyishiishara kullisiro, rahe tenne assa hasiissannosi. Hakkoye mancho martine qaete hoogginiro, kiꞌnenni xaada dandaanno gara borreessitine wortine haꞌra dandiitinanniha ikkanno.