Soqqanshonke Isilanchimma Woyyeessiꞌra—Qullaawu Maxaafi Roso Yaanno Maxaafa Horoonsiꞌne Qullaawa Maxaafa Xiinxallinanni Gara Leellisha

Hasiissannohu Mayiraati? Mannaho Qullaawa Maxaafa woxe kaffaꞌlikki xiinxallinseemmo yaanke mayyaatero duuchu mannira leella hoogansara dandaanno. Gaamote ledo mitteenni xiinxallitannoha woy borro sonkanna korse adhitannoha lawansara dandaanno. Manna Qullaawa Maxaafa xiinxallanno gede koyissine calla agurantenni, xiinxallissine mayira dileellishshinanni? Shiimu daqiiqi giddo calla, wole agurina xullote uurritine heedhinenni Qullaawu Maxaafi xiinxallo shotanna hagiirsiissannota ikkitinota qaete annira leellisha dandiitinanni.

Tenne Assa Dandiinanni Gara:

Keere haadhini gedensaanni, qaete anni albillittete heeshsho daafira huluullamannoronna teꞌee xaꞌme.
Hakkiinni wolu batinyu mannino hattonni huluullamannota kultine, Qullaawu Maxaafi Roso yaanno maxaafi furcho leellishshesi. Kuni maxaafi huwatate shota ikkino roso amadinotanna Qullaawu Maxaafi albillittete yannarenna wole coyibba daafira mayyaannoro kulannota xawisse; hakkiinni isi hiittee fooliishshore afa hasiꞌrannoro xaꞌme.
Isira mitto maxaafa uyitine, doodhino fooliishsho noowa fanne. Fooliishshote bitimaho noo xaꞌmuwara dawaro aantanno guffa giddo noota kullesi.
Dandaannoha ikkiro, qaete anni umi gufo nabbawanno gede koyisse. Hakkiinni hatte gufora qixxaabbino xaꞌmo nabbabbeenna, dawaro mitteenni hasaabbe. Dawarote irko ikkitara qummi assinoonni xiqisubba fantine nabbabbine hasaabbe. Maxaafiꞌne aana dawaro malaatisidhinoonni gara qaete annira leellishshesi.
Hakkiinni aantanno gufo hasaabbe; xa kayinni qaete anni dawaro umisi yaattonni qolate woꞌnaalanno gede kullesi.
Qaete anna galattini gedensaanni, hanaffinoonni roso gudate dinye amadde.
Dandaamannoha ikkiro, Qullaawa Maxaafa Xiinxallinseemmohu Hiittoonniiti? yitannota jw.org/sid aana noo viidiyo leellishshesi.

Konni Aganira Togo Assate Woꞌnaalle:

Qullaawa Maxaafa xiinxallanno manna afiꞌrate woꞌnaaltinanni wote Yihowa kaaꞌlannoꞌne gede huuccatto assidhe.—Fil. 2:13.
Qullaawu Maxaafi Roso yaanno maxaafa horoonsidhine Qullaawa Maxaafa xiinxallinseemmo gara leellishate woꞌnaalle; woy soqqanshote yannara ajayi ajeenna mitte higgine Qullaawa Maxaafa Xiinxallinseemmohu Hiittoonniiti? yitanno viidiyo leellishshe.