Magano Magansiꞌrate Horoonsiꞌneemmota Haaro Faarso!
1 Wochi Tawori Bayibili Endi Tirakti Sosayitii Ovi Pensiliveeniyu Birra 4, 2014nni diru gambooshshe assiꞌri yannara, faarsote maxaafanke woyyeessine qixxeessate hendoonnita egensiinsoonni. Gamba yiino manni tennera baasa hagiidhino! Magano magansiꞌneemmo wote Mangistete faarsonke kaffi assine laꞌꞌa hasiissannonketa macciishshaanote qummi assinoonni.—Far. 96:2.
2 ‘Faarsote maxaafa woyyeessa hasiissinohu mayiraati?’ yite hedattoha ikkara dandaanno. Tennera haammata korkaata kula dandiinanni. Umihunni, Qullaawa Borrora noonke wodancha yannate kiiro lexxitanni hadhannota ikkaseeti; tini qolte faarsote maxaafinke giximano taashshinanni gede assitanno. (Law. 4:18) Wolu korkaati kayinni, batinyu afiinni xa horoonsiꞌneemmo faarsora noo qaalla haaꞌnoonnihu albite Haaro Alame Tiro ittimenni ikkasiiti. Tenne qaalla muli yannara haarote fultinote Haaro Alame Tiro ittime qaalla garinni taashsha hasiissino. Mitto mittonka gixima haaro ikkine taashshate lowo loosi hasiisanno daafira, nootera aanaho boode haaro faarso ledate wossannoonni.
3 Haaru faarsote maxaafi attamame daa geeshsha haaro faarso horoonsiꞌra didandiineemmo yaate? Deeꞌni. Albillittete boode aganna gedensaanni, batinyu afiinni qixxaabbinota batinye haaro faarso jw.org yinanni webisayitenke aana worranni. Haaro faarso fultanno wote, Soqqanshote Gambooshshi jeefora faarsinanni gede “haaro faarso” yine bande worranni.
4 Haaro Faarso Rosa Dandiinanni Gara: Haaro faarso rosa shota ikka hooggara dandiitanno. Ikkirono, faarsaanchu assinonte gede, ninkeno songote gambooshshi yannara shooshshine faarsineemmo ikkinnina ‘sammi diyineemmo.’ (Far. 30:12) Haaro faarsonke rosate, aanchine kulloonnire asse.
Haaro faarsora qixxeessinoonni muuziiqa webisayitenke aana fushshinanni daafira, hakkoye muuziiqa marro marro higgine macciishshe. Konne assitini kiiro, qaage faarsa roore shota ikkitannoꞌne.
Faarsote gixima seekkitine xiinxalle, hattono surreꞌnera amadate woꞌnaalle.
Faarsote gixima muuziiqu ledo faarse. Faarso seekkitine rossina geeshsha tenne assa agurtinoonte.
Maateꞌne rossa geeshsha maatete magansiꞌraꞌne yannara shiima yanna gaaꞌmitine haaro faarso rosiisidhe.
5 Albillitte haaro faarso Soqqanshote Gambooshshe jeefisate pirogiraamete aana fultanno wote, songo mitte higge hatte faarso muuziiqa macciishshitanno gede assinanni. Hakkiinni aanchite songo wole faarso faarsineemmo wote assineemmonte gede, muuziiqu ledo mitteenni faarsitanno.
6 Songote gambooshshi yannara faarsanke mittimmatenni Yihowara guweenya uyine afiꞌnanni hagiirre afiꞌrate kaaꞌlitannonke. Konni daafira, gambooshshu yannara faarso faarsinammora egensiinsanni wote mitiinsinori nookkiha kaꞌne haꞌrate rosicho gargadha hasiissannonke.
7 Qullaawa faarsote muuziiqanke naandeemmota leellinsheemmoti wole doogono no. Woradunna qoqqowu gambooshshi yannara, mitte mittenti pirogiraame hanaffara albaanni muuziiqa macciishshinammora fannanni. Labballunna meya roduuwinke xeertote gobbanni uminsa wocenni Magano magansiꞌrate horoonsiꞌneemmoha maccate baxisanno muuziiqa qixxeessate, dirunni lame hige Paaterseni Niwu Yoorke daanno. Konni daafira, madirakete liqambartichi bayicho bayichonke amandeemmo gedenna qixxaawinonke muuziiqa macciishshineemmo gede koyisanno wote, ofolline macciishsha hasiissannonke. Tenne assanke wodananke aane shiqanno rosira qixxeessiꞌrate kaaꞌlitannonke.—Izi. 7:10.
8 Muli barra diru gambooshshi yannara egensiinsoonnite haaro faarso giddo mitte, “Gashsha Jammartinoti Maganu Mangiste Daggo!” yitannote. Tini faarso roorenkanni Maganu Mangiste gashsha jammartunku 100 diro ikkinota hende qixxeessinoonnite.
9 Yihowa uyinonkehu “danchu coyi” giddo mitte tenne haaro faarsooti. (Mat. 12:35a) Tenne haaro faarso qixxeessinoonni afoo dandiitinanniha ikkiro, Maganinkera hasiisanno guweenyanna ayirrinye aa dandiitinanni gede tenne haaro faarso rosatenna seekkitine faarsate murcidhine kaꞌe!—Far. 147:1.