Qaagooshshu Ayyaani Woggara Yihowanna Yesuusi Gede Diinaggaabbinanni?
1. Yihowa Farciꞌraasine Qaagooshshu Ayyaani woggara maa assate sharrantanno?
1 Yihowa alaamasi diinaggaawe wonshanno. Isayyaasi 9:7 mito Maganu Mangiste abbitanno atoote kultanni togo yitanno: ‘Saraawitete Magani Yihowa diinaggaawe tenne assanno.’ Maganu beettino uullate aana noo yannara halaalu Magansiꞌrara lowo geeshsha diinaggaawannota leellishino. (Yoh. 2:13-17; 4:34) Alamete doyichora noori lowo miliyoone ikkitanno halashshaano, diru kiiro Qaagooshshu Ayyaani woggara, albinni roore diinaggaabbe soqqante, Yihowanna Yesuusi lawishsha harunsitanno. Atino insa gede assatto?
2. Badheessa 7nni kayinse diinaggaambe assineemmo coyi maati?
2 Qaagooshshu Ayyaani Zamacha: Tayixe Qaagooshshu Ayyaani zamacha hananfannihu Badheessa 7nni Qidaamete barraati. Konnira diinaggaawe soqqamate xaanni soma fushshira hasiissanno. Tenne yannara songo noonsata soqqanshote killile dandaami deerrinni loose gudate sharrantanno. Qullaawa Maxaafa rosiissinannirira, galagaltine martine hasaawissinannirira, ledoꞌne loossannorira, fiixiꞌneranna ledoꞌne rossannorira koyishshu woraqata uyitine woy jw.org horoonsidhine koyisate qixxaabbe.
3. Badheessunna Dotteessu agannara albinni roore soqqama dandiineemmohu hiittoonniiti?
3 Kaaꞌlaancho Suwisaancho: Diinaggaawanke albinni roore soqqammeemmo gedeno kakkayissannonke. Badheessunna Dotteessu aganira batinye halashshaano kaaꞌlaano suwisaano ikka dandiitannoti dihuluullissannote, korkaatuno kuri agannara 30 saate soqqamateno doodha dandiineemmo qixxaawo no. Tenne assa dandiitinannihu hiittoonniitiro afate maatete magansiꞌraꞌne yannara woy gillete xiinxalloꞌne yannara huuccattotenni assaabbe. (Law. 15:22) Konni zamachira diinaggaabbine soqqamaꞌne wolootuno hatto assitanno gede jawaachishshara dandiitanno. Albinni roore soqqamate gilletenni mito coye biddi assidhinanniha ikkiro, diinaggaawe soqqamate Yesuusi lawishsha harunsitinanni heedhinoonni.—Marq. 6:31-34.
4. Yihowanna Yesuusi lawishsha harunsine diinaggaambummoro afiꞌneemmo atooti maati?
4 Tenne Qaagooshshu Ayyaani woggara Yihowanna Yesuusi lawishsha harunsine diinaggaambeemmore ikkanke lowo atoote abbitannonke. Soqqanshote killile giddo noohu lowo mannira farciꞌneemmo. Konni garinni Yihowara soqqammenna wolootaho uyine afiꞌnanni hagiirre afiꞌneemmo. (Looso 20:35) Roore kayinni, Diinaggaawe loosanno Maganonkenna Beettosi hagiirsiinseemmo.