Lawishsha Ikkanno Hasaawa Horoonsiꞌnanni Gara

Lawishsha ikkanno hasaawi seekkine hende qixxeessinoonniho; qoleno batinye halashshaano konne hasaawa horoonsidhe qoqqowinsara dancha guma afidhino. Ikkollana alamete qooxeessira noo ikkito bayichu bayichu garinni babbaxxitanno daafira, halashshaano soqqantanno woyite uminsaha hasaawu bitima horoonsiꞌra woy qooxeessu manni hasaawa baxanno hajo kayisse hasaawisa dandiitanno. Ikkollana ninke baalunku baxxino zamachi yannara kullanninke biddishsha harunsa hasiissannonke. Mixonke Yesuusi Maganu Mangisteha dancha duduwo dudumbammora uyinonke looso umo fushshate.—Mt 24:14.

Halashshaano rosaanote kifile shiqishshanno woyite, Kiristaanu Heeshshonna Soqqanshote Xiinxallote Maxaafichora nooha lawishsha ikkanno hasaawa horoonsiꞌra hasiissannonsa. Ikkollana halashshaano bande kulloonniri heeꞌriro ikkinnina, xaꞌmo, qummeeshsha, wolu woyitira qixxeessinoonni xaꞌmo, woy yannanna bayicho qooxeessaho injaanno garinni soorra dandiitanno. Tini hedo Ella 2020te xiinxallote maxaafichora qoola settete noo biddishsha biddi assinoonnite.