Maganu Huuccattokki Macciishshanno Gede Maa Assa Dandaatto?

YESUUSI SUꞌMINNI MAGANO YIHOWA HUUCCIꞌRI

“Ane suꞌminni huuccidhinannire baala Anniꞌya aannoꞌne.” —Yohaannisi 16:23.

Yesuusi coyiꞌrinori Yihowa misillate, qullaawootu, sokkaasinete, woy reyitino annuwinke widoonni ikkikkinni Yesuusi Kiristoosi suꞌminni huucciꞌnammora hasiꞌrannota leellishanno. Yesuusi suꞌminni Magano huucciꞌneemmo woyite, Yesuusi assinonkere huwantoommota leellinsheemmo. Yesuusi, “Ane widoonni ikka hoogiro, ayino Anniꞌyawa daannohu dino” yiino.—Yohaannisi 14:6.

GIDDOKKINNI HUUCCIꞌRI

“Qarraꞌne baala isira hasaaphe.”—Faarso 62:8.

Huucciꞌneemmo woyite Yihowa baxillaanchu anninke gede assine hasaawisa hasiissannonke. Huuccattote maxaafa nabbawa woy yinoommota yaa dihasiissannonke; hatteentenni giddonketa ayirrinyunni isira hasaapha hasiissannonke.

MAGANU HEDO LEDO SUMUU YAANNO GARINNI HUUCCIꞌRI

“Isi hedino garinni huucciꞌneemmore baala macciishshannonke.”—1 Yohaannisi 5:14.

Qullaawu Maxaafi Yihowa ninkera maa assannonkeronna ninkeno isira maa assinammora hasiꞌrannoro kulannonke. Maganu huuccattonke macciishshanno gede “isi hedino garinni” huucciꞌra hasiissannonke. Togo assate, iso seekkine anfeemmo gede Qullaawa Maxaafa xiinxalla hasiissannonke. Hatto ikkiro, huuccattonke Magano hagiirsiissannota ikkitanno.

MAYI DAAFIRA HUUCCIꞌRA DANDIINEEMMO?

Hasiisannohe coyi daafira huucciꞌri. Heeshshote lowo geeshsha hasiisannonkere yaano sagale, uddanonna galleemmo mine afiꞌrate huucciꞌra dandiineemmo. Dancha doorsha doodhineemmo gede hayyo aankeranna iillannonke qarra dandiine saꞌneemmo gede kaaꞌlankerano huucciꞌra dandiineemmo. Ammana ledankeranna gatona yaankera hattono kaaꞌlankera Magano huucciꞌra dandiineemmo.—Luqaasi 11:3, 4, 13; Yaiqoobi 1:5, 17.

Wolootaho Huucce. Oosonsa baxanno anninna ama oosonsa mimmitu ledo baxanturo hagiidhanno. Yihowano uullate aana noo oososi mimmitu ledo baxantara hasiꞌranno. Galtenkera, maatenkera, oosonkera hattono jaallankera huucca hasiissannonke. Rosaanchu Yaiqoobi “Kuꞌu kuꞌunnira huucco” yee borreessino.—Yaiqoobi 5:16.

Huuccattotenni Magano Galatte. Qullaawu Maxaafi Kalaqaanchinke daafira togo yaanno: “[Isi] dancha looso loosa diagurino. Gordunni xeena soyannoꞌne; gideno yannatenni aannoꞌne; sagaletenninna hagiirrunni wodana kassi assannoꞌne.” (Soqqamaasinete Looso 14:17) Maganu assinonkere baala hendeemmo woyite huuccattotenni iso galatate kakkaꞌneemmo. Heeꞌneemmo garino Magano galanteemmota leellishannoha ikka hasiissannosi.—Qolasiyaasi Sokka 3:15.

CINCI HATTONO AGURITTOKKINNI HUUCCIꞌRI

Mito woyite giddonkenni huucciꞌnoommo huuccattora bayichonko dawaro afiꞌra hoongeemmo daafira, hexxo mudhinammora dandiineemmo. Hatto yaa Maganoho ninkeri didhiwannosi yaateni? Deeꞌni. Hanni agurrummokkinni huucciꞌra hasiissannonketa leellishannoha aane noo lawishsha laꞌno.

Umi birxichira qummi assinoonnihu Istiivi, “Agurummokkinni huucciꞌra hoogoommoro, hexxo mudhe hoogoommo” yiino. Agurikkinni huucciꞌranno gede kaaꞌlinosiri maati? Isi Qullaawa Maxaafa xiinxalle huuccatto assiꞌranna agurikkinni huucciꞌra hasiissannosita rosino. Istiivi togo yiino: “Lubbote jaallaꞌya baxillunni lowore kaaꞌlitinoe daafira, Magano huuccattotenni galaxxeemmosi. Xa albinni roore hagiirraamo ikkoommo.”

“Maganu ane gedee manni huuccatto dimacciishshanno” yite heddannoti Jeenina? Ise togo yitino: “Waagu dinoe yee hedeemma woyite, hatto yee hedeemmahu mayiraatiro wodancheemma gede kaaꞌlaera Magano huucciꞌroomma.” Tini kaaꞌlitinosehu hiittoonniiti? Ise “Maganoho hasaaphaꞌya, aneneeto isi laꞌꞌannoe garinni laeemma gedenna wodaniꞌya bushiishiero nafa isi hakko garinni laꞌꞌannoekkita afeemma gede kaaꞌlitinoe” yitino. Hakkiinni mayi ikkiyya? Ise togo yitino: “Huuccatto Yihowa seekke afeemma gede, isi baxillaanchonna towaatanno Magano, Annanna Jaala ikkinota wodancheemma gede kaaꞌlitinoe; isi hasiꞌranno garinni agurummakkinni huucciꞌrummaro woꞌmanka woyite kaaꞌlannoe.”

Hanni Isabeeli woꞌnaalshano laꞌno. Ise godowinni heedheenna akimootu iltanno qaaqqi fayyo ikkinokkita kultinose. Isabeeli lowo geeshsha massino. Mitu isinni godowu gato huntanno gede amaaltinose. Ise “Lowo geeshsha yaadoomma daafira reyammaraati yee hedoomma” yitino. Hakkiinni maa assituyya? “Kaaꞌlaera Magano marro marro hige huucciꞌroomma” yitino. Gedensoonni ise fayyimmate qarri noosiha labbaa qaaqqo (suꞌmasi Jeraardi yinoonni) iltino. Isabeeli Maganu huuccattose macciishshinohu gede assite heddino? Eewana! Hiittoonni? Ise togo yitino: “Xa 14 diro ikkinosi qaaqqiꞌya fayyimmate qarri noosiha ikkirono, hagiirru noo heeshsho heeꞌranni noota laeemma woyite, Maganu Yihowa huuccattoꞌya seekke macciishshinota wodanchoomma. Qaaqqiꞌya Maganu uyinoete muxxe eltooti.”

Ise coyidhinori faarsaasinchu coyiꞌrinore qaangeemmo gede assannonke; isi togo yiino: “Kaaliiqa, gadadaammu huuccatto macciishshite, jawaachishattonsa; maccakkino insa widira [qolatto.]” (Faarso 10:17) Tenne afanke Magano agurrummokkinni huucciꞌneemmo gede kaaꞌlitannonke.

Qullaawu Maxaafi giddo Yesuusi huucciꞌrinota batinye huuccatto borreessinoonni. Lowo geeshsha egennantinoti rosaanosira rosiisino huuccattooti. Tenne huuccattonni maa ronseemmo?