Isi Addinta Heeshsho Seekkannori Maati?
Batinyu manni, albillittete heeshshonke seekkitannoti illete leeltannokki wolqa no yee ammananno. Hakko daafira, heeshshonke woyyeessanno yee hedannoha addi addi coye assanno.
BATINYU MANNI AMMANANNORE
BEEDDAHE LAYIꞌRA: Mitu manni, mittu manchi ilami woyite beeddahe ikkite dirantino gari hakko manchi heeshsho seekkara woy hunara dandaanno yee ammananno. Kuni manni albillitte heeshshonsa hiittoota ikkitannoro afatenna gawajjannonsare hooꞌlate, beeddahe laꞌe masaaltannore amaaꞌlanno.
KIILO: Mitu manni, heeshsho seekkitannoti kiilaano woy maganaano kiilsiisiꞌne insa yitannore assate yee ammananno. Kuni manni, hatto assiniro baalunkuri qinaawanno yee hedanno. Qoleno mitto coye assannohu kiilaano yitannonsa garinniiti.
ALBI ANNUWA MAGANSIꞌRA: Mitu manni kayinni agarooshshenna atoote afiꞌrate, albi annuwara ayirrinye aanna addi addi maganna magansiꞌra hasiissannonke yee ammananno. Veetinaamete gobbara heedhannoti Vaania yinanni mancho togo yitino: “Albi annuwaꞌyara ayirrinye uummaro, anino oosoꞌyano xaano ikko albillitte teense heeꞌneemmo yee ammanoomma.”
REYITINORI WOLE BISO UDDIDHE WIRRO ILANTANNO YEE AMMANA: Batinyu manni mittu manchi reyiro galagale ilamanno, qoleno wirro wirro hatto ikkanni heeꞌranno yaanno. Kuni manni, xa tuncu yaannonkehu danchu woy bushu coyi albi heeshshonke yannara assinoommorinni ikkannoho yee ammananno.
Ikkollana batinyu manni togoo coyi haafa ammanaati yee hedanno. Ikkirono hatto yee hedanno manni uminsa angate hoowo layiꞌranno, hellee layiꞌranno, buusa layiꞌranno, hattono woleno togoore assanno. Insa togoore assannohu albillitte heeshshonsa hiittoota ikkitannoro afate kaaꞌlannonke yeeti.
TINI ABBITINO GUMI MAATI?
Togoore ammantannorinna assitannori dancha heeshsho heeꞌra dandiitinoyya?
Hanni Veetinaamete heeꞌrannohu Heyu yinanni manchi woꞌnaalsha laꞌno. Isi heeshshosira biddishsha afiꞌrate beeddahe layiꞌrino, kiilsiisiꞌrino, hattono albi annuwasi magansiꞌrino. Tini kaaꞌlitinosiyya? Heyu togo yiino: “Lowo woxi bainoe, asalu giddora eummo, maateꞌya giddo gaance kalaqantu, hattono yaaddo amaddue.”
Tayiwaanete gobbara ilaminohu Chomingi yinanni manchino buusa layiꞌrannoho, reyino manchi wole biso uddiꞌre galagale ilamanno yee ammanannoho, kaayyo layiꞌrannoho, kiilsiisiꞌrannoho, hattono albi annuwasi magansiꞌrannoho. Isi kuri baalanka seekke xiinxallihu gedensaanni togo yiino: “Togoo rosinna budi isi isiniiwa sumuu yaannokkihanna gurcheessannoha ikkinota huwatoommo. Buusa laꞌne masaallanni coyino duucha hige ikkikki gatanna laoommo. Reyino manchi wolu bisinni galagale ilamanno yinannitera kayinni, albi heeshshonke daafira mittoreno qaaga hoongummona, albillittete heeshshonke hiitto assine soorrine woyyeessa dandiineemmo?”
“Togoo rosinna budi isi isiniiwa sumuu yaannokkihanna gurcheessannoha ikkinota huwatoommo.”—CHOMINGI, TAYIWAANE
Heyu, Chominginna woluno batinyu manni huwatinonte gede, albillittete heeshshonke seekkitannoti kaayyo, beeddahe, albi annuwa, woy galagale ilama diꞌꞌikkitino. Hatto yaa kayi albillittete heeshshonke woyyeessate assa dandiineemmori dino yaate?
Batinyu manni, albillitte teese heeꞌrate lowo roso rosanna dureessa ikka hasiissannonke yee hedanno. Tenne doodhitinorira heeshshonsa hiittoota ikkitino?
a Konninna aananno birxichira mitu manni suꞌma soorrinoonni.
b Tini yaatto Qullaawu Maxaafi giddo Galatiyu Sokka 6:7 noote.