Geerra Roduuwanke Lowo Geeshsha Naadde

1-2. (a) Lawishsha 16:31 kultanno garinni, geerra roduuwanke ma garinni laꞌꞌa hasiissannonke? (b) Konni birxichira hiittee xaꞌmuwara dawaro afiꞌneemmo?

AMEERIKAHO Arkansaasi paarke giddo almaazete yinanni shiilo mullawa afiꞌnara dandiinanni. Ikkollana, tini shiilo umo laꞌnanni woyite bushshunku noota ikkitino daafira xabbe dileeltanno. Hakko daafira, almaaze laꞌꞌannohu batinyu manni maa lainoro wodancha hooge, tenne muxxe jiro agure saꞌꞌara dandaanno.

² Mite doogonni laꞌniro, ammanaminohu geerru roduuwinke tenne almaaze gedeeti; insa muxxe jirooti. Maganu Qaali togoohu jajjabbu roduuwi awuuwe baꞌlattote gede ikkitinota kulanno. (Lawishsha 16:31 nabbawi; 20:29) Kuri roduuwi muxxe jiro ikkinota kayi wodancha hoongammora dandiineemmo. Geerru roduuwi muxxe jiro ikkinota wodanchitino wedellooti maalaamittete jironni roorinore afidhanno. Konni birxichira sase xaꞌmora dawaro afiꞌneemmo: Ammanaminohu geerru roduuwi Yihowa albaanni muxxe ikkinohu mayiraati? Togoo roduuwi Yihowa dirijjitera lowore kaaꞌlitanno yineemmohu mayiraati? Insa lawishshinni roore rosate maa assa dandiineemmo?

AMMANAMINOHU GEERRU RODUUWI YIHOWA ALBAANNI MUXXE IKKINOHU MAYIRAATI?

3. Faarso 92:12-15 kultanno garinni, ammanaminohu geerru roduuwi Yihowa albaanni muxxe ikkinohu mayiraati?

³ Ammanaminohu geerru roduuwi Maganu Yihowa albaanni muxxete. Isi giddoyidi ayimmansa egennino; qoleno kaajja akattansa lowo geeshsha naadanno. Geerru roduuwi Yihowara lowo diro ammanante soqqante afidhino hayyo wedellu roduuwira kultanno woyite isi hagiidhanno. (Iyo. 12:12; Law. 1:1-4) Yihowa kuri roduuwi cincite heedhino garano naadanno. (Mil. 3:16) Kore roduuwa mittu qarrino amade diegenninonsa yaa diꞌꞌikkino; ikkirono Yihowara noonsa ammana horo dishoshshoggitino. Insa halaale macciishshitu yannanni roore xa hexxonsa xabbe leeltannonsa. Qoleno insa, “geedhimmate yannara nafa” suꞌmasi dudubbanno daafira Yihowa baxannonsa.—Faarso 92:12-15 nabbawi.

4. Geerru roduuwinke maa huwatansa jawaachishshannonsa?

⁴ Diru akkalle amaddinoꞌneha ikkiro, Yihowa konni albaanni loossinoonni looso hawannokkita deꞌinoonte. (Ibi. 6:10) Sabbakate looso diinaggaabbine loossinoonni; hatto assaꞌne iimi Annanke lowo geeshsha hagiirsiissannosi. Addi addi qarri amadiꞌnerono, mito woyite isinni lowo geeshsha dadillisanno coyi tuncu yiiꞌnerono cincitine saꞌinoonni; Qullaawu Maxaafihu xalalu seerira halantinoonni; Yihowa dirijjite uyitinoꞌneha lowo geeshsha hasiisanno looso loossinoonni hattono woloota qajeelsitinoonni. Rakke rakke albillitte hadhanni noote Yihowa dirijjite ledo taalo qaafate dandiitinire baala assitinoonni. Woꞌma yanna soqqansho giddo noore woloota roduuwa irkissinoonni hattono jawaachishshinoonni. Ammanantinoonnire ikkitinoonni daafira Maganu Yihowa lowo geeshsha baxannoꞌne. Isi ‘Keeraano dihuneemmo’ yee qaale eino! (Far. 37:28) Qoleno togo yee hexxo uyinoꞌne: “Geedhitine awuubbina geeshsha, duheemmoꞌnehu aneeti.” (Isa. 46:4) Diriꞌne akkalino daafira xaate Yihowa dirijjitera kaaꞌleemmori dino yitine heddinoonte. Kaaꞌlitinanniri lowori no!

GEERRU RODUUWINKE YIHOWA DIRIJJITERA LOWORE KAAꞌLITANNO

5. Geerru roduuwi maa qaaga hasiissannonsa?

⁵ Geerru roduuwi wolootaho aa dandiitannori lowori noonsa. Kuri roduuwira alba noonsate geeshshi jawaante xa noonsakkiha ikkara dandaanno; ikkirono seeda diro heedhe afidhinohu lowo woꞌnaalshi noonsa. Xaano ikkiro Yihowa insara dirijjitesi giddo addi addi looso aansara dandaanno; aanchine laꞌneemmoti hundi waritinna dirinke lawishshuwa tenne leellishshanno.

6-7. Geedhimmate diro Yihowara ammaname soqqame atootesi afiꞌrino manni lawishsha Qullaawu Maxaafinni kuli.

⁶ Qullaawu Maxaafi geedhimmate yannara Yihowara diinaggaawe soqqaminohu ammanamino manni lawishsha kulanno. Lawishshaho Muse, Yihowa masaalaanchonna Israeelete albisa ikke soqqama hanafi woyite 80 diri balla ikkannosi. Daanieelira 90 diri ale ikke noosi yannarano Yihowa iso masaalaancho asse soqqa diagurino. Soqqamaasinchu Yohaannisino qullaawu ayyaaninni Ajuujate maxaafa borreessi woyite 90 diro ale ikkisikki digatino.

⁷ Wolootu batinyu ammanantino soqqamaasine hakkeya egennantinore ikkitinokki daafira, mannu hakkeeshsha wodancha hoogansara dandaanno. Ikkirono Yihowa seekke egenninonsa; hattono ammanantinore ikkitino daafira kiisinonsa. Lawishshaho Qullaawu Maxaafi, ‘Maganoho galinohu keeraanchu’ manchi Simiooni daafira shiimarella kulanno; Yihowa kayinni isi hiittoo manchootiro seekke egennino; qoleno qaaqqo Yesuusa laꞌꞌatenna qaaqqunna amate daafira masaalo coyiꞌrate qoosso uyinosi. (Luq. 2:22, 25-35) Minaanna shiidhinote himanaancho Haanna lawishshano laꞌꞌa dandiineemmo. Isera 84 diri ale ikkannoseha ikkirono, “Qullaawu Mininni baxxitukkinni” Maganoho soqqantino. Ise “gambooshshe hossannokki” daafira Yihowa iserano qaaqqo Yesuusa laꞌꞌate qoosso oye maassiꞌrinose. Simioonino Haannano Yihowa albaanni muxxete.—Luq. 2:36-38.

8-9. Mitte minaanna shiidhino rodoo Yihowa dirijjite giddo soqqantanni noohu hiittoonniiti?

⁸ Yannankera noohu batinyu ammanaminohu geerru roduuwi, wedellootaho kaajja lawishshaati. Hanni Rodoo Loyisi Diideri woꞌnaalsha laꞌno. Ise Kanaadaho baxxitino suwisaancho ikkite soqqama hanaffu woyite 21 dirolla ikkannose. Hakkuyi gedensaanni, isenna minaannise Jooni songuwa towaatanni lowo diro soqqamino. Insa gedensoonni Kanaadu Beeteelera 20 saꞌꞌanno diro soqqamino. Loyisira 58 diro ikkiseta, isenna Jooni Yukireenete gobba haꞌre soqqamara koyinsinsa. Insa hakkawote ma assiyya? ‘Dirinke akkalino daafira wole gobba haꞌne soqqama didandiineemmo’ yiinokka? Insa sonkoonninsawa maahoyye yee haꞌrino; qoleno hakkiicho Jooni Sinu Biiro Komite miila assine shoommoonni. Lamalu diri gedensaanni Jooni reyita, Loyisi worroonnisewa soqqantanni heeꞌrate murcidhu. Loyisira xa 81 diro ikkinose; ikkirono ise xaano Yukireenete, Beeteelete maate ledo Yihowara ammanante soqqantanni no; qoleno hakko noo roduuwi baalunku lowo geeshsha baxxannose.

⁹ Loyisi gede minaanna shiiꞌrinore meya roduuwa, minaanninsa lubbote noo wari geeshsha qaaga hoongansara dandiinanni; ikkirono, insa xaano muxxete. Minaannansa lowo diro kaaꞌlanni keeshshinorinna xaano ammaname soqqamanni noori meya roduuwi Yihowa albaanni lowo waaga afiꞌrino. (1 Xim. 5:3) Qoleno, kuri roduuwi lawishshi wedelloota jawaachishanno.

10. Tooni dancha lawishsha ikkinonkehu hiittoonniiti?

¹⁰ Mininni fule afannokkihu batinyu ammanamino geerrino muxxete. Lawishshaho, Tooni yinanni rodii geerra towaantanni uurrinshara heeꞌranno. Isi Yunayitidi Isteetisete, Pensiliveeniyaho Woxawaajje 1942nni 20 dirihu heeꞌre cuuamino. Hakkuyi gedensaanni mulenni, poletikaho anga wodha giwino daafira lame dironna darate usurroonnisi. Isinna minaamasi Hilda lame ooso ile halaalu mine lossiꞌrino. Tooni lowo diro sase songo giddo qineessaancho aliidi laꞌꞌaancho (xa cimeeyyete bisi qineessaancho yinanni), hattono woradu gambooshshi aliidi laꞌꞌaancho ikke soqqamino. Isi usuru mine gambooshshe massagino, hattono Qullaawa Maxaafa xiinxallisino. Toonira xa 98 diro ikkinosiha ikkirono, Yihowa looso loosa diagurino. Isi Yihowara soqqamatenna songosi roduuwi ledo gamba yee loosate dandiire baala assanno!

11. Mininni fule afannokki geerra banxeemmotanna ayirrinseemmota leellisha dandiineemmohu hiittoonniiti?

¹¹ Mininni fule afannokkiha geerra roduuwa ayirrinseemmota leellisha dandiineemmohu hiittoonniiti? Cimeeyye dandaami deerrinni, kuri roduuwi songote gambooshshe macciishshitanno woy beeqqitanno gede, hattono soqqantanno gede kaaꞌlitannonsa. Qoleno insa noowa marre woy viidiyotenni xaande hasaawinse insa daafira hendeemmota leellisha dandiineemmo. Roorenkanni, songo noo bayichinni xeertiꞌre heeꞌrannoha geerra roduuwanke deꞌnummokkinni towaata hasiissannonke. Insa xeertote noo daafira calla dea dihasiissannonke. Mitu geerru roduuwi uminsa daafira hasaawa baxannokkiha ikkara dandaanno. Ikkirono, yanna gaaꞌmine xaꞌmo xaꞌmineemmohanna insa Yihowa dirijjite giddo afiꞌrino atoote kulannanke macciishshineemmoha ikkiro, lowo horo afiꞌneemmo.

12. Uminke songo giddono hiittoo roduuwi heedhara dandiitanno?

¹² Ninke uminke songora ammanaminohunna kaajja lawishsha ikkannohu geerru roduuwi noota huwanteemmo woyite dhagge assiꞌnammora dandiineemmo. Hariyeti yinanni rodoo, Yunayitidi Isteetisete Niwu Jeerziira noote mitte songo giddo lowo diro Yihowara ammanante soqqantino. Hakkiinni ise beettose ledo heedhara wolewa hadhino. Haarote martinowa noo songo roduuwi tenne rodoo seekkite egennate woꞌnaaltino; hakkiinni insa tini rodoo muxxe ikkitinota wodanchitino. Ise 1925 balla halaale macciishshitu waro afidhinota soqqanshote woꞌnaalshuwa kulte kore roduuwa jawaachishshino. Hakkawaro, ise amande usurreenna minira higa hooggara dandiitanno daafira, soqqansho fultanno woyite ayewoteno hinkote burushe adhite fultanno. Isinni, 1933nni lame hinge mitte lamala geeshsha usurroonnise. Ise usurantanno woyite, Yihowa Farciꞌraasincho ikkinokki minaannise sasenka qaaqquullensa towaatanni kaaꞌlannose. Addanko, Hariyeti gedeehura ammanaminohu geerru roduuwinkera ayirrinyu hasiisannonsa!

13. Geerru roduuwira Yihowa dirijjite giddo noonsa bayichi daafira maa ronsoommo?

¹³ Geerru roduuwinke Yihowa dirijjitera lowore kaaꞌlitanno. Insa Yihowa dirijjitesinna insa umonsa addi addi doogganni maassiꞌranna illensanni laꞌino. Insa loossino soꞌronnino lowore rossino. Kuri roduuwa “egennote buicho” gede assitine hedde; qoleno insawiinni rosate woꞌnaalle. (Law. 18:4) Yanna gaaꞌmitine kore roduuwa egennate woꞌnaaltinanniha ikkiro, ammanaꞌne kaajjitanno, hattono lowore rosa dandiitinanni!

GEERRU RODUUWI LAWISHSHINNI ROSSE

14. Marro 32:7 wedellootu ma assitanno gede jawaachishshanno?

¹⁴ Geerra roduuwa kiꞌne umiꞌne shiqqine hasaawisate woꞌnaalle. (Marro 32:7 nabbawi.) Hige xaate insa xunsite laꞌannokkiha, sunuutunni qaaffannoha, hattono coyidhanno woyite huuronsa ajjannoha ikkara dandaanno; ikkirono, giddonsa wedellu gedeeti. Qoleno Yihowa albaanni “danchu suꞌmi” noonsa. (Ros. 7:1) Insa Yihowa albaanni muxxe ikkitinohu mayiraatiro deꞌinoonte. Insa ayirrisa agurtinoonte. Elsai gedeere ikke. Isi jeefote Eeliyaasi ledo hosi barra isiwiinni baxxa dihasiꞌrino. Elsai sase hige “Ani atewiinni horonta baxxeemmokkita egensiiseemmohe” yiino.—2 Mot. 2:2, 4, 6.

15. Geerra roduuwa hiittee xaꞌmuwa xaꞌma dandiineemmo?

¹⁵ Geerra roduuwa shaqqillunni mite xaꞌmo xaꞌmitine insa daafira heddinannita leellishshe. (Law. 1:5; 20:5; 1 Xim. 5:1, 2) Togo yitine xaꞌma dandiitinanni: “Wedellu heedhinoonni waro, halaale afidhinoonnita ammantinanni gede assinoꞌneri maati?” “Heeshshoꞌne giddo tuncu yiinoꞌne coyi Yihowawa gamba yitinanni gede kaaꞌlinoꞌnehu hiittoonniiti?” “Yihowara hagiirrunni soqqantinanni heedhinanni gede kaaꞌlinoꞌne coyi maati?” (1 Xim. 6:6-8) Hakkiinni insa xaggensa kultannoꞌne woyite seekkitine macciishshe.

16. Jawu rodiinna wedellichu rodii mitteenni hasaawansa lamunkura kaaꞌlitannohu hiittoonniiti?

¹⁶ Jawu rodiinna wedellichu rodii mitteenni hasaawansa lamunkura kaaꞌlitanno. (Rom. 1:12) Hatto assansa, wedellichu rodii Yihowa ammanantino soqqamaasinesi towaatannota albinni roore addaxxanno gede kaaꞌlitanno, jawu rodii kayinni banxannisita huwatanno gede assitanno. Qoleno jawu rodii Yihowa maassiꞌrinosi gara odeessanno woyite tashshi yaannosi.

17. Ammanaminohu geerru roduuwi dirinsa lexxi kiiro roore xuꞌmanno yineemmohu mayiraati?

¹⁷ Duucha woyite, diru lexxanni haꞌri kiiro danu xumme ajjanni hadhanno; Yihowara ammanamino manni kayinni dirinsa lexxi kiiro isi albaanni roore xuꞌmanno. (1 Tes. 1:2, 3) Hatto yineemmohu mayiraati? Insa lowo diro Yihowa ayyaani quxannonsa gedenna akatansa biddi assannonsa gede assidhanni keeshshitino. Muxxe geerra roduuwanke albinni roore egennate, insa ayirrisatenna insawiinni rosate woꞌnaallummo kiiro, insa albinni roore muxxe jiro gede assine hendeemmo!

18. Aananno birxichira maa ronseemmo?

¹⁸ Songo roore jawaattanno gede, wedellu roduuwi geerra roduuwa naada calla ikkikkinni geerru roduuwino wedella roduuwa naada hasiissannonsa. Aananno birxichira, geerru roduuwi songote giddo noore wedella roduuwa naaddannota leellisha dandiitannohu hiittoonniitiro ronseemmo.