Wedellu Roduuwi Jawaante Naadde

1. Diru akkalle amaddannonke woyite maa assate mixo fushshiꞌra dandiineemmo?

DIRU akkalle amaddannonke woyite, xaate albi geeshsha Yihowara kaaꞌleemmori dino yine yaandeemmoha ikkara dandaanno. Dhukinke albihu geeshsha ikka hoogara dandaanno; ikkirono afiꞌnoommo hayyonna woꞌnaalsha horoonsiꞌne wedellootu Yihowara woꞌma wolqansanni soqqantanno gedenna wole soqqanshote qoossora ikkadda ikkitanno gede kaaꞌla dandiineemmo. Lowo diro cimeessa ikke soqqaminohu mittu rodii togo yiino: “Diru akkalle amaddeennae albi geeshsha soqqama hoogummo yannara, hakkoye looso loosa dandiitannori ikkaddu wedellu roduuwi noo daafira tashshi yiinoe.”

2. Konni birxichira maa ronseemmo?

² Sai birxichira, wedellu roduuwi geerru roduuwiwa aanansa kaaꞌlitannonsa gara ronsoommo. Konni birxichira geerru roduuwi umonsa heeshshi assannore, dhukansa afinore, galatannorenna elannore ikkansa wedellootu ledo kaaꞌlame loosate kaaꞌlitannonsa garanna tennenni songo woꞌma atoote afidhanno gara ronseemmo.

UMOꞌNE HEESHSHI ASSITINANNIRE IKKE

3. Filiphisiyusi Sokka 2:3, 4 kultanno garinni meessaneeto heeshshi assate yaa mayyaate? Kuni akati mittu Kiristaanchira kaaꞌlannohu hiittoonniiti?

³ Geerru roduuwi wedella roduuwa kaaꞌla hasidhuro umonsa heeshshi assa hasiissannonsa. Umosi heeshshi assanno manchi wolootu iso roortinohu gede asse hedanno. (Filiphisiyusi Sokka 2:3, 4 nabbawi.) Togoo akati noonsari geerru roduuwi, mitto looso Qullaawu Maxaafi ledo sumuu yaanno garinninna danchu garinni loosa dandiinanniti duucha doogga noota huwattanno. Hakko daafira insa, ‘Baalunku manni alba ninke loonseemmo garinni loosa hasiissannonsa’ diyitanno. (Ros. 7:10) Insa wedellu roduuwira kultannoti lowo geeshsha kaaꞌlitanno hayyo noonsaha ikkirono, ‘tenne gobba (alame) dani saꞌꞌanni’ woy soorramanni nootanna haarore rosa hasiissannonsaha ikkara dandaannota huwattanno.—1 Qor. 7:31.

4. Woradu aliidi laꞌꞌaano hundi Leewaawooti faale hadhannohu hiittoonniiti?

⁴ Umonsa heeshshi assitannori jajjabbu roduuwi, dirinsa lexxanni haꞌranno woyite albi geeshsha loosa dandiitannokkita huwattanno. Hanni woradu aliidi laꞌꞌaanonke lawishsha laꞌno. Insara 70 diro ikkannonsa woyite, wole looso loossara koyinsanninsa. Tini shota ikka hooggansara dandiitanno. Mayira yiniro, roduuwansa towaata lowo geeshsha hagiirsiissannonsa. Kuni insa lowo geeshsha baxxanno loosooti; qoleno xaano konni garinni soqqama lowo geeshsha hasidhanno. Ikkirono insa konne looso aju roduuwi loossuro woyyannota affino. Konni garinni insa hunda Israeelete manni mereero noo Leewaawooti faale hadhanno; hakkawaro Leewaawootu 50 diro woꞌmannonsa woyite xaadooshshu dunkaani soqqanshonsa uurrissanno gede kullanninsa. Kuri jajjabbu Leewaawooti uyinanninsa loosi ikkihano ikkiro hagiirrunni loossanno. Insa wolqansa assitu deerrinni diinaggaabbe loosse, wedella Leewaawoota kaaꞌlitanno. (Kir. 8:25, 26) Alba woradu aliidi laꞌꞌaano ikkite soqqantino roduuwinke, albi gede batinye songuwa towaattannoha ikka hoogirono, xa noo songo lowo geeshsha kaaꞌlitanninna jawaachishshanni no.

5. Daaninna Keeti lawishshinni maa rosootto?

⁵ Hanni 23 diro woradu aliidi laꞌꞌaancho ikke soqqaminohu Daani yinanni rodii lawishsha laꞌno. Daanira 70 diro ikkisita, isonna minaamasi Keeti baxxitino suwisaano ikke soqqamanno gede assinoonni. Insa haaro soqqanshonsa rosinohu hiittoonniiti? Daani, xa albinni roore Maganu loosi woꞌminosita coyiꞌrino! Isi songote looso loosanno, labballo roduuwa songote soqqamaasine ikkate ikkadda ikkitanno gede kaaꞌlanno, hattono roduuwu katamahonna usuru mine farcidhanno gara qajeelsanno. Geerra roduuwa, woꞌma yanna soqqansho giddo heedhinoonniha ikkirono ikka hoogirono, woloota kaaꞌlate lowore assa dandiitinanni. Hiittoonni? Haaro heeshshoꞌnenni hagiidha rosse, haaro mixo fushshidhe, hattono assa dandiitinannikkire agurtine assa dandiitinannire illachishshe.

DHUKAꞌNE AFFINOONNIRE IKKE

6. Dhukanke afa hayyote yineemmohu mayiraati? Lawishshunni kuli.

⁶ Dhukasi afino manchi, assa dandaannokkiri noota huwatanno. (Law. 11:2, NW) Hakko daafira kuni manchi wolqasira aleenni ikkinore assate dihedanno. Konninni kainohunni, hagiirraamo ikke heeꞌranno, hattono loosisinni dancha guma afiꞌranno. Dhukasi afino mancho, biskilliite gulufe haꞌranni heeꞌre buusu noowa iillino manchi ledo heewisiisa dandiineemmo. Kuni manchi hakkoye laga fulate biskilliitete aaninni dirra hasiissannosi. Isi hakkawoyite umi gede rahe rahe haꞌrannokkiti egennantinote; ikkirono alba hige haꞌra diaguranno. Hatteente gede, dhukasi afino manchi Yihowara soqqamanninna woloota kaaꞌlanni heeꞌrate mitore biddi assiꞌra hasiissannosihu mamooteetiro afino.—Fil. 4:5.

7. Barzilayi dhukasi afinoha ikkinota leellishinohu hiittoonniiti?

⁷ Hanni Barzilayi lawishsha laꞌno; Moote Daawiti iso mootete mine amaalaanchosi ikkara koyisisi woyite 80 diro ikkannosi. Barzilayi kayinni dhukasi afinoha ikkino daafira, maahoyye diyiino. Isi diru akkallenni kainohunni garire asse afannokkita afino daafira, isi bayicho aju beetti Kimihaami haꞌriro woyyannota coyiꞌrino. (2 Sam. 19:35-37) Barzilayi gede, geerru roduuwino looso wedellu labballi loossanno gede hagiirrunni uyitanno.

8. Moote Daawiti qullaawa mine minara kai woyite dhukasi afinoha ikkinota leellishinohu hiittoonniiti?

⁸ Moote Daawitino dhukasi afinoha ikke dancha lawishsha ikkinonke. Isi Yihowara mine minate lowo geeshsha quqquxamino. Ikkollana, Yihowa mine minannosihu wedellicha Selemooni ikkinota kulisita, Daawiti Yihowa yiinore maahoyye yee adhino; hattono konne looso woꞌmu wodanisinni kaaꞌlino. (1 Dud. 17:4; 22:5) Selemooni ‘shiimanna togoo looso loose egenninokkiha’ ikkino daafira, Daawiti Yihowa mine minate ani woyyeemmo yee dihedino. (1 Dud. 29:1) Daawiti, Yihowa mine minne gundanni gede kaaꞌlannori albisa ikke looso loosiisanno manchi diro woy egenno ikkitukkinni Yihowa maasso ikkitinota afino. Yannankerano, geerru roduuwi Daawiti lawishsha harunsite loosinsa soorramiro nafa diinaggaabbe soqqantanno. Qoleno alba insa loossanno looso loossanni noo wedelloota Yihowa maassiꞌrannota affino.

9. Mittu Sinu Biiro Komite miili dhukasi afinoha ikkinota leellishinohu hiittoonniiti?

⁹ Yannankera, Shiigiyo yinanni rodiino dhukasi afinoha ikkinota leellishino. Isi 1976nni 30 dirihu heeꞌreenna, Sinu Biiro Komite miila assine shoommoonnisi. Hakkiinni 2004nni Sinu Biiro Komite qineessaancho ikkino. Isi gedensoonni dhukisi albihu geeshsha ikkinokkitanna loososi albi gede yannante loose iillisha dandaannokkita huwati. Shiigiyo huuccatto assiꞌre, konne looso aju rodii loosiro woyyannohu mayiraatiro seekke hedino. Shiigiyo xa qineessaancho ikka hoogirono, Sinu Biiro Komite miila ikke soqqamanni no. Barzilayi, Moote Daawitinna Shiigiyo lawishshi leellishannonte gede, umosi heeshshi assannohunna dhukasi afino manchi wedellootu woꞌnaalshu noonsakkire ikkansa ikkikkinni jawaantensa illachishanno. Togoo manchi wedelloota isi ledo heewisantannori gede ikkikkinni loosu miillasi gede asse hedanno.—Law. 20:29.

GALATTINANNIRE IKKE

10. Geerru roduuwi songote giddo noore wedella roduuwa ma garinni laꞌanno?

¹⁰ Geerru roduuwi wedella roduuwa Yihowa elto gede assite heddanno; qoleno tenne eltora Yihowa galattanno. Geerru roduuwi dhukinsa ajanni haꞌranno woyite, looso loosatenna songo kaaꞌlate jawaantenna hasatto noonsa wedellooti heeꞌransanni tashshi yaannonsa.

11. Ruuti 4:13-16 wedellootu kaaꞌlitankera maahoyye yaa atoote abbitannota leellishshannohu hiittoonniiti?

¹¹ Qullaawu Maxaafi giddo kulloonniti Naoomi, wedellitte beetto kaaꞌlitasera maahoyye yite kaajja lawishsha ikkitino. Naoomi umo beettise beetto Ruuti agurte mannisewa higganno gede amaaltinose. Ikkollana, Ruuti Naoomi ledo Beeteliheme hadhara murcidhino; hakko daafira Naoomi Ruuti ledose hadhino daafira hagiidhitino hattono kaaꞌlose maahoyye yite adhitino. (Rut. 1:7, 8, 18) Konni garinni lamenti lowo atoote afiꞌrino! (Ruuti 4:13-16 nabbawi.) Umonsa heeshshi assannohu geerru roduuwi Naoomi lawishsha harunsanno.

12. Soqqamaasinchu Phaawuloosi galatannota leellishinohu hiittoonniiti?

¹² Soqqamaasinchu Phaawuloosi roduuwu kaaꞌlitinosi daafira galatino. Lawishshaho isi, Filiphisiyusi songo Kiristaani maalaamittete hasiisannosire soyinosi daafira insa galatino. (Fil. 4:16) Qoleno Ximootewoosi kaaꞌlinositerano galatino. (Fil. 2:19-22) Hakkiinni saeno Phaawuloosi usurrasira Rooma haaꞌne haꞌnisi woyite roduuwu jawaachishshasira daggino daafira Magano galatino. (Soq. 28:15) Phaawuloosi jawaata manchooti; isi sabbakanninna songuwa jawaachishanni lowo kume kiilo meetire ikkitanno doogo haꞌrino. Ikkirono isi naaxxe roduuwu kaaꞌlitannosita digiwino.

13. Geerru roduuwi wedellu roduuwi daafira galattannore ikkitinota leellisha dandiitannohu hiittoonniiti?

¹³ Geerra roduuwa, songoꞌne giddo noo wedellooti daafira galattinannire ikkitinoonnita leellishshinanniti duucha doogga no. Insa mitowa hadhinanni woyite kaaꞌlitaꞌnera, dikko fulte mitore hirtaꞌnera, woy wolere assite kaaꞌlitaꞌnera hasidhuro, hagiirrunni maahoyye yiiyye. Togoo kaaꞌlo Yihowa baxannoꞌneta leellishanno coyi gede assitine hedde. Kaaꞌlitannoꞌne roduuwi ledo lubbote jaalla ikkitinara dandiitinanni. Kuri jaallaꞌne ayyaanaamittetenni roore lophitanno gede woꞌmanka woyite kaaꞌlensa; hattono wedellu roduuwi songo albinni roore kaaꞌlate sharrantanna laꞌinanni woyite tashshi yaannoꞌneta kullensa. Qoleno ledonsa yanna sayissine woꞌnaalshaꞌne kullensa. Hatto assitiniro, Yihowa minisira abbino wedellooti daafira iso ‘galattinannire’ ikkitinoonnita leellishshinanni.—Qol. 3:15; Yoh. 6:44; 1 Tes. 5:18.

ELTINANNIRE IKKE

14. Moote Daawiti elannoha ikkinota leellishinohu hiittoonniiti?

¹⁴ Moote Daawiti geerru roduuwira hasiisannoha wole kaajja akata yaano elannoha ikkinotano leellishino. Isi qullaawa mine minate hasiisannoha lowo woxenna jajja umisi miinji aaninni kayise uyino. (1 Dud. 22:11-16; 29:3, 4) Isi tenne assinohu mannu qullaawa mine minsiisinohu Selemooniiti yaannota afanni heeꞌreeti. Xaa yannara Maganu mine minate dhukinke assannokkiha ikkiro, dandiinummo deerrinni woxe fushshine konne looso kaaꞌla dandiineemmo. Qoleno lowo diri giddo afiꞌnoommo woꞌnaalshinni wedella roduuwa kaaꞌla dandiineemmo.

15. Soqqamaasinchu Phaawuloosi Ximootewoosira maa elino?

¹⁵ Hanni soqqamaasinchu Phaawuloosino elannoha ikke lawishsha ikkinonke gara laꞌno. Isi Ximootewoosi ledosi misiyoone ikke soqqamanno gede koyisino; qoleno sabbakannonna rosiisanno hayyo konni wedellichira kulinosi. (Soq. 16:1-3) Phaawuloosi Ximootewoosi Maganu Mangiste sokka danchu garinni duduwanno gede qajeelsinosi. (1 Qor. 4:17) Hakkiinni Ximootewoosino Phaawuloosi rosiisinosi hayyo horoonsiꞌre woloota qajeelsino.

16. Shiigiyo woloota qajeelsinohu mayiraati?

¹⁶ Yannankera noohu geerru roduuwi, ‘Songote giddo ninke loonseemmo looso loossara wedelloota qajeelsinummoro ninke looso hoongeemmo’ yee diyaadanno. Lawishshaho aleenni kullihu Shiigiyo haarote Sinu Biiro Komite miila ikkitino roduuwa lowo diro qajeelsanni keeshshino. Isi tenne assinohu isi noo gobbara loonsanniha Maganu Mangiste looso kaaꞌlateeti. Hakko daafira isi qineessaancho ikke soqqama dandaa hoogi yannara, wonanni dancha gede qajeelino rodii isi bayicho loosa dandiino. Shiigiyo 45 saꞌꞌanno diro Sinu Biiro Komite miila ikke afiꞌrino woꞌnaalsha xaano wedellu roduuwira kula diagurino. Togoo roduuwi Maganu mannira lowo eltooti!

17. Luqaasi 6:38 kultanno garinni geerru roduuwi wolootaho maa aa dandiitanno?

¹⁷ Kiꞌne geerru labballunna meya roduuwi, Yihowara ammanatenninna minshe nookkire ikkine soqqamate geeshsha ikkannori nookkita heeshshoꞌnenni leellishshinoonni. Qullaawu Maxaafiha xintu seera rosanna ronsoommo garinni heeꞌra kiissannota ikkitinota lawishsha ikkitine leellishshinoonni. Woꞌnaalshu nooꞌnere ikkitinoonni daafira konni albaanni mitto looso ma garinni loonsanniro affinoonni; ikkirono haarore rosa hasiissannohu mayiraatirono huwattinoonni. Muli yannara cuuantinoonniri geerru roduuwino, wolootaho aa dandiitinanniri lowori nooꞌne; geedhimmaꞌne dirinni Yihowa afaꞌne mageeshshi geeshsha hagiirsiissinoꞌnero kula dandiitinanni. Wedellu roduuwi woꞌnaalshaꞌnenna heeshshoꞌne giddo rossinoonnire macciishsha baxxanno. Wolootaho woꞌnaalshaꞌne kultine ‘aa’ baxxinannire ikkitinoonnita leellishshiniro Yihowa lowo geeshsha maassiꞌrannoꞌne.—Luqaasi 6:38 nabbawi.

18. Geerru roduuwinna wedellu roduuwi mimmito kaaꞌla dandiitannohu hiittoonniiti?

¹⁸ Kiꞌne muxxe geerru roduuwi wedellu roduuwiwa aantinanniha ikkiro, mimmito jawaachisha dandiitinanni. (Rom. 1:12) Mittoho nookkihu danchu coyi woleho heeꞌranno. Geerru roduuwira lowo diri giddo afidhino hayyonna woꞌnaalshi noonsa. Wedellu roduuwira kayinni wolqanna jawaante noonsa. Wedellootunna geerru roduuwi jaalla ikkite mitteenni loossuro, baxillaanchu iimi Anninke ayirranno hattono songote giddo noori baalunku horo afidhanno.