Geedhimma Hagiirre Huntahera Wodhitooti

1-2. Yihowa ammanamino geerra ma garinni laꞌꞌanno? (Faarso 92:12-14; misileno lai.)

ALAME woꞌmate heeꞌranno mannira geedhimmate daafira babbaxxitino lao noonsa. Hanni mitto lawishsha hedi: Mite yite umoho awuuwicho fultinoheta afitto yanna qaagatto? Awuuwekki mittuno afikkinni cirte hoolate woꞌnaaloottoha ikkara dandaanno. Ikkollana awuuwe cire hoola wole fultannokki gede assitannokkita huwatitto. Kuni lawishshi lowo manni geedhimma gargadhate gaaramannota leellishanno.

² Iimi Anninke kayinni, geedhitino soqqamaanosi laꞌꞌanno gari baxxinoho. (Law. 16:31) Yihowa insa lattino haqqicho gede ikkitinota coyiꞌrino. (Faarso 92:12-14 nabbawi.) Isi hatto yiinohu mayiraati? Duucha woyite daro shembe yitannotinna suꞌnaanno daraarcho daraartannoti lowo diro heedhino haqqeeti. Biifadda haqqe giddo mitte Jaappaanete gobbara heedhannote cheerii yinannite daraartanno haqqichooti. Kuri haqqe giddo lowo geeshsha biiffannoti kume saꞌꞌanno diro heedhinote. Tenne sigiiga haqqe gede ammanantino geerrino roorenkanni Yihowa illera biifaddaho. Yihowa laꞌꞌannohu awuuwensa calla diꞌꞌikkino. Isi geerraho noonsata kaajja akatta lawishshaho cincansanna ammanamansa hattono isira lowo diro ammanante soqqantino soqqansho naadanno.

3. Yihowa hedinore wonshate geerra horoonsiꞌrino gara leellishanno lawishsha kuli.

³ Geedhimma mittu manchira Yihowa albaanni noosi waaga diajishshanno.a Isinni duucha woyite Yihowa hedinore wonshate geerra horoonsiꞌrino. Lawishshaho Yihowa Saarara wolqaataame daga amanna Buuramino Mootera ahaahe ikkitannota kulise woyite ise geerchote. (Kal. 17:15-19) Yihowa Musera, Israeele Gibitsetenni haaꞌre fushshanno gede kulisi woyite isi jawa manchooti. (Ful. 7:6, 7) Soqqamaasinchu Yohaannisino Yihowa Qullaawu Maxaafita onte maxaaffa borreessanno gede qullaawu ayyaaninni massagisi yannara geerchoho.

4. Lawishsha 15:15 kultanno garinni geerru iillannonsa qarra dandiite heedhanno gede mayi kaaꞌlannonsa? (Misileno lai.)

⁴ Geedhimma lowo qarra redhite dagganno. Mitte rodoo haariintanni, “Gelfu geedhoonke!” yitino. Ikkollana geerru hagiirraammab ikkiro, geedhimma abbitanno qarra cince heeꞌra dandaanno. (Lawishsha 15:15 nabbawi.) Konni birxichira geerru hagiirraamma ikkite heeꞌrate assa dandiitannoha mito coye laꞌneemmo. Wolootu songonsara noore geerra roduuwa kaaꞌla dandiitanno garano ronseemmo. Hanni balanxe, geedhimmate yannara hagiirraamma ikke heeꞌra qarra ikkitara dandiitannohu mayiraatiro laꞌno.

GEEDHIMMA HAGIIRRE HUNTARA DANDIITANNO GARA

5. Mito geerra hexxo mudhitanno gede assannonsari maa ikkara dandaanno?

⁵ Ate hexxo mudhatto gede assahera dandaannori maati? Bashsho assattore xa assa hoogakki dadillissahera dandiitanno. Wedellichunna fayyu nootto yanna halchattoha ikkara dandaanno. (Ros. 7:10) Lawishshaho Ruubi yinanni rodoo togo yitino: “Dhiwanni waadannoe daafiranna milli yaa dandeemmakki daafira uddano uddiꞌra nafa qarra ikkitinoe. Lekka kayise kaalse wodhe nafa diafeemma. Naatu dhibbinni kainohunni anga jingilli yitinoe daafira, shiimmaaddare assa nafa gooddo ikkitannoe.” Beetelete soqqaminohu Harooldino togo yiino: “Bashshoo ane ikkoommokki daafira mito woyite hifatameemmo. Wedellichu noommo waro ani forsaho. Kaase godoꞌla baxeemmo. Wolootu, ‘Isi horo disoꞌrannonna kaase Harooldira uyiyye’ yitanno. Xa kayinni kaase ole nafa afeemmoha dilawannoe.”

6. (a) Mito geerra hexxo mudhitanno gede assansara dandaannohu wolu coyi maati? (b) Geerru kaameela kada agura hasiissannonsaronna teꞌee murate mayi kaaꞌlannonsa? (Tenne ittimera nooha “Kaameela Kadonso Aguro?” yaanno birxicho lai.)

⁶ Bashsho gede umokki dandiite heeꞌra hoogakkino hexxo mudhatto gede assitahera dandiitanno. Hakko iso towaatannohe mancho worroonniheha woy oosokkiwa heeꞌra gidde ikkitinoheha ikkiro, tini dadillissahera dandiitanno. Dhibbunni woy illete dunkanni kainohunni hasiꞌroottowa callikki haꞌra woy kaameela kada hoogootto daafira, hexxo mudhoottoha ikkara dandaanno. Kuni dadillisanno coyeeti! Ikkollana, umonke dandiine callootu heeꞌra hooganke woy kaameela kada hooganke Yihowanna wolootu albaanni noonke waaga ajishshannokkita qaagakki kaaꞌlitannohe. Qoleno Yihowara qarrinke leellannosita addaxxa dandiineemmo. Yihowa laꞌꞌannohu giddoyidi ayimmankeeti; isonna ammante roduuwanke mageeshshi geeshsha banxeemmoro afino.—1 Sa. 16:7.

7. Tenne alame goofimarchi ninke lubbote heeꞌneenna daa hoogara dandaanno yite yaaddannore mayi kaaꞌlansara dandaanno?

⁷ Tenne alame goofimarchi ani lubbote heeꞌreenna daa hoogara dandaanno yite yaadoottoha ikkara dandaanno. Hatto ikkiro mayi kaaꞌlannohe? Yihowa tenne busha alame hunate cince agare noota qaagi. (Isa. 30:18) Ikkollana isi cincinohu dimullaati. Cincasi lowo miliyoone ikkanno manni iso afannonna isira soqqamanno yannanna faro afiꞌranno gede assitino. (2 Ph. 3:9) Hakko daafira hexxo mudhatto woyite, Yihowa cinca goofimarchu daara albaanni lowo manna kaaꞌlitanni noota hedi. Kuri giddo mitu minikki manna ikkara dandaanno.

8. Geedhimma abbitanno qarri geerra ma assara dandaanno?

⁸ Ajano ikkino akkala, xissannonke woyite ganaanni gaabbisannonkere coyiꞌnammora woy assinammora dandiineemmo. (Ros. 7:7; Yaq. 3:2) Lawishshaho ammanamino manchi Iyyoobi lowo qarri amadisita, “qasanno coye” coyiꞌrino. (Iyo. 6:1-3) Qoleno dhibbinsa woy adhitanno xagichi geerru wonaatiro coyidhannokkire coyidhanno gede woy wonaatiro assitannokkire assitanno gede assansara dandaanno. Hige ninke giddo mittuno geedhimma woy dhibba kuꞌline gara ikkinokkire coyira woy woloota qarrisa dihasiꞌneemmo. Mittu manchira gara ikkinokkire coyiꞌnoommoti leeltunkero, ranke maaro xaꞌmiꞌra hasiissannonke.—Mat. 5:23, 24.

HAGIIRRAAMMA IKKINE HEEꞌRATE KAAꞌLANNORE

9. Wolootu kaaꞌlitannoheta giwa hasiissannohekkihu mayiraati? (Misillano lai.)

⁹ Wolootu kaaꞌlitannoheta gibbooti. (Gal. 6:2) Umi qara tini qarra ikkitahera dandiitanno. Gireetili yinanni rodoo togo yitino: “Duha ikkeemmansaha lawannoe daafira, wolootu kaaꞌlo maahoyye yee adha qarra ikkitannoe. Hedoꞌya biddi assiꞌratenna umoꞌya heeshshi asse kaaꞌlo hasiissannoeta ammanate yanna hasiissinoe.” Wolootu kaaꞌlitahera maahoyye yiittoro, insa uyiniro afiꞌnanni hagiirre afidhanno gede assitanni nootto. (Soq. 20:35) Mannu baxannohetanna towaatahera hasiꞌrannota afakki ateno hagiirsiissannoheti egennantinote.

10. Assinoonniherira galata hawa hasiissannohekkihu mayiraati? (Misileno lai.)

¹⁰ Galatattoha ikki. (Qol. 3:15; 1 Te. 5:18) Wolootu danchare assitannonke woyite wodaninkenni galanteemmonsaha ikkirono, fushshine coyiꞌne galata hambammora dandiineemmo. Ikkollana muushshi yine galateemmohe yineemmonsaha ikkiro, assitinonkere naandoommota affanno. Beetelete geerra towaattannoti Liya yinanni rodoo togo yitino: “Towaateemma roduuwi giddo mitte, harancho galatu borro borreessitannoe. Borro seeda ikka hooggurono baxissannote. Borreessitannoe borro nabbawa baxeemma; kaaꞌleemmase kaaꞌlo naaddannota afaꞌyano hagiirsiissannoe.”

11. Woloota kaaꞌla dandaattohu hiittoonniiti? (Misileno lai.)

¹¹ Woloota kaaꞌlate woꞌnaali. Yannakkinna wolqakki woloota kaaꞌlate horoonsiꞌrattoha ikkiro, qarrakki calla dihedatto. Geerru, hayyo amaddino maxaaffa woꞌmitino mini gedeeti. Ikkollana sammi yine worre agurroonni maxaaffa rosiissara woy xagge kultara didandiitanno. Hakko daafira egennokkinna woꞌnaalshakki wedellootaho ati shiqqe kulinsa. Xaꞌmo xaꞌminsa; hakkiinni macciishshi. Woꞌmanka woyite woyyitannotinna hagiirraamma assitannonsati Yihowa seerinni gala ikkitinota rosiisinsa. Wedelloota roduuwakki sheshifachishattonna jawaachishatto woyite atino hagiidhattoti egennantinote.—Fa. 71:18.

12. Isayyaasi 46:4 kultanno garinni Yihowa geerraho uyino hexxo maati? (Misileno lai.)

¹² Jawaachishannohe gede Yihowa huucciꞌri. Mannimmaꞌneno surreꞌneno daafurtara dandiitanno; Yihowa kayinni “horo didaafuranno; dihooganno.” (Isa. 40:28) Yihowa gawalo nookki wolqasi horoonsiꞌranno doogga giddo mitte, ammanantino geerra jawaachishate. (Isa. 40:29-31) Isi kaaꞌlannonsata kule qaale eino. (Isayyaasi 46:4 nabbawi.) Yihowa woꞌmanka woyite eino qaale wonshanno. (Iya. 23:14; Isa. 55:10, 11) Huuccatto assiꞌrittohu gedensaanni Yihowa baxillenna irko laꞌꞌatto woyite lowo geeshsha hagiidhatto.

13. Layinki Qorontoosi 4:16-18 kultanno garinni, maa qaaga hasiissannonke? (Misileno lai.)

¹³ Qarrikki yannate geeshshiha ikkinota qaagi. Iillinonke qarri yannate geeshshiha ikkinota qaangummoro, hakkoye qarra cince saꞌꞌa shota ikkitannonke. Qoleno Qullaawu Maxaafi geedhimmanna dhibbu yannate geeshshiha ikkinota kulannonke. (Iyo. 33:25; Isa. 33:24) Roore dancha yanna saꞌinota ikkitukkinni albakkiinni nootta affe hagiidha dandaatto. (2 Qorontoosi 4:16-18 nabbawi.) Ikkina wolootu kaaꞌla dandiitannohu hiittoonniiti?

WOLOOTU KAAꞌLA DANDIITANNO GARA

14. Geerra mare laꞌꞌanna insara silke bilbila hasiissannohu mayiraati?

¹⁴ Geerra roduuwa ganyitine martine laꞌensa, hattono silke bilbillensa. (Ibi. 13:16) Geerra callimma amaddansara dandiitanno. Kamiili yinannihu mininni fule afannokki rodii togo yiino: “Soodonni kayise hawarro geeshsha mininni difuleemmo. Hakko daafira lowo geya ceeꞌmishannoe. Mito woyite godu giddonni fule afannokkihu geedhino doobbiichi gede ikkoommoha lawannoe. Yaachishannoe, hattono caacceessannoe.” Geerra marre laꞌneemmonsaha ikkiro, naandeemmonsatanna banxeemmonsata affanno. Baalunku songonkera nooha mitto geercho rodoo marre laꞌꞌate woy isira silke bilbilate hende kaꞌne hamboommo yanna heedhara dandiitanno. Ninke baalunkura loosu batiꞌrannonke. Ikkina “roore hasiisanno coye” balaxisiisate lawishshaho geedhitino roduuwa mare laꞌꞌate mayi kaaꞌlankera dandaanno? (Fil. 1:10) Songoꞌnera noori geerru roduuwi suꞌma, hattono insara sokka borreessitinanni woy silke bilbiltinanni barra borreesse amaxxa kaaꞌlitaꞌnera dandiitanno. Insa martine laꞌꞌateno pirogiraame fushshiꞌra dandiitinanni; injiie woyite mare laeemmona yitine heddinoonte.

15. Wedellunna geerru mitteenni maa assa dandiitanno?

¹⁵ Ati wedellichahoro, geerru ledo maa hasaaweemmo woy maa asseemmo yite yaadattoha ikkara dandaanno. Ikkollana tennera quwa saꞌe yaada dihasiissannohe. Dancha jaala ikki. (Law. 17:17) Songote gambooshshi hanafara albaanni woy goofihu gedensaanni geerru ledo hasaawi. Baxxanno qummeeshsha woy anje heedhe assitinoha muushshi assanno coye kultannohe gede xaꞌma dandaatto. Qoleno JW Biroodikaaste ledokki laꞌanno gede koyisa dandaatto. Mitore assiteno kaaꞌlattonsara dandaatto. Lawishshaho, silkensa woy taabileetensa haaroonsidhanno gede woy xiinxallinannita haaro borro dirrisidhanno gede kaaꞌlattonsara dandaatto. Kaarooli yinanni rodoo togo yitino: “Kiꞌne assa baxxinannire geerru ledoꞌne assitanno gede koyissensa. Ani geedhoommaha ikkirono, xaano hagiirraame ikka hasiꞌreemma. Dikkiꞌra, mitore gobba fule itanna kalaqama laꞌꞌanni boohaara baxeemma.” Maariya yinanni rodoo togo yitino: “Jaallaꞌya giddo mitte 90 dirite. Ise ane 57 diro bayirtannoe. Ikkirono, osoꞌlinanninna filme laꞌnanni mitteenni yanna sayinseemmo daafira duucha woyite tenne haweemma. Qarru tuncu yaannonke woyite mimmito amaaꞌlineemmo.”

16. Geerru akimete minira hadhanno woyite ledonsa haꞌra dancha ikkitinohu mayiraati?

¹⁶ Akimete minira hadhanno woyite ledonsa hadhe. Geerra kaameelunni haadhine hadhinanninsatano agurranna, akimootu hasiisannonsare assite danchu garinni towaattanni noonsaronna teꞌee buuxa dandiitinanni. (Isa. 1:17) Akimootu kultannonsare borreessitine amaddineno kaaꞌlitinansara dandiitinanni. Ruuti yinanniti geercho rodoo togo yitino: “Dinye heedheennae akimete minira callaꞌya mareemma woyite akimootu haja assite dimacciishshitannoe. Insa, ‘Dhiwamoottahalla lawinohena ikkoottari dino’ yitannoe. Mitu manni ledo haꞌreemma woyite kayinni akimootu danchu garinni towaattannoe. Roduuwu yannansa uyite ledoꞌya hadhanno daafira galateemmansa.”

17. Geerru ledo hiikko gari soqqansho soqqama dandaatto?

¹⁷ Ledonsa soqqamme. Mitu geerri dhuka hoogganno daafira minunni mine hadhe soqqama hooggara dandiitanno. Lawishshaho mitte geercho rodoo, gudumaalu soqqansho ledo soqqantinanni gede koyisattosera dandaatto? Borrote gaare mule ofoltanno gede wombare qixxeessattosera dandaatto. Woy Qullaawa Maxaafa xiinxallisatto woyite mitto geercho rodoo koyisa hattono Qullaawu Maxaafi xiinxallo minesi xiinxallisa dandaatto? Geerru qanchu soqqansho gambooshshe qarrantukkinni beeqqa dandiitanno gede, cimeeyye gambooshshe insa mine assinanni gede qineessitara dandiitanno. Geerra roduuwa banxeemmotanna ayirrinseemmota leellishate assineemmori gaabbisannore diꞌꞌikkino.—Law. 3:27; Rom. 12:10.

18. Aananno birxichira maa xiinxallineemmo?

¹⁸ Kuni birxichi Yihowa geerra baxannotanna naadannota qaagiissinonke. Ninkeno songonke giddo noo geerra banxeemmo hattono naandeemmo! Geedhimma qarrissannote; ikkirono Yihowa kaaꞌlonni hagiirraamma ikkitine heeꞌra dandiitinanni. (Fa. 37:25) Roore dancha yanna saꞌinota ikkitukkinni albakkiinni noota afa jawaachishshannote! Maateꞌne miili giddonni geedhinoha, qaaqquullenna dhiwamino jaalaꞌne towaaxxitinannirina? Hagiirriꞌne baikkinni heeꞌra dandiitinannihu hiittoonniiti? Aananno birxichira tenne xaꞌmora qollanni dawaro hasaambeemmo.