XIINXALLOTE BIRXICHO 42
Cuꞌmiꞌroottohu Halaale Ikkinota Horo Huluullantooti
“Baalanka coye fonqoltine laꞌe, dancha ikkinoha adhe.”—1 TES. 5:21.
FAARSO 142 Hexxonke Seekkine Cuꞌmiꞌno
GUULCHOa
1. Batinyu mannira coyi gurchaawinonsahu mayiraati?
XAA yannara ninke Kiristaanaho yitannoti lowo kume ikkitanno ammaꞌno no; kuri baalunku Magano halaalunni magansiꞌnanni heeꞌnoommori ninkeeti yitanno. Hakko daafira batinyu mannira coyi gurchaawinonsa. Kuni manni, “Halaalaancho ammaꞌno mitte callatenso, tini baalanti ammaꞌno Magano hagiirsiissannote?” yee hedanno. Ninkena? Yihowa Farciꞌraasine rosiissanno rosi halaale ikkinotanna Magano hagiirsiisanno garinni magansidhanni noori insa calla ikkitinota buuxiꞌnoommo? Tenne woꞌmunni woꞌma buuxa dandiinanni? Hanni tenne huwatate kaaꞌlitannonke taje laꞌno.
2. Soqqamaasinchu Phaawuloosi cuꞌmiꞌrinohu halaale ikkinota ammaninohu mayiraati? (1 Teselonqe 1:5)
2 Soqqamaasinchu Phaawuloosi cuꞌmiꞌrinohu halaale ikkinota seekke ammanino. (1 Teselonqe 1:5 nabbawi.) Isi ammaninohu mulla baxisinosi daafira calla diꞌꞌikkino. Phaawuloosi Maganu Qaale diinaggaawe xiinxallanno manchooti. Isi “Qullaawa Borro baala Maganunnihu Qullaawu Ayyaani kulanna [borreessinoonnita]” ikkitinota ammanino. (2 Xim. 3:16) Phaawuloosi xiinxalle buuxino coyi maati? Isi Qullaawa Borro giddo, Yesuusi daanno yinoonni Mesihicha ikkinota buuxissannota ammansiissanno taje afiꞌrino. Ayihudenniri ammaꞌnote murrooti kayinni tenne taje lashshi assite agurtino. Kuri lawisiisaano ammaꞌnote murrooti halaale rosiinseemmoreeti yiturono, loosinsanni kayinni Magano kaaddino. (Tit. 1:16) Phaawuloosi kayinni insa gede Maganu Qaali giddo gama ammane gama agurannoha diꞌꞌikkino. Isi Maganu Qaali kulannore baalankare ammanatenna rosiisate qixxaawinoho.—Soq. 20:27.
3. Cuꞌmiꞌnoommohu halaale ikkinota buuxiꞌrate xaꞌmonke baalantera dawaro afiꞌra hasiissannonke? (“Yihowa Loosonna Hedosi ‘Hasaambe Gunde Dianfeemmo’” yitanno saaxineno lai.)
3 Mitootu addu ammaꞌno xaꞌmonke baalantera wole agurina Qullaawu Maxaafi giddo bande kulloonnikki coyira nafa dawaro qola hasiissannose yite heddanno. Hatto yee heda garaho? Hanni Phaawuloosi lawishsha laꞌno. Isi ammanate roduuwasi, “Baalanka coye fonqoltine laꞌe” yee amaalino; ikkirono isi huwatinokkihu batinyu coyi noota xawise coyiꞌrino. (1 Tes. 5:21) Isi “Egennonke xeate” yee borreessino; qoleno togo yiino: “Xa coꞌo yee leellinkekkinni hincilaallote giddoonni qolle laꞌnanni heeꞌnoommo.” (1 Qor. 13:9, 12) Phaawuloosi woꞌmankare afino yaa diꞌꞌikkino; ninketino hattoontilla. Ikkollana Phaawuloosi Yihowa daafira xinta ikkino halaale afino. Noosi egenno, cuꞌmiꞌrinohu halaale ikkinota ammanate ikkitanno geeshshite!
4. Cuꞌmiꞌnoommohu halaale ikkinota buuxiꞌra dandiineemmohu hiittoonniiti? Addu Kiristaani daafira maa ronseemmo?
4 Cuꞌmiꞌnoommohu halaale ikkinota buuxiꞌra dandiineemmoti mitte doogo, Yesuusi Yihowa halaalunni magansiꞌre lawishsha ikkinonke gara xaa yannara Yihowa Farciꞌraasine assitanni noori ledo heewisiisate. Konni birxichira, addu Kiristaani (1) kaphu maganna magansiꞌra giwannota, (2) Yihowa suꞌma ayirrisannota, (3) Qullaawu Maxaafi halaale baxannotanna (4) mimmito godowinta baxannota ronseemmo.
KAPHU MAGANNA MAGANSIꞌRA GIMBEEMMO
5. Magano halaalunni magansiꞌrate daafira Yesuusiwiinni maa ronseemmo? Isi rosiisinore harunsa dandiineemmohu hiittoonniiti?
5 Yesuusi Yihowa lubbora baxanno daafira, iima noo warono ikko uullate aana daye heeꞌri yannara iso calla magansiꞌrino. (Luq. 4:8) Rosaanosino Yihowa calla magansidhanno gede rosiisino. Yesuusino ikko ammanantino rosaanosi magansiꞌrate misilla horoonsidhe horo diegentino. Maganu Ayyaana ikkino daafira, mannu ooso loossannohu aye coyino Maganu ayirrinye leellishara horo didandaanno! (Isa. 46:5) Ikkina mannu qullaawootaho yee hedanno manni misile kayisanna insa huucciꞌrate daafira mayyaa dandiinanni? Yihowa Tonne Hajajo giddo layinkitera togo yiino: “Gordohono ikko baattote, baattote woroonni wayi giddo noorichinnino ikkiro magansiꞌrate yitine ayee misileno seekkidhinoonte. Kaphu magannara kumbuultinoonte.” (Ful. 20:4, 5) Magano hagiirsiisa hasidhannori, isi misile magansiꞌnammora hasiꞌrannokkita affino.
6. Yannankera Yihowa Farciꞌraasine magansidhannohu hiikkonne lawishsha harunsiteeti?
6 Xaggete xiinxallaano, hundi Kiristaani Magano calla magansiꞌrannota buuxxino. Lawishshaho, mittu xaggete maxaafi hundi Kiristaani magansiꞌnanni basera misilla horoonsiꞌra “effiꞌre giwannota” xawisino. Yannankera Yihowa Farciꞌraasineno umi xibbi diri Kiristaani lawishsha harunsitanno. “Qullaawootaho” yinanni manni misilla woy sokkaasine dihuucciꞌneemmo; wole agurina Yesuusa nafa dihuucciꞌneemmo. Qoleno baandiira keere dihaaꞌneemmo; hattono heeꞌneemmo gobba dimagansiꞌneemmo. Dayirino dayiro, Yesuusi “Mootichu Maganikkira kumbuuli; iso calla magansiꞌri!” yee hajajinonke hajajo ayirrisate murciꞌnoommo.—Mat. 4:10.
7. Yihowa Farciꞌraasine wole baalante ammaꞌnowiinni baxxitannohu mayinniiti?
7 Xaa yannara batinyu manni maccare ikkitinori ammaꞌnote murrooti hoode haꞌranno. Insa kore murroota quwa saꞌe jajjanno daafira, magansiꞌrate ledo taalo ayirrinye uyitannonsa. Batinyu manni beetekiristaanensa timanno, maxaaffansa hidhanno, hattono beetekiristaanensa kaaꞌlate lowo woxe fushshanno. Mitootu kuri ammaꞌnote murrooti yitannore baalankare ammantanno. Kuni manni ammaꞌnote murrootansa laꞌꞌanno woyite Yesuusa umosi lainohu gede ikke hagiidhanno! Yihowa halaalunni magansidhannorira kayinni qeese dinonsa. Mereeronke albisa ikkite soqqantannore ayirrinseemmoha ikkirono, Yesuusi ‘Kiꞌne [baalunku] roduuwaho’ yee rosiisinonke roso harunsineemmo. (Mat. 23:8-10) Ammaꞌnote murrichano ikko poletiku gashshaanchono ikko, manna dimagansiꞌneemmo. Qoleno togoo manni loosira dieꞌneemmo. Hatteentenni, alametewiinni baxxinoommore ikkine heeꞌneemmo. Tenne doogganni, ninke Kiristaanaho yitannote batinye ammaꞌnowiinni baxxinoommoreeti.—Yoh. 18:36.
YIHOWA SUꞌMA AYIRRINSEEMMO
Addu Kiristaani mannaho Yihoware kulanno woyite tashshi yaannonsa (Gufo 8-10 lai)d
8. Yihowa suꞌmasi ayirrinsammoranna manna baalaho dudumbammora hasiꞌrannota mayinni anfeemmo?
8 Mitte hige Yesuusi, “Annaꞌya, suꞌmakki ayirrisi!” yee huucciꞌrino. Yihowano gordoho heeꞌre lowo huuronni suꞌmasi ayirrisannota kule Yesuusi huuccattora dawaro qolino. (Yoh. 12:28) Yesuusi uullate aana soqqami yanna baalantera Annisi suꞌmi ayirranno gede assino. (Yoh. 17:26) Konni daafira, addu Kiristaani Maganu suꞌma woshshanna wolootaho kula lowo ayirrinyi gede asse kiiranno.
9. Umi xibbi diri Kiristaani Maganu suꞌma ayirrisannota leellishinohu hiittoonniiti?
9 Kiristaanu songo xintantuhunni shiima yanna gedensaanni, Yihowa ‘suꞌmisinni woshshino manna doorara daga towaatino.’ (Soq. 15:14) Kuni umi xibbi diri Kiristaani Maganu suꞌma woshshansanninna mannaho kulansanni hagiidhino. Roorenkanni insa soqqanshonsa yannaranna qullaawa borro borreessitu woyite Maganu suꞌma horoonsidhino.b Konni garinni insa Maganu suꞌmisinni woshshino manna ikkitinota leellishshino.—Soq. 2:14, 21.
10. Yihowa suꞌma dudubbannori Yihowa Farciꞌraasine calla ikkitinota mayinni anfeemmo?
10 Yihowa Farciꞌraasine Yihowa suꞌmisinni woshshanno mannaati? Hanni taje maa leellishshannoro laꞌno. Yannankera batinye ammaꞌnote murrooti mannu Maganu suꞌma afannokki gede assate dandaaminsare baala assitino. Insa Qullaawu Maxaafi tironsa giddonni Maganu suꞌma fushshite hooltino; mitowa isinni konne suꞌma beetekiristaanensa giddo horoonsiꞌnannikki gede agabbino.c Maganu suꞌmira ayirrinye uyitanni noori Yihowa Farciꞌraasine calla ikkitinota kaadannohu ayi no? Wole baalante ammaꞌnonni roore mannu baalunku Maganu suꞌma afanno gede assinanni heeꞌnoommori ninkeeti! Konni garinni, Yihowa Farciꞌraasine yinanni suꞌminke ledo sumuu yaanno garinni heeꞌrate dandiinummore baala assinanni heeꞌnoommo. (Isa. 43:10-12) Qullaawa Borrota Haaro Alame Tiro 240 miliyoone saꞌannota attamme mannaho iillinshoommo; tenne Qullaawu Maxaafi tiro giddo, Qullaawa Maxaafa tirtinori wolootu fushshite hooltinoha Maganu suꞌma bayichosi qolloonni. Qoleno Yihowa suꞌma amaddinota Qullaawu Maxaafi aana xintantino borro 1,000 saꞌꞌanno afiinni tirranni heeꞌnoommo!
QULLAAWU MAXAAFI HALAALE BANXEEMMO
11. Hundi Kiristaani halaale baxannota leellishinohu hiittoonniiti?
11 Yesuusi, Maganunnirenna Maganu hedinore kulanno halaale baalanka baxanno. Qoleno Yesuusi hakko halaali ledo sumuu yaanno garinni heeꞌrino; wolootuno konne halaale affanno gede assino. (Yoh. 18:37) Yesuusiti addu rosaanono halaale lowo geeshsha baxxanno. (Yoh. 4:23, 24) Isinni soqqamaasinchu Pheexiroosi Kiristinnu ammaꞌno ‘halaalu doogooti’ yiino. (2 Phe. 2:2) Hundi Kiristaani halaale lowo geeshsha baxanno daafira, halaalu ledo sumuu yaannokkiha ammaꞌnote roso, budenna woga, hattono mannu hedo giwino. (Qol. 2:8) Yannankerano addu Kiristaani ammanansanna heeshshonsa Yihowa Qaali ledo sumuu yitannota assiꞌrate sharramanno; konni garinni ‘halaalunni heeꞌrate’ dandaaminsare baala assanno.—3 Yoh. 3, 4.
12. Aliidi Bisi mitto coye biddi assa hasiissannota huwatanno woyite ma assanno? Konne assannohu mayiraati?
12 Xaa yannara noohu Maganu manni Qullaawu Maxaafi giddo noore baalankare anfoommo diyaanno. Maganu manni mito Qullaawu Maxaafi roso xawisinonna songo qineessanno gara lainohunni soꞌrino woyiti no. Tenne dhagge assiꞌra dihasiissannonke. Qullaawa Borro, halaalu egenno lexxitannohu sunu sununni ikkinota xawisse kultanno. (Qol. 1:9, 10) Yihowa halaale xawisannohu sunu sununniiti; hakko daafira, halaalu xawaabbi roore waraꞌa yee xawa geeshsha cince agadha hasiissannonke. (Law. 4:18) Aliidi Bisi mitto coye huwantoommo gara woy mitto looso loonseemmo gara biddi assa hasiissannota huwatiro, bayichonko biddi assanno. Batinye Suꞌmu Kiristinni ammaꞌno mito coye soorritannohu ammanaasinensa woy alame hagiirsiisateeti; Yihowa dirijjite mitto coye soorritannohu kayinni Yihowawa albinni roore shinqeemmo gedeetinna Magano Yesuusi magansiꞌrino garinni magansiꞌneemmo gedeeti. (Yai. 4:4) Mitto coye soorrineemmohu yanna soorrantino daafira woy batinyu manni hasatto wonshate yine ikkikkinni Qullaawa Borro yitannore albinni roore huwantoommo daafiraati. Addanko Qullaawu Maxaafi halaale banxeemmo!—1 Tes. 2:3, 4.
MIMMITO GODOWINTA BANXEEMMO
13. Addu Kiristaani leellishannohu roore luphi yee leellanno akati hiikkonneeti? Yannankera Yihowa Farciꞌraasine konne akata leellishshanni noohu hiittoonniiti?
13 Hundi Kiristaanira batinye dancha akatta noonsaha ikkirono, roore luphi yee leellannohu kayinni baxilleho. Yesuusi togo yiino: “Kiꞌne kiꞌneneewa baxantiniro, ane rosaano ikkitinoonnita mannu baalu tennenni egennannoꞌne.” (Yoh. 13:34, 35) Xaa yannara alame woꞌmate noorira Yihowa Farciꞌraasinera addu baxillinna mittimma noonsa. Addi addi gobbanninna budinni dangoommore ikkinummorono, ninke mitte maate gedeeti; konni garinni wole baalante ammaꞌnowiinni baxxinoommoreeti. Songote gambooshshinkewa, woradu gambooshshinkewanna qoqqowu gambooshshinkewa baxillinke xawe leellanno. Tinino Yihowa hagiirsiisanno garinni magansiꞌnanni heeꞌnoommori ninke ikkinoommota albinni roore ammanneemmo gede assitannonke tajeeti.
14. Efesooni Sokka 4:32 kultanno garinni, mimmito godowinta banxeemmota leellinsheemmoti mitte doogo hiitteeti?
14 Qullaawu Maxaafi “Mimmitiꞌne ledo seekkitine baxamme” yee amaalannonke. (1 Phe. 4:8) Togoo baxille leellisha dandiineemmo doogga giddo mitte, koffi assitinonkere gatona yaatenna kuꞌu koꞌoye cince heeꞌrate. Qoleno songote giddo noorira baalaho, wole agurina koffi assitinonkerira nafa shaqqille leellinsheemmo faro hasiꞌneemmo; hattono baalanka wosinimma adhineemmo. (Efesooni Sokka 4:32 nabbawi.) Mimmitoho togoo baxille leellinsheemmoha ikkiro, addu Kiristaana ikkinoommota mannu afanno gede assineemmo.
“MITTE AMMAꞌNA”
15. Hundi Kiristaani faale haꞌneemmoti wole doogga hiikkuriiti?
15 Hundi Kiristaani faale haꞌneemmoti wole dooggano no. Lawishshaho, dirijjitenke qinaabbinohu hundi Kiristaani qinaawino garinniiti. Hakkawari Kiristaaninte gede ninkerano songotenni songo hadhanni roduuwa towaattannori, cimeeyyenna songote soqqamaano noonke. (Fil. 1:1; Tit. 1:5) Qoleno insante gede ninkeno Maganu siimu xaadooshshinna adhamate daafira, hattono mundeete qullaambe daafira fushshino seera ayirrinseemmo; qoleno cubbo loosse maaro eꞌannokkiri songo gawajjitannokki gede agarreemmo.—Soq. 15:28, 29; 1 Qor. 5:11-13; 6:9, 10; Ibi. 13:4.
16. Efesooni Sokka 4:4-6 noo hedonni maa ronseemmo?
16 Yesuusi, ninke rosaanosiiti yaannohu batinyu manni heeꞌrannotanna iso halaalunni harunsitannori kayinni gama calla ikkitinota coyiꞌrino. (Mat. 7:21-23) Qoleno Qullaawu Maxaafi, goofimarchu barra batinyu manni “Magano magansiꞌrannoha lawanno” yee balaxe masaalino. (2 Xim. 3:1, 5) Ikkirono, Maganu Qaali Magano hagiirsiissannoti “mitte ammaꞌna” calla ikkitinota xawise kulanno.—Efesooni Sokka 4:4-6 nabbawi.
17. Xaa yannara Yesuusi hoode hadhanni noorinna mitte addu ammaꞌno harunsitanni noori ayeooti?
17 Xaa yannara noota mitte halaalu ammaꞌno harunsitanni noori ayeooti? Taje maa leellishshannoro laꞌnoommo. Yesuusi Magano ma garinni magansiꞌrinoronna hundi Kiristaanino isi faale haꞌrinohu hiittoonniitiro ronsoommo. Konni daafira, Magano halaalunni magansidhanni noori Yihowa Farciꞌraasine callaati. Maganu manna ikkanke, hattono Yihowa halaalenna isi albillitte assannore afanke ninkera lowo ayirrinyeeti! Konnira halaalu giddo heeꞌnoommota huluullammummokki konne halaale cuꞌmiꞌne heeꞌno.
FAARSO 3 Wolqanke, Hexxonkenna Irkonke
a Konni birxichira, Yesuusi Magano halaalunni magansiꞌre lawishsha ikkinonke garanna hundi Kiristaanino hakkonne lawishsha harunsino gara ronseemmo. Qoleno, yannankera Yihowa Farciꞌraasineno Yesuusi lawishsha harunsite Magano halaalunni magansidhanni noota leellishshanno taje laꞌneemmo.
b Maaja 1, 2010 Agarooshshu Shaera (Amaaru Afoo) qool. 6 noota “Hundi Kiristaani Maganu Suꞌma Horoonsiꞌrino?” yitanno saaxine lai.
c Lawishshaho, 2008nni Phaaphaasichu Benedikit 16kihu, Kaatolikete beetekiristaane giddo magansiꞌnanni woyite, faarsinanni woyite, woy huuccatto assinanni woyite “[Maganu suꞌma] gana” dihasiissanno yee hajajino.
d MISILETE XAWISHSHA: Mannu Maganu suꞌma amadinoha Qullaawa Maxaafa afoo dadhino qaalinni nabbawanno gede, Yihowa dirijjite Haaro Alame Tiro 200 saꞌꞌanno afiinni qixxeessitino.