MANNA GIWA AGURA DANDIINANNIHU HIITTOONNIITI?

1 | Mallaaddooti

Qullaawu Maxaafi Rosiisannore:

“Maganu manna [dimallaadanno]. . . . Aye gosano ikkiro Maganu waajjannosihanna dancha loosannoha baxanno.”—Soqqamaasinete Looso 10:34, 35.

Hatto Yaa Mayyaate?

Maganu Yihowaa gobbanke, sirchonke, dananke woy budenke lae isi togooho diyaannonke. Hatteentenni isi wodana laꞌꞌanno. Isinni Qullaawu Maxaafi ‘mannu aaniido laꞌꞌannota Yihowa kayinni wodana laꞌꞌannota’ kulanno.— 1 Saamueeli 16:7.

Ati Maa Assa Dandaatto?

Ninke mannu wodanita afa hoogummorono Maganu faale haꞌne mallaandeemmokkire ikka dandiineemmo. Mitte gaamo badde insa togooreeti yaantenni mittu mittunku manchi daafira afate woꞌnaali. Giwatto manni nooti leeltuhero tenne hedo wodanikkinni buqqisse hooꞌlatto gede kaaꞌlahera Magano huucciꞌri. (Faarso 139:23, 24) Yihowa mallaadattokki gede kaaꞌlahera dancha giddonni huucciꞌrittoro isi huuccattokki macciishshe kaaꞌlannoheta addaxxa dandaatto.—1 Pheexiroosi 3:12.

a Yihowa Maganu suꞌmaati.—Faarso 83:18, NW.

“Alba faranjete ledo keeruyi dihasaaweemmo . . . Xa kayi alamete doyichora noohu mimmito baxanno roduuwi wido ikkoommo.”—TAAYITESI

Addu Xagge—TAAYITESI

Manna Giwa Agurino

Taayitesi faranjenna koliddu manni xaadannokki gede fushshinoonni seerira lowo geya giiramino; konnira isinte gedee lao noonsari finqila gaamo miila ikkino. Isi togo yiino: “Gibbo kayisate yine calla koliddu manni eannokki gede hoolloonniwa lawishshaho hoteelenna bunu mine haꞌneemmo.” Taayitesi hakkawoye wole manna effiꞌre giwannota coyiꞌrino. Isi lede togo yiino: “Labbaahano ikko meyata, aye manchi ledono heewisamummoro woꞌmanka woyite balaxe ganeemmohu aneeti.”

Taayitesi Yihowa Farciꞌraasine ledo Qullaawa Maxaafa xiinxalla hanafiti heeshshosi biddi assiꞌrino. Qullaawa Maxaafa nabbawasi lowo geeshsha kaaꞌlitinosi. Roorenkanni albillitte alamete aana, “reyo woy dadillu woy wiꞌla woy shetto” heedhannokkita kultanno hexxo jawaachishshinosi.—Yohaannisi Ajuuja 21:3, 4.

Umi qara Taayitesira woloota giwa agura qarra ikkitinosi. Isi, “Hedoꞌyanna assooteꞌya biddi assiꞌra lowo geya qarra ikkitinoe” yiino. Kayinni Soqqamaasinete Looso 10:34, 35 noota Maganu mallaadannokkita kultanno hedo afasi kaaꞌlitinosi.

Tini mayi guma abbituyya? Taayitesi togo yiino: “Gaꞌrensa woy daninsa ikkihano ikkiro, Yihowa Farciꞌraasine mimmito baxxannota laummoti insati addu ammaꞌno ikkitinota huwatummo. Cuuame Yihowa Farciꞌraasincho ikkammora albaanni nafa, songote giddonni mittu faranjichi minisira sagalete koyisinoe. Tini haaqee labbinoe. Hakkuyira albaanni mittu faranjichi mine sagale ita nafa agurina faranjete ledo awu afiinni dihasaaweemmo. Xa kayi alamete doyichora noohu mimmito baxanno roduuwi wido ikkoommo.”