MANNA GIWA AGURA DANDIINANNIHU HIITTOONNIITI?

2 | Rabbisidhooti

Qullaawu Maxaafi Rosiisannore:

“Busha assinohehura busha assite qoltooti. . . . Dandiitiniha ikkiro, kiꞌne widiidita mannu baalu ledo keere heedhe. . . . Maganoho uyitine agurre ikkinnina kiꞌne rabbisidhinoonte. Mootichu, ‘Rabba anete; rabba ani qoleemmo’ yaanno.”—Roomu Sokka 12:17-19.

Hatto Yaa Mayyaate?

Mittu manchi xissiisinkero hanqa nooreentilla; kayi Maganu hakkoye mancho rabbisiꞌnammora dihasiꞌranno. Hatteentenni muli yanna giddo xissiisinonke coye baala biddi assanno daafira iso cincine agadhinammora hasiꞌranno.—Faarso 37:7, 10.

Ati Maa Assa Dandaatto?

Ninke guuta ikkinoommokki daafira rabbisiꞌrate kaꞌneemmoha ikkiro, mimmito giwa roore lexxitannilla hadhanno. Hakko daafira, mittu manchi hanqisihero woy xissiisihero rabbisidhooti. Hatteentenni keeru heeꞌranno gede assatenna ateneeto eemadhate woꞌnaali. Mito woyite kalaqamino coye facci asse agura qarra ajishshara dandiitanno. (Lawishsha 19:11) Mito woyite kayinni kalaqamino qarra wolootaho kula woyyitannoha ikkara dandaanno. Lawishshaho jaddo assinoonniheha ikkiro, tenne jaddo polisete woy wole gashshaanora kuꞌlattora dandaatto.

Rabbisiꞌra meessanaalla gawajjitanno

Kalaqamino coyi salaametenni tira dandiinannikkiho yite hedittorona? Woy kalaqamino qarra tirate dandiittore baala assiteenna coyi gara giwirona? Hakka woyiteno rabbisidhooti. Rabbisiꞌrittoro coyi roore bushanni haꞌrara dandaanno. Hakko daafira, woloota giwa aguri. Maganu kalaqamino qarra tirannota addaxxa dandaatto. “Iso addaxxi; isino towatannohe.”—Faarso 37:3-5.

Addu Xagge—ADIRIYAANI

Rabbisiꞌrate Kakkayissanno Hedo Qeeꞌlino

Adiriyaani shiimu heeꞌre woloota giwannohonna ganamannoho; hattono gawajjinosi manna rabbisiꞌra hasiꞌrannoho. Isi togo yiino: “Duucha woyite massaara tokkosanni giwameemmo; mundeetenni sona bae doogote uwoommoha lae mannu reyommoha laweennansa agure haꞌranno woyiti no.”

Adiriyaani 16 dirihu heeꞌre Qullaawa Maxaafa xiinxalla hanafino. Isi lede togo yiino: “Qullaawa Maxaafa xiinxallanni haꞌrummoti akataꞌya biddi assiꞌra hasiissannoeta huwatoommo.” Isi manna giwanna finqille agura hasiissinosi. Isira Roomu Sokka 12:17-19 nooti rabbisiꞌra hasiissannokkita kultanno hedo dhagge ikkitinosi. Isi togo yiino: “Yihowa yannasinninna fajjosi garinni taashshote xeꞌne biddi assannota ammanoommo. Sunu sununni finqilleno aguroommo.”

Mitto hashsha alba isi ledo giwantanno gaamo Adiriyaani gawajjitinosi. Gaamote murrichi, “Hanni dandaattoro hooꞌli!” yee cance coyiꞌrisi. Adiriyaani, “Hakkawoye rabbisiꞌra hasiꞌroommo” yee maaxikki coyiꞌrino. Kayi isi rabbisiꞌrantenni harancho huuccatto assiꞌre hakkiichii agure haꞌrino.

Adiriyaani lede togo yiino: “Layinki soodo hatte gaamo murrichi callichisi heeꞌreenna xaadummo. Iso laummoti giiramoommo daafira rabbisiꞌra hasiꞌroommo; Ikkirono Yihowa hanqoꞌya eemadheemmo gede kaaꞌlaera eeggifate huucciꞌroommo. Hakkii isi anewa daye togo yiieta dhagge assiꞌroommo: ‘Hashsha ikkino coyira maarie ballo. Noore coyiꞌrate anino ate gede ikka hasiꞌreemmo. Qullaawa Maxaafa xiinxalla hasiꞌreemmo.’ Hanqoꞌya eemadhaꞌyanni lowo geya hagiidhoommo! Hakkiinni isi ledo mitteenni Qullaawa Maxaafa xiinxalla hananfoommo.”