Amaaltinanni Amaale ‘Wodana Tashshi Assitannote’?

1-2. Mittu rodii woloota amaalate daafira maa rosino?

LOWO diri albaanni lame cimeeyye boode yanna geeshsha gambooshshe daa agurtinota mitte rodoo towaattara martino. Rodoo hasaawisino cimeessi gambooshshe haꞌrate daafira kultanno qummeeshshuwa nabbawinose. Isira tenne rodoo jawaachishinoha lawinosi; kayinni isinna ledosi noo cimeessi hadhara kaꞌuta ise, “Roduuwa kiꞌnera ane qarri dileellinoꞌne” yitino. Roduuwu ise amaaltinohu qarrasenna noo gara xaꞌmite affukkinniiti. Hakko daafira amaaltinose amaale kaaꞌlitinoseha dilawinose.

² Qummeeshsha nabbawi rodii hakkawarita qaage togo yiino: “Hakka woyitira ise diayirrissinonke yee hedoommo. Kayinni taxxi yee hedummoti, kaaꞌlitannose yee hedoommo qummeeshshuwa nabbawummonte balaxe kaaꞌlitannose xaꞌmuwano xaꞌmoommoro danchu baino; lawishshaho ‘Hiitto nootta?’ ‘Kaaꞌleemmoheri no?’ yee xaꞌmoommoro danchaho.” Kuni cimeessi tennenni lowore rosino. Xaa yannara isi mannu qarri leellannosihonna roduuwa kaaꞌla baxanno cimeessaati.

3. Songote giddo roduuwa amaala dandiitannori ayeooti?

³ Songote cimeeyye allaalaasine ikkitino daafira, hasiisanno woyite roduuwa amaalate qeechi noonsa. Ikkirono songote giddo noori woloota amaala hasiissannonsa woyiti heeꞌrara dandaanno. Lawishshaho mittu rodii woy rodoo jaalansa Qullaawu Maxaafi aana xintantino amaale amaala dandiitanno. (Far. 141:5; Law. 25:12) Woy mitte jawa rodoo Tiito 2:3-5te kulloonni garinni, ‘aja meento’ amaala dandiitanno. Qoleno annuwunna amuuwu oosonsa duucha woyite amaalanna seejja hasiissannonsati egennantinote. Konne birxicho qixxeessinoonnihu roorenkanni songote cimeeyyera ikkirono, ninke baalunku kaaꞌlannonna loosoho kakkayisanno garinni hattono amaalleemmo manni, “wodana tashshi assanno” garinni amaala dandiineemmo gara ronseemmo.—Law. 27:9.

4. Konni birxichira maa ronseemmo?

⁴ Konni birxichira woloota amaalate daafira shoole xaꞌmo hasaambeemmo. (1) Amaalate kaꞌneemmo gede assannonkeri maati? (2) Amaalleemmo amaale addinta hasiissannote? (3) Ayi amaaliro woyyanno? (4) Kaaꞌlanno garinni amaala dandiineemmohu hiittoonniiti?

AMAALATE KAꞌNEEMMO GEDE ASSANNONKERI MAATI?

5. Mittu cimeessi amaalara kainohu mayiraatiro afasi danchu garinni amaalanno gede kaaꞌlitannosihu hiittoonniiti? (1 Qorontoosi 13:4, 7)

⁵ Songote cimeeyye ammanate roduuwansa baxxanno. Mito woyite insa baxxannota leellishshannohu soꞌrote doogo haꞌranni noo mancho amaalteeti. (Gal. 6:1) Ikkirono, mittu cimeessi mitto mancho amaalara albaanni soqqamaasinchu Phaawuloosi baxillu daafira borreessinore hedasi danchate. Isi togo yee borreessino: “Baxillu cincanno; baxillu elanno. . . . Baxillu baalankare cincanno; baalanka addaxxanno; baalanka hexxanno; dargasi diaguranno.” (1 Qorontoosi 13:4, 7 nabbawi.) Songote cimeessi kuri qummeeshshuwa hiincasi amaalate kainohu mayiraatiro afanno gedenna amaalanno mancho danchu garinni hasaawisate kaaꞌlitannosi. Amaallanni manchi cimeessu isi daafira hedannota afiro, amaale macciishshe adha qarra diꞌꞌikkitannosi.—Rom. 12:10.

6. Phaawuloosi cimeeyyete dancha lawishsha ikkinohu hiittoonniiti?

⁶ Soqqamaasinchu Phaawuloosi songote cimeeyyera dancha lawishsha ikkino. Lawishshaho Phaawuloosi Teselonqe heeꞌranno Kiristaanira amaale hasiissunsa yannara insa amaalate hobbi ruxxi diyiino. Ikkirono, Phaawuloosi insara borreessino sokkara, balaxe ammanate loosonsa, baxillu kakkayiseennansa daafurtino daafuronna kaajjite uurritinota kule galatinonsa. Qoleno isi heeshshonsa gara hedino; hattono qarru iillanni noonsatanna dartu iillinsarono dandiite heedhanni noota afinota coyiꞌrino. (1 Tes. 1:3; 2 Tes. 1:4) Isi wole agurina kuri roduuwi wolu Kiristaanira nafa lawishsha ikkitinota coyiꞌrino. (1 Tes. 1:8, 9) Phaawuloosi galatinonsa daafira insa lowo geeshsha hagiidhitinoti dihuluullissannote! Phaawuloosi kuri roduuwasi lowo geeshsha baxannoti dihuluullissannote. Isi Teselonqe heeꞌranno Kiristaanira borreessinote lamente sokka widoonni insa kaaꞌlanno garinni amaala dandiinohu iseraati.—1 Tes. 4:1, 3-5, 11; 2 Tes. 3:11, 12.

7. Mittu manchi amaale macciishsha giwannohu mayira ikkara dandaanno?

⁷ Danchu garinni amaala hoongiro mayi kalaqamara dandaanno? Mittu woꞌnaalshu noosihu songote cimeessi togo yiino: “Mitu roduuwi amaale macciishsha gibbannohu amaale qarra afidheenna ikkikkinni danchu garinni amaala hoongeennaati.” Ninke tennenni maa ronseemmo? Mannu amaale macciishshannohu hanqine ikkikkinni baxillunni kaꞌne amaallirooti.

AMAALLEEMMO AMAALE ADDINTA HASIISSANNOTE?

8. Mittu cimeessi mitto rodoo amaala hasiissannosironna teꞌee hedanno woyite isonooto mayyee xaꞌma hasiissannosi?

⁸ Songote cimeeyye roduuwa amaalate muddama dihasiissannonsa. Mittu cimeessi woloota amaalara albaanni isonooto togo yee xaꞌma hasiissannosi: ‘Tini haja addinta kayisa hasiissannoete? Mittu manchi assanni noori gara ikkinokkita seekke buuxoommo? Qullaawu Maxaafi seera diiginonso assinori ani asseemmokkire ikkino daafiraati?’ Songote cimeeyye ‘coyiꞌrate muddama’ hoogansa hayyote. (Law. 29:20) Mittu cimeessi mitto rodoo amaala hasiissannosironna teꞌee buuxa hoogiro, wole cimeessa amaaꞌla dandaanno; lamunku cimeessi roduu Qullaawa Borro seera diiginoronna teꞌee hasaawa dandiitanno.—2 Xim. 3:16, 17.

9. Phaawuloosi uddiꞌratenna seesate daafira amaalino amaalenni maa ronseemmo? (1 Ximootewoosi 2:9, 10)

⁹ Hanni mitto lawishsha laꞌno. Mitto songote cimeessa, mittu ammanate rodiisi uddiꞌrannonna seesanno gari huluullinosi yine hendo. Kuni cimeessi, ‘Tenne hajo daafira kayise hasaaweemmo gede assitannoti Qullaawa Borro taje no?’ yee isonooto xaꞌma dandaanno. Kuni cimeessi tenne hajo daafira umisira lawinosire calla coyiꞌra hasiꞌrannokki daafira wole cimeessa woy ayyaanaamittetenni gikki yiino rodoo amaaꞌla dandaanno. Insa Phaawuloosi uddiꞌratenna seesate daafira amaalino amaale mitteenni hasaawa dandiitanno. (1 Ximootewoosi 2:9, 10 nabbawi.) Phaawuloosi Kiristaanu arshimmatenninna kawajjotenni seesa hasiissannonsata kulino. Ikkollana isi Kiristaanu togoo uddano uddiꞌra hasiissannonsa togoota uddiꞌra dihasiissannonsa yee dikulino. Phaawuloosi, Qullaawa Borro yitannori ledo sumuu yaannoha ikki geeshsha Kiristaanu uddiꞌratenna seesate daafira uminsa doorsha doodha dandaannota afino. Hakko daafira, cimeeyye mitto mancho amaala hasiissannonsaronna teꞌee heddanno woyite, kuni manchi uddiꞌrannonna seesanno gari kawajjaamo ikkinota buuxa hasiissannonsa.

10. Mittu manchi doodhanno doorshi daafira heda hasiissannonkeri maati?

¹⁰ Lamu ayyaanaamittetenni gikki yitino roduuwi addi addire doodhitara dandiitannotanna lamunku doodhitino doorshi gara ikkara dandaannota wodancha hasiissannonke. Ammanate roduuwinkera kuni garaho kuni digaraho yinanni uminke biddishsha fushsha dihasiissannonke.—Rom. 14:10.

AYI AMAALIRO WOYYANNO?

11-12. Mitto mancho amaala hasiissanno woyite mittu cimeessi isonooto mayyee xaꞌma hasiissannosi? Mayira?

¹¹ Mitto mancho amaala hasiissannoha ikkiro, ayi amaaliro woyyannorono heda hasiissanno. Mittu songote cimeessi mitte mine assidhino rodoo woy qaaqqo amaalate hediro, balaxe tenne maatera umo ikkino rodoo hasaawisa dandaanno; maatete umi tenne hajo ani afeemmona yaara dandaanno.b Woy maatete umi cimeeyye amaaltanno woyite insa ledo heeꞌra hasiꞌrara dandaanno. Qoleno gufo sasete laꞌnummonte gede, mito woyite mitte wedellitte rodoo jawa rodoo amaalturo woyyara dandaanno.

¹² Heda hasiissannohu wolu coyino no. Mittu cimeessi isonooto togo yee xaꞌmara dandaanno: ‘Ani amaalummoronso wolu amaaliro roore woyya ikka?’ Lawishshaho ‘Ani ditidhoommoho’ yee hedanno mancho togoo hedo qeeꞌlino cimeessi amaaliro roore woyyara dandaanno. Togoo hedo qeeꞌlino cimeessira konni manchi qarri roore leellannosi hattono kuni manchino amaale macciishshe adhara dandaanno. Ikkirono baalante cimeeyyera ammanate roduuwansa jawaachishatenna Qullaawa Borro kultanno garinni, biddi assiꞌra hasiissannonsare biddi assidhanno gede kaaꞌlate qeechi noonsa. Hakko daafira, mittu manchira amaale hasiissanno woyite roore hasiisanno coyi, ayi amaaliro woyyanno yitanno hajo ikkikkinni hasiissanno amaale aate.

KAAꞌLANNO GARINNI AMAALA DANDIINEEMMOHU HIITTOONNIITI?

13-14. Cimeeyye seekkite macciishsha hasiissannonsahu mayiraati?

¹³ Macciishshate qixxaabbinoonnire ikke. Songote cimeessi mitto rodoo amaalate qixxaawanno woyite isonooto togo yee xaꞌma hasiissannosi: ‘Rodiiꞌya noo gara seekke afoommo? Isi hiittoo heeshsho heeꞌranni no ikka? Isira ani afoommokkihu iillanni noosi qarri no ikka? Isira xa roore hasiisannosiri maati?’

¹⁴ Yaiqoobi 1:19 noohu xintu seeri woloota amaaltannori harunsa hasiissannonsaho. Yaiqoobi togo yee borreessino: “Mannu baalu macciishshate rahinoha, coyiꞌratenna hanqoho muddamannokkiha ikko.” Mittu cimeessi amaalanno manchi daafira baalankare afinohu gede asse hedara dandaanno; kayinni isi baalankare seekke buuxino? Lawishsha 18:13, “Macciishshinikkinni tumo qola, gowwimmatenna shollinyeho” yitanno. Mittu manchi noo gara seekkine afate iso umosi xaꞌma woyyitanno. Hatto assate coyiꞌnara albaanni balanxe macciishsha hasiissanno. Konni birxichira hanafote kulli cimeessi rosinore qaango. Kuni cimeessi rodoote qixxaawe haꞌrino qummeeshshuwa nabbawantenni, “Hiitto nootta?” “Kaaꞌleemmoheri no?” yee xaꞌme hanafoommero danchu bainota huwatino. Cimeeyye yanna gaaꞌmite coye seekkite buuxxannoha ikkiro roduuwansa roore jawaachishanna kaaꞌla dandiitanno.

15. Cimeeyye Lawishsha 27:23 nooha xintu seera harunsa dandiitannohu hiittoonniiti?

¹⁵ Hoshsha noo gara seekkitine affe. Hanafote laꞌnummonte gede, danchu garinni amaalate yaa mite qummeeshshuwa nabbawa woy mite hedo kula calla diꞌꞌikkitino. Roduuwinke insa daafira hendeemmota, qarrinsa leellannonketanna kaaꞌlinammonsara hasiꞌneemmota affanno gede assa hasiissannonke. (Lawishsha 27:23 nabbawi.) Cimeeyye roduuwinsa ledo noonsa jaalooma kaajjishiꞌrate dandiiture baala assa hasiissannonsa.

16. Songote cimeeyye kaaꞌlanno garinni amaaltanno gede mayi kaaꞌlannonsa?

¹⁶ Songote cimeeyye, roduuwu ‘Cimeeyye ninke hasaawissannonkehu amaale hasiissannonke woyite callaati’ yite heddanno gede assitannokki gede qoropha hasiissannonsa. Hatteentenni insa roduuwinsa ledo ganyite hasaawanna qarru amadannonsa woyite insa daafira heddannota leellisha hasiissannonsa. Mittu woꞌnaalshu noosi cimeessi, “hatto assineemmoha ikkiro jaaloominke kaajjanno. Mitto rodoo amaala hasiissannonke woyite amaalano qarra diꞌꞌikkitannonke” yiino. Amaallanni rodiirano amaale macciishshe adha qarra diꞌꞌikkitannosi.

17. Mittu cimeessi roorenkanni cincannohanna shaqqado ikka hasiissannosihu mamooteeti?

¹⁷ Cincitinannirenna shaqqadda ikke. Hakko iso mittu manchi Qullaawu Maxaafi aana xintantino amaale macciishsha giwanno woyite cincineemmorenna shaqqadda ikka hasiissannonke. Songote cimeessi isi amaalino amaale mittu manchi bayichonko macciishshe adhe loosu aana hosiisa hoogiro caaccaawannokki gede qoropha hasiissannosi. Yesuusi daafira togo yine masaalloonni: “Dabbino shomboqqo nafa dihiiqqanno; baꞌꞌara rahino caabbichono dixoyissanno.” (Mat. 12:20) Hakko daafira, mittu songote cimeessi huuccatto assiꞌranno woyite, amaalino rodoo Yihowa maassiꞌrannosi gede, amaalloonnisihu mayiraatiro huwatanno gedenna amaale macciishshe adhanno gede kaaꞌlasira huucca dandaanno. Amaalloonni rodii amaalloonnisi coye seekke hedate yanna hasiissannosiha ikkara dandaanno. Cimeessu cincanna shaqqado ikkiro, amaallanni rodii amaallannisi gara ikkikkinni amaale illachishara dandaanno. Amaallanni amaale woꞌmanka woyite Qullaawu Maxaafi aana xintantinota ikka hasiissannoseti dihuluullissannote.

18. (a) Mitto rodoo amaalate hendeemmo woyite maa heda hasiissannonke? (b) Misilenna saaxinete giddo noo hedo leellishshannonte gede annuwunna amuuwu mayi daafira hasaawa hasiissannonsa?

¹⁸ Soꞌroꞌnenni rosse. Guuntete xeꞌne noonkere ikkinoommo daafira, konni birxichira ronsummore woꞌmunni woꞌma harunsa didandiineemmo. (Yai. 3:2) Soꞌro loosanke digattanno, kayinni soꞌneemmo woyite soꞌronkenni rosate sharrama hasiissannonke. Roduuwinke banxeemmonsata affuro, coyiꞌneemmorinni woy assineemmorinni koffi assineemmonsa woyite ninke gatona yaa qarra diꞌꞌikkitannonsa.—“Annuwanna Amuuwa Kaaꞌlitanno Hedo” yitanno saaxineno lai.

MAA RONSOOMMO?

19. Roduuwinke wodana tashshi assa dandiineemmohu hiittoonniiti?

¹⁹ Kaaꞌlanno garinni amaala shota ikkitinokkita ronsoommo. Ninkeno amaalleemmo mannino guuntete xeꞌne noonkereeti. Konni birxichira ronsummo roso hamboonke. Amaalate kaꞌinanni gede assinoꞌnere seekkitine buuxxe. Qoleno amaale addinta hasiissannoronna ayi amaaliro woyyannoro hedde. Mitto mancho amaaltinara albaanni xaꞌmuwa xaꞌme hattono seekkitine macciishshe; hatto assitinoro mayi qarri iillanni noosiro afa dandiitinanni. Kiꞌne iso ikkitinoommero maa assitinanniro hedate woꞌnaalle. Shaqqadda ikke hattono roduuwiꞌne ledo muli jaalooma kalaqidhe. Mixonke kaaꞌlanno garinni calla ikkikkinni “wodana tashshi assanno” garinni amaala ikkitinota deꞌnoonke.—Law. 27:9.