Woloota Amaala Dandiinanni Gara

1. Amaala hasiissannosihu ayeti? Xawisi.

WOLOOTA amaalate daafira mayi macciishshamannohe? Mitootu amaala baxxanno. Wolootu kayinni amaalate hobbi ruxxi yitanno woy amaaltanno woyite waajjitanno. Ikkirono ninke baalunku woloota amaala hasiissannonke woyiti no. Mayira? Korkaatuno Yesuusi addu haꞌrunsaanosi bande anfannihu mimmitoho leellishshanno baxillinni ikkinota coyiꞌrino. (Yoh. 13:35) Tenne assa dandiineemmoti mitte doogo hasiisanno woyite ammanate roduuwanke amaalate. Maganu Qaali “Danchu manchi amaale . . . hagiirsiissanno” yaanno.—Law. 27:9.

2. Songote cimeeyye ma assa rosa hasiissannonsa? Mayira? (“Kiristaanu Heeshshonna Soqqansho Gambooshshiwa Amaala” yitanno saaxineno lai.)

² Roorenkanni songote cimeeyye dancha gede amaala rosa hasiissannonsa. Yihowa Yesuusi widoonni kuri labballi songo allaaltanno gede shoomino. (1 Phe. 5:2, 3) Cimeeyye tenne assitannoti mitte doogo, songote gambooshshiwa lallawo shiqishshanno woyite Qullaawu Maxaafi aana xintantino amaale amaalate. Insa songote giddo nooha mitto mittonka halashshaanchonna hoshshatewiinni ballekke baꞌinore amaala hasiissannonsa. Songote cimeeyyenna ninke baalunku dancha gede amaala dandiineemmohu hiittoonniiti?

3. (a) Dancha gede amaala rosa dandiineemmohu hiittoonniiti? (Isayaasi 9:6; “Amaalatto Woyite Yesuusi Lawishsha Haꞌrunsi” yitanno saaxineno lai.) (b) Konni birxichira maa ronseemmo?

³ Qullaawu Maxaafi giddo kulloonnita roorenkanni Yesuusi xagge xiinxalline, dancha gede amaalate daafira lowore rosa dandiineemmo. Yesuusira uyinoonnisihu suusu suꞌmi giddo mittu, “Dhaggete Amaalaancho” yaannoho. (Isayaasi 9:6 nabbawi.) Konni birxichira xaꞌmiꞌneennanke amaalleemmo woyitenna xaꞌmiꞌninkekkinni amaala hasiissannonke woyite maa assa dandiineemmoro ronseemmo. Qoleno maltino yannaranna danchu garinni amaala hasiissannota ikkitinohu mayiraatiro ronseemmo.

AMAALLEEMMO GEDE XAꞌMIꞌNANNINKE WOYITE

4-5. Mittu manchi amaalleemmosi gede xaꞌmiꞌrannonke woyite balanxe ninkeneeto mayine xaꞌma hasiissannonke? Lawishsha kuli.

⁴ Mittu manchi amaalleemmosi gede xaꞌmiꞌrannonke woyite umo maa assa hasiissannonke? Hagiidhine bayichonkonni iso kaaꞌla hasiꞌneemmoha ikkara dandaanno. Kayinni balanxe ninkeneeto togo yine xaꞌma hasiissannonke: ‘Tenne hajo daafira amaalate ikkado ikkoommo?’ Mito woyite dancha gede kaaꞌla dandiineemmoti kaajja doogo, ninke amaalantenni hatte hajo daafira amaalate ikkado ikkino rodoo amaaꞌlanno gede assate.

⁵ Hanni aane noo lawishsha laꞌno. Hanni mittu muli jaalikki baasa dhiwamino yine hendo. Isi ma garinni xagisiꞌrannoro xiinxalla hanafinota kulehe ma garinni xagisiꞌriro woyyannoro kulattosi gede xaꞌmannohe. Ati woyyanno yite hedootto hikkiminni nooha ikkara dandaanno; kayinni xagisate ogimma dinohe woy konni dhibbi daafira qajeeloottori dino. Hakko daafira jaalakki kaaꞌla dandaattoti kaajja doogo iso xagisate ikkado ikkino mancho afiꞌranno gede kaaꞌlate.

6. Mitto mancho amaallammora albaanni maa assa woyyitanno?

⁶ Mitte hajo daafira amaalate ikkadoota ikkinoommohu gede assine hendeemmoha ikkiro nafa, amaalleemmosi gede xaꞌmiꞌrinonke manchira dawaro qollammora albaanni taxxi yine heda woyyitanno. Mayira? Lawishsha 15:28 “Keeraanchu manchi hede coyiꞌranno” yitanno. Dawaro mayine qolleemmoro anfoommohalla ikki? Xaano ikkiro xiinxallate, huuccatto assiꞌratenna hiincate mite yanna geeshsha agara hasiissannonke. Hatto ikkiro qolleemmo dawaro Yihowa hedo ledo sumuu yitanno ikkase roore addaxxineemmo. Hanni masaalaanchu Naataani lawishsha laꞌno.

7. Masaalaanchu Naataani lawishshinni maa ronseemmo?

⁷ Moote Daawiti masaalaanchu Naataanira Yihowara qullaawa mine mina hasiꞌrannota kulinosi. Naataani bayichonkonni minanno gede amaalinosi. Kayinni Naataani balaxe tenne hajo daafira Yihowa mayyaannoro afa hasiissannosi. Mayira? Korkaatuno Yihowa qullaawa mine Daawiti minara dihasiꞌrino. (1 Dud. 17:1-4) Tini dhagge leellishshannonte gede, amaalleemmo gede xaꞌmiꞌnanninke woyite ‘coyiꞌrate muddammeemmokkire’ ikka hayyote.—Yaq. 1:19.

8. Amaalleemmo woyite qorophineemmo gede assannonkehu wolu korkaati maati?

⁸ Hanni amaalleemmo woyite qorophineemmo gede assannonkeha wole korkaatano laꞌno: Mitto mancho amaalleenna isi qarru giddo uwanno gede assannosi doorsha doodhiro tennera ninkeno xaꞌmamanke digattanno. Amaallammora albaanni seekkine heda hasiissannonkehu iseraati.

XAꞌMININKEKKINNI AMAALLEEMMO WOYITE

9. Amaaltara albaanni songote cimeeyye maa buuxa hasiissannonsa? (Galaatiya 6:1)

⁹ Songote cimeeyye yannate kiiro, “gara ikkitinokki doogo” hadhanno roduuwa amaala hasiissannonsa. (Galaatiya 6:1 nabbawi.) Gara ikkinokki doorsha doodhanno manchi gedensoonni jawa cubbo loosara dandaanno. Cimeeyyete mixo togoo manchi hegere heeshsho doogora haꞌra agurannokki gede kaaꞌlate. (Yaq. 5:19, 20) Ikkirono, insa dancha gede amaalate, hakku manchi gara ikkitinokki doogora haꞌranni nooronna teꞌee buuxa hasiissannonsa. Yihowa ninke baalunku tiianke horoonsiꞌne uminke doorsha doodhineemmo gede fajjinonke. (Rom. 14:1-4) Kayinni mittu manchi gara ikkitinokki doogora haꞌranni noohanna cimeeyye iso amaala hasiissannonsahalla ikki?

10-12. Xaꞌmiꞌnikkinni amaaltanno woyite cimeeyye maa assa hasiissannonsa? Lawishsha kuli. (Misillano lai.)

¹⁰ Xaꞌmiꞌnikkinni amaala cimeeyyete shota diꞌꞌikkitannonsa. Mayira? Soqqamaasinchu Phaawuloosi mittu manchi afikkinni gara ikkitinokki doogo haꞌrara dandaannota coyiꞌrino. Hakko daafira cimeeyye mittu manchi amaale adhanno gede balaxxe qixxeessa hasiissannonsa.

¹¹ Mitto mancho xaꞌmiꞌrikkinni amaala kaajjado baattora muro kayise lossate woꞌnaalate gedeeti. Baatto loosire galino manchi wixa wixara albaanni baatto loose shaqqishanno. Tini baatto wixaho qixxaabbanno gede assitanno. Isi hakkiinni wixa wixanno. Jeefote wixu lophanno gede waa hayikkisanno. Hatteente gede mittu cimeessi amaale xaꞌmiꞌrinokki rodoo amaalanno woyite, amaale macciishsha shota ikkitannosi gede assa hasiissannosiri no. Lawishshaho, maltino yanna agare konni rodii daafira lowo geeshsha hedannota buuxisannosi. Amaalanno manchi baxillenna shaqqille leellishate danchu suꞌmi noosiha ikkiro, wolootaho amaalesi macciishshe adha qarra diꞌꞌikkitannonsa.

¹² Hasaabbanno woyite cimeessu baalunku soꞌro loonseemmotanna mito woyite amaale hasiissannonketa kule, konni manchi wodani shaqqanno gede assanno. (Rom. 3:23) Songote cimeessi wodanaaꞌmenna iso lowo geeshsha ayirrisannota leellishanno garinni, Qullaawa Borro horoonsiꞌre kuni manchi soꞌrote doogo haꞌranni noohu ma garinniitiro xawise kulannosi. Roduu soꞌrosi ammane adhihu gedensaanni, cimeessu ‘wixa wixanno’ yaano soꞌrosi biddi assiꞌrate maa assa hasiissannosiro kulannosi. Jeefote cimeessu, wixaho ‘waa hayikkisanno’ yaano rodoo godowinta galatannosi hattono ledosi huuccatto assiꞌranno.—Yaq. 5:15.

13. Songote cimeeyye mittu rodiira amaalloonnisi amaale leeltinosironna teꞌee buuxa dandiitannohu hiittoonniiti?

¹³ Mito woyite amaalanno manchi coyiꞌrinorinna amaallanni manchi huwatino gari addi addire ikkara dandaanno. Songote cimeeyye togoori kalaqamannokki gede assa dandiitannohu hiittoonniiti? Insa ayirrinyunninna hayyotenni xaꞌmo xaꞌmite qara hedo huwatanno gede assa dandiitanno. (Ros. 12:11) Amaalloonni manchi qolanno dawaro isi amaale garunni huwatinoronna teꞌee buuxate kaaꞌlitanno.

MALTINO YANNARA DANCHU GARINNI AMAALA

14. Hanqine heeꞌne amaala hasiissannonke? Xawisi.

¹⁴ Ninke baalunku guuntete xeꞌne noonkere ikkinoommo daafira, woloota hanqisannore assineemmo woy coyiꞌneemmo woyiti no. (Qol. 3:13) Maganu Qaali nafa mito woyite mimmitoho hanqinammora dandiineemmota kulanno. (Efe. 4:26) Kayinni hanqine heeꞌne woloota amaalleemmokki gede qoropha hasiissannonke. Mayira? Korkaatuno “mannu hanqi Maganu keeraanchimma diabbanno.” (Yaq. 1:20) Hanqine heeꞌne amaalleemmoha ikkiro coyi roore bushanno gede assinammora dandiineemmo. Togo yaa kayinni hanqisinonke manchira horonta giddonketa kula dihasiissannonke yaa diꞌꞌikkitino. Kayinni wodanaaꞌminammo geeshsha agarreemmoha ikkiro, roore dancha gede hasaambammora dandiineemmo. Hanni Iyyoobi dancha gede amaalinohu Eelihu lawishsha laꞌno.

15. Eelihu lawishshinni maa ronseemmo? (Misileno lai.)

¹⁵ Eelihu, Iyyoobi suꞌmi jaallasi bushiishshannosita gargadhanna barra woꞌma macciishshanni keeshshino. Eelihu Iyyoobi mararino. Kayinni, Iyyoobi Yihowa daafira gara ikkinokkire coyiꞌrinohuranna quwa sae isiniiti daafira calla hedinohura Eelihu lowo geya hanqino. Ikkirono Eelihu isi coyiꞌranno yanna iillita geeshsha agadhino; hattono Iyyoobi amaali yannara joongillunninna iso lowo geeshsha ayirrisannota leellishanno garinni coyiꞌrino. (Iyo. 32:2; 33:1-7) Eelihu lawishshinni kaajja roso ronseemmo. Amaale dancha guma abbitannohu maltino yannara ayirrinyunninna baxillunni amaallirooti.—Ros. 3:1, 7.

WOLOOTA AMAALANNA AMAALE MACCIISHSHITINE ADHA AGURTINOONTE

16. Faarso 32:8 maa rosootto?

¹⁶ Konni birxichihu cuꞌmote qummeeshshi, ‘Yihowa illesi ninke aana wore amaalannonketa’ kulanno. (Faarso 32:8 nabbawi.) Tini isi ninke woꞌmanka woyite kaaꞌlannonketa leellishshannote. Isi amaalannonkeha calla ikkikkinni amaalesi loosu aana hosiinseemmo gedeno kaaꞌlannonke. Isi ninkera dancha lawishsha ikkinonke! Woloota amaalate qoosso afiꞌneemmo woyite woꞌmanka woyite illenke insa aana worrenna insa kaaꞌlate dandiinummore baala assine Yihowa lawishsha haꞌrunsino.

17. Qullaawu Maxaafi aana xintantino amaale uyitannonke cimeeyye mayi gedeeti yaa dandiinanni? Xawisi. (Isayaasi 32:1, 2)

¹⁷ Albinni roore xaa yannara dancha gede amaalanna amaale macciishshe adha hasiissannonke. (2 Xim. 3:1) Qullaawu Maxaafi aana xintantino amaale uyitannonke cimeeyye, ‘halallitte gobbara lolahanno wayi’ gedeeti. (Isayaasi 32:1, 2 nabbawi.) Macciishsha hasiꞌneemmore affinoha ikkirono, kayinni macciishsha hasiissannonkere kultannonke jaalla “birru mereero worroonni culki” gedeeta muxxe elto uyitinonkehu gedeeti. (Law. 25:11) Ninke baalunku dancha gede amaalanna amaale macciishshe adha rosa agurroonke.