Yihowara Soqqamate Dandiittore Baala Assite Hagiidhi

1. Lowo geeshsha hagiidhineemmo gede assannonkeri maati?

YIHOWA hagiirraamma ikkinammora hasiꞌranno. Tenne mayinni anfeemmo? Korkaatuno hagiirru qullaawu ayyaani laalo widooti. (Gal. 5:22) Adhannonkunni aannohu hagiirraamo ikkino daafira, diinaggaambe soqqammeemmo woyite woy roduuwanke addi addi doogganni kaaꞌlineemmo woyite lowo geeshsha hagiidhineemmo.—Soq. 20:35.

2-3. (a) Galatiyu Sokka 6:4 kultanno garinni, Yihowara soqqammeemmo woyite hagiirrinke baikkinni heeꞌneemmo gede kaaꞌlannonkehu lamu coyi maati? (b) Konni birxichira maa ronseemmo?

² Soqqamaasinchu Phaawuloosi Galatiyu Sokka 6:4te hagiirrinke baꞌꞌannokki gede kaaꞌlannonkeha lame coye kulino. (Qummeeshsha nabbawi.) Umihunni, Yihowara soqqamate dandiinummore baala assa hasiissannonke. Yihowara soqqamate dandiinummore baala assinummo geeshsha hagiidha hasiissannonke. (Mat. 22:36-38) Layinkihunni, ninkeneeto wolootu ledo heewisiisa dihasiissannonke. Dancha ordu fayyimma noonkehura, qajeelsha afiꞌnoommo daafira, woy kalaqamu dandoo noonkehura loonsoommo loosi ikkihano ikkiro Yihowa galata hasiissannonke. Qoleno noonkere baala uyinonkehu Yihowaati. Wole widoonni kayinni, wolootu mitu gari soqqanshonni roortannonkeha ikkiro, insa dandoonsa umonsa bokkeessate woy uminsa hasatto balaxisiisate ikkikkinni Yihowa guwisate horoonsidhanni noo daafira hagiidha hasiissannonke. Hakko daafira insa ledo heewisamantenni insawiinni rosa hasiissannonke.

³ Konni birxichira Yihowara soqqamate garire assinanni heeꞌnoommokkiha laweennanke hexxo mudhinummoro mayi kaaꞌlannonkero ronseemmo. Qoleno noonke dandoo dancha gede horoonsiꞌra dandiineemmo garanna wolootuwiinni maa rosa dandiineemmoro laꞌneemmo.

YIHOWARA GARI GEESHSHA SOQQAMMANNI HEEꞌNOOMMOKKIHA LAWINKERO

4. Hexxo mudhineemmo gede assannonkeri maati? Lawishsha kuli.

⁴ Mite Yihowa soqqamaano diru akkalle amaddinonsa daafira woy dhiwanni waadannonsahura gari geeshsha soqqama didandiitanno; hakko daafira hexxo mudhitanno. Kaarooli yinanni rodoora togoori iillinose. Ise alba, sabbakkannori roore hasiissannowa hadhe soqqamate qoosso afidhino. Hatte yannara ise, 35 manna Qullaawa Maxaafa xiinxallissino hattono batinyu manni heeshshonsa Yihowara sayise oye cuuamanno gede kaaꞌlitino. Kaarooli soqqanshotenni dancha guma afidhino! Gedensoonni ise dhiwanni waadinose daafira roore woyite mininni difultanno. Kaarooli togo yitino: “Dhiwanni waadannoe daafira, wolootu assitannori geeshshire assa dandeemmakkita afoomma; ikkirono insa geeshsha ammanamoommata ikkoommaha dilawannoe. Assa hasiꞌreemmare baalare assa didandoommo; tini hexxo mudheemma gede assitinoe.” Kaarooli Yihowara soqqamate wolqase assiture baala assa hasidhanno. Tini lowo geeshsha danchate! Shaqqadu Maganinke ise assitinoha dancha coye naadannota dihuluullammeemmo.

5. (a) Assa dandiineemmokkire hende hexxo mudhinummoro maa qaaga hasiissannonke? (b) Misilla leellishshannonte gede mittu rodii heeshshosi diro woꞌma Yihowara soqqamate wolqasi assiture baala assinohu hiittoonniiti?

⁵ Mito woyite, assa dandaattokkire hedde hexxo mudhattoha ikkiro, ‘Yihowa maa assammora hasiꞌranno?’ yite ateneeto xaꞌmi. Yihowa hasiꞌrannohu xa wolqakki assiture assattoraati. Hanni mitto lawishsha laꞌno: Mitte 80 diro ikkannose rodoo 40 diriti noo waro Yihowara soqqamate assitannore xa assa dandiitannokki daafira hexxo mudhitara dandiitanno. Ise xa wolqase assitu geeshshire assitanni nooha ikkirono, tini Yihowa dihagiirsiissanno yite heddara dandiitanno. Hatto yee heda kayinni garaho? Hanni tenne hedi. Ise 40 diriti noo waro wolqase assitu geeshsha soqqantino; xa 80 diriti heedheno wolqase assitu geeshsha soqqama diagurtino. Yihowara soqqamate assinanni heeꞌnoommori iso hagiirsiisanno geeshshire diꞌꞌikkino yine hendeemmoha ikkiro, Yihowa hagiirsiisannori daafira biddishsha fushshannohu iso ikkinota qaaga hasiissannonke. Yihowa isira soqqamate wolqanke assiture baala assinummoro, “Dancha assootto!” yaannonke.—Maatewoosi 25:20-23 ledo heewisiisi.

6. Maariya lawishshinni maa ronseemmo?

⁶ Assa dandiineemmokkire agurre assa dandiineemmore illachinshummoro, hagiirrinke baikkinni heeꞌra roore shota ikkitannonke. Hanni Maariya yinanni rodoo woꞌnaalsha laꞌno; ise dhiwanni waadannose daafira hasidhino geeshsha soqqama didandiitanno. Umi qara ise lowo geeshsha yaaddino hattono kaaꞌleemmari dinoote yite heddino. Gedensoonni kayinni ise songosera dhiwanni waadannose daafira daallasunni kaꞌe affannokki rodoo noota affu; hakkiinni ise kaaꞌlate murcidhu. Maariya togo yitino: “Ise ledo silketenninna borrote sokka borreesse soqqamate pirogiraame fushshiꞌroomma. Ise ledo soqqamumma kiiro, ise kaaꞌloomma daafira minira lowo geeshsha hagiidhanni higeemma.” Ninkeno assa dandiineemmokkire agurre assa dandiineemmore illachinshummoro hagiirrinke lexxanno gede assiꞌra dandiineemmo. Kayinni Yihowara albinni roore soqqama woy mitu gari soqqansho dancha gede soqqama dandiineemmohalla ikki?

DANDOOꞌNE ‘SOQQAMATE’ HOROONSIDHE

7. Soqqamaasinchu Pheexiroosi Kiristaana hiittenne kaaꞌlitanno amaale amaalino?

⁷ Soqqamaasinchu Pheexiroosi qullaawu ayyaaninni borreessinote umi sokkara roduuwu noonsa dandoo baala ammanate roduuwansa jawaachishate horoonsidhanno gede amaalinonsa. Isi togo yee borreessino: “Addi addiha Maganu elto afansha ammanamatenni amaddine mitti mittiꞌne uyinoonniꞌne elto garinni mimmitiꞌnera soqqamme.” (1 Phe. 4:10) Wolootu hinaassanno woy hexxo mudhitanno yine waajjine dandoonke woꞌmunni woꞌma horoonsiꞌra agura dihasiissannonke. Hatto ikkiro Yihowara soqqamate dandiinummore baala assinanni diheeꞌnoommo.

8. Umi Qorontoosi 4:6, 7 kultanno garinni dandoonke kulle naaxxa hasiissannonkekkihu mayiraati?

⁸ Noonke dandoo woꞌmunni woꞌma horoonsiꞌra hasiissannonke; kayinni dandoo noonke daafira naaxxineemmokki gede qoropha hasiissannonke. (1 Qorontoosi 4:6, 7 nabbawi.) Lawishshaho duucha woyite, Qullaawu Maxaafi xiinxallo hanafisiisate qinaannoheha ikkara dandaanno. Tenne dandoo horoonsiꞌra agura dihasiissannohe! Kayinni dandoo horoonsiꞌratenna dandoonkenni naaxxate mereero lowo badooshshi noota qaagi. Hanni muli yannara Qullaawu Maxaafi xiinxallo hanafisiisootto yine hendo. Afiꞌroottoha hagiirsiisanno woꞌnaalsha soqqanshote gaamokkira kulate quqquxamootto. Ikkollana insanni xaadatto woyite mitte rodoo metseete eltino gara kultanni no. Ise metseete eltino; ati kayinni Qullaawu Maxaafi xiinxallo hanafisiisootto. Tenne yannara maa assatto? Woꞌnaalshakki kula roduuwa jawaachishshannota afootto; kayinni metseete eltino rodoo hagiirri baꞌꞌannokki gede woꞌnaalsha wole woyite kula hasiꞌrattoha ikkara dandaanno. Tini danchumma leellishate. Kayinni Qullaawu Maxaafi xiinxallo hanafisiisa agura dihasiissannohe. Tenne dandookki horoonsiꞌri!

9. Dandoonke ma garinni horoonsiꞌra hasiissannonke?

⁹ Kalaqamunni noonke dandoo baala Maganuwiinni afiꞌnoommota ikkinota qaango. Tenne dandoo ninkeneeto bokkeessate ikkikkinni songo dhaawate horoonsiꞌra hasiissannonke. (Fil. 2:3) Wolqankenna dandoonke Maganu fajjo assate horoonsiꞌneemmo woyite lowo geeshsha hagiidhineemmo; kayinni hagiidhineemmohu woloota roorroommo daafira ikkikkinni, noonke dandoo Yihowa guwisiꞌrate horoonsiꞌnanni heeꞌnoommo daafiraati.

10. Ninkeneeto wolootu ledo heewisiisa digaraho yineemmohu mayiraati?

¹⁰ Qoropha hoongummoro uminke jawaante wolu manchi laanfe ledo heewisiinsammora dandiineemmo. Lawishshaho mittu rodii lallawo dancha gede asse shiqishara dandaanno. Tini isi jawaanteeti. Ikkirono isi lallawo shiqishate sharramanni nooha mitto rodoo woffi asse laꞌꞌara dandaanno. Ikkollana hakku rodii wosina adha baxannoha, oososi dancha gede qajeelsiꞌrannoha woy diinaggaawe sabbakannoha ikkara dandaanno. Dandoonsa Yihowara soqqamatenna woloota kaaꞌlate horoonsidhannori batinyu roduuwi noonke daafira lowo geeshsha tashshi yaannonke!

WOLOOTU LAWISHSHINNI ROSSE

11. Yesuusi lawishsha harunsate sharrama hasiissannonkehu mayiraati?

¹¹ Ninkeneeto wolootu ledo heewisiisa hasiissannonkekkiha ikkirono, ammanantinote Maganu soqqamaano lawishshinni ronse horo afiꞌra dandiineemmo. Hanni Yesuusi lawishsha laꞌno. Ninke isi gede guuta ikka hoongummorono, baxissanno akattasinninna assinohu dhagge ikkanno coyinni lowore rosa dandiineemmo. (1 Phe. 2:21) Isi lawishsha harunsate dandiinummore baala assineemmoha ikkiro, worbuulle Yihowa soqqamaano ikkineemmo hattono soqqanshonkenni dancha guma afiꞌneemmo.

12-13. Moote Daawiti lawishshinni maa ronseemmo?

¹² Maganu Qaali giddo, guuntete xeꞌne noonsare ikkirono lawishshansa harunsa hasiissannonkehu batinyu ammanamino labballinna meenti no. (Ibi. 6:12) Hanni Yihowa “hedoꞌya gedeeha” yiinohu Moote Daawiti lawishsha laꞌno. (Soq. 13:22) Ikkirono Daawiti guuntete xeꞌne noosiho. Isi jawa cubbo loosino woyiti nafa no. Ikkirono isi dancha lawishsha ikkannonke. Mayira? Korkaatuno isi seejjinisi woyite soꞌrosi gara lawisate diwoꞌnaalino. Hatteentenni isi uyinoonnisita kaajjado seejjo adhino hattono godowinta maaro eino. Yihowano maarinosi.—Far. 51:3, 4, 10-12.

¹³ Ninkeneeto aante noote gedee xaꞌmuwa xaꞌmine Daawiti lawishshinni rosa dandiineemmo: ‘Amaallannie woyite mayyee qoleemmo? Soꞌroꞌya bayichonko ammaneemmonso gara lawisate woꞌnaaleemmo? Woloota busha assa rakkannoe? Wirro soꞌro looseemmokki gede sharrameemmo?’ Qullaawu Maxaafi giddonni wolu ammanamino labballinna meenti xagge nabbawatto woyiteno ateneeto togoo xaꞌmuwa xaꞌma dandaatto. Insara atera iillino gedee fonqoli iillinonsa? Insa hiikku danchu akati noonsata leellishshino? Mittu mittunku xagge nabbawatto woyite, ‘Konni ammanaminohu Yihowa soqqamaanchi faale haꞌra dandeemmohu hiittoonniiti?’ yite ateneeto xaꞌmi.

14. Ammanate roduuwinke lawishsha harunsa kaaꞌlitannonkehu hiittoonniiti?

¹⁴ Yannankera noohu wedelluno ikko jajjabbu ammanate roduuwinke lawishshinnino rosa dandiineemmo. Lawishshaho songoꞌnera, iillanni noosi fonqolo dandee heeꞌranni noo rodii no? Iso darawosi gara ikkinokkire assanno gede xixxiibbannosiha, maatesi gibbannosiha woy dhiwanni waadannosiha ikkara dandaanno. Isira, atera heedhahera hasiꞌrattoti kaajja akatta noosi? Isiha dancha lawishsha harunsite iillanni noohe fonqolo dandiite saꞌꞌatto gara rosa dandaatto. Dancha lawishsha ikkitannonkeri togoo roduuwi noonke daafira tashshi yaannonke; hagiidhineemmo gede assannonkehu mittu coyi konneeti.—Ibi. 13:7; Yai. 1:2, 3.

YIHOWARA SOQQAMAKKINNI HAGIIDHI

15. Yihowara soqqammanni hagiidhineemmo gede kaaꞌlitannonketi soqqamaasinchu Phaawuloosi amaalino amaale hiittenneeti?

¹⁵ Songote giddo keerunna mittimma heedhanno gede mittu mittunku dandiinummore baala assa hasiissannonke. Hanni umi xibbi diri Kiristaani lawishsha laꞌno. Insara addi addi dandoonna loosu qeechi noonsa. (1 Qor. 12:4, 7-11) Ikkollana tini mereeronsa heewonna babbadooshshu kalaqamanno gede diassitino. Hatteentenni Phaawuloosi, mittu mittunku Kiristoosi ‘biso ikkitinore dhaawate’ sharrantanno gede jawaachishinonsa. Phaawuloosi Efesooni heeꞌranno Kiristaanira togo yee borreessino: “Mittu mittunku bisi loososi loosanno woyite manninatu baalu lophanno; baxillunni dhaawamanno.” (Efe. 4:1-3, 11, 12, 16) Phaawuloosi amaalino amaale loosu aana hosiisino Kiristaani songote giddo keerunna mittimma heedhanno gede assino; togoo akatta xaa yannara songuwanke giddono laꞌnanni heeꞌnoommo.

16. Maa assate murciꞌra hasiissannonke? (Ibiraawoota 6:10)

¹⁶ Ateneeto wolootu ledo heewisiisattokki gede qorophi. Hatteentenni Yesuusiwiinni rosatenna isi akatta leellishate sharrami. Qullaawu Maxaafi giddo kulloonni manninna yannankera noohu ammanamino manni lawishshinni rosi. Yihowara soqqamate wolqakki assiture baala assattoha ikkiro, ‘Maganu halaalaancho yoo yaannoha’ ikkinohura ‘loosokki hawannokkita’ addaxxa dandaatto. (Ibiraawoota 6:10 nabbawi.) Yihowa, woꞌma lubbokkinni iso hagiirsiisate assattore naadannota qaagge isira soqqantanni hagiidhitanni heeꞌri.