Yihowara Soqqama Dandaakkinni Hagiidhi!

1. Yihowa ninke wolootu ledo heewisiisannonkekkihu mayiraati?

YIHOWA baalunkuri mittu gariha ikkara dihasiꞌranno. Isi mannu oosono ikko wole kalaqama kalaqino gari tenne leellishanno. Ate lawannohu uullate aana wolu manchi dino. Hakko daafira Yihowa ate wolootu ledo horo diheewisiisannohe. Isi wodanakki yaano giddoyidi ayimmakki laꞌꞌanno. (1 Sam. 16:7) Qoleno jawaantekki, laanfekkinna lophootto gara hedanno. Hattono wolqakkira aleenni ikkinore assi diyaannohe. Ninkeneeto Yihowa laꞌꞌannonke garinni laꞌne isi lawishsha harunsa hasiissannonke. Hatto assinummoro gara ikkitino lao heedhannonke daafira hasiisannohura aleenni uminke daafira dihendeemmo woy ninkeneeto quwa saꞌne woffi diassineemmo.—Rom. 12:3.

2. Ninkeneeto wolootu ledo heewisiisa dancha ikkitinokkihu mayiraati?

² Dancha lawishsha ikkitanno roduuwa laꞌne insawiinni lowore ronsammora dandiineemmo; lawishshaho mittu rodii woy rodoo soqqanshote worba ikkitara dandiitanno. (Ibi. 13:7) Ninkeno insa laꞌne soqqanshonke woyyeessiꞌneemmo gara huwantammora dandiineemmo. (Fil. 3:17) Ikkollana mitto mancho laꞌne isiha dancha lawishsha harunsatenna ninkeneeto isi ledo heewisiinse ani togooho yaate mereero lowo badooshshi no. Konni garinni ateneeto wolootu ledo heewisiisa hinaasatto gede, hexxo mudhatto gede, wole agurina waagu dinoe yite hedatto gede nafa assitahera dandiitanno. Sai birxichira laꞌnummonte gede songote giddo noo roduuwi ledo heewisama ayyaanaamittenkeno gawajjitara dandiitanno. Hakko daafira Yihowa shaqqillunni togo yee amaalinonke: “Mittu mittunku umisi looso fonqole lao! Assino coyi dancha ikkiro, isonoo wolu manni ledo taashsha agure, umisi kuꞌlannore afiꞌranno.”—Gal. 6:4.

3. Hagiidhatto gede assitannoheti ayyaanaamittete lophokki hiittenneeti?

³ Yihowa isira soqqamate assattori baalunkurinni hagiidhattora hasiꞌranno. Lawishshaho cuuamoottoha ikkiro cuuamate deerra iillakkinni hagiidha dandaatto! Hatto assa doodhoottohu umikkinniiti. Qoleno konne doorsha doodhoottohu ati umikki Magano baxootto daafiraati. Hanni hatte yannanni kayisse ayyaanaamittetenni lophootto gara hedi. Lawishshaho Qullaawu Maxaafi niwaawenna hojju xiinxallo albinni roore baxootto? Woy albinni roore giddokkinni huucciꞌra rosootto? (Far. 141:2) Hattono sabbakatto woyite mannu ledo hasaawa hanafate dandookki lexxitino? Woy soqqanshote horoonsiꞌneemmo uduunnicho albinni roore danchu garinni horoonsiꞌra rosootto? Mine kalaqidhinoonniha ikkiro Yihowa kaaꞌlonni albinni roore dancha minaanna, dancha minaama hattono dancha anna woy ama ikkitinoonni? Hatto ikkiro, kuri woyyeessidhinoonni coyibbanni lowo geeshsha hagiidhanna harshammi yaa dandiitinanni.

4. Konni birxichira maa ronseemmo?

⁴ Wolootuno Yihowara soqqamate assitanni noorinni hagiidhitanno gede kaaꞌla dandiineemmo. Qoleno insaneeto wolootu ledo heewisiissannokki gede kaaꞌla dandiineemmo. Konni birxichira annuwunna amuuwu oosonsa, minaanninna minaama mimmito hattono songote cimeeyyenna wolu roduuwi ammanate roduuwansa kaaꞌla dandiitanno gara ronseemmo. Jeefote, mittu mittunku dandoonkenna heeꞌnoommo gari ledo sumuu yaanno garinni, quwa saꞌinokki mixo fushshiꞌra dandiineemmo gede kaaꞌlannonkeha mito Qullaawu Maxaafiha xintu seera laꞌneemmo.

ANNUWUNNA AMUUWU HATTONO MINAANNINNA MINAAMA MAA ASSA DANDAANNO?

5. Efesooni Sokka 6:4 yitanno garinni annuwunna amuuwu maa assitannokki gede qoropha hasiissannonsa?

⁵ Annuwunna amuuwu mitto qaaqqonsa wolu qaaqqinsa ledo heewisiissannokki gede woy qaaqquullensa wolqansara aleenni ikkinore asse yitannokki gede qoropha hasiissannonsa. Qaaqquulle mimmitu ledo garimale heewisiisanna wolqansara aleenni ikkinore asse yaa qaaqquullu caaccaabbanno gede assitara dandiitanno. (Efesooni Sokka 6:4 nabbawi.) Sashikob yinanni rodoo togo yitino: “Rosu mine rosiisaanoꞌya wole oosonni roore ikkammara hasidhanno. Amaꞌyano, rosiisaanoꞌyanna Yihowa Farciꞌraasincho ikkinokki anniꞌya Yihowa manna ayirrisanno gede ani rosunni dancha guma afiꞌrammara hasidhanno. Isinni fonqoloho xibbunni xibbe afiꞌrammara hasidhanno; ani kayinni hatto assa didandoomma. Roso gudummanku lowo dirooti; ikkirono mito woyite, ani Yihowara soqqamate danduumma geeshsha sharramummarono Yihowa hagiidhannoha dilawannoe.”

6. Annuwunna amuuwu Faarso 131:1, 2⁠teni maa rossanno?

⁶ Faarso 131:1, 2⁠tenni annuwunna amuuwu kaajja roso rosa dandiitanno. (Qummeeshsha nabbawi.) Moote Daawiti, ‘jawurira woy wolqaꞌsira aleenni ikkinorira, shembeephannokkita’ coyiꞌrino. Isonooto heeshshi assannohanna dhukasi afinoha ikkasi “harshammonna keere” afiꞌranno gede assitinosi. Annuwunna amuuwu Daawiti coyiꞌrinorinni maa rossanno? Annuwunna amuuwu uminsa assitannorira calla ikkikkinni, oosonsa assitara hasidhanno coyirano quwa saꞌannokkire ikkite, insaneeto heeshshi assitannorenna dhukansa affinore ikkansa leellisha dandiitanno. Insa qaaqqinsa wonshiꞌra dandaanno mixo fushshiꞌranno gede kaaꞌlitanno woyite, assa dandaannorenna dandaannokkire huwattinota afanno gede assite jawaachishshasira dandiitanno. Maarina yinanni rodoo togo yitino: “Amaꞌya sasu roduuwiꞌya ledono ikko wole ooso ledo diheewisiissannoe. Ise ninke mittu mittunkura addi addi dandoo noonketanna Yihowa mitto mittonka baxannonketa rosiissinoe. Tini aneneeto wolootu ledo heewisiiseemmakki gede kaaꞌlitinoe.”

7-8. Minaanni minaamasi ayirrisa dandaannohu hiittoonniiti?

⁷ Kiristaancho ikkino minaanni minaamasi ayirrisa hasiissannosi. (1 Phe. 3:7) Lawishshaho ise mulluri gede asse laꞌꞌannosekkita leellishe ayirrisannose. Isi wolqasera aleenni ikkinore assi diyaannose. Qoleno wolu meenti ledo diheewisiisannose. Isi ise wolootu ledo heewisiisannoha ikkiro mayi kalaqamara dandaanno? Rooza yinanni rodoo Yihowa Farciꞌraasincho ikkinokki minaannise wolu meenti ledo heewisiisannose. Isi gara garimmo laikki coyiꞌrannori Rooza qara baꞌanno gedenna baxannoehu dino yite heddanno gede assinose. Ise “Yihowa baxannoeta ganye qaagiissannoehu hasiisannoe” yitino. Kiristaancho ikkino minaanni kayinni minaamasi ayirrisanno. Isi minaamasi ayirrisasi ise ledono ikko Yihowa ledo noosi aante seekkitannota dideanno.c

⁸ Minaamasi ayirrisanno minaanni naadannose, baxannoseta kulannose hattono galatannose. (Law. 31:28, 29) Sai birxichira kullita Kateriina, minaannise waagu dinoe yite heda agurtanno gede kaaꞌlinosehu konni garinniiti. Kateriina anje noo yannara amase ise wolu seenninna jaallase ledo heewisiissanni iseneeto woffi assite laꞌanno gede assitinose. Hakko daafira Kateriina Yihowa Farciꞌraasincho ikkitu gedensaanni nafa iseneeto wolootu ledo heewisiissanno. Kiristaancho ikkino minaannise kayinni iseneeto wolootu ledo heewisiisa agurtanno gedenna iseneetira gara ikkitino lao heedhannose gede kaaꞌlinose. Ise togo yitino: “Isi baxannoe, asseemmahu danchu coyira galatannoe hattono ane daafira huuccatto assannoe. Qoleno Yihowata dhagge ikkitanno akatta qaageemma gedenna gara ikkitinokki hedoꞌya biddi assiꞌreemma gede kaaꞌlinoe.”

SONGOTE CIMEEYYENNA WOLU RODUUWI MAA ASSA DANDIITANNO?

9-10. Songote cimeeyye mitte rodoo iseneeto wolootu ledo heewisiissannokki gede kaaꞌlitinosehu hiittoonniiti?

⁹ Songote cimeeyye insaneeto wolootu ledo heewisiissannore kaaꞌla dandiitannohu hiittoonniiti? Hanni hakkeya galantisekki lossinoonnisete Hanuuni yinanni rodoo woꞌnaalsha laꞌno. Ise togo yitino: “Ani alba waajjeemmatenna wole ooso anenni roortinohu gede asse hedeemmate. Aneneeto wolootu ledo heewisiisa hanafoommahu anjeꞌyanni kayiseeti.” Hanuuni halaale macciishshitu gedensaannino iseneeto wolootu ledo heewisiisa diagurtino. Hakko daafira songote giddo waagu dinoe yite heddanno. Ikkirono ise xa suwisaancho ikkite hagiirrunni soqqantanni no. Ise laose biddi assidhanno gede kaaꞌlinoseri maati?

¹⁰ Hanuuni songote cimeeyye kaaꞌlitinoseta coyidhino. Insa, ise ammantannose hattono dancha lawishsha ikkitinota kulte galattannose. Ise togo yitino: “Songote cimeeyye duucha higge, kaaꞌlo hasiissannonsare meya roduuwa jawaachisheemma gede kultinoe. Tini anino songote giddo kaaꞌleemmari no yee hedeemma gede assitinoe. Cimeeyye mito meya roduuwa jawaachishoommatera galattinoeta qaageemma. Hakkiinni insa 1 Teselonqe 1:2, 3 nabbabbinoe. Tini lowo geeshsha jawaachishshinoe! Kuri baxillaano allaalaasine kaaꞌlitinoe daafira songote giddo kaaꞌleemmari noota wodanchoomma.”

11. Faarso 41:1 kultanno garinni, ‘gadadaamma’ kaaꞌla dandiineemmohu hiittoonniiti?

¹¹ Faarso 41:1 nabbawi. Yihowa “gadadaammu daafira xissiisiꞌranno.” Songote cimeeyye calla ikkitukkinni ninke baalunku togoore muxxe roduuwa jawaachisha dandiineemmo. Insa jawaachisha dandiineemmo doogga giddo mitte, insa daafira godowinta hendeemmota leellishate. Yihowa, insa baxannonsata huwattanno gede assinammora hasiꞌranno. (Law. 19:17) Ninkeneeto heeshshi assineemmorenna dhukanke anfoommore ikkankeno roduuwanke kaaꞌlitannonsa. Wolootu hinaassanno gede assitara dandiitanno daafira, mannu ninke illachishanno gede assa dihasiissannonke. Hatteentenni, dandoonkenna egennonke mimmito jawaachishate horoonsiꞌneemmo.—1 Phe. 4:10, 11.

12. Mannu woffi asse laꞌꞌannori Yesuusiwa daa baxxannohu mayiraati? (Aaniidi qoolira noo misile lai.)

¹² Yesuusi harunsaanosi kaaꞌlino gara laꞌne, ninkeno woloota kaaꞌlate daafira lowore rosa dandiineemmo. Yesuusi uullate aana heeꞌrino manni baalunkunni rooreho. Ikkirono isi “joogahonna shaqqadoho.” (Mat. 11:28-30) Isi mannu baalunnita roortino dandoonna egenno noosita leellishiꞌrate diwoꞌnaalino. Isi xawe leellanno garinni rosiise, hattono dancha lawishsha horoonsiꞌre rosiisannori mannu wodanira coanno gede assino. (Luq. 10:21) Yesuusi booꞌnaleeyye ikkitinori ammaꞌnote murrooti gede, mannu Maganu albaanni waagu dinonke yee hedanno gede diassino. (Yoh. 6:37) Isi mannu woffi asse laꞌꞌannore nafa ayirrisino.

13. Yesuusi rosaanosi kaaꞌlino gari shaqqadonna baxillaancho ikkinota leellishannohu hiittoonniiti?

¹³ Yesuusi rosaanosi kaaꞌlino gari, isi shaqqadonna baxillaancho ikkinota leellishanno. Isi insara noonsa dandoo addi addita ikkitinotanna heeshshonsa garino addi addiha ikkinota afino. Hakko daafira baalunku mittu gari looso loosa woy soqqanshonsanni mittu gari guma afiꞌra didandiitanno. Ikkirono isi, insa mittu mittunku woꞌma lubbonsanni assitinore naadino. Yesuusi taalaantete daafira coyiꞌrino lawishshi, isi dhukansanna dandoonsa afinota leellishanno. Yesuusi lawishshu giddo kulino mootichi, mittu mittunku borojjichira looso uyinohu ‘dandoosi deerrinniiti.’ Jawaatte loossinori lamu borojjooti giddo mittu roore loosino. Mootichu kayinni lamenka “Danchaho! Ati ammanamoottohonna dancha soqqamaanchooti” yee taalo galatinonsa.—Mat. 25:14-23.

14. Roduuwanke jawaachishate Yesuusi lawishsha harunsa dandiineemmohu hiittoonniiti?

¹⁴ Yesuusi ninkeno shaqqillunninna baxillunni kaaꞌlannonke. Isi dandoonkeno heeshshonke garino addi addiha ikkinota afino; hattono woꞌma lubbonkenni soqqamate sharrammeemmo woyite hagiidhanno. Ninkeno roduuwanke jawaachishate Yesuusi lawishsha harunsineemmo. Ammanate roduuwinke wolootu loossanno geeshsha loonsanni diheeꞌnoommo yite insaneeto woffi assitanno gede woy saaltanno gede assa dihasiꞌneemmo. Hatteentenni, roduuwinke Yihowara soqqamate dandiiture baala assitanno daafira, insa galanteemmo faro hasiꞌneemmo.

QUWA SAꞌINOKKI MIXO FUSHSHIꞌRI

15-16. Mitte rodoo quwa saꞌinokki mixo fushshiꞌrase kaaꞌlitinosehu hiittoonniiti?

¹⁵ Ayyaanaamittete mixo fushshiꞌranke heeshshonke qinaabbinotanna hagiirru noota ikkitanno gede assitanno. Ikkollana mixo fushshiꞌneemmohu uminke dandoonna heeshshonke gara laꞌneeti ikkinnina wole manna laꞌne diꞌꞌikkino. Wole manna laꞌne mixo fushshiꞌneemmoha ikkiro, hexxo mudhinammora dandiineemmo. (Luq. 14:28) Hanni Midoori yinannite suwisaancho rodoo lawishsha laꞌno.

¹⁶ Yihowa Farciꞌraasincho ikkinokki annise, Midoori anje noo yannara roduuwisenna ledose rossannori ledo heewisiisanni qara baꞌanno gede assinose. Midoori “Waagu dinoe yee hedoomma” yitino. Ise lophitanni hadhuti kayi, worba ikkitino. Midoori togo yitino: “Giddoyidi keere afiꞌratenna Yihowa baxannoeta huwatate Qullaawa Maxaafa barru baala nabbaweemma.” Qoleno ise quwa saꞌinokki mixo fushshidhino, hattono tenne mixo wonshidhanno gede kaaꞌlasera Yihowa huuccidhino. Tini, Midoori Yihowara soqqama dandaasenni hagiidhitanno gede assitinose.

YIHOWARA WOꞌMA LUBBOKKINNI SOQQAMA AGURTOOTI

17. ‘Wodaninkenna hedonke haarooꞌmitanno’ gede assiꞌra dandiineemmohu hiittoonniiti? Hatto assanke maaho kaaꞌlitannonke?

¹⁷ Gara ikkitinokki hedo giddonkenni bayichonko baꞌꞌa hooggara dandiitanno. Hakko daafira Yihowa “Wodaniꞌnenna hedoꞌne haarooꞌmito” yee jawaachishinonke. (Efe. 4:23, 24) Wodaninke haarooꞌmanno gede, huuccatto assiꞌra, Maganu Qaale nabbawanna hiinca hasiissannonke. Kuri coyibba assa agurtooti, hattono Yihowa jawaante aannohe gede huucciꞌri. Qullaawu ayyaanisi ateneeto wolootu ledo heewisiisate hedo qeeꞌlatto gede kaaꞌlannohe. Naaxxatenna hinaasate akati giddokki muꞌranni nooha ikkiro, Yihowa tini gara ikkitinokki akatta nooheta huwatatto gedenna bayichonko buqqisse hooꞌlatto gede kaaꞌlannohe.

18. Layinki Duduwo 6:29, 30te noo hedo sheshifachishshannonkehu hiittoonniiti?

¹⁸ Layinki Duduwo 6:29, 30 nabbawi. Yihowa wodaninketa afino. Qoleno isi, tenne busha alamenna guuntete xeꞌnenke ledo gaarammanni heeꞌnoommota afino. Yihowa kuri busha coyibba ledo lowo geeshsha gaarammanni heeꞌnoommota laꞌꞌanno woyite, albinni roore baxannonke.

19. Yihowa baxannonketa leellishate hiikkonne lawishsha horoonsiꞌrino?

¹⁹ Yihowa mageeshshi geeshsha baxannonkero leellishate, amatenna qaaqqise mereero noo baxille lawishsha asse horoonsiꞌrino. (Isa. 49:15) Hanni Raakeeli yinannite oosote ama lawishsha laꞌno. Ise togo yite borreessitino: “Qaaqqoꞌya Istefaani barru iillikki ilantino. Ise ilantu woyite hiliccitenna horo noori dinoote. Ikkollana ise mitto agana hospitaalete noo yannara akimootu barru baala hanqafiꞌreemma gede fajjitinoe. Hatte yannara isenna ane mereero noo baxilli kaajjino. Xa isera lee diro ikkinose; qoleno darawose laꞌniro ise shiimate. Ikkollana, ise lowo qarra dandiite saꞌino daafira lowo geya baxeemmase; qoleno heeshshoꞌya hagiirru noota ikkitanno gede assitino!” Yihowano isira woꞌma lubbonkenni soqqamate sharrammeemmota laꞌꞌanno woyite, konni garinni baxannonketa afanke lowo geya jawaachishshannonke!

20. Yihowa soqqamaancho ikkootto daafira hagiidhatto gede assannoheri maati?

²⁰ Yihowa soqqamaancho ikkootto daafira, ati muxxe maatesi miilaati; qoleno ate lawannohu wolu dino. Yihowa isiwa abbinohehu ati wole manna roorootto daafira diꞌꞌikkino. Isi minisira abbinohehu ateneeto heeshshi assattoha, hattono rosatenna biddi yaate maahoyye yaattoha ikkoottota laino daafiraati. (Far. 25:9) Yihowa isira soqqamate dandiittore baala assatto woyite tenne naadannota huluullantooti. Cincakkinna ammanamakki “danchu wodani” nooheta leellishshanno. (Luq. 8:15) Hakko daafira Yihowara woꞌma lubbokkinni soqqama agurtooti. Hatto assittoro, ‘umikkinni hagiidhattore’ afiꞌratto.