Geerra Roduuwa, Songote Lowore Kaaꞌlitinanni
“Alba assa dandeemmare qaageemma woyte dhagge assiꞌreemma. Xa geedhoomma daafira alba asseemma geeshshire assa didandeemma.”—Kaani 83 diri geercho.
Atino geedhootto daafira alba assatto geeshshire assa dandoottokkiha ikkara dandaanno. Lowo diro Yihowara ammanante soqqamoottoha ikkirono xaa yannara garire assa dandoottokkihura ateneeti daafira gara ikkinokkire hedattoha ikkara dandaanno. Lawishshaho, xa assitanni noottore alba assattori ledo heewisiisa rakkahera dandiitanno. Hatto ikkiro togoo hedo hagiirrekki huntannokki gede maa assa dandaatto?
YIHOWA MA ASSATTORA HASIꞌRANNO?
Ateneeto togo yite xaꞌmi: ‘Yihowa maa assammora hasiꞌranno?’ Marro 6:5 noo hedo sheshifachishshahera dandiitanno; qummeeshshu togo yaanno: “Maganoꞌne Kaaliiqa, woꞌmu wodaniꞌnenni, woꞌma lubboꞌnenni, woꞌma wolqaꞌnenni baxxe.”
Konni qummeeshshi garinni Yihowa woꞌmu wodanikkinni, woꞌma lubbokkinninna woꞌma wolqakkinni soqqamattosiꞌra hasiꞌranno. Tenne afakki ateneeto wolootu ledo woy xa assitanni noottore alba assattori ledo heewisiisattokki gede kaaꞌlitannohe.
Hanni tenne hedi: Wedellichu nootto waro Yihowara soqqamate maa assootto? Rooru Yihowa manni isira soqqamate dandiire baala assinota coyiꞌrara dandaanno. Atino wedellichu nootto yannara Yihowara soqqamate dandiittore baala assootto. Xaa yannara Yihowara soqqamate assa dandaattori maati? Xaano nootto gara hendiro, Yihowara soqqamate dandiittore baala assitanni nootto yaa dandiinanni. Konni garinni hedattoha ikkiro Yihowara soqqamate xa assitanni noottori alba assattori ledo mittu gariha ikkinota huwata dandaatto. Alba Yihowara soqqamate dandiittore baala assootto; xaa dandiittore baala assitanni nootto.
Wedellichu heedhe Yihowara soqqamate dandiittore baala assootto; xaano geedhimmakki yannara Yihowara soqqamate dandiittore baala assitanni nootto
WOLOOTA LOWO GEESHSHA KAAꞌLATTORA DANDAATTO
Aane nooreno heda dandaatto: Geercho ikkakkinni assa dandaattokkire calla ikkikkinni geercho ikkakkinni assa dandaattoreno hedate woꞌnaali. Geercho Kiristaancho ikkoottohura wedellichu nootto waro assa dandaattokkihu, xa kayinni assa dandaattohu mitu coy no. Lawishshaho aane noore assa dandaatto:
Woꞌnaalshakki wolootaho kuli. Qullaawu Maxaafi giddo noota aante noo xagge hedi:
Moote Daawiti: “Anjeꞌyanni kayise techo geedhimmaꞌya geeshsha, keeraanchu tugamanna, sirchisino hudiꞌre huucciꞌranna afe diegennoommo.”—Fa. 37:25.
Iyyaasu: “Kuneeti ani mannu aalo ikkeemmo yanna iillitinoe. Maganiꞌne Kaaliiqi uyinoꞌne hexxo garinni assinoꞌneha dancha coye baalanka kiꞌne mittu mittunku godowiꞌnenni seekkitine egentinoonni; isi uyinoꞌne hexxo giddonni mitteno gattukkinni baalanti woꞌmitanno.”—Iya. 23:14.
Atino insa gede yaattoha ikkara dandaanno. Daawitinna Iyyaasu uminsa heeshshonni laꞌinore coyidhino. Kuri ammanantinori Yihowa soqqamaano coydhinori lowo diro laꞌinoreetinna macciishshitinoreeti; hakko daafira insa coydhinori lowo tiro afiꞌrino.
Yihowara lowo diro soqqamoottoha ikkiro atino hatto assakkinni afiꞌrootto atoote wolootaho kula dandaatto. Yihowa mannasi maassiꞌranna laoottoti hawattokki yanna no? Hatto ikkiro, tenne wolootaho kulate hobbi ruxxi yitooti. Kuni woꞌnaalshi ate umokki jawaachishinohente gede wolootano jawaachishara dandaanno. Yihowara soqqante afiꞌrootto woꞌnaalsha kultanna macciishshitanno woyte wolootu lowo geeshsha jawaattanno.—Rom. 1:11, 12.
Woloota jawaachisha dandaattoti wole doogo dandiitto deerrinni songote gambooshshe haꞌrate. Gambooshshunniwa ammanate roduuwakki jawaachishatto; atino jawaatatto. Aleenni kulliti Kaani togo yitino: “Gambooshshe haꞌra hexxo mudheemmakki gede kaaꞌlitinoe. Gambooshshunniwa roduuwu baxille leellishshannoe daafira didadilleemma. Wolootaho mito shiimaadda coye oye naadeemmansata leellishate woꞌnaaleemma. Woꞌmanka woyte ammanate roduuwiꞌya ledo ayyaanaamittete coye assate danduummare baala asseemma.”
YIHOWA AMMANANTE ISIRA SOQQAMATE ASSATTORE NAADANNO
Qullaawu Maxaafi giddo alba assanno geeshshire assa dandiinokkihu kayinni Yihowa baxannonsa manniti batinye xagge no. Hanni Yesuusi ilami yannara heeꞌrinohu Simooni yinanni geerchi xagge laꞌno. Simooni qullaawa mine haꞌranno woyte hakkiicho wedellu labballi lowo geeshsha hasiisanno looso loossanna laꞌꞌannoha ikkara dandaanno. Kayinni Simooni umisina? Mannu lao garinni hattee geedhimmasi yannara isi Yihowa albaanni gari waagi dinoe yee hedinoha ikkara dandaanno. Kayinni Yihowa laꞌꞌannohu hakko garinni diꞌꞌikkino. Yihowa Simooni ‘keeraanchunna Magano waajjanno manchi’ gede asse lainosi hattono Yesuusi qaaqqu heꞌreenna laꞌꞌate qoosso afiꞌranno gede asse maassiꞌrinosi. Isinni Yihowa Simooni albillitte Buuraminoha ikkannohu daafira masaalo coyiꞌranno gede asse horoonsiꞌrinosi! (Luq. 2:25-35) Yihowa Simoonita geedhitino mannimmasi ikkikkinni kaajjado ammanasi laino hattono “qullaawu ayyaanino aanasi no.”
Yihowa Simooni qaaqqo Yesuusa laꞌꞌanno gede assenna albillitte Buuraminoha ikkannohu daafira masaalo coyiꞌranno gede asse maassiꞌrinosi
Atino Yihowara soqqamate albi geeshshire assa dandoottokkiha ikkiro Yihowa isira ammanante soqqamate assattore naadannota addaxxa dandaatto. Yihowa “roore hagiidhannohu mittu manchi noosikki deerrinni ikkikkinni noosi deerrinni uyirooti.”—2 Qo. 8:12.
Hakko daafira assa dandaattore illachishi. Lawishshaho harancho saate soqqamattoha ikkiro nafa xa hiikko gari soqqansho soqqama dandaatto? Silke dowwolte woy haranchore borreessite sokke woloota jawaachisha dandaatto? Roorenkanni Yihowara lowo diro soqqantinori baxille leellishate assitannohu shiimu coy ammanate roduuwansa lowo geeshsha jawaachishanno.
Wolootaho dhuku anje noonsa. “Heeshshose Gatissino” yitanno saaxine hunda nooha Soojjaati Afirikira heedhanno rodoo woꞌnaalsha lai.
Yihowara ammanante soqqamakki woloota jawaachishshannota deꞌooti. Cincate dancha lawishsha ikkoottota hattono ‘Maganu xaano ikko albillitte qullaawootaho soqqamate loosatto loosonna suꞌmisira leellishootto baxille hawe halaale wirannokkita’ addaxxa dandaatto.—Ibi. 6:10.
WOLOOTA KAAꞌLATE DANDIITTORE BAALA ASSI
Woloota kaaꞌlannohu batinyu geerrira dancha ordu fayyimma heedhannonsata, dancha gede hedannotanna seeda diro heeꞌrannota xiinxallo leellishshanno.
Hige dancha looso loosa geedhimma abbitannoha baalanka qarra dihooltanno. Geedhimmatenna reyote kaima ikkinoha cubbo hune tenne assa dandaannohu Maganu Gashshoote callaho.—Rom. 5:12.
Ikkirono Yihowara shiqishiꞌratto kakkalo lawishshaho wolootu iso affanno gede kaaꞌlakki hexxokki kaajjishshanno hattono dancha ordu fayyimma nafa heedhannohe gede kaaꞌlitannohe. Geerra roduuwa Yihowa isira soqqamate assitinannire naadannota deꞌinoonte ballo; songono ammanatenni dancha lawishsha ikkaꞌne lowonta naaddanno.