1 | Huuccatto—“Qarrisannoꞌnere Baala Isi Aana Tuqqe”

QULLAAWU MAXAAFI TOGO YAANNO: “Kiꞌnere malannohu isootina, qarrisannoꞌnere baala [Maganu] aana tuqqe.”—1 PHEEXIROOSI 5:7.

Hatto Yaa Mayyaate?

Maganu Yihowa surrenkeranna wodaninkera duha ikkinonkere baala isira hasaaphineemmo gede koyisinonke. (Faarso 55:22) Iillinonke qarri aye geeshshano jawa ikkiro woy aye geeshshano shiima ikkiro Yihowara hasaapha dandiineemmo. Iillinonke qarri ninke yaachishinkero, Yihowano yaachishannosi. Giddoyidi keere afiꞌrate Yihowa huucciꞌra lowo geeshsha hasiissannote.—Filiphisiyusi Sokka 4:6, 7.

Tini Kaaꞌlitannonkehu Hiittoonniiti?

Surrete xisso waaddannonke woyite, horo callantoommohu gede assine hendammora dandiineemmo. Amadinonke qarri wolu mannira woꞌmunni woꞌma leella hoogansara dandaanno. (Lawishsha 14:10) Kayinni wodaninke hedo gudinse huuccattotenni Maganoho kuꞌlinummoro, isi huuccattonke macciishshanno; qarrinkeno leellannosi. Yihowa qarranke laꞌꞌanno, isi xissonkenna qarra ikkannonkere afanno; qoleno isi yaachishannonkere baala hasaaphinammosira hasiꞌranno.—2 Duduwo 6:29, 30.

Huuccattotenni Yihowa hasaawisa isi ninke daafira hedannota albinni roore addaxxineemmo gede assitannonke. Ninkeno faarsaasinchu yiinota yaa dandiineemmo; isi, “Qarraꞌya afootto, shettoꞌyano laootto” yiino. (Faarso 31:7) Yihowara qarrinke leellannosita afanke calla nafa, iillinonke qarra dandiine saꞌneemmo gede wolqa ikkitannonke. Ikkollana isi iillinonke qarra afe calla diaguranno. Yihowa iillanni noonke qarra aye manchinni roore afannoha calla ikkikkinni, Qullaawu Maxaafi widoonni jawaantenna shesho afiꞌneemmo gedeno kaaꞌlannonke.

Qullaawu Maxaafi Kaaꞌlanno Gara Juuliyani

Yaaddo Waaddannoe Gara

“Quwa saꞌino yaaddonna obisesiivi kompalsiivi disorderi (OCD) yinanni dhibbi waadannoe. Yaaddo hedeweelcho dagge amaddannoe. Mittu qarri nookkiha dancha gede ikke noommohu, mulenni hedeweelcho iimi uullanni kae lowo geeshsha yaadeemmo. Hakko iso mannu ledo noommo woyite roore yaadeemmo. Insa ane daafira maa heddanni nookka yee lowo geeshsha huluullameemmo.”

“Qarraꞌya affino jaallaꞌya ane kaaꞌlate dandiiture baala assitanno. Hige insa mito woyite kaaꞌlannoekki coye coyidhannota dikaadeemmo. Kayi insa ane kaaꞌlate yite assitannorira galateemmonsa.”

“Mito woyite yaaddonna nooe xisso huuccatto assiꞌra nafa hooltannoe. Hedoꞌya xaphi assiꞌre Yihowa huucciꞌrate lowo geeshsha sharrama hasiissannoe. Surreꞌya mitto coye hede kaummokkinni wolere heddanno daafira lowo geeshsha gurchaaweemmo. Togoo yannara hedoꞌya mitte assiꞌre afeemmokki daafira, giddoꞌyata fushshe Yihowara hasaapha qarra ikkitannoe.”

Qullaawu Maxaafi Kaaꞌlinoe Gara

“Qullaawa Maxaafa xiinxallaꞌyanni, Maganu macciishshannonkehu seeda huuccatto assiꞌnummoro calla woy dancha dancha qaalla doorre huucciꞌnummoro calla ikkinokkita huwatoommo. Mito woyite giddoꞌyata fushshe hasaapha qarra ikkituero, ‘Yihowa kaaꞌlie ballo’ calla yeemmo. Hattoo woyite nafa, Yihowara qarriꞌya leellinositanna hasiisannoere asse kaaꞌlannoeta huwateemmo. Huuccatto assiꞌrano agurranna, akimete minirano haꞌroommo. Kuni lamunku coyi lowo beedho afiꞌreemmo gede kaaꞌlinoe. Iimi Annaꞌya huucciꞌratenna kaaꞌlie yaate lowo geeshsha sharrama hasiissannoeha ikkirono, isi baxannoetanna kaaꞌlaera hasiꞌrannota afoommo daafira hatto assa diagureemmo.”