Cuuama Hasiissannohehu Mayiraati?

1-2. Mannu cuuamanno yannara duucha woyite mayi ikkanno? Konni birxichira maa ronseemmo?

GAMBA yee nooha cuuamate qixxaawino manna laꞌe egennootto? Insa cuuantara albaanni xaꞌminanninsate lame xaꞌmora dawaro qoltanno woyite huuronsanni ammanansa mageeshshitero afa dandaatto. Hatte yannara maatensanna jaallansa lowo geeshsha hagiidhitanno. Cuuantannori wayi giddonni fultanno woyite, gamba yee noo manni anga shooshshe gananno; cuuantinorino lowo geeshsha hagiidhitinota wodancha dandaatto. Lamalate kiiro mereerimunni, lowo kume ikkanno manni heeshshonsa Yihowara sayise oye cuuame Yihowa Farciꞌraasine ikkanno.

² Atina? Cuuamate heddanni noottoha ikkiro, tenne busha alame giddo heedhe baxxoottoha ikkootto; mayira yiniro, ati ‘Magano hasidhanni’ nootto. (Far. 14:1, 2) Aja woy akkalano ikkittoro kuni birxichi kaaꞌlannohe. Ikkollana ninke cuuammoommorino Yihowara hegerera soqqammanni heeꞌrate albinni roore murciꞌra hasiꞌneemmo. Hakko daafira hanni Yihowara soqqammeemmo gede kakkayisannonkeha ajayi ajeenna sase korkaata laꞌno.

HALAALENNA KEERAANCHIMMA BAXOOTTO

3. Yihowa soqqamaano halaalenna keeraanchimma baxxannohu mayiraati? (Faarso 119:128, 163)

³ Yihowa mannisi ‘halaale baxanno’ gede hajajino. (Zak. 8:19) Yesuusi harunsaanosi keeraanchimma hasidhanno gede kulinonsa. (Mat. 5:6) Hatto yaa Maganu albaanni gara, danchanna keeraancho ikkinore assate hasatto heedhannonke gede assiꞌra hasiissannonke yaate. Ati halaalenna keeraanchimma baxatto? Baxattoti dihuluullissannote. Kaphonna busha coye baala giwootto. (Faarso 119:128, 163 nabbawi.) Kaphu tenne alame gashshaanchi Sheexaanu akataati. (Yoh. 8:44; 12:31) Sheexaanu mixo giddo mitte qullaawa ikkinoha Maganu Yihowa suꞌma hunate. Sheexaanu Edenete finqille kaꞌuhunni hanafe Maganinke daafira kapho tareessa diagurino. Isi, Yihowa mannu oosora danchare hoꞌlannoho, umosi calla baxannohonna kaphaancho Gashshaanchooti yiino. (Kal. 3:1, 4, 5) Sheexaanu Yihowa daafira coyiꞌrino kaphi mannu surrenna wodana daafa diagurino. Mannu ‘halaale baxannokkiha’ ikkiro, Sheexaanu kuni manni keeraancho ikkinokkihanna busha coye assanno gede xixxiiwansara dandaanno.—Rom. 1:25-31.

4. Yihowa “halaalu Magano” ikkinota leellishinohu hiittoonniiti? (Misileno lai.)

⁴ Yihowa ‘halaalu Maganooti’; hattono isi baxxannosirira shaqqillunni halaale rosiisannonsa. (Far. 31:5) Konni garinni isi insa Sheexaanu kaphinni dogantannokki gede kaaꞌlannonsa. Qoleno Yihowa soqqamaanosi ammaꞌninannirenna keeraano ikkitanno gede rosiisannonsa. Tini insaneetira ayirrinyu heeꞌrannonsa gedenna giddoyidi keere afidhanno gede kaaꞌlitannonsa. (Law. 13:5, 6) Qullaawa Maxaafa xiinxallitto woyite tini halaale ikkitinota huwatootto? Yihowa assannori aterano ikko baalante mannu oosora lowo geeshsha hasiisannoha ikkinota rosootto. (Far. 77:13) Hakko daafira Maganu albaanni gara ikkinore assa hasiꞌrootto. (Mat. 6:33) Halaaleho halamanna Sheexaanu Maganinke Yihowa daafira coyiꞌrinori kapho ikkinota leellisha hasiꞌrootto. Tenne assa dandaattohu hiittoonniiti?

5. Halaalehonna keeraanchimmate halama dandaattohu hiittoonniiti?

⁵ Aane noore assa hasiꞌrattota leellishshanno heeshsho doodha dandaatto: “Sheexaanu kapho giweemmo; halaaleho halameemmo. Yihowa Aliidi Gashshaanchoꞌya ikkara hasiꞌreemmo; hattono isi albaanni gara ikkinore assa hasiꞌreemmo.” Tenne assa dandaattohu hiittoonniiti? Yihowa huucciꞌri, heeshshokki isira sayisse uyi hattono heeshshokki sayisse oottota cuuante mannu albaanni leellishi. Halaalenna gara ikkinore assa baxakki cuuama hasiꞌratto gede kakkayisannoheho qara coyeeti.

YESUUSI KIRISTOOSA BAXOOTTO

6. Faarso 45:4 Yesuusi Kiristoosa banxeemmo gede assannonkeha hiikkonne korkaata kulloonni?

⁶ Yesuusi Kiristoosa baxoottohu mayiraati? Kiristoosa banxeemmo gede assannonkeha mito korkaata Faarso 45:4 kulloonni. (Qummeeshsha nabbawi.) Yesuusi halaale, joongillenna keeraanchimma baxanno. Halaalenna keeraanchimma baxattoha ikkiro, Yesuusi Kiristoosano baxattoti dihuluullissannote. Yesuusi halaalenna gara ikkinorira worbimmatenni halamino gara hedi. (Yoh. 18:37) Ikkina isi jooga ikkinota leellishinohu hiittoonniiti?

7. Yesuusi joongilli daafira dhagge ikkannoheri maati?

⁷ Yesuusi jooga ikkinota leellishino. Lawishshaho isi, ayirrinye umisira ikkikkinni Annisira uyino. (Maq. 10:17, 18; Yoh. 5:19) Isi joongilli daafira hedatto woyite mayi macciishshamannohe? Tini Maganu Beetto baxatto gedenna iso harunsatto gede diassitannohe? Assitannoheti dihuluullissannote. Yesuusi jooga ikkinohu mayiraati? Jooga ikkinoha Annasi baxannonna isi faale haꞌranno daafiraati. (Far. 18:35; Ibi. 1:3) Tini, Yihowa akatta guutu garinni leellishinohu Yesuusiwa shiqatto gede diassitannohe?

8. Mootenke ikkinoha Yesuusa banxeemmohu mayiraati?

⁸ Yesuusi taalle nookki Gashshaanchonke ikkino daafira banxeemmosi. Yihowa Beettosi qajeelsino; hattono gashshaancho ikkanno gede shoominosi. (Isa. 50:4, 5) Hanni Yesuusi umisi horo agure baxille leellishino gara hedi. (Yoh. 13:1) Yesuusi Mootenke ikkino daafira iso baxa hasiissannonke. Isi jaallaꞌya yee woshshannonsari iso addinta baxxannori, hajajosi agadhite baxille leellishshannota coyiꞌrino. (Yoh. 14:15; 15:14, 15) Yihowa Beetti jaalla ikka ninkera lowo ayirrinyeeti!

9. Kiristaanu cuuamanna Yesuusi cuuama mitto assannori maati?

⁹ Yesuusi hajajo giddo mitte harunsaanosi ikkitannori cuuantanno gede hajajino hajajooti. (Mat. 28:19, 20) Tennera isi lawishsha ikkinonke. Yesuusi cuuama rosaanosi cuuamawiinni mito geeshsha baxxitanno. (“Yesuusi Cuuamanna Rosaanosi Cuuama Mereero Noo Badooshshi Maati?” yitanno saaxine lai.) Kayinni lamenta cuuama mitto assannonsarino no. Yesuusi cuuami woyite Annisi fajjo wonshate maahoyye yiino. (Ibi. 10:7) Kiristoosi rosaanono cuuantanno woyite heeshshonsa Maganu Yihowara sayisse uyitinota mannu albaanni leellishshanno. Hakko daafira xaate insa uminsa fajjo ikkikkinni Yihowa fajjo balaxisiissanno. Konni garinni Mootichinsa lawishsha harunsitanno.

10. Yesuusa baxakki cuuamatto gede kakkayissannohehu mayiraati?

¹⁰ Yesuusi Yihowaha mitto Beetto ikkinotanna Maganu iso Mootenke ikkara shoominota ammanootto. Yesuusi umosi heeshshi assannoha ikkinotanna Annisi akatta guutu garinni leellishannoha ikkinota rosootto. Qoleno isi hudidhinore itisinota, hexxo mudhitinore sheshifachishinotanna dhiwantinore hursinota rosootto. (Mat. 14:14-21) Xaa yannara songuwa massaganni noo garano afootto. Qoleno isi Maganu Mangiste Moote ikkino daafira albillitte kawiinni sainore assannotano afootto. Iso baxattota leellisha dandaattohu hiittoonniitiyya? Isi lawishsha harunsatenniiti. (Yoh. 14:21) Heeshshokki Yihowara sayisse uyite cuuante isi lawishsha harunsa dandaatto.

MAGANO YIHOWA BAXOOTTO

11. Cuuamatto gede assannohehu qaru korkaati maati? Hatto yoottohu mayiraati?

¹¹ Cuuamatto gede assannohehu qaru korkaati maati? Yesuusi Maganu hajajo giddo baalanta roortannoti hiittenneetiro kulanni togo yiino: “Maganokki Kaaliiqa woꞌmu wodanikkinni, woꞌma lubbokkinni, woꞌma hedokkinninna woꞌma wolqakkinni baxi!” (Maq. 12:30) Konni qummeeshshira noo hedo Magano mageeshshi geeshsha baxattoro leellishshanno?

12. Yihowa baxattohu mayiraati? (Misileno lai.)

¹² Yihowa banxeemmo gede assannonkehu batinyu korkaati no. Lawishshaho, isi “heeshshote buicho” ikkinotanna “dancha eltonna woꞌmu atooti baalu” isiwiinni ikkinota huwatootto. (Far. 36:9; Yai. 1:17) Dancha coye baala afiꞌnoommohu shaqqadunna baxillaanchu Maganinkewiinniiti.

13. Wodo dhagge ikkitanno eltooti yineemmohu mayiraati?

¹³ Wodo Yihowa uyinonkete dhagge ikkitanno eltooti. Hatto yineemmohu mayiraati? Hanni Yihowanna Beettisi mereero noo jaalooma hedi. Yesuusi, “Anniꞌya ane baxannoe” hattono “Ani Annaꞌya baxeemmo” yiino. (Yoh. 10:17; 14:31) Insa lowo biliyoone diro mitteenni heeꞌransa mereeronsa noo jaaloomi kaajjanno gede assitino. (Law. 8:22, 23, 30) Hanni Maganu Beettisi qarramannonna reyanno gede fajji woyite mageeshshi geeshsha xissiisiꞌrinoro hedi. Yihowa mannu ooso lowo geeshsha baxanno; hakko daafira atino wolu mannino hegere heeshsho afidhinanni gede baxanno Beettosi wodo asse uyino. (Yoh. 3:16; Gal. 2:20) Magano banxeemmo gede assannonkehu qaru korkaati konneeti.

14. Heeshshokki giddo fushshiꞌratto mixo baalanta roortannoti hiittenneeti?

¹⁴ Yihowa daafira rositto kiiro isira noohe baxilli lexxanni haꞌranno. Xaano ikko hegerera isiwa roore shiqa hasiꞌrattoti dihuluullissannote. Qoleno hatto assa dandaatto. Isi wodanasi tashshi assineemmo gede jawaachishinonke. (Law. 23:15, 16) Coyiꞌrattorinni calla ikkikkinni assattorinnino hatto assa dandaatto. Yihowa addinta baxattota heeꞌratto heeshshonni leellisha dandaatto. (1 Yoh. 5:3) Tini fushshiꞌratto mixo baalanta roortannote.

15. Yihowa baxattota leellisha dandaattohu hiittoonniiti?

¹⁵ Yihowa baxattota leellisha dandaattohu hiittoonniiti? Umihunni, heeshshokki mittu halaalaanchu Maganira sayisse oottota baxxino garinni huuccattotenni kulteeti. (Far. 40:8) Hakkiinni heeshshokki isira sayisse oottota mannu albaanni leellishatto. Konni birxichira aleenni laꞌnummonte gede, cuuamakki hagiidhatto gedenna tenne yanna horo hawattokki gede assitannohe. Konni garinni umikkira ikkikkinni Yihowara haaro heeshsho heeꞌra hanafatto. (Rom. 14:8; 1 Phe. 4:1, 2) Kuni dishaaꞌꞌa doorshaati. Ikkirono baalantenni woyyitino heeshsho heeꞌratto faro fanannohe. Hiittoonni?

16. Faarso 41:12 kultanno garinni Yihowa heeshshonsa isira soqqamate sayisse uyitinore baꞌraasannohu hiittoonniiti?

¹⁶ Yihowa gedee shaqqadi no. Yihowara aattori ikkireno ikkiro isi woꞌmanka woyite hakkiinni roorse aannohe. (Maq. 10:29, 30) Isi tenne baꞌara shiima yanna gatte noo alame giddo nafa hagiirsiissannotanna harshammi assitanno heeshsho aannohe. Tini hanafotella. Cuuante hanafoottoti tini heeshsho gawalo diafidhinote. Baxillaanchu Annikkira hegerera soqqantanni heeꞌra dandaatto. Atenna Annikki Yihowa mereero noo baxilli lexxanni haꞌranno; Yihowa hegerera heeꞌrannoha ikkino daafira atino hegerera heeꞌratto.—Faarso 41:12 nabbawi.

17. Yihowara noosikkihu aattosira dandaatto coyi maati?

¹⁷ Heeshshokki Maganoho sayisse aatto woyitenna cuuamatto woyite Annikki Yihowara lowo geeshsha muxxe ikkinore aate qoosso afiꞌratto. Hagiidhatto gede assannoheha dancha coye baala uyinohehu isooti. Atino iimanna uulla kalaqino Maganira noosikki coye aa dandaatto; kuni coyi umikki fajjonni isira ammanante soqqamate. (Iyo. 1:8; 41:11; Law. 27:11) Tenne saꞌino heeshsho horo dino. Cuuamatto gede assannohehu qaru korkaati Yihowara noohe baxille ikkinoti dihuluullissannote.

CUUAMATE QIXXAAWOOTTO?

18. Ateneeto hiikkuri xaꞌmuwa xaꞌma dandaatto?

¹⁸ Cuuamate qixxaawootto? yitanno xaꞌmora qolatto dawaro maati? Tenne xaꞌmora dawaro qola dandaattohu ate callaati. Kayinni ‘Cuuamummokkinni keeshshoommohu mayiraati?’ yite ateneeto xaꞌmakki kaaꞌlitahera dandiitanno. (Soq. 8:36) Hanni aleenni laꞌnummoha sase coye qaagi. Umihunni, halaalenna keeraanchimma baxootto. Ateneeto togo yite xaꞌmi: ‘Baalunku manni halaale coyiꞌrannotanna gara ikkinore assanno yanna laꞌꞌate halcheemmo?’ Layinkihunni, Yesuusi Kiristoosa baxootto. Ateneeto togo yite xaꞌmi: ‘Maganu Beetto Mooteꞌya asse adhanna isi lawishsha harunsa hasiꞌreemmo?’ Sayikkihunni, baalunkunni roore Yihowa baxootto. Ateneeto togo yite xaꞌmi: ‘Maganiꞌya Yihowara soqqame isi wodana tashshi assa hasiꞌreemmo?’ Kuri xaꞌmuwara ee yite qolattoha ikkiro, keeshshittokkinni xaanni mayira dicuuamatto?—Soq. 16:33.

19. Cuuamate hobbi ruxxi yaa hasiissannohekkihu mayiraati? Lawishsha kuli. (Yohaannisi 4:34)

¹⁹ Cuuamate hobbi ruxxi yitanni noottoha ikkiro Yesuusi horoonsiꞌrino lawishsha hedi. (Yohaannisi 4:34 nabbawi.) Isi Annisi fajjo wonsha sagalete ledo heewisiisinota wodanchi. Mayira? Sagale kaaꞌlitannonke. Yesuusi Yihowa asse yaannonkeri baalu ninkera kaaꞌlannonkere ikkinota afino. Yihowa horo gawajjannonkere assinammora dihasiꞌranno. Yihowa assattora hasiꞌranno coyi giddo mittu cuuamate? Ee. (Soq. 2:38) Hakko daafira tenne hajajo wonsha kaaꞌlitannoheta addaxxa dandaatto. Dancha sagale itate hobbi ruxxi yaattokkiha ikkiro, cuuamateno hobbi ruxxi yaa dihasiissannohe.

20. Aananno birxichira maa ronseemmo?

²⁰ Mitootu cuuantukkinni keeshshitannohu mayiraati? Batinyu manni, “Xaara diqixxaawoommo” yee qolara dandaanno. Heeshshokki Yihowara sayise aatenna cuuamate doodhatto doorshi, doodhatto doorsha baalanka roorannoho. Hakko daafira tennera qixxaawate seekkine heda, yanna gaaꞌmanna diinaggaambe sharrama hasiissannonke. Ikkina addinta heeshshokki Yihowara sayisse aanna cuuama hasiꞌrattoha ikkiro tennera qixxaawate xaanni maa assa dandaatto? Aananno birxichira tenne xaꞌmora dawaro qollanni.