XIINXALLOTE BIRXICHO 30
FAARSO 36 Wodananke Agadhino
Israeelete Mootoolla Xaggenni Ronseemmoha Kaajja Roso
“Hatte yannara anera soqqamannoehura danchu manchira assinannisi danchummanna soqqamannoekkihura bushu manchira iillannosi qarra manniꞌya laꞌꞌanno.”—MIL. 3:18.
GUULCHO HEDO
Israeelete mootoolla daafira rosanke Yihowa hagiirsiisate maa assa hasiisannonkero huwanteemmo gede kaaꞌlitannonke.
1-2. Qullaawu Maxaafi mite Israeelete mootoolla daafira maa kulannonke?
QULLAAWU MAXAAFI Israeelete mootoolla ikke gashshinohu 40 saꞌꞌanno manni suꞌma kulanno.a Insa giddo mitootu assitino coye maaxikkinni kulanno. Lawishshaho, mite dancha mootoolla nafa busha coye assitino. Hanni danchu Moote Daawiti lawishsha laꞌno. Yihowa isi daafira coyiꞌranni, “coꞌo yiino wodaninni hajajoꞌya agadhinohunna ani baxeemmo coye assinohu soqqamaanchiꞌya Daawiti” yiino. (1 Mot. 14:8) Ikkirono kuni manchi minaanni noose mancho ledo foorino; hattono minaannase olunniwa shinanni gede gano ganino.—2 Sam. 11:4, 14, 15.
2 Wole batinye ammanantinokki mootoolla kayinni mito dancha coye assitino. Hanni Roobiaami lawishsha laꞌno. Isi Yihowa albaanni “busha coye assino.” (2 Dud. 12:14) Ikkirono Roobiaami tonne gaꞌre gashshootisi giddonni baxxite fultanno gede Yihowa kulino biddishshira hajajamino. Qoleno isi duucha katammara huxxa huxxe Israeele diinnansa anganni agarino.—1 Mot. 12:21-24; 2 Dud. 11:5-12.
3. Dawaro afiꞌra hasiissannonketi kaajja xaꞌmo hiittenneeti? Konni birxichira maa xiinxallineemmo?
3 Israeelete mootoolla busha coyeno dancha coyeno assitinoha ikkina, Yihowa mitto moote ammanaminoho woy diammanaminoho yaannohu maa laeeti? Tenne xaꞌmora qollanni dawaro Yihowa ninke maa assinammora hasiꞌrannoro huwanteemmo gede kaaꞌlitannonke. Konni birxichira, Yihowa Israeelete mootoolla ammanantinoreeti woy diammanantinoreeti yaate laꞌꞌannoha sase coye ronseemmo. Insano: wodaninsa garaati, cubbo loossuro maaro eate hattono halaalu magansiꞌra seekke cuꞌmiꞌrate.
INSA WOꞌMU WODANINSANNI YIHOWA BAXXINO
4. Ammanantino mootoollanna ammanantinokki mootoolla mereero noohu mittu badooshshi maati?
4 Yihowa woꞌmu wodaninsanni magansidhino mootoolla iso hagiirsiissino.b Danchu Moote Iyosaafiixi ‘Wolqasi uyitu geeshsha Kaaliiqira soqqamino.’ (2 Dud. 22:9) Qullaawu Maxaafi Iyosiyaasi daafira kulanni, “Woꞌmu wodanisinni . . . Kaaliiqira soqqaminohu Iyosiyaasi gedee moote isira albaannino ikko gedensaanni horontanni dino” yaanno. (2 Mot. 23:25) Geedhimmasi yannara busha coye assinohu Selemoonina? Isi “Kaaliiqira diammanamino.” (1 Mot. 11:4) Qoleno Qullaawu Maxaafi ammanaminokki moote Abiya daafira kulanni, “Coꞌo yiino wodaninni Maganisi Kaaliiqira diammanamino” yaanno.—1 Mot. 15:3.
5. Yihowara woꞌmu wodaninni soqqamate yaa mayyaatero xawisi.
5 Ikkina Yihowara woꞌmu wodaninni soqqamate yaa mayyaate? Yihowara woꞌmu wodaninni soqqamanno manchi isira soqqamannohu hatto assa hasiissannosi daafira calla diꞌꞌikkino. Hatteentenni Yihowara soqqamannohu Yihowa baxannonna ayirrisanno daafiraati. Hakkiino sae isi heeshshosi diro woꞌma Yihowa baxanninna ayirrisanni heeꞌranno.
6. Yihowara woꞌmu wodaninni soqqammanni heeꞌra dandiineemmohu hiittoonniiti? (Lawishsha 4:23; Maatewoosi 5:29, 30)
6 Yihowara ammanantinonna woꞌmu wodaninsanni soqqantino mootoolla lawishsha harunsa dandiineemmohu hiittoonniiti? Bushare assineemmo gede xixxiiwannonkere giwatenniiti. Lawishshaho, gara ikkinokki boohaarshi wodaninke bebbeehamanno gede assara dandaanno. Busha hoshshanna maalaamittete coyi daafira hedano wodaninke bebbeehamanno gede assitanno. Hakko daafira mitu coyi Yihowara noonke baxilli baꞌꞌanno gede assanni noota wodanchinummoro bayichonkonni hooꞌlino.—Lawishsha 4:23; Maatewoosi 5:29, 30 nabbawi.
7. Bushare assineemmo gede xixxiiwannonke coye hooꞌla hasiissannota ikkitinohu mayiraati?
7 Wodaninke bebbeehamara wodha dihasiissannonke. Qoropha hoongummoro, batinye ayyaanaamittete coye assinummo geeshsha bushare assineemmo gede xixxiiwannonkere gargadha dandiineemmo yine ninkeneeto dongammora dandiineemmo. Hanni lawishshaho gobba lowo qorrinna bubbe noowa nootto yine hendo. Minira eittoro giiranniwa gamba yaatto. Kayinni waalcho cufiꞌrittokkilla aguritto? Qiidu gudisame minira eanno. Konni lawishshinni maa ronseemmo? Yihowa ledo noonke jaalooma kaajjishshannota ayyaanaamittete sagale sagaꞌlatenni sainore assa hasiissannonke. Alamete “qiidi” yaano bushare assineemmo gede xixxiiwannonke coyi wodaninke giddora eꞌꞌe wodananke bebbeehannokki gede, wodaninke waalcho cufiꞌra hasiissannonke.—Efe. 2:2.
INSA CUBBINSARA MAARO EꞌINO
8-9. Moote Daawitinna Moote Hiziqiyaasi seejjininsata ma assitino? (Aaniidi qoolira noo misile lai.)
8 Aleenni qummi assininte gede Moote Daawiti lowo soꞌro loosino. Kayinni masaalaanchu Naataani loosino cubbo kulisita, Daawiti umosi heeshshi asse maaro eino. (2 Sam. 12:13) Daawiti Faarso 51 borreessinori isi addu maaro einota leellishanno. Daawiti Naataani dogate woy qorichunni gatate yee maaro einoha lawate diwoꞌnaalino; hatteentenni addu maaro eino.—Far. 51:3, 4, 17.
9 Moote Hiziqiyaasino Yihowa dadillisino. Qullaawu Maxaafi isi daafira kulanni togo yaanno: “Wodanisira booꞌna woꞌmite noo daafira, . . . Kaaliiqi hanqi, Yihudunna Yerusaalamete manni aana dirri.” (2 Dud. 32:25) Hiziqiyaasi booꞌninohu mayiraati? Jiro noosi daafira, Asooru manna qeelino daafira woy maalaletenni hurino daafira ikkara dandaanno. Isi Baabiloonootaho jirosi leellishinohu booꞌnino daafira ikkara dandaanno; tini masaalaanchu Isayaasi seejjannosi gede assitino. (2 Mot. 20:12-18) Kayinni Daawiti gede Hiziqiyaasino umosi heeshshi asse maaro eino. (2 Dud. 32:26) Hakko daafira Yihowa jeefote iso, ‘Kaaliiqi baxanno coye assinohu’ ammanamino moote gede asse lainosi.—2 Mot. 18:3.
Moote Daawitinna Moote Hiziqiyaasi loossino soꞌro ammantuti umonsa heeshshi assite maaro eꞌino (Gufo 8-9 lai)
10. Moote Amesiyaasi seejjinisita ma assino?
10 Yihudu moote Amesiyaasi kayinni, gara ikkinore assinoha ikkirono assinohu “diwoꞌmu wodaninniiti.” (2 Dud. 25:2) Isi loosino soꞌro maati? Yihowa kaaꞌleennasi Edoomoota qeelihu gedensaanni, kaphu magannansara kumbuulino.c Hakkiinni Yihowa masaalaanchi iso seejjisita Amesiyaasi kakkache macciishsha giwino.—2 Dud. 25:14-16.
11. Layinki Qorontoosi 7:9, 11 kultanno garinni, maaro afiꞌrate maa assa hasiissannonke? (Misillano lai.)
11 Konni lawishshinni maa ronseemmo? Cubbinkera maaro eanna hakko cubbo galagalle loonseemmokki gede dandiinummore baala assa hasiissannonke. Songote cimeeyye shiima labbanno soꞌrora nafa amaaltannonkehalla ikki? Yihowa woy songote cimeeyye baxxannonkekkihu gede assine heda dihasiissannonke. Israeelennita dancha mootoolla nafa amaalloonninsa hattono seejjinoonninsa. (Ibi. 12:6) Seejjinanninke woyite aane noore assa hasiissannonke; (1) umonke heeshshi assine maahoyye yaa, (2) biddi assiꞌra hasiissannonkere biddi assiꞌranna (3) woꞌmu wodaninkenni Yihowara agurrummokkinni soqqama. Cubbinkera maaro eꞌnummoro Yihowa gatona yaannonke.—2 Qorontoosi 7:9, 11 nabbawi.
Seejjinanninke woyite, (1) umonke heeshshi assine maahoyye yaa, (2) biddi assiꞌra hasiissannonkere biddi assiꞌranna (3) woꞌmu wodaninkenni Yihowara agurrummokkinni soqqama hasiissannonke (Gufo 11 lai)f
INSA HALAALU MAGANSIꞌRA SEEKKITE CUꞌMIDHINO
12. Ammanantino mootoolla ammanantinokki mootollawiinni baxxitanno gede assannohu qaru coyi maati?
12 Yihowa ammanantinori gede asse lainonsa mootoolla halaalu magansiꞌra seekkite cuꞌmidhinoreeti. Insa gashshitino mannino hatto assanno gede jawaachishshino. Hige aleenni laꞌnummonte gede insa soꞌro loossino. Kayinni insa Yihowa calla magansidhino hattono kaphu maganna uullate aaninni hunate sharrantino.d
13. Yihowa Moote Akiaabi diammanaminoho yiinohu mayiraati?
13 Yihowa diammanantinoreeti yiino mootoollana? Insa assitinohu baalunku coyi busha ikkinokkiti egennantinote. Bushu Moote Akiaabi nafa isinni kainohunni Naabute shinoonnita macciishshihu gedensaanni mito geeshshano ikkiro umosi heeshshi assino hattono dadillino. (1 Mot. 21:27-29) Qoleno isi addi addi katamma minino hattono Israeelete qeelle abbino. (1 Mot. 20:21, 29; 22:39) Kayinni Akiaabi lowo geeshsha busha coye assino; isi galtesi shombinni foole kaphu magansiꞌra halashshino. Tenne soꞌrosira isi maaro dieino.—1 Mot. 21:25, 26.
14. (a) Yihowa Moote Roobiaami ammanaminokkihu gede asse lainohu mayiraati? (b) Ammanantinokki mootoolla bande anfannihu mayinniiti?
14 Hanni wolu ammanaminokki moote yaano Roobiaami daafira laꞌno. Aleenni kullinte gede isi gashshootisi yannara batinye dancha coye assino. Kayinni isi gashshootisi kaajji yannara Yihowa seera harunsa agure kaphu maganna magansiꞌra hanafino. (2 Dud. 12:1) Hakkunni gedensaanni mito woyite Yihowa magansiꞌrannoha mito woyite kaphu maganna magansiꞌrannoha ikkino. (1 Mot. 14:21-24) Halaalu magansiꞌra agurtino mootoolla Roobiaaminna Akiaabi calla diꞌꞌikkitino. Isinni ammanantinokki mootoolla giddo rooru kaphu magansiꞌrara halantino. Yihowa mitto moote danchaho woy bushaho yaannohu halaalu magansiꞌra seekke cuꞌmiꞌrinoronna teꞌee lae ikkinoti dihuluullissannote.
15. Halaalu magansiꞌra seekke cuꞌmiꞌra Yihowa albaanni lowo waaga afidhinohu mayiraati?
15 Yihowa magansiꞌra isi albaanni lowo waaga afidhinohu mayiraati? Mittu korkaati, mootoolla Maganu manni halaalu magansiꞌrara halamanno gede kaaꞌlate qeechi noonsahuraati. Qoleno, kaphu magansiꞌra jawa cubbo loonsanni gedenna woloota miincanni gede assitanno. (Hos. 4:1, 2) Hatteeno agurranna mootoollanna insa gashshitino manni Yihowara dooraminoho. Hakko daafira insa Yihowara ammanama gibbe kaphu maganna magansidhinohura, Qullaawu Maxaafi foortinohu gede asse kulino. (Erm. 3:8, 9) Mittu manchi foorannoha ikkiro galtesi baddalanni no. Hatteente gede Yihowara dooraminohu mittu manchi kaphu maganna magansiꞌriro Yihowa lowo geeshsha xissiisiꞌranno.e—Mar. 4:23, 24.
16. Yihowa albaanni danchanna busha mancho bande anfanni gede assannohu qaru coyi maati?
16 Maa ronseemmo? Kaphu maganna giwate murciꞌra hasiissannonketi egennantinote. Ikkirono woꞌmanka woyite halaalu magansiꞌra cuꞌmiꞌre heeꞌrano hasiissannote. Masaalaanchu Milkiyaasi Yihowa albaanni mitto mancho danchaho woy bushaho yinannisi gede assannori maatiro xawise coyiꞌrino. Isi togo yee borreessino: “Anera soqqamannoehura danchu manchira assinannisi danchummanna soqqamannoekkihura bushu manchira iillannosi qarra manniꞌya laꞌꞌanno.” (Mil. 3:18) Hakko daafira aye coyino, guuntete xeꞌnenkenna loonseemmo soꞌro nafa hexxo mudhine Yihowara soqqama agurreemmo gede assitankera wodha dihasiissannonke. Yihowara soqqama agura umise jawa cubbooti.
17. Galte qorophine doodha hasiissannonkehu mayiraati?
17 Mine kalaqiꞌrate heddinanni heedhinoonniha ikkiro, Milkiyaasi coyiꞌrinori dancha galte doodhitinanni gede kaaꞌlaꞌnera dandaanno. Mittu manchira mite dancha akatta heedhasira dandiitanno; kayinni hakku manchi halaalaancho Magano magansiꞌrannokkiha ikkiro, Yihowa albaanni keeraanchoho yaa dandiinanni? (2 Qor. 6:14) Togoo adhama Yihowara ammanamme heeꞌnanni gede assitanno? Hanni tenne hedi: Moote Selemooni adhinohu wole maganna magansiꞌranno meentira mite dancha akatta noonsaha ikkara dandaanno. Ikkollana insa Yihowa magansiꞌrannore diꞌꞌikkino; hakko daafira sunu sununni Selemooni kaphu maganna magansiꞌranno gede assino.—1 Mot. 11:1, 4.
18. Annuwunna amuuwu oosonsara maa rosiisa hasiissannonsa?
18 Annuwanna amuuwa, mootoollate daafira kultannota Qullaawu Maxaafi xagge horoonsidhine, oosoꞌnera Yihowa diinaggaawe magansiꞌrate hasatto heedhannonsa gede kaaꞌlensa. Yihowa mitto moote danchaho woy bushaho yaannohu halaalu magansiꞌrara halaminoronna teꞌee lae ikkinota huwattanno gede kaaꞌlensa. Oosoꞌnera, ayyaanaamittete coye lawishshaho Qullaawa Maxaafa xiinxalla, gambooshshe haꞌranna soqqansho fula wolu baalunku coyinni roore balaxisiisa hasiissannota ikkitinota coyidhinannirinninna assitinannirinni rosiissensa. (Mat. 6:33) Hakkuyi kaꞌa oosoꞌne, Yihowa Farciꞌraasincho ikkate yaa maatensa ammaꞌno harunsa ikkitinohu gede assite heddara dandiitanno. Konninni kainohunni insa halaalu magansiꞌra balaxisiisa hooggara woy woꞌmunni woꞌma Yihowa magansiꞌra agurtara dandiitanno.
19. Yihowara soqqama agurtinorira mayi hexxo noonsa? (“Yihowawa Higa Dandaatto!” yitanno saaxineno lai.)
19 Mittu manchi Yihowara soqqama aguriro galagale isiwa higa didandaanno yaateni? Deeꞌni. Isi maaro eanna galagale halaalu magansiꞌrara halama dandaanno. Tenne assate isi umosi heeshshi assannohanna songote cimeeyye kaaꞌlo maahoyye yee adhannoha ikka hasiissannosi. (Yai. 5:14) Yihowawa higate assinanniri gaabbisannore diꞌꞌikkino!
20. Ammanantino mootoolla lawishsha harunsinummoro Yihowa ma garinni laꞌꞌannonke?
20 Ikkina Israeelete mootoolla xaggenni maa ronsoommo? Woꞌmu wodaninkenni Yihowara ammanamme heeꞌneemmoha ikkiro, ammanantino mootoolla gedeere ikka dandiineemmo. Loonsoommo soꞌronni ronso, cubbinkera maaro eꞌno hattono biddi assiꞌra hasiissannonkere biddi assiꞌno. Qoleno halaalaancho Magano calla magansiꞌra hasiissannota ikkitinota qaango. Yihowawa gamba yite heeꞌrattoha ikkiro, Yihowa ateno isi albaanni dancha coye assino manchi gede asse laꞌꞌannohe.
FAARSO 45 Wodaniꞌyanni Hiinceemmore
a Konni birxichira “Israeelete mootoolla” yinoonnihu, lame gaꞌre amadinohu Yihudu gashshootira, tonne gaꞌre amadinohu Israeelete gashshootiranna 12nte gaꞌrera mookkinore Yihowa manna gashshitino mootoolla baalanta kulateeti.
b HARANCHO XAWISHSHA: Qullaawu Maxaafi giddo duucha woyite “wodana” yaanno qaale horoonsiꞌnoonnihu, mittu manchi halcho, hedo, dooꞌꞌo, lao, dandoo, hasattonna mixo kulateeti.
c Wole maganna magansidhanno mootoollara, qeeltino daga maganna magansiꞌrate rosi noonsaha ikkara dandaanno.
d Moote Aasa jawa cubbo loosino. (2 Dud. 16:7, 10) Ikkirono, Qullaawu Maxaafi isi Yihowa albaanni danchare assinota kulanno. Isi umi qara seejjo adha giwinoha ikkirono, gedensoonni maaro einoha ikkara dandaanno. Assinohu danchu coyi loosinoha busha coye rooranno. Aasa Yihowa calla magansiꞌrino hattono gashshootisi giddonni kaphu maganna hunate sharramino.—1 Mot. 15:11-13; 2 Dud. 14:2-5.
e Tonne hajajo giddonni umiti lame hajajo Israeele Yihowa aguranna aye manchono woy aye coyeno magansiꞌra hasiissannonsakkita leellishshannota qaagge.—Ful. 20:1-6.
f MISILLATE XAWISHSHA: Mittu wedellichu cimeessi mittu rodiira agoho noosi lao yaachishshinosita kulanni no. Roduu amaale umosi heeshshi asse adhino, biddi assiꞌra hasiissannosire biddi assiꞌrino hattono Yihowara ammaname soqqama diagurino.