Horonta Callootanke Diꞌꞌikkinoommo

1-2. (a) Fonqolu iillannonke woyite horonta callootanke diꞌꞌikkinoommo yineemmohu mayiraati? (b) Konni birxichira maa xiinxallineemmo?

BUUTOTE fonqoli iillannonke woyite, dambalu batiꞌrino baari giddo shiima yowolora callootinke heeꞌnoommohu gede assine hendammora dandiineemmo. Ikkirono fonqolu iillannonke woyite callootanke diꞌꞌikkinoommo. Baxillaanchu iimi Anninke qarru iillannonketa laꞌꞌannoha calla ikkikkinni qarra dandiine saꞌneemmo gede kaaꞌlannonketa kule qaale eino. Yihowa ammanantino soqqamaanosira “Ani . . . kaaꞌleemmohe” yee qaale einonsa.—Isa. 41:10.

² Konni birxichira Yihowa kaaꞌlannonketa shoole doogga laꞌneemmo. Isi (1) massagannonke, (2) hasiisannonkere wonshanno, (3) agarannonke hattono (4) sheshifachishannonke. Heeshshonke giddo iillannonke qarri ikkihano ikkiro Yihowa horo hawannonkekkita buuxisinonke. Isi horo tuge diagurannonke. Hakko daafira horonta callootanke diꞌꞌikkinoommo.

YIHOWA MASSAGANNONKE

3-4. Yihowa massagannonkehu hiittoonniiti? (Faarso 48:14)

³ Faarso 48:14 nabbawi. Yihowa ninke uminke umonke massaga dandiineemmokkita afino. Isi xaa yannara ammanantino soqqamaanosi massagannohu hiittoonniiti? Isi tenne assannoti mitte doogo Qullaawu Maxaafi widoonniiti. (Far. 119:105) Yihowa qullaawu ayyaaninni borreessamino Qaalisi widoonni dancha doorsha doodhineemmo gede hattono xaa yannara albinni roore hagiirraamma ikkineemmo gedenna albillitte hegere heeshsho afiꞌneemmo gede assitannonke akatta lossiꞌneemmo gede kaaꞌlannonke.a Lawishshaho, isi koma amandeemmokki gede, assineemmohu baalunku coyinni ammanammoommore ikkineemmo gedenna woloota lubbora banxeemmo gede rosiisannonke. (Far. 37:8; Ibi. 13:18; 1 Phe. 1:22) Togoota Maganu baxanno akatta leellinsheemmoha ikkiro, albinni roore dancha annanna ama ikkineemmo, adhamanke seekkanno hattono dancha jaalla ikkineemmo.

⁴ Qoleno Yihowa Qaalisi giddo ninkera iillinonke gedee qarri iillinonsa manni xagge borreessinanni gede assino. (1 Qor. 10:13; Yai. 5:17) Tenne addu xagge nabbambe ronsoommore loosu aana hosiinseemmoha ikkiro, ajayi ajeenna lame doogonni horo afiꞌneemmo. Umihunni, qarru iillinonkeri ninke calla ikkinoommokkitanna wolootuno togoo qarri iilleennansa dandiite saꞌinota huwanteemmo. (1 Phe. 5:9) Layinkihunni, iillannonke qarra dandiine saꞌneemmo gara ronseemmo.—Rom. 15:4.

5. Yihowa heeshshote doogora haꞌneemmo gede ninke massagate ayeoo horoonsiꞌranno?

⁵ Yihowa ammanate roduuwanke horoonsiꞌreno massagannonke.b Lawishshaho, woradu aliidi laꞌꞌaano ninke jawaachishate ganyite songo towaattanno. Insa shiqishshanno lallawo ammananke kaajjitanno gedenna muxxe ikkitino mittimmanke baꞌannokki gede kaaꞌlitannonke. (Soq. 15:40–16:5) Songote cimeeyyeno mitto mittonka halashshaancho ayyaanaamittetenni kaaꞌlate diinaggaabbe loossanno. (1 Phe. 5:2, 3) Annuwunna amuuwu oosonsa Yihowa baxxanno gede, hedate dandoonsa danchu garinni horoonsidhanno gede hattono danchu amanyootinna ayyaanaamittete coye assate rosichi heeꞌrannonsa gede kaaꞌlitannonsa. (Law. 22:6) Qoleno gikki yiinori meya roduuwi wedellu meya roduuwira dancha lawishsha ikke, kaaꞌlitanno amaale oyenna baxillunni jawaachishe insa kaaꞌlannonsa.—Tit. 2:3-5.

6. Yihowa biddishshinni horo afiꞌrate maa assa hasiissannonke?

⁶ Yihowa hasiisannonke biddishsha oye isi widiidire assino. Isi assinonkere naandeemmota leellisha dandiineemmohu hiittoonniiti? Lawishsha 3:5, 6 togo yitanno: “Woꞌmu wodanikkinni Kaaliiqa addaxxi ikkinnina, umikki egennora irkidhooti.” Hatto assinummoro ‘isi halaalaancho doogo kulannonke’ yaano lowo qarrinni ganteemmo gedenna hagiirru noo heeshsho heeꞌneemmo gede kaaꞌlannonke. Yihowa baxillunni mittu mittunkura hasiissanno amaale aannonke daafira lowo geeshsha galanteemmosi!—Far. 32:8.

YIHOWA HASIISANNONKERE WONSHANNONKE

7. Yihowa hasiisannonkere wonshannonketi mite doogga hiittenneeti? (Filiphisiyusi 4:19)

⁷ Filiphisiyusi 4:19 nabbawi. Yihowa ayyaanaamittetenni massagannonketano agurranna sagale, uddanonna galleemmowa afiꞌrate assineemmoreno maassiꞌranno. (Mat. 6:33; 2 Tes. 3:12) Maalaamittete hasiisannonke coyi daafira yaada noore ikkiturono, Yihowa kayinni togoo coyira quwa saꞌne yaandeemmokki gede amaalinonke. (Mat. 6:25.) Mayira? Korkaatuno Anninke ammanantino soqqamaanosi kaaꞌlo hasiissannonsa yannara tuge diagurannonsa. (Mat. 6:8; Ibi. 13:5) Isi hasiisannonkere wonshannonketa kule eino qaale woꞌmunni woꞌma addaxxineemmo.

8. Yihowa Daawitira assinosiri maati?

⁸ Hanni Yihowa Daawiti kaaꞌlino gara laꞌno. Daawiti lubbosi gatisirate xooqanni noote qarrissanno yannara, Yihowa isiranna ledosi noo mannira heeshshote hasiisannonsare oye kaaꞌlinonsa. Daawiti Yihowa lowo diro towaatinosita hiince togo yiino: “Anjeꞌyanni kayise techo geedhimmaꞌya geeshsha, keeraanchu tugamanna, sirchisino hudiꞌre huucciꞌranna afe diegennoommo.” (Far. 37:25) Atino Yihowa ammanantino soqqamaanosi baxillunni towaatanna laoottoha ikkara dandaanno.

9. Xaa yannara Yihowa dano kalaqantanno woyite mannasi towaatannohu hiittoonniiti? (Misillano lai.)

⁹ Yihowa mannasi dano kalaqantanno yannarano towaatanno. Lawishshaho, umi xibbi diro hude ubbu yannara addi addi gobbara heeꞌranno Kiristaani ammanate roduuwinsara hasiisannonsare soyinonsa. (Soq. 11:27-30; Rom. 15:25, 26) Xaa yannara noohu Maganu mannino konni garinni shaqqille leellishanno. Dano kalaqantanno woyite Yihowa baxillunni mannasi horoonsiꞌre, dano gawajjitino roduuwi hasiisannonsare lawishshaho, sagale, waa, uddanonna xagga afidhanno gede assanno. Magano magansiꞌnanni mine mintanno roduuwi dano gawajjitino minnanna Gambooshshu Addaraashuwa gatamartanno. Qoleno Yihowa soqqamaano bayichonkonni, qaensa hoogginorenna shiidhino roduuwa sheshifachishshanno hattono ayyaanaamittetenni jawaachishshanno.c

10-11. Booriyisi woꞌnaalshinni maa rosootto?

¹⁰ Yihowa iso magansidhannokkirirano shaqqillunni hasiisannonsare assanno. Ninkeno Yihowa magansidhannokkirira shaqqille leellinsheemmo faro hasiꞌneemmo. (Gal. 6:10) Tini duucha woyite dancha guma abbitanno. Hanni Yukireenete heeꞌrannohu Booriyisi yinannihu mittu rosi mini sooreessi woꞌnaalsha laꞌno. Booriyisi Yihowa Farciꞌraasincho ikka hoogirono Yihowa Farciꞌraasine ikkitino rosaanora woꞌmanka woyite shaqqille leellishanno hattono ammanansa ayirrisanno. Booriyisi isi heeꞌranno qooxeessira olu kaeenna wole qooxeessa haꞌrita ammanate roduuwinke kaaꞌlitinosi. Gedensoonni Booriyisi Kiristoosi Reyo Qaagooshshi Ayyaana dayino. Isi roduuwinke assitinosire qaage togo yiino: “Yihowa Farciꞌraasine shaqqille leellishshinoe hattono towaattinoe. Insa lowo geeshsha galateemmonsa.”

¹¹ Ninkeno maarannohu iimi Anninke lawishsha haꞌrunsine, ammanatenni fiixxannonkere ikkiturono ikka hooggurono kaaꞌlo hasiissannonsarira baxille leellinsheemmo. (Luq. 6:31, 36) Manna baxate sharramanke mannu Kiristoosi rosaano ikkanno gede assitanno yine hexxineemmo. (1 Phe. 2:12) Mannu halaale macciishshirono hoogirono, uyiniro afiꞌnanniha lowo hagiirre afiꞌneemmo.—Soq. 20:35.

YIHOWA AGARANNONKE

12. Yihowa mannasi gaamote deerrinni magarinni agarannota kule qaale eino? (Faarso 91:1, 2, 14)

¹² Faarso 91:1, 2, 14 nabbawi. Xaa yannara Yihowa mannasi ayyaanaamittetenni agarannota kule qaale eino. Isi, Sheexaanu halaalu magansiꞌra batteessara wore horo dilaꞌꞌanno. (Yoh. 17:15) Qoleno quuxxote qarri yannara Yihowa mannasi ayyaanaamittetenni calla ikkikkinni maalaamittetennino agarannonsata kule eino qaale woꞌmunni woꞌma addaxxa dandiineemmo.—Aju. 7:9, 14.

13. Yihowa mitto mittonka agarannonkehu hiitte doogganniiti?

¹³ Yihowa mitto mittonka agarannonkehu hiittoonniiti? Yihowa Qullaawa Borro widoonni garanna gara ikkinokkire bande anfeemmo gede kaaꞌlannonke. (Ibi. 5:14) Maganu Qaali giddo noohu xintu seeri garinni heeꞌneemmoha ikkiro, ayyaanaamitteteno maalaamitteteno gawajjannonke coyinni ganteemmo. (Far. 91:4) Qoleno Yihowa songote widoonni agarannonke. (Isa. 32:1, 2) Yihowa baxxannorinna biddishshisi garinni heedhannoriwa gamba yineemmoha ikkiro, jawaante afiꞌneemmo hattono gara ikkinokkire assineemmo gede xixxiimbanninketa gargadha dandiineemmo.—Law. 13:20.

14. (a) Yihowa baalunku fonqolinni agarannonkekkihu mayiraati? (b) Faarso 9:10 maa buuxissannonke? (Lekkaaliidi qaagiishshano lai.)

¹⁴ Yihowa alba iso magansidhannore gawajjannonsa coyinni agarinonsa woyiti no. Ikkirono tenne assannohu woꞌmanka woyite diꞌꞌikkino. Mito woyite hedeweelchu coyi iillannonke. (Ros. 9:11) Qoleno Yihowa Sheexaanu kaphi xawo fulanno gede mite soqqamaanosi darantanno gede wole agurina shinanninsa gede fajjino woyiti no. (Iyo. 2:4-6; Mat. 23:34) Xaa yannarano Yihowa soqqamaanora togoo coyi iillannonsa. Yihowa iillannonke qarra hoolannokkiha ikkirono, iso baxxannore horo tuge agurannokkita addaxxa dandiineemmo.d—Far. 9:10.

YIHOWA SHESHIFACHISHANNONKE

15. Huuccatto, Maganu Qaalinna ammanate roduuwinke sheshifachishshannonkehu hiittoonniiti? (2 Qorontoosi 1:3, 4)

¹⁵ Layinki Qorontoosi 1:3, 4 nabbawi. Mito woyite xissiisiꞌneemmo, yaandeemmo woy dadillineemmo. Xaa yannara callimma macciishshantannohe gede assanno qarri iillanni nooheha ikkara dandaanno. Qarrikki leellannosihu no? Yihowara leellannosi. Isira xissonke leeltannosiha calla ikkikkinni “iillannonke qarri baalunku giddo sheshifachishannonke.” Hiittoonni? Eeggifante huucciꞌnummoro Yihowa ‘wodancha baalanta roorannoha keeresi’ aannonke. (Fil. 4:6, 7) Qoleno Qullaawu Maxaafi giddo nooha Yihowa qaale nabbambeemmo woyite shesho afiꞌneemmo. Yihowa Qaali giddo isi mageeshsha baxannonkero, hayyoota ikkineemmo gede rosiisannonke garanna isi uyinonke hexxo daafira ronseemmo. Hattono gambooshshinkewa ammanate roduuwinke ledo hagiidhineemmo; qoleno Qullaawu Maxaafi giddonni jawaachishannore ronseemmo.

16. Naataaninna Phirisqilla woꞌnaalshinni maa rosootto?

¹⁶ Hanni Yihowa Qaalisi widoonni jawaachishannonkenna sheshifachishannonke gara afate, Yunayitidi Isteetisete heeꞌrannori Naataaninna Phirisqilla woꞌnaalsha laꞌno. Boodu diri albaanni insa sabbakkannori roore hasiissannowa haꞌrate kaꞌino. Naataani “Yihowa sharronke maassiꞌrannota addaxxinoommo” yiino. Kayinni insa haarote gaammoonninsawa iillituhu gedensaanni hedeweelchu dhibbi amadinonsa hattono angate anje amaddinonsa. Kuri minaanninna minaama agurte qaensa higa hasiissinonsa; hakkunni gedensaannino angate anje waaddinonsa. Naataani hakkawarita qaage togo yiino: “Maganu ninke hendoommo garinni maassiꞌrinonkekkihu mayiraati? Loosoommo soꞌro nookka yee heda nafa hanafoommo.” Ikkirono Naataaninna Phirisqilla kaaꞌlo hasiissunsa yannara Yihowa tuge agurinonsakkita huwatino. Naataani lede togo yiino: “Hattenne qarru yannara Qullaawu Maxaafi jawaantenna biddishsha aanno jaali gede ikke kaaꞌlinonke. Iillinonke qarra ikkikkinni Yihowa konne qarra dandiine saꞌneemmo gede kaaꞌlinonke gara illachishanke albillitte iillannonke fonqolira qixxaambeemmo gede kaaꞌlitinonke.”

17. Helga yinanni rodoo shesho afidhinohu hiittoonniiti? (Misileno lai.)

¹⁷ Ammanate roduuwinkeno sheshifachishshannonke. Hiittoonni? Hanni Hangaari gobbara heedhannote Helga yinanni rodoo woꞌnaalsha laꞌno. Isera lowo diro addi addi qarri iillinose; kuni qarri hexxo mudhitanno gedenna waagu dinoe yite heddanno gede assinose. Kayinni ise albita qaagge Yihowa songote widoonni sheshifachishinose gara huwattino. Ise togo yitino: “Maalaamittete loosi, dhiwamino qaaqqoꞌya towaaxxanna wolu addi addi qarri wolqaꞌya gudanno yanna baalantera Yihowa kaaꞌlinoe. Saihu 30 diri giddo Yihowa ane sheshifachishate eino qaale wonshikki gatino barri dino. Isi duucha woyite wolootu jawaachishannore coyidhe sheshifachishshannoe gede asse kaaꞌlinoe. Duucha woyite roduuwu roore jawaante hasiisse nooe yannara sokka borreessitannoe, kaarde uyitannoe woy galattannoe.”

18. Woloota sheshifachisha dandiineemmohu hiittoonniiti?

¹⁸ Woloota sheshifachinshe Maganinke lawishsha haꞌrunsate qoosso noonke. Tenne assa dandiineemmohu hiittoonniiti? Insa hasaaphitanna cincine macciishshine, sheshifachishannore coyiꞌnenna mitore assine kaaꞌline tenne assa dandiineemmo. (Law. 3:27) Qarru iillinonsare baalanka, Maganoho soqqantannokkire nafa sheshifachishate sharrammeemmo. Olliinke manni xissiisiꞌranno woyite, dhiwamanno woyite woy yaadanno woyite marre xaꞌmineemmo, hasaaphanno woyite macciishshineemmo hattono Qullaawu Maxaafi giddonni jawaachishshanno hexxo kulleemmonsa. “Shesho baalate Magani” Yihowa lawishsha haꞌrunsineemmoha ikkiro, ammanate roduuwinke qarra dandiite saꞌanno gede kaaꞌlineemmoha calla ikkikkinni Yihowa magansidhannokkiri isi daafira rosa hasidhanno gede kaaꞌlinammora dandiineemmo.—Mat. 5:16.

YIHOWA WOꞌMANKA WOYITE KAAꞌLANNONKE

19. Yihowa maa assannonke? Isi lawishsha haꞌrunsa dandiineemmohu hiittoonniiti?

¹⁹ Yihowa iso baxxannorira baalaho lowo geeshsha hedanno. Isi qarru iillannonke woyite tuge diagurannonke. Qaaqqosi baxillunni towaaxxanno anni gede Yihowa ammanantino soqqamaanosi towaatanno. Isi massagannonke, hasiisannonkere wonshannonke, agarannonke hattono sheshifachishannonke. Qarru iillinonsare kaaꞌlineemmohanna jawaachinsheemmoha ikkiro, baxillaanchu iimi Anninke lawishsha haꞌrunsineemmo. Buutote qarri amadannonke woyite Yihowa ledonke noota woꞌmunni woꞌma addaxxa dandiineemmo. Isi, “Ani ledokki noommona waajjitooti” yee qaale einonke. (Isa. 41:10) Tini lowo geeshsha jawaachishshannote! Addanko horonta callootanke diꞌꞌikkinoommo.