XIINXALLOTE BIRXICHO 28
FAARSO 88 Doogokki Rosiisie
Woloota Amaaꞌla Hasiissannonkehu Mayiraati?
“Amaallannire adhitannori . . . egennaammaho.”—LAW. 13:10.
GUULCHO HEDO
Amaallanninke amaalenni woꞌma horo afiꞌrate maa assa hasiissannonkero ronseemmo.
1. Dancha doorsha doodhanna hendoommori qinaanno gede assiꞌra dandiineemmohu hiittoonniiti? (Lawishsha 13:10; 15:22)
NINKE baalunku dancha doorsha doodha hasiꞌneemmo. Hattono hendoommori qinaankera hasiꞌneemmo. Maganu Qaali tenne lamenta mixonke wonshiꞌneemmo gara kulannonke.—Lawishsha 13:10; 15:22 nabbawi.
2. Yihowa ma assannonketa kule qaale eino?
2 Hayyonna kaajja amaale aannonkehu Annanke Yihowa ikkinoti egennantinote. Isi, “Amaaleemmohe; illeꞌya ate aana woreemmo” yee kaaꞌlannonketa kule qaale eino. (Far. 32:8) Tini yaatto Yihowa amaalannonketa calla ikkikkinni, ninke daafira hedannotanna amaalesi loosu aana hosiinseemmo gede kaaꞌlannonketa leellishshannote.
3. Konni birxichira maa xiinxallineemmo?
3 Konni birxichira, aante noote shoole xaꞌmora Maganu Qaali dawaro afiꞌneemmo gede kaaꞌlannonke gara ronseemmo: (1) Dancha amaalenni horo afiꞌrate hiitti akatta heedhannoe gede assiꞌra hasiissannoe? (2) Dancha amaale aaera dandaannohu ayeti? (3) Addinta amaale hasiꞌreemmota leellisha dandeemmohu hiittoonniiti? (4) Mitto coye wolootu doortaera xaꞌmiꞌra hasiissannoekkihu mayiraati?
HIITTI AKATTA HEEDHANNOE GEDE ASSIꞌRA HASIISSANNOE?
4. Dancha amaalenni horo afiꞌrate hiitti akatta hasiissannonke?
4 Dancha amaalenni horo afiꞌrate umonke heeshshi assineemmorenna dhukanke anfoommore ikka hasiissannonke. Dancha doorsha uminkenni doodhate woꞌnaalshu woy egenno hooggankera dandiitannota huwata hasiissannonke. Umonke heeshshi assineemmorenna dhukanke anfoommore ikka hoongummoro Yihowa kaaꞌlankera didandaanno. Hatto ikkiro, Maganu Qaale nabbambe afiꞌneemmo amaale baala kinchoho ganino xeeni gede ikkitara dandiitanno. (Mik. 6:8; 1 Phe. 5:5) Umonke heeshshi assineemmorenna dhukanke anfoommore ikkinummoro kayinni, Qullaawu Maxaafi giddonni afiꞌnoommo amaale macciishshatenna loosu aana hosiisate rankoommore ikkineemmo.
5. Moote Daawiti naaxxanno gede assasira dandaannore maa assino?
5 Hanni Moote Daawiti lawishshinni maa ronseemmoro laꞌno. Isi assinori woleteemmero naaxxanno gede assasira dandaannoreeti. Isi moote ikkara lowo diri albaanni muuziiqa ganate dandoosinni egennaminoho. Iso mootete muuziiqa gananno gede nafa xaꞌminoonnisi. (1 Sam. 16:18, 19) Daawiti aananno moote ikkanno gede buurrisihu gedensaanni, Yihowa isira qullaawu ayyaanisinni wolqa uyinosi. (1 Sam. 16:11-13) Isi diinnansa shee dagasi mereero maccaha ikkino; tenne diinna giddo mittu jigeessa Goliyaadiiti. (1 Sam. 17:37, 50; 18:7) Naaxxannohu mittu manchi togooha dhagge ikkanno coye assiro wolootu amaale macciishsha dihasiissannoe yee hedannoha ikkara dandaanno. Daawiti kayinni hatto yee dihedino.
6. Daawiti amaale macciishshannoha ikkinota mayinni anfeemmo? (Misileno lai.)
6 Daawiti moote ikkihu gedensaanni amaaltannosi mannootiwa aana diagurino. (1 Dud. 27:32-34) Isi hakkuyira albaannino wolootu amaale macciishshannoha ikkino daafira tini dhagge diꞌꞌikkitannote. Daawiti labballu amaale calla ikkikkinni meyati Abigiya amaaltinosi amaaleno macciishshino. Ise ayirrinye afiꞌrinokkihu, galata bainohunna umisi daafira calla hedannohu Naabaali minaamaati. Daawiti umosi heeshshi asse dancha amaalese macciishshino; tini, isi lowo soꞌro loosannokki gede gatissinosi.—1 Sam. 25:2, 3, 21-25, 32-34.
Moote Daawiti Abigiya amaale macciishshe loosu aana hosiisino (Gufo 6 lai)
7. Daawiti lawishshinni maa ronseemmo? (Rosiisaancho 4:13) (Misillano lai.)
7 Daawiti lawishshinni ronseemmori no. Lawishshaho mite dandoo woy mito geeshshi silxaane noonkeha ikkara dandaanno. Hatto ikkiro baalankare anfoommohunna amaale hasiissannonkekkihu gede assine horo heda dihasiissannonke. Qoleno Daawiti gede amaalannonkehu ayeno ikkiro dancha amaale macciishsha hasiissannonke. (Rosiisaancho 4:13 nabbawi.) Hatto assineemmoha ikkiro, ninkeno wolootano dadillissannota jawa soꞌro loonseemmokki gede qoropha dandiineemmo.
Amaalannonke manchi ayeno ikkiro dancha amaale macciishsha hasiissannonke (Gufo 7 lai)c
DANCHA AMAALE AAERA DANDAANNOHU AYETI?
8. Yoonaataani Daawiti dancha gede amaala dandaanno yineemmohu mayiraati?
8 Hanni Daawiti lawishshinni maa ronseemmoro lende laꞌno. Isi Yihowa ledo danchu jaaloomi noonsarinna isira iillanni noosi qarra affinori amaaltinosi amaale macciishshino. Lawishshaho Daawiti, Saaooli isi ledo keere kalaqa hasiꞌrannoronna teꞌee afa hasiꞌri yannara Saaooli beetti Yoonaataani amaalinosi amaale macciishshino. Yoonaataani iso dancha gede amaala dandiinohu mayiraati? Korkaatuno Yoonaataani Yihowa ledo danchu jaaloomi noosiha calla ikkikkinni Saaooli seekke egennino. (1 Sa. 20:9-13) Ninke konni lawishshinni maa ronseemmo?
9. Amaale hasiissannonke woyite aye amaaꞌla hasiissannonke? Xawisi. (Lawishsha 13:20)
9 Amaale hasiissannonke woyite, Yihowa ledo danchu jaaloomi noosihanna amaaꞌlineemmo hajo daafira woꞌnaalshu noosiha amaaꞌla hasiissannonke.a (Lawishsha 13:20 nabbawi.) Hanni lawishshaho mittu wedellichi maltino galte afiꞌra hasiꞌrino yine hendo. Iso dancha gede amaalasira dandaannohu ayeti? Mittu mine kalaqirinokki jaalisi Qullaawu Maxaafihu xintu seeri garinni amaalannosiha ikkiro, kaaꞌlitanno amaale kulasira dandaanno. Ikkirono isi seekkite egentinosire, mite yanna geeshsha adhante keeshshitinorenna adhamansanni hagiirraamma ikkitinore ayyaanaamittetenni gikki yitino minaannanna minaama amaaꞌliro roore kaaꞌlitannosi amaale badde kultasira dandiitanno.
10. Kawiinni aanchine maa ronseemmo?
10 Heedhannonke gede assiꞌra hasiissannonketa lame akattanna dancha gede amaalankera dandaannohu ayetiro laꞌnoommo. Hanni xa addinta amaale hasiꞌneemmota leellisha hasiissannonkehu mayiraatironna mitto doorsha wolootu doortankera xaꞌmiꞌra hasiissannonkekkihu mayiraatiro laꞌno.
ADDINTA AMAALE HASIꞌREEMMOTA LEELLISHA DANDEEMMOHU HIITTOONNIITI?
11-12. (a) Mito woyite ma assineemmoha ikkara dandaanno? (b) Moote Roobiaami mitto lowo geeshsha hasiisanno coye assa hasiissusi yannara ma assino?
11 Mito woyite mittu manchi amaale hasiꞌrannoha lawara dandaanno; kayinni isi hasiꞌranni noohu balaxe doodhino coyira sumuu yaannosi mancho ikkara dandaanno. Togoo manchi addinta amaale hasiꞌranni nooha diꞌꞌikkino. Isi Moote Roobiaamira iillino coyinni rosa hasiissannosi.
12 Roobiaami Moote Selemooninni aane Israeelete gashshaancho ikkino. Roobiaami gashshinohu Israeelete manni durooꞌminoho; ikkirono kuni manni Selemooni lowo duha duhisiisinonsahu gede asse hedino. Hakkiinni mannu Roobiaamiwa daye konne duha shaashshannonsa gede xaꞌmiꞌri. Roobiaami ma assa hasiissannosiro hedate yanna hasiissannosita kulinsa. Isi alba Selemooni kaaꞌlitino geerra amaaꞌlino; tini danchate. (1 Mo. 12:2-7) Ikkirono isi kuri geerri amaaltinosi amaale giwino. Giwinohu mayiraati? Roobiaami ma assannoro balaxe doodhe kae tennera sumuu yaannosi manna hasiꞌranni no ikka? Hatto ikkiro wedellu jaallasi amaaltinosi amaale isi doodhinori ledo sumuu yitannote. (1 Mo. 12:8-14) Roobiaami Israeelete mannira kuri wedelli amaaltinosi amaale garinni qolino. Tini Israeelete daga lamewa beehantanno gede assitino; hattono Roobiaamira heeshshosi diro woꞌma qarru iillinosi.—1 Mo. 12:16-19.
13. Addinta amaale hasiꞌnanni heeꞌnoommoronna teꞌee afa dandiineemmohu hiittoonniiti?
13 Roobiaami lawishshinni maa ronseemmo? Amaale xaꞌmineemmo woyite addinta amaale hasiꞌneemmota leellisha hasiissannonke. Addinta amaale hasiꞌneemmoronna teꞌee afa dandiineemmohu hiittoonniiti? Ninkeneeto togo yine xaꞌma hasiissannonke: ‘Amaale xaꞌmiꞌre kae ani hasiꞌreemmo gedeeta ikkitinokki daafira bayichonkonni giweemmo?’ Hanni mitto lawishsha laꞌno.
14. Amaallanninke woyite maa qaaga hasiissannonke? Lawishsha kuli. (Misileno lai.)
14 Hanni mittu rodii lowo woxe baantanni looso afiꞌrino yine hendo. Isi konne looso loosate maahoyye yaara albaanni mitto songote cimeessa amaaꞌlanno. Roduu, kuni loosi mite yanna geeshsha maatesiwiinni xeertiꞌranno gede assannosiha ikkinota kulanno. Songote cimeessi Qullaawu Maxaafiha xintu seera qummi asse, qaru qeechisi maatesira ayyaanaamittetenni hasiisannore wonsha ikkitinota kulannosi. (Efe. 6:4; 1 Xi. 5:8) Hanni kuni rodii songote cimeessi kulinosire baxinokki daafira macciishsha hasiꞌrannore kultasi geeshsha woloota roduuwa amaaꞌlanno yine hendo. Isi addinta amaale hasiꞌranni noonso assannore wonanni doodhe kae doodhino coyiꞌra sumuu yaannosi mancho hasiꞌranni no? Wodaninke xagaraamo ikkinota qaaga hasiissannonke. (Erm. 17:9) Mito woyite roore hasiissannonke amaale, macciishsha hasiꞌneemmokkita ikkitara dandiitanno.
Addinta dancha amaale hasiꞌnanni heeꞌnoommonso, balanxe doodhinoommo coyira sumuu yaannonke mancho hasiꞌnanni heeꞌnoommo? (Gufo 14 lai)
MITTO COYE WOLOOTU DOORTAERA XAꞌMIꞌRA HASIISSANNOE?
15. Ma assineemmokki gede qoropha hasiissannonke? Mayira?
15 Mittu mittunkura uminke doorsha doodhate qeechi noonke. (Gal. 6:4, 5) Aleenni ronsummonte gede hayyichu manchi mitto coye assara albaanni, Maganu Qaali giddonninna ayyaanaamittetenni gikki yiino Kiristaaniwiinni amaale hasiꞌranno. Ikkirono mitto coye wolootu doortankera xaꞌmiꞌneemmokki gede qoropha hasiissannonke. Mitootu mito woyite, ayirrissanno mancho “Ate ikkoottoro maa assatto?” yite xaaddote mitto doorsha doorannonsa gede xaꞌmidhanno. Wolootu kayinni seekkite heddukkinni mitto doorsha wolu doodhino daafira calla doodhitannoha ikkara dandaanno.
16. Hunda Qorontoosi songora kaphu magannara kakkalloonni maala itate daafira kaꞌino hajo maati? Konne maala itannoronna teꞌee doodhannohu ayeti? (1 Qorontoosi 8:7; 10:25, 26)
16 Hanni hunda Qorontoosi songora kaphu magannara kakkalloonni maala itate daafira kaꞌino hajo laꞌno. Phaawuloosi hakkawari Kiristaanira togo yee borreessino: “Kaphu maganna haafare ikkitinotanna mitto Magano agurranna wolu nookkita anfoommo.” (1 Qo. 8:4) Songote giddo noori mitootu tenne wodanaho wodhite, kaphu magannara kakkalloonni maala gedensoonni fushshine dikkote hirranni woyite ita doodhitino. Wolootu kayinni tiiꞌꞌinsa bushiishannonsa daafira konne maala ita hooga doodhitino. (1 Qorontoosi 8:7; 10:25, 26 nabbawi.) Kuni mittu mittunku manchi doodhanno doorshaati. Phaawuloosi Qorontoosi songora heeꞌranno Kiristaani wolootaho mitto coye dooranno gede woy wolootu assitinore assanno gede horo diamaalino. Insa ‘mittu mittunku Maganu albaanni uminsa daafira dawaro qoltanno.’—Rom. 14:10-12.
17. Wolootu assitannore assineemmoha ikkiro mayi kalaqamara dandaanno? Lawishsha kuli. (Misillano lai.)
17 Xaa yannarano hattoo coyi kalaqamara dandaannohu hiittoonniiti? Hanni shiimaadda mundeete beehache adhate daafira hendo. Shiimaadda mundeete beehache adhannoronna teꞌee mittu mittunku Kiristaanchi doodha hasiissannosi.b Togoo hajo woꞌmunni woꞌma huwata hoongammora dandiineemmo; kayinni konne doorsha doodha mittu mittunku duqqa hasiissannosi duhaati. (Rom. 14:4) Mitto doorsha wolootu doodhitino daafira calla doodhineemmoha ikkiro hayyoota diꞌꞌikkineemmo. Hayyoota ikkineemmohu Qullaawu Maxaafihu xintu seeri garinni mitto doorsha uminkenni doodhineemmoha ikkiro callaati. (Ibi. 5:14) Ikkina ayyaanaamittetenni gikki yiino Kiristaancho amaaꞌla hasiissannonkehu mamooteeti? Ninke uminkenni xiinxallinummohu gedensaanni, Qullaawu Maxaafihu xintu seeri ninkera iillinonke coyi ledo xaadooshshe afiꞌrinohu hiittoonniitiro huwatate kaaꞌlo hasiissunkerooti.
Woloota amaale xaꞌmiꞌra hasiissannonkehu uminkenni xiinxallinummohu gedensaanni callaati (Gufo 17 lai)
AMAALE HASIꞌRA AGURTOOTI
18. Yihowa assinonkeri maati?
18 Yihowa uminke doorsha doodhineemmo gede asse lowo geeshsha ammanannonketa leellishino. Isi Qaalesi Qullaawa Maxaafa uyinonke. Qoleno Qullaawu Maxaafiha xintu seera heeshshi gotti assine hendeemmo gede kaaꞌlitannore hayyoota jaalla uyinonke. Isi Annanke ikkino daafira ninkera hedannota leellishino. (Law. 3:21-23) Iso galanteemmota leellishate ma assa dandiineemmo?
19. Woꞌmanka woyite Yihowa hagiirsiisa dandiineemmohu hiittoonniiti?
19 Hanni tenne hedi: Annuwunna amuuwu oosonsa ayyaanaamittetenni gikki yitinore, coye heeshshi gotti assite heddannore, hayyootanna woloota kaaꞌlitannore Yihowa soqqamaano ikkitanna laꞌanno woyite lowo geeshsha hagiidhitanno. Hatteente gede Yihowa woꞌmanka woyite ayyaanaamittetenni gikki yinoommore ikkinanna, amaale hasiꞌnanna hattono isi ayirranno gede assanno doorsha doodhinanna laꞌꞌanno woyite lowo geeshsha hagiidhanno.
FAARSO 127 Hiittoo Mancho Ikka Hasiissannoe?
a Kiristaanu mito woyite woxu, xagisiꞌrate woy wole hajo daafira Yihowa Farciꞌraasine ikkinokki manna amaaꞌlannoha ikkara dandaanno.
b Tenne hajo daafira ledde afate Hegerera Hagiidhitanni Heeꞌra Dandaatto! yaanno maxaafa roso 39 naxiwe 5 nna “Egenno Lexxi” yaannoha lai.
c MISILLATE XAWISHSHA: Mittu cimeessi, cimeeyyete gambooshshiwa hanqe coyiꞌrinoha mitto cimeessa amaalanni no.