XIINXALLOTE BIRXICHO 42
FAARSO 44 Qarramino Manchi Huuccatto
Huuccattokki Woyyeessiꞌra Dandaattohu Hiittoonniiti?
“ Kaaliiqa ballo, woꞌmu wodaniꞌyanni, atewa hige raareemmona macciishshie.”—FA. 119:145.
GUULCHO HEDO
Qullaawu Maxaafi giddo noo huuccatto hiinca huuccattonke woyyeessiꞌneemmo gede kaaꞌlitannonke gara ronseemmo.
1-2. (a) Giddonketa Yihowara fushshine hasaaphineemmokki gede assankera dandaannori maati? (b) Yihowa huuccattonke seekke macciishshannota anfeemmohu hiittoonniiti?
MITO woyite huuccattokki mittu garita ikkitinohanna giddokkita fushshite Yihowara hasaapha qarra ikkitinoheha lawannohe? Hatto ikkiro togoori macciishshamannohehu ate calla diꞌꞌikkootto. Baalunku suttote hoshsha honseemmo daafira harancho huuccatto calla huucciꞌneemmoha ikkara dandaanno. Woy Yihowa hasaawisate ikkado diꞌꞌikkoommo yine hendeemmo daafira isira giddonketa fanne kuꞌla qarra ikkitankera dandiitanno.
2 Qullaawu Maxaafi Yihowa laꞌꞌannohu qaru coyi huuccattonke biifisate horoonsiꞌneemmo qaalla ikkikkinni ninkeneeto heeshshi assine giddonkenni huucciꞌneemmo huuccatto ikkitinota buuxisannonke. Isi ‘gadadaammu huuccatto macciishshanno.’ (Fa. 10:17) Yihowa ninke daafira addinta hedannohura huucciꞌnanni yineemmore baala seekke macciishshanno.—Fa. 139:1-3.
3. Konni birxichira hiikkuri xaꞌmuwa xiinxallineemmo?
3 Konni birxichira aante noo xaꞌmuwa xiinxallineemmo: Woꞌma giddonni Yihowa huucciꞌra dandiineemmohu mayiraati? Huuccattonke roore woyyeessiꞌra dandiineemmohu hiittoonniiti? Qullaawu Maxaafi giddo noota giddonsata kule huucciꞌrino manni huuccatto hiinca huuccattonke woyyeessiꞌrate kaaꞌlitannonkehu ma garinniiti? Lowo geeshsha yaandoommo daafira mayine huucciꞌneemmoro afa qarra ikkitunkero ma assa dandiineemmo? Hanni kuri xaꞌmuwara dawaro afiꞌrate woꞌnaallo.
WOꞌMA GIDDONNI YIHOWA HUUCCIꞌRA
4. Yihowa woꞌma giddonni huucciꞌneemmo gede kaaꞌlannonkeri maati? (Faarso 119:145)
4 Yihowa qinaankera hasiꞌrannoha ammanamino jaalanke ikkinota wodanchinummoro woꞌma giddonkenni iso huucciꞌra dandiineemmota huwanteemmo. Faarso 119 borreessaanchi Yihowa ledo togoo jaaloomi heeꞌrannosi gede assiꞌrate woꞌnaalino. Isi heeshsho qarru nookkita diꞌꞌikkitino. Mitu manni isi daafira kapho coyiꞌrino. (Fa. 119:23, 69, 78) Qoleno isi laanfesi qeeꞌlate sharrama hasiissinosi. (Fa. 119:5) Ikkirono isi giddosita Yihowara fane hasaapha diwaajjino.—Faarso 119:145 nabbawi.
5. Gara ikkitinokki hedo Yihowa huucciꞌneemmokki gede assitankera wodha hasiissannonkekkihu mayiraati? Lawishsha kuli.
5 Yihowa jawa cubbo loossinori nafa iso huuccidhanno gede koyisino. (Isa. 55:6, 7) Hakko daafira gara ikkitinokki hedo iso huucciꞌneemmokki gede assitankera wodha dihasiissannonke. Hanni lawishshaho hadhe egennoottokki qooxeessa haꞌrootto yine hendo. Hakkiicho raga habbe baitto; ikkirono hakko qooxeessira heeꞌranno manchi raga kulahera dandaanno. Doogo hawootto daafira calla saalfatte kuni manchi doogo kulannohe gede xaꞌmate hobbi ruxxi yaatto? Diyaatto! Hatteente gede mito woyte assineemmori baꞌꞌannonkeha woy cubbo loonseemmoha ikkirono woꞌma giddonkenni Yihowa huucciꞌra dandiineemmo.—Fa. 119:25, 176.
HUUCCATTOKKI ROORE WOYYEESSIꞌRA DANDAATTOHU HIITTOONNIIT?
6-7. Giddonketa Yihowara fushshine hasaaphineemmo gede kaaꞌlannonkeri maati? Lawishsha kuli. (Lekkaalliidi qaagiishshano lai.)
6 Giddonke hedonna macciishshamannonkere fanne Yihowara hasaaphineemmo woyite albinni roore isiwa shinqeemmo. Ikkina huuccattonke goowi alita ikkitannokki gede ma assa dandiineemmo?
7 Yihowa akatta hiinci.a Yihowa akatta hiincinummo kiiro huxuxxi yinummokkinni giddonketa isira xawinse kula roore shota ikkitannonke. (Fa. 145:8, 9, 18) Hanni finqilu anni noosete Kiristiini yinanni rodoo woꞌnaalsha laꞌno. Ise togo yitino: “Yihowa Annu gede assiꞌre hasaawisa shota diꞌꞌikkitinoe. Laanfeꞌya isi tuge agurannoe gede assitinoe yee hedeemma.” Kiristiini kaaꞌlinosehu hiikkonne Yihowa akataati? Ise ledde togo yitino: “Yihowahu bagamannokki baxilli beꞌe yeemmakki gede assinoe. Isi agurannoekkita afoomma. Uwummaro nafa isi baxillunni amade kayisannoe. Tini lowo geeshsha hagiidheemma woyite hattono lowo geeshsha dadilleemma woyite isira giddoꞌyata fushshe hasaapheemma gede kaaꞌlitinoe.”
8-9. Huuccatto assiꞌrattora albaanni balaxxe heda kaaꞌlitannohehu ma garinniiti? Lawishsha kuli.
8 Mayite huucciꞌrattoro hedi. Huucciꞌrattora albaanni ateneeto mite xaꞌmuwa xaꞌma dandaatto. Lawishshaho, xa qeeꞌlate sharramanni noommo qarri maati? Gatona yaa hasiissannoe manchi no? Qeele saꞌꞌate Yihowa kaaꞌlo hasiissannoehu muli yannara heeshshoꞌya giddo soorramino coyi no? (2 Mo. 19:15-19) Qoleno Yesuusi huuccattote daafira rosiisinonke garinni lawishshaho, Yihowa suꞌmi, Gashshootisinna fajjosi daafira mayine huucciꞌneemmoro heda dandiineemmo.—Mat. 6:9, 10.
9 Aliska yinanni rodoora minaannase shitannoti surrete kaansere amaddinota kulliseta huuccatto assiꞌra qarra ikkitinose. Ise togo yitino: “Lowo geeshsha yaadoomma daafira mayyee huucciꞌreemmaro heda qarra ikkitinoe.” Ise kaaꞌlinoseri maati? Ise togo yitino: “Huucciꞌrammara albaanni hedoꞌya xaphi assiꞌrate shiima geeshsha taxxi yeemma; tini huucciꞌreemma woyite aneneeti daafira calla illachisheemmakki gede assitinoe. Togo assa wodanaaꞌmeemmanna hedoꞌya xaphi assire huucciꞌreemma gede kaaꞌlitinoe.”
10. Seeda yanna huucciꞌrate woꞌnaala hasiissannonkehu mayiraati? (Misillano lai)
10 Seeda yanna huucciꞌri. Harancho huuccatto Yihowawa shiqate kaaꞌlitannonkeha ikkirono seeda yanna huucciꞌra roore giddonketa fushshine hasaaphate kaaꞌlitankera dandiitanno.b Aliska minaanni Eeliyaja togo yiino: “Barru giddo duucha hige huucciꞌrate woꞌnaaleemmo hattono seeda yanna huucciꞌra albinni roore Yihowawa shiqeemmo gede kaaꞌlitinoe. Yihowa huuccattoꞌya cince macciishshanno daafira seeda yanna huucciꞌra dandeemmo.” Togo assate woꞌnaali: Huurokki gotti assite hedokki billaallisannori nookkiwa huucciꞌrate maltino yannanna bayicho hasiꞌri; hattono seeda yanna huucciꞌrate rosichi heeꞌrannohe gede assiꞌri.
Seeda yanna huucciꞌrate injiitannohe yannanna bayicho hasiꞌri (Gufo 10 lai)
QULLAAWU MAXAAFI GIDDO NOOTA GIDDONSATA KULE HUUCCIꞌRINO MANNI HUUCCATTO HIINCI
11. Qullaawu Maxaafi giddo noota giddonsata kule huucciꞌrino manni huuccatto hiinca kaaꞌlitannonkehu hiittoonniiti? (“Insara Iillino Gedeeri Iille Egenninohe?” yitanno saaxineno lai.)
11 Qullaawu Maxaafi giddo noota giddonsata kule huucciꞌrino manni huuccatto woy faarsuwa hiinca kaaꞌlitahera dandiitanno. Maganu soqqamaano giddonsata fushshite hasaaphitino gara afakki atino giddokkita Yihowara fushshite hasaaphatto gede kakkayissannohe. Qoleno Yihowa huucciꞌratto woyite iso guwisate kaaꞌlitannohe yaatto afiꞌrattora dandaatto. Hattono ati huucciꞌra hasiꞌratto huuccatto ledo sumuu yitannota afiꞌrattoha ikkara dandaanno.
12. Qullaawu Maxaafi giddo noo huuccatto hiincineemmo woyite ninkeneeto mayine xaꞌma dandiineemmo?
12 Qullaawu Maxaafi giddo noo huuccatto hiincatto woyite ateneeto togo yite xaꞌmi: ‘Tenne hedo coyiꞌrinohu ayeti? Isi konni garinni huucciꞌrinohu mayiraati? Anera tenne huuccattora kulloonni gedeeri iillinoe? Tenne huuccattonni maa roseemmo? Kuri xaꞌmuwara dawaro afiꞌrate ledde xiinxalla hasiissannoheha ikkara dandaanno; ikkirono hatto assa gaabbissannota diꞌꞌikkitino. Hanni mito lawishsha laꞌno.
13. Huuccattote daafira Haanna xaggenni ronseemmohu mittu rosi hiikkonneeti? (1 Saamueeli 1:10, 11) (Misileno lai.)
13 Umi Saamueeli 1:10, 11 nabbawi. Haanna tenne huuccatto huuccidhu yannara lamu shaaꞌꞌa ikkinokki qarri illanni noose. Ise ilaweelote hattono minaanniseti wole galte beebba assidhannose. (1 Sa. 1:4-7) Buutote qarri iillanni nooheha ikkiro Haanna huuccidhino huuccattonni maa rosatto? Ise seeda yanna huuccidhino hattono duhase Yihowa aana tuqqite fooliishsho afidhino. (1 Sa. 1:12, 18) Ninkeno iillinonke qarrinni kainohunni macciishshamannonkere Yihowara kuꞌlinenna ‘yaaddonke isi aana tuqqine’ fooliishsho afiꞌra dandiineemmo.—Fa. 55:22.
Ila noosekkitinna minaanniseti layinki galte waaddannoseti Haanna, duhase Yihowa aana tuqqitino (Gufo 13 lai)
14. (a) Haanna lawishshinni wolere maa ronseemmo? (b) Qullaawa Borro hiinca huuccattonke woyyeessiꞌrate kaaꞌlitannonkehu hiittoonniiti? (Lekkaalliidi qaagiishsha lai.)
14 Haanna qaaqqose Saamueeli iltuhunni shiimu diri gedensaanni Kakkalaanote Biiliwa Eeliwa massitino. (1 Sa. 1:24-28) Ise godowinta huuccidhanni Yihowa ammanantino soqqamaanosi agarannonsatanna towaatannonsata ammantannota leellishanno garinni coyidhino.c (1 Sa. 2:1, 8, 9) Isera mini giddo iillanni noose qarri hoꞌlinokkiha ikkara dandaanno; ikkirono Haanna Yihowa maassiꞌrinose gara illachishshino. Ninke maa ronseemmo? Yihowa alba ammanantino soqqamaanosi kaaꞌlinonsa garanna xaa geeshsha ninke kaaꞌlinonke gara illachinsheemmoha ikkiro, illanni noonke qarra woyyino garinni dandiine saꞌneemmo.
15. Taashsho xeꞌinore assinanninke woyite masaalaanchu Ermiyaasi huuccattonni maa ronseemmo? (Ermiyaasi 12:1)
15 Ermiyaasi 12:1 nabbawi. Mitte yannara Ermiyaasi bushuulleho qiniinonsa gara laiti hexxo mudhino. Qoleno isi Israeelete manni qacifatinosi daafira hexxo mudhino. (Erm. 20:7, 8) Gara ikkinokkire assanno manni durooꞌmanna laꞌneemmo woyite woy mannu qacifatannonke woyite Ermiyaasi xisso leeltannonke. Ermiyaasi caacceessinosire kule huucciꞌrinoha ikkirono Yihowa taashsho kayinni horo dihuluullamino. Isi Yihowa finqilino mannasi seejjino gara laꞌꞌasi Yihowa taashshannoha ikkasi albinni roore addaxxanno gede assitinositi dihuluullissannote. (Erm. 32:19) Ninkeno xaa yannara iillitanni noonketa taashshote xeꞌne Yihowa yannasira hunannota addaxxine caacceessinonkere kulle iso huucciꞌra dandiineemmo.
16. Hasiꞌnoommo geeshshire assa dandiinoommokkiha ikkiro qafadame haꞌrino Leewaawichi lawishshinni maa ronseemmo? (Faarso 42:1-4) (Misillano lai.)
16 Faarso 42:1-4 nabbawi. Tenne faarso borreessinohu qafadame haꞌrinoho ammanate roduuwisi ledo xaada dandiinokki Leewaawichaati. Isi faarso mayi macciishshaminosiro leellishshanno. Mininni fula dandiinoommokkiha woy ammanankenni kainohunni usurammoommoha ikkiro isi xisso leeltannonke. Hedonke mule mulenni soorrantannoha ikkara dandaanno; ikkirono macciishshamannonkere huuccattotenni Yihowara xawinse kula danchate. Tini giddoyidi hedonke huwanteemmo gedenna roore hasiisanno coye qaangeemmo gede kaaꞌlitannonke. Lawishshaho Leewaawichu Yihowa guwisiꞌra dandaanno faro noosita huwatino. (Fa. 42:5) Qoleno isi Yihowa towaatanni noosi gara hedino. (Fa. 42:8) Magano eeggifante huucciꞌra giddoyidi hedonke layiꞌneemmo gede, gara ikkitino hedo heedhannonke gedenna qarra dandiine saꞌꞌate hasiissanno jawaante afiꞌneemmo gede kaaꞌlitannonke.
Faarso 42 borreessino Leewaawichi giddosita kule Magano huucciꞌrino. Giddonketa kulle Yihowa huucciꞌneemmo woyite, balaxisiisa hasiissannonke coye qaangammora dandiineemmo (Gufo 16 lai)
17. (a) Masaalaanchu Yoonaasi huuccattonni maa ronseemmo? (Yoonaasi 2:1, 2) (b) Faarsuwate giddo nooti mite yaatto qarru iillannonke woyite kaaꞌlitannonkehu hiittoonniiti? (Lekkaalliidi qaagiishsha lai.)
17 Yoonaasi 2:1, 2 nabbawi. Masaalaanchu Yoonaasi tenne huuccatto huucciꞌrinohu jawu qulxuꞌmichi godowi giddo heeꞌreeti. Yoonaasi Yihowara hajajaminokkiha ikkiro nafa isi Maganu huuccattosi macciishshannota addaxxino. Isi huucciꞌranni Faarsote maxaafi giddonni batinye yaatto qummi assino.d Yoonaasi konne Qullaawu Maxaafi gafa seekki afinoha ikkikki digatino. Isi tenne faarso hiincasi Yihowa kaaꞌlannosita addaxxanno gede assitinosi. Ninkeno Qullaawu Maxaafita mite qummeeshshuwa qaagate woꞌnaalleemmoha ikkiro qarru yannara Yihowa huucciꞌneemmo woyite kuri qummeeshshuwa qaangammoranna shesho afiꞌnammora dandiineemmo.
HUUCCATTOTENNI YIHOWAWA SHIQA AGURTOOTI
18-19. Mito woyite huucciꞌnanna giddonketa fushshine hasaapha qarra ikkitunkero Rooma 8:26, 27 maa buuxissannonke? Lawishsha kuli.
18 Rooma 8:26, 27 nabbawi. Mito woyite lowo geeshsha yaandeemmo daafira huuccattotenni giddonketa fushshine Yihowara hasaapha qarra ikkitankera dandiitanno. Ikkirono kaaꞌlo afiꞌra dandiineemmo. Togoo woyite Maganunnihu qullaawu ayyaani ninkera huuccannonke. Hiittoonni? Yihowa ayyaanisinni Qaalisi giddo lowo huuccatto borreessante heedhanno gede assino. Giddonketa fushshine huucciꞌra qarra ikkitannonke woyite Yihowa Qaalisi giddo noota mite huuccatto ninke huucciꞌnoommohu gede asse laꞌꞌanno hattono huuccattonkera dawaro qolanno.
19 Tini hedo Ruusiyaho heedhannota Yeleena yinanni rodoo kaaꞌlitinose. Ise huuccatto assidhinonna Qullaawa Maxaafa nabbabbino daafira usurroonnise. Yeleena lowo geeshsha yaaddino daafira huucciꞌra qarra ikkitinose. Ise togo yitino: “Lowo geeshsha dadilleemma woyitenna mayyee huucciꞌreemmaro afa qarra ikkitannoe woyite Yihowa Qaalisi giddo noota alba ammanantino soqqamaanosi huuccidhino huuccatto . . . ani huucciꞌroommahu gede asse laꞌꞌannota qaageemma. . . . Tini buutote qarri yannara lowo geeshsha sheshifachishshinoe.”
20. Yaaddo amaddannonke woyite wodananke huuccattote qixxeessiꞌra dandiineemmohu hiittoonniiti?
20 Yaaddo amadde heedheennanke huucciꞌneemmo woyite hedonke gamba assiꞌra qarra ikkitankera dandiitanno. Wodananke qixxeessiꞌrate qoonqotenni qaddaꞌnoonniha faarsote maxaafa macciishsha dandiineemmo. Qoleno Moote Daawiti assinonte gede macciishshamannonkere borreessate woꞌnaala dandiineemmo. (Fa. 18; 34; 142; umoonni noo hedo.) Hige huuccattote qixxaambeemmo woyite ma assa hasiissannonkero kulanno seeri dino. (Fa. 141:2) Atera woyyannohere assa dandaatto.
21. Woꞌmu wodaninkenni huucciꞌra dandiineemmohu mayiraati?
21 Yihowa mittoreno coyiꞌnummokki nafa giddonketa huwatannota afa lowo geeshsha hagiirsiissannote. (Fa. 139:4) Ikkirono iso addaxxine huucciꞌnanna macciishshanno woyite hagiidhanno. Hakko daafira iimi Annikkiwa huucciꞌrate hobbi ruxxi yitooti. Qaalisi giddo borreessinoonni huuccattonni rosi. Woꞌmu wodanikkinni huucciꞌri. Hagiirsiisannohereno dadillisannohereno isira hasaaphi. Addu jaalakki ikkino daafira Yihowa woꞌmanka woyite ate kaaꞌlate qixxaawinoho!
FAARSO 45 Wodaniꞌyanni Hiinceemmore
a Kiristaanu Heeshshora Kaaꞌlitanno Qummeeshshuwa yitanno birosherera “Yihowa” yaannohu hunda “Yihowata dhagge ikkitanno akatta” yaannoha lai.
b Songote mannu albaanni huuccinanni huuccatto harancho ikka hasiissannose.
c Haanna huuccidhu woyite horoonsidhino yaatto Muse borreessino borro giddo noo yaatto ledo mittu garite. Ise yanna gaaꞌmite Qullaawa Borro hiincitinoti dihuluullissannote. (Mar. 4:35; 8:18; 32:4, 39; 1 Sa. 2:2, 6, 7) Lowo diri gedensaanni Yesuusi ama Maariyaami Yihowa guwisate horoonsidhino yaatto Haanna horoonsidhino yaatto ledo mittu garite.—Luq. 1:46-55.
d Lawishshaho Yoonaasi 2:3-9, Faarso 69:1; 16:10; 30:3; 142:2, 3; 143:4, 5; 18:6; 3:8 ledo heewisiisi; qummeeshshu noohu yoonaasi huucciꞌrino huuccatto taae garinniiti.