Wolootaho Huucca Habbinoonte

1. Yihowa huuccattonke naadannota anfeemmohu hiittoonniiti?

HUUCCATTO dhagge ikkitanno eltooti. Hanni hedi: Yihowa sokkaasinete addi addi looso uyino. (Fa. 91:11) Beettisirano shaaꞌꞌa ikkinokki looso uyino. (Mat. 28:18) Ikkina huuccatto macciishshate looso ayera uyinoyya? Huuccatto macciishshannohu Yihowa umosiiti. Isi ninke mittu mittunku ‘huuccatto macciishshanno.’—Fa. 65:2.

2. Soqqamaasinchu Phaawuloosi wolootaho huuccate lawishsha ikkinonkehu hiittoonniiti?

² Yaachishinonkere huxuxxi yinummokkinni Yihowara hasaapha dandiineemmoha ikkirono, wolootahono huucca hasiissannonke. Soqqamaasinchu Phaawuloosi tenne assino. Lawishshaho isi Efessooni songora borreessino sokkara “kiꞌnera huucca diagureemmo” yiino. (Efe. 1:16) Phaawuloosi mittu mittunku ammanate roduuwisirano huuccino. Lawishshaho isi Ximootewoosira, “Magano galaxxeemmo; qoleno hashsha barra eeggifate huucciꞌreemmo woyite ate woꞌmante yannara qaageemmo” yiino. (2 Xi. 1:3) Phaawuloosira huucciꞌra hasiissannosihu umisihu yaachishanno coyi noosi. (2 Qo. 11:23; 12:7, 8) Ikkirono isi wolootaho huuccate yanna gaaꞌmino.

3. Wolootaho huucca deꞌneemmohu mayira ikkara dandaanno?

³ Mito woyite wolootaho huucca deꞌneemmoha ikkara dandaanno. Mayira? Sabiriinaa yinanni rodoo mitto korkaata kultino. Ise togo yitino: “Tenne alamera heeshsho suttote. Iillannonke qarri hedonke billaallisannohura uminke daafira calla huucciꞌneemmoha ikkara dandaanno.” Aterano togoori tuncu yee egenninohe? Hatto ikkiro kuni birxichi kaaꞌlannohe. Konni birxichira (1) wolootaho huucca hasiissannohu mayiraatironna (2) tenne assa dandiineemmohu hiittoonniitiro kulloonni.

WOLOOTAHO HUUCCA HASIISSANNONKEHU MAYIRAATI?

4-5. Wolootaho huuccineemmo huuccatto “lowo wolqa afidhino” yineemmohu mayiraati? (Yaaqoobi 5:16)

⁴ Wolootaho huuccineemmo huuccatto “lowo wolqa afidhino.” (Yaaqoobi 5:16 nabbawi.) Wolootaho huuccineemmo huuccatto kaaꞌlitannori no? Ee no. Yesuusi Pheexiroosi mulenni kaadannosita afino daafira togo yiino: “ammanakki baꞌannokki gede ate daafira eeggifate huuccoommo.” (Luq. 22:32) Phaawuloosino huuccatto lowore kaaꞌlitannota afino. Isi Roomaho beebbate usurroonnisiwa heeꞌre Filimoonira togo yee borreessino: “Maganu huuccattoꞌne macciishsheenna kiꞌnewa galagale dayemmo.” (Flm. 22) Hakkiinni Phaawuloosi mulenni usuru mininni fule soqqanshosi hanafino.

⁵ Hige togo yaa huuccattotenni Yihowa mitto coye assanno gede giddeessineemmo yaa diꞌꞌikkitino. Isira soqqamaanosi qarri leellannosi hattono mito woyite huuccattonsara dawaro qola doodhanno. Tenne afanke Yihowara giddonketa kulle huucciꞌneemmo gedenna kaaꞌlannonketa addaxxine qarranke isi aana tuqqineemmo gede assitannonke.—Fa. 37:5; 2 Qo. 1:11.

6. Wolootaho huucca ma assineemmo gede assitannonke? (1 Pheexiroosi 3:8)

⁶ Wolootaho huucca insa ‘godowinta mararreemmo gede assitannonke.’ (1 Pheexiroosi 3:8 nabbawi.) Mararanno manchi wolootu qarra afanno hattono insa kaaꞌla hasiꞌranno. (Maq. 1:40, 41) Mayikili yinannihu mittu songote cimeessi togo yiino: “Wolootaho hasiisannori daafira huucca insara iillanni noonsa qarra albinni roore huwateemmo gedenna insa lubbora baxeemmo gede assitannoe. Insa afa hoogguro nafa insawa albinni roore gamba yoommohu gede asse hedeemmo.” Richaardi yinannihu mittu cimeessino kaaꞌlannonkere wolere qummi assino. Isi togo yiino: “Mittu manchi daafira huuccineemmo woyite albinni roore mitore assine iso kaaꞌlate kaꞌneemmo. Huuccatto assineemmo manchira mitore assine kaaꞌlineemmo woyite, ninke uminke isi daafira huuccinoommo huuccattora dawaro higganno gede kaaꞌlinanni heeꞌnoommo.”

7. Wolootaho huucca uminke qarra calla hendeemmokki gede kaaꞌlitannonkehu hiittoonniiti? (Filiphisiyusi 2:3, 4) (Misillano lai.)

⁷ Wolootaho huucca qarrinke daafira quwa saꞌneemmokki gede kaaꞌlitannonke. (Filiphisiyusi 2:3, 4 nabbawi.) Sheexaanu gashshe noote tenne alamera ninke mittu mittunkura qarru iillannonke. (1 Yo. 5:19; Aju. 12:12) Wolootaho huucca roso assiꞌnummoro “roduuwu maamari woꞌmu giddo noo [roduuwinkera] togoo qarri iillanni noota” huwanteemmo. (1 Ph. 5:9) Katiriina yinanni suwisaancho togo yitino: “Wolootaho huucca insarano qarru iillanni noonsata qaageemma gede assitannoe. Tini umiꞌya qarra quwa sae illachisheemmakki gede kaaꞌlitannoe.”

INSARA NINKE HUUCCATTO HASIISSANNONSA

8. Ayeoora huucca dandiineemmoro leellishanno lawishsha kuli.

⁸ Ayeoora huucca dandiineemmo? Roduuwaho gaamote deerrinni huucca dandiineemmo; lawishshaho, dhiwantinorira, rosu mine darawonsa qacifattannonsarinna gara ikkinokkire assitanno gede xixxiibbannonsa wedellira, woy geedhimma waaddannonsa roduuwira huucca dandiineemmo. Batinye ammanate roduuwanke mininsa manni woy gashshootu darantanno gede assannonsa. (Mat. 10:18, 36; Soq. 12:5) Mitu ammanate roduuwinkera poletiku gaarinni kainohunni qaensa agurte haꞌra hasiissinonsa. Woloota kalaqamu dano gawajjitinonsa. Kuri roduuwa mitto mittonka egenninoommokkiha ikkara dandaanno. Kayinni insara huuccineemmoha ikkiro Yesuusi “kiꞌne kiꞌneneewa baxamme” yee hajajinonke hajajo ayirrinseemmota leellinsheemmo.—Yoh. 13:34.

9. Yihowa dirijjite giddo albisa ikkite soqqantanno roduuwiranna minaamuwinsara huucca hasiissannonkehu mayiraati?

⁹ Qoleno Yihowa dirijjite giddo albisa ikkite soqqantanno roduuwira huucca dandiineemmo. Lawishshaho, Aliidi Bisiranna kaaꞌlaanonsara, Sinu Biiro Komitera, sinu biiro giddo aliidi laꞌꞌaano ikkite soqqantanno roduuwira, woradu aliidi laꞌꞌaanora, songote cimeeyyeranna songote soqqamaanora huucca dandiineemmo. Kuri roduuwi ninke kaaꞌlate diinaggaabbe loossannoha ikkirono insa giddo batinyeho qarru iillannonsa. (2 Qo. 12:15) Lawishshaho, woradu aliidi laꞌꞌaancho ikke soqqamannohu Maarki yinanni rodii togo yiino: “Lowo geeshsha yaachishannoe coyi giddo mittu geedhitino anniꞌyanna amaꞌyawiinni xeertiꞌre heeꞌraꞌyaati. Insa lamenka dhiwanni waadannonsa. Rodooꞌyanna minaannise insara hasiisannore asse kaaꞌlannoha ikkirono ani umiꞌya mare assa hasiissannoere asse kaaꞌloommokki daafira xissiisiꞌreemmo.” Kuri diinaggaabbe loossanno roduuwira iillannonsa qarra anfoommoha woy anfoommokkiha ikkirono insa daafira woꞌmanka woyite huuccino. (1 Te. 5:12, 13) Kuri roduuwi minaamuwirano huucca dandiineemmo; insa, minaannuwinsa loosonsa agurtukkinni loossanno gede ammaname kaaꞌlanno.

10-11. Roduuwinke daafira xaphoomunni huuccineemmo huuccatto Yihowa hagiirsiissanno? Xawisi.

¹⁰ Aleenni laꞌnummonte gede ammanate roduuwinkera gaamote deerrinni huucca dandiineemmo. Lawishshaho, mitto mancho bande kullummokkinni Yihowa usuru mine noore kaaꞌlannonsa gedenna shiidhe dadillitinore sheshifachishannonsa gede huucca dandiineemmo. Donaaldi yinannihu mittu songote cimeessi togo yiino: “Qarru iillannonsari batinyu ammanate roduuwinke no; hakko daafira mito woyite xaphoomunni insara huucca dandiineemmo.”

¹¹ Togoo huuccatto Yihowa hagiirsiissanno? Ee hagiirsiissanno! Hige mittu mittunku ammanate roduuwinkera hasiisannonsari maatiro dianfoommo. Konnira ammanate roduuwinkera xaphoomunni huucca garaho. (Yoh. 17:20; Efe. 6:18) Tini huuccatto “roduuwu maamara woꞌma” banxeemmota leellishshanno.—1 Ph. 2:17.

MITTU MITTUKU MANCHIRA HUUCCINEEMMO WOYITE

12. Xiinxalloota ikka mitto mittonka mancho bande kulle huuccineemmo gede kaaꞌlitannonkehu hiittoonniiti?

¹² Xiinxalloota ikke. Ammanate roduuwinkera gaamote deerrinni huuccineemmotano agurranna mittu mittunku rodiinke daafirano huucca hasiissannote. Songokki giddo bayicho assiꞌrino dhibbi waadanni noosihu no? Rosu mine iillinosi fonqolinni kainohunni hexxo mudhino wedellichi no? Qaaqqo callisi “Yihowa seejjonna amaalenni” lossiꞌrate sharramanni noo anni woy ama no? (Efe. 6:4) Xiinxalla ikkite ammanate roduuwikkira iillanni noo qarra albinni roore afa dandaatto; tini insara huuccate hasattokki lexxitanno gede assitanno.b—Rom. 12:15.

13. Egenninoommokki roduuwira huucca dandiineemmohu hiittoonniiti?

¹³ Wolootu suꞌma gantine huucce. Horonta xaande egenninoommokki roduuwi suꞌma nafa ganne huucca dandiineemmo. Hanni lawishshaho, Kiriimiyaho, Ertiraho, Ruusiyahonna Singapoorete usurante noo roduuwinke daafira hendo. JW.ORG aana usurante noo roduuwinke suꞌma afiꞌra dandaatto.c Birayaani yinannihu mittu woradu aliidi laꞌꞌaanchi togo yiino: “Usuru mine noo roduuwinke suꞌma borreesse amaxxanna insa suꞌma huuroꞌya gotti asse woshsha, insa suꞌma qaageemmo gedenna huuccatto assiꞌreemmo woyite suꞌmansa gane huucceemmo gede kaaꞌlitinoe.”

14-15. Wolootaho huuccineemmo woyite mito coye bande kulle huucca dandiineemmohu hiittoonniiti?

¹⁴ Mitto coye baddine kultine huucce. Aleenni kullihu Mayikili togo yiino: “JW.ORG aana, usurantino roduuwinke daafira nabbaweemmo woyite, ani insa ikkoommoro mayi macciishshamannoero hedate woꞌnaaleemmo. Minaamaꞌya daafira yaadeemmotanna ise hasiisannosere afidhinoro buuxa hasiꞌreemmota afoommo. Hakko daafira tini, usuru mine noori minaama noonsa roduuwi daafira bade kule huucceemmore afiꞌreemmo gede kaaꞌlitannoe.”—Ibi. 13:3.

¹⁵ Usuru mine noo roduuwinketi barru barrunku heeshshonsa maa labbannoro hendeemmo woyiteno insa daafira bande kulle huuccineemmore afiꞌneemmo. Lawishshaho, usuru mini agaraano shaqqille leellishshannonsa gedenna silxaane noonsari, roduuwinke Yihowa magansidhara fajjitannonsa gede huucca dandiineemmo. (1 Xi. 2:1, 2) Qoleno usuru mine noo rodii songo ammanasinni jawaattanno gede woy Yihowa Farciꞌraasine ikkitinokkiri konni rodiita dancha akattasi huwattanno gedenna halaale macciishshitanno gede huucca dandiineemmo. (1 Ph. 2:12) Konni garinni heda wolu addi addi qarri iillanni noonsari ammanate roduuwinke daafirano bande kulle huuccineemmo gede kaaꞌlitannonke. Xiinxalloota ikkine, wolootu suꞌma gannenna mitto coye bande kulle huuccine ‘mimmitoho noonke baxilli halaꞌlado’ ikkinota leellisha dandiineemmo.—1 Te. 3:12.

WOLOOTAHO HUUCCINEEMMO WOYITE DHUKANKE AFA

16. Wolootaho huuccineemmo woyite dhukanke anfoommore ikkinoommota leellisha dandiineemmohu hiittoonniiti? (Maatewoosi 6:8)

¹⁶ Kageeshsha laꞌnummonte gede huuccattonke lowore kaaꞌlitara dandiitanno. Ikkirono, dhukanke anfoommore ikka hasiissannonke. Huuccatto assineemmo woyite Yihowa afinokki coye kullanni heeꞌnoommoha diꞌꞌikkino; qoleno isi maa assiro woyyannoro kula dihasiissannonke. Yihowa soqqamaanosira hasiisannori maatiro insa woy ninke anfummokkinni balaxe afino. (Maatewoosi 6:8 nabbawi.) Hatto ikkina wolootaho huucca hasiissannonkehu mayiraatiyya? Konni birxichira ronsummoreno agurranna tini wolootaho hendeemmota leellishshanno. Baxillu mimmitoho huuccineemmo gede kakkayisannonke. Yihowa soqqamaanosi isi gede baxille leellishshanna laꞌꞌanno woyite hagiidhanno.

17-18. Ammanate roduuwinkera huuccineemmo huuccatto mayi gedeeti? Lawishsha kuli.

¹⁷ Huuccatto assineenna coyi woyyaawinokkiha ikkiro nafa huuccatto assanke ammanate roduuwinkera noonke baxille leellishshanno; Yihowano tenne laꞌꞌanno. Huuccattonke aane noo lawishshi ledo heewisiisa dandiinanni. Hanni mittu qaaqqinna qaaqqo noonsa maate hedi. Labbaa qaaqqi dhiwame goxino. Meya qaaqqo annisera togo yitu: “Rodiiꞌya huranno gede mitore assi bawo. Isi lowo geeshsha dhiwaminona!” Annise wonanni maa assannoro afe no; isi labbaa qaaqqosi baxanno hattono iso dancha gede towaatanni no. Ikkirono kuni anni qaaqqosi rodoose lowo geeshsha mararte kaaꞌlannosi gede xaꞌmitanno woyite isi mageeshshi geeshsha hagiidhannoro hedi.

¹⁸ Hatteente gede Yihowa ninkeno mimmitoho hendeemmonna huuccineemmo gede jawaachishinonke. Hatto assineemmo woyite huuccattonke umonke calla ikkikkinni wolootano lubbora banxeemmota leellishshanno hattono Yihowa tenne laꞌꞌanno. (2 Te. 1:3; Ibi. 6:10) Qoleno aleenni ronsummonte gede, huuccattonke mito woyite coyi soorramanno gede assitara dandiitanno. Hakko daafira mimmitoho huuccate dandiinummore baala assa deꞌnoonke.