Mitte Ammaꞌno Miila Ikka Hasiissanno?

Qullaawu Maxaafi mayyaanno?

Ee, hasiissanno; mayira yiniro, Maganu mannu iso gamba yee mitteenni magansiꞌrara hasiꞌranno. Qullaawu Maxaafi togo yaanno: “Baxille afiꞌratenna dancha looso loosate mimmitonke kakkayinso. . . . Ronsoommoha xaadonke agurroonke.”—Ibiraawoota 10:24, 25.

Yesuusi harunsaanosi, “Mereeroꞌne baxillu heeꞌriro rosaanoꞌya ikkitinoonnita mannu baalunku konninni afanno” yaasi insa qinaabbino gaamo ikkitannota leellishshanno. (Yohaannisi 13:35) Kiristoosi rosaano konne baxille leellisha dandiitannote qara doogga giddo mitte, ammanate roduuwinsa ledo gamba yaate. Insa ganyite mitteenni gamba yite magansiꞌrate songuwa xinta hasiissannonsa. (1 Qorontoosi 16:19) Songuwa mitteenni alamete doyichoha roduuwu maamara ikkitanno.—1 Pheexiroosi 2:17.

Mitte ammaꞌno miila ikkatenni sainore assa hasiissanno

Qullaawu Maxaafi mannu Magano magansiꞌrate gamba yaa hasiissannonsata kulanno; hatto yaa kayinni mittu manchi mitte ammaꞌno miila ikkino daafira calla Magano hagiirsiisanno yaa diꞌꞌikkino. Mittu manchi Magano hagiirsiisa hasiꞌriro, ammaꞌnosi yitanno garinni heeꞌra hasiissannosi. Lawishshaho, Qullaawu Maxaafi togo yaanno: “Maganu Annu albaanni keeraanchonna battaabbinokki ammaꞌno: Annanna ama shiidhino ooso, hattonni galte shiiꞌrino meento kaaꞌla, tenne gobba [alame] ishinchiwiinni meessaneete agadhate.”—Yaiqoobi 1:27.