Aneneeto Shaate Hedanni Noommoha Ikkiro Qullaawu Maxaafi Kaaꞌlannoe?

Qullaawu Maxaafi mayyaanno?

Ee, kaaꞌlannohe! Qullaawu Maxaafi “dadillitinore jawaachishanno Magani” qixxeessino Maxaafaati. (2 Qorontoosi 7:6) Qullaawu Maxaafi surrete dhibba xagisate hende qixxeessinoonniha ikka hoogirono, batinye manna insaneeto shaate hedonsa qeeꞌlanno gede kaaꞌlino. Aannoti dancha amaale aterano kaaꞌlitannohe.

• Qullaawu Maxaafi hiittenne kaaꞌlitanno amaale aanno?

• Qullaawu Maxaafi reyo halchino mannire kulanno?

• Ateneeto shaate hedo qeeꞌlate kaaꞌlitannoheti Qullaawu Maxaafi qummeeshshuwa hiikkuriiti?

• Mittu manchi hexxo mudhe “Reyo woyyitannoe” yiiro maa assa dandaatto?

• Konni albaanni ateneeto shaate woꞌnaalte egennoottoha ikkirona?

Qullaawu Maxaafi hiittenne kaaꞌlitanno amaale aanno?

• ● Wodanikki xisso wolootaho kuꞌli.

  Qullaawu Maxaafi yaannore: “Jaalu woꞌmanka woyite jaalaholla; roduuno qarru barra iillanno.”—Lawishsha 17:17.

  Qummeeshshu tiro: Yaaddo amaddannonke woyite, wolootu kaaꞌlo hasiissannonke.

  Wodanikki xisso maaxidhe sammi yaattoha ikkiro, duhu wolqakkira aleenni ikkahera dandaanno. Wolootaho kuꞌlattoha ikkiro kayinni, beedho afiꞌrattoranna qarrakki wolu garinni laꞌꞌattora dandaatto.

  

  Togo assate woꞌnaali: Ballo xissokki techonni mitoho kuꞌli; lawishshaho maatekki miilira woy ammanatto jaalira hasaapha dandaatto.a Qoleno giddokkita woraqataho borreessakki, hedokki xawisate kaaꞌlitahera dandiitanno.

• ● Akimenniwa haꞌri.

  Qullaawu Maxaafi yaannore: “Dhiwantinorira ikkinnina fayyaaleeyyete xagisaanchu dihasiisannonsa.”—Maatewoosi 9:12.

  Qummeeshshu tiro: Dhiwammeemmo woyite akimete kaaꞌlo hasiissannonke.

  Meessaneeto shaate heda, surrete xissora malaate ikkitara dandiitanno. Surrete xisso wolu dhibbi gedeentilla ikkinnina saalfantannire diꞌꞌikkino. Akimootu surrete xisso xagisse hursitara dandiitanno.

  Togo assate woꞌnaali: Ballo rakke dancha gede xagisanno akimichiwa haꞌri.

• ● Maganu ate daafira hedannota qaagi.

  Qullaawu Maxaafi yaannore: “Onte gurrae lame saantera hirranni diheeꞌnoonni? Maganu hakkuri giddonni mitticho nafa dihawanno. . . . Waajjitinoonte; kiꞌne lowo gurraenni roortinanni.”—Luqaasi 12:6, 7.

  Qummeeshshu tiro: Heeshshokki Maganu albaanni lowo waaga afidhinote.

  Caaqqi yee laꞌꞌannohehu nookkiha lawihero nafa, Maganoho qarrikki leellannosi. ‘Xaate heeꞌra dihasiꞌreemmo’ yite hedittoro nafa, isi ate daafira hedanno. Faarso 51:17 Magano, “Heeshshi yiinohanna atewa higino wodana dimishatto” yitanno. Maganu baxannohe daafira heeꞌrattora hasiꞌranno.

  Togo assate woꞌnaali: Maganu baxannoheta leellishshannota Qullaawu Maxaafi taje xiinxalli. Lawishshaho, Ella 2016 Agarooshshu Shaera qoola 3-5 nooha “Yihowa Ate Daafira Hedanno” yaanno birxichonna Yihowawa Shiqi (Amaaru Afoo) yaanno maxaafa fooliishsho 24 nabbawi.

• ● Magano huucciꞌri.

  Qullaawu Maxaafi yaannore: “Kiꞌnere malannohu isootina [Maganohona], qarrisannoꞌnere baala isi aana tuqqe.”—1 Pheexiroosi 5:7.

  Qummeeshshu tiro: Maganu wodanikki xissonna yaachishanni noohe coye baalanka hasaaphattosira koyisinohe.

  Maganu qarrakki cincate kaaꞌlitannohe jawaantenna giddoyidi keere aannohe. (Filiphisiyusi Sokka 4:6, 7, 13) Kaaꞌlo afiꞌrate iso huuccidhannore konni garinni irkisannonsa.—Faarso 55:22.

  

  Togo assate woꞌnaali: Techonni Magano huucciꞌri. Yihowa yinanniha suꞌmasi gante, giddiidi xissokki isira kuꞌli. (Faarso 83:18) Qarrakki dandaatto gede jawaante aahera huucciꞌri.

• ● Qullaawu Maxaafi albillittete yanna daafira kulanno hexxo hiinci.

  Qullaawu Maxaafi yaannore: “Tini hexxo heeshshonkera milli miqqi yaannokkihu addaxxinanni mokkollichi gedeete.”—Ibiraawoota 6:19.

  Qummeeshshu tiro: Hombobalatte kawanna kaꞌa raateessitanni noo markaawe gede giddiidi hedokki heeshshinna gotti yituro nafa, Qullaawu Maxaafi giddo noo hexxo kiꞌahera dandiitanno.

  Qullaawu Maxaafi giddo noo hexxo haaqeete halcho diꞌꞌikkitino; tenne hexxo uyinohu xissiisiꞌneemmo gede assannonke coye baalanka huneemmo yee qaale eino Maganooti.—Yohaannisi Ajuuja 21:4.

  Togo assate woꞌnaali: Qullaawu Maxaafi kulanno hexxore ledde afate, “Woyyitino Yanna Dagganno Yine Hexxa Dandiineemmo?” yaanno birxicho lai.

• ● Hagiirsiisannohe coye assi.

  Qullaawu Maxaafi yaannore: “Hagiirraamu wodani mannimmate fayyimma aanno.”—Lawishsha 17:22.

  Qummeeshshu tiro: Hagiirsiisannonke coye assineemmo woyite, surrenkenna mannimmanke fayyimma woyyaabbara dandiitanno.

  

  Togo assate woꞌnaali: Hagiirsiisannohe coye assi. Lawishshaho, baxatto muuziiqa macciishsha, jawaachishannore kultanno borro nabbawa, woy wole baxisannohe coye assa dandaatto. Qoleno shiimare assite nafa woloota kaaꞌlittoro, hagiirrikki lexxara dandaanno.—Soqqamaasinete Looso 20:35.

• ● Ordu fayyimmakki towaaxxi.

  Qullaawu Maxaafi yaannore: “Manninate kaajjishiꞌrate rosi . . . kaaꞌlanno.”—1 Ximootewoosi 4:8.

  Qummeeshshu tiro: Mannimmate guunte millimmo, dancha gede goxicho afiꞌra, hattono kiꞌanno sagale ita kaaꞌlitanno.

  Togo assate woꞌnaali: Gobba fulte, 15 daqiiqano ikkiro ariiffatte qaafi.

• ● Wodanikki hedonna heeshshokki giddo mitu coyi soorramara dandaannota qaagi.

  Qullaawu Maxaafi yaannore: “Gaꞌa ikkannore affinoonnini?”—Yaiqoobi 4:14.

  Qummeeshshu tiro: Qarrinke, wole agurina mala diafiꞌrinoho yine hendoommo qarri nafa, noo gedeenni heeꞌra hoogara dandaanno.

  Techo ragu baalu tunsinkero nafa, gaꞌa coyi woyyaawara dandaanno. Hakko daafira, ballo cincite saꞌꞌatto gara hedi. (2 Qorontoosi 4:8) Xa hexxo mudhatto gede assinohe coyi gale hosanni woyyaawara dandaanno; ateneeto shiittoro kayinni, lubbokki qolte diafatto.

  Togo assate woꞌnaali: Qullaawu Maxaafi giddo hexxo mudhe reyo halchino mannire kultanno xagge nabbawi; konni manni heeshsho galte hossanni insa hedinokki garinni woyyaabbino gara wodanchate woꞌnaali. Hanni mito lawishsha laꞌno.

Qullaawu Maxaafi reyo halchino mannire kulanno?

Ee, Qullaawu Maxaafi mitu manni reyo halchinota kulanno. Maganu konne manna diboroorino; hatteentenni kaaꞌlinonsa. Ateno kaaꞌlannohe.

Eeliyaasi

• ● Eeliyaasi ayeti? Eeliyaasi worba masaalaanchooti. Ikkirono isi hexxo mudhino woyiti no. Yaiqoobi 5:17, “Eeliyaasi ninke gedee manchooti” yitanno.

• ● Isi reyo halchinohu mayiraati? Eeliyaasi mitte hige callatino, waajjino, hattono waagu dinoe yee hedino. Konni daafira isi “Lubboꞌya haaꞌri” yee Yihowa huucciꞌrino.—1 Mootoolla 19:4.

• ● Mayi kaaꞌlisiyya? Eeliyaasi giddiidisi hedo gudise Maganoho kuꞌlino. Maganu iso jawaachishinosihu hiittoonniiti? Maganu Eeliyaasi daafira hedannota leellishino; hattono wolqasi mageeshshi geeshsha lowotero huwatanno gede kaaꞌlinosi. Qoleno Eeliyaasi xaano waagu noosiha ikkinota huwatanno gede assino; hattono Eeliyaasira towaatannosiha dancha soqqamaancho uyinosi.

• ▸ Eeliyaasi xagge nabbawi: 1 Mootoolla 19:2-18.

Iyyoobi

• ● Iyyoobi ayeti? Iyyoobi dureessaho, halaalaancho Magano magansiꞌrannohonna maate noosi manchooti.

• ● Isi reyo halchinohu mayiraati? Iyyoobira hedeweelcho buutote qarri iillinosi. Noosi jajji baalu goofino. Oososi baalanti danotenni mitteenni gooffino. Buutote dhibbi amadinosi. Qoleno, mararro afiꞌrinokki manni, ‘Qarru amadannohe gede assiꞌroottohu umokkiiti’ yee beebbatenni rufinosi. Konnira Iyyoobi togo yiino: “Heeshshoꞌya mishoommo; heeꞌrammora horontanni dihasiꞌreemmo.”—Iyyoobi 7:16.

• ● Mayi kaaꞌlisiyya? Iyyoobi Magano huucciꞌrino; qoleno wolootaho hasaaphino. (Iyyoobi 10:1-3) Eelihu yinannihu mararanno jaalisi jawaachishinosi; qoleno Eelihu, Iyyoobi qarrasi wolu raginni hedanno gede kaaꞌlinosi. Roorenkanni kayinni, Iyyoobi Maganu amaalenna kaaꞌlo maahoyye yee adhino.

• ▸ Iyyoobi xagge nabbawi: Iyyoobi 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Muse

• ● Muse ayeti? Muse hundite Israeelete daga sooreessaati; qoleno ammanamino masaalaanchooti.

• ● Isi reyo halchinohu mayiraati? Musera loosu batiꞌrinosi, hattono mannu duucha woyite mishannosi woy arrassannosi; qoleno isi, kawii sae didandeemmo yee hedino. Hakko daafira, “Rakke shiie” yee Magano huucciꞌrino.—Kiiro 11:11, 15.

• ● Mayi kaaꞌlisiyya? Isi giddosita fushshe Maganoho kuꞌlino. Maganu, Musera duha ikkinosi looso shaashshe yaachishannosire ajishino.

• ▸ Muse xagge nabbawi: Kiiro 11:4-6, 10-17.