Pheexiroosi Gede Hexxo Mudhitinannikkire Ikke

1. Yesuusi maalaletenni qulxuꞌme amadanno gede kaaꞌlisita Pheexiroosira mayi macciishshaminosi?

PHEEXIROOSI hashsha woꞌma qulxuꞌme woshshaaxxanni galinoha ikkirono mitte qulxuꞌmicho nafa diamaxxino. Yesuusi iso “qulxuꞌme amadate woshshaadoꞌne baaru giddora tugge” yiino. (Luq. 5:4) Pheexiroosi mitte qulxuꞌmichono amada didandeemmo yee huluullaminoha ikkirono Yesuusi kulinosire assino. Hakkiinni lowo qulxuꞌme amaddino daafira woshshaado taꞌara rakku. Pheexiroosinna ledosi qulxuꞌme woshshaaxxitanni noori Yesuusi maalale loosinota affuti “dhaggeeffattino.” Pheexiroosi kayinni, “Mooticha, ani cubbaataamohona anewiinni hoꞌli” yiino. (Luq. 5:6-9) Pheexiroosi Yesuusi ledo heeꞌrate ikkado ikkinokkihu gede asse hedinoha ikkara dandaanno.

2. Pheexiroosi lawishsha xiinxalla kaaꞌlitannonke yineemmohu mayiraati?

² Pheexiroosi halaalella yiino; isi ‘cubbaataamo manchooti.’ Qullaawa Borro isi gedensoonni gaabbanno gede assannosire coyiꞌrinonna assino woyiti noota kultanno. Aterano Pheexiroosira macciishshaminori gedeeri macciishshame egenninohe? Mito akata woyyeessiꞌrate woy laanfekki qeeꞌlate lowo yanna sharrantanni nootto? Hatto ikkiro Pheexiroosi lawishsha xiinxallakki jawaachishshannohe. Hiittoonni? Hanni tenne hedi: Yihowa hasiꞌroommero Pheexiroosi loosino soꞌro Qullaawu Maxaafi giddo borreessinannikki gede assara dandaanno. Ikkirono isi loosino soꞌronni ninke roso afiꞌneemmo gede Qullaawu Maxaafi giddo borreessinanni gede assino. (2 Xim. 3:16, 17) Ninkente gede laanfe noosihu konni manchi daafira xiinxallanke Yihowa guuta ikka hasiissannoꞌne yaannonkekkita huwanteemmo gede kaaꞌlitannonke. Isi laanfe noonkere ikkinummorono woꞌmanka woyite ammanamme soqqammammosira hasiꞌranno.

3. Hexxo mudha hasiissannonkekkihu mayiraati?

³ Hexxo mudha hasiissannonkekkihu mayiraati? Mitto coye duucha hinge assinummoro hakkonne coye woyyeessiꞌnanni haꞌneemmo. Lawishshaho mittu manchi muuziiqa godoꞌlinanni gara lowo diro rosiisiꞌrara dandaanno. Isi rosiisiꞌranni lowo soꞌro loosannoha ikkara dandaanno; ikkirono rosiisiꞌranni haꞌri kiiro dandoosi woyyeessiꞌranno. Isi muuziiqa godoꞌlate dandoo noosiha ikkiro nafa mito woyite soꞌro loosannoha ikkara dandaanno. Ikkirono isi hexxo dimudhanno. Isi dandoosi woyyeessiꞌrate rosiisiꞌra diaguranno. Hatteente gede ninkeno mite laanfenke qeeꞌlinoommoha lawinkero nafa galagalle soꞌro loonsammora dandiineemmo. Ikkirono dandoonke woyyeessiꞌrate sharrama diagurreemmo. Ninke baalunku gedensoonni gaabbineemmo gede assannonkere coyiꞌneemmo woy assineemmo; hexxo mudhineemmokkiha ikkiro kayinni Yihowa biddi assiꞌra hasiissannonkere biddi assiꞌneemmo gede kaaꞌlannonke. (1 Phe. 5:10) Hanni Pheexiroosi hexxo mudhinokkita leellishanno lawishsha laꞌno. Soꞌro loosinoha ikkirono Yesuusi iso mararasi ninkeno Yihowara woꞌmanka woyite soqqammeemmo gede kakkayissannonke.

PHEEXIROOSIRA GUFICHO IKKINOSI COYENNA AFIꞌRINO ATOOTE

4. Luqaasi 5:5-10 kultanno garinni Pheexiroosi ani hiittooho yiino? Yesuusi maa buuxisisiyya?

⁴ Qullaawa Borro Pheexiroosi ‘ani cubbaataamo’ manchooti yiinohu mayiraatiro woy isi hiikkunni cubbi daafira coyiꞌranni nooro dikultanno. (Luqaasi 5:5-10 nabbawi.) Ikkirono isi mite jawa soꞌro loosinoha ikkara dandaanno. Yesuusi Pheexiroosi waajjinota afino; Pheexiroosi waajjinohu ani ikkado diꞌꞌikkoommo yee hedino daafira ikkara dandaanno. Qoleno Yesuusi Pheexiroosi ammaname heeꞌra dandaannota afino. Hakko daafira Yesuusi Pheexiroosi shaqqillunni “waajjitooti” yiinosi. Yesuusi Pheexiroosi ammaninosi daafira, Pheexiroosi heeshsho roore woyyaabbino. Gedensoonni Pheexiroosinna rodiisi Indiriyaasi qulxuꞌme woshshaadate loosonsa agurte Buuraminoha harusitannore ikkitino; hatto assansa dhagge ikkanno atoote afidhanno gede assitinonsa.—Maq. 1:16-18.

5. Pheexiroosi waajja qeeꞌlinohuranna Yesuusi koyisinosi koyishsha maahoyye yee adhino daafira afiꞌrino atooti maati?

⁵ Pheexiroosi Kiristoosi harunsaancho ikkino daafira batinye dhagge ikkanno atoote afiꞌrino. Isi Yesuusi dhiwantinore hursanna, busha ayyaana fushshanna wole agurina reyitinore kayisanna laino.b (Mat. 8:14-17; Maq. 5:37, 41, 42) Qoleno Pheexiroosi, Yesuusi albillitte Maganu Gashshooti Moote ikkanno woyite afiꞌranno ayirrinye ajuujatenni laino; Pheexiroosi lainoha konne coye horo dihawanno. (Maq. 9:1-8; 2 Phe. 1:16-18) Addanko isi Yesuusi rosaancho ikka hoogoommero tenne dilaꞌꞌanno. Pheexiroosi umisi daafira gara ikkinokki coye hedasi konne atoote afiꞌrannokki gede assitasira wodhinokki daafira, lowo geeshsha hagiidhinoti dihuluullissannote!

6. Pheexiroosi laanfesi bayichonkonni qeeꞌlinoni? Xawisi.

⁶ Pheexiroosi konne coye baala lainohanna macciishshinoha ikkirono, laanfesi qeeꞌlate sharrama diagurino. Hanni mito lawishsha laꞌno. Yesuusi Qullaawu Maxaafi masaalo woꞌmitanno gede qarramannonna reyanno gara kulita, Pheexiroosi iso seejjate woꞌnaalino. (Maq. 8:31-33) Pheexiroosinna wole rosaano duucha higge, ‘Ninke giddo roorannohu ayeti?’ yitanni heewisantino. (Maq. 9:33, 34) Yesuusi reyara albaanni noohu jeefote hashsha Pheexiroosi muddame mittu manchira macca mure tayisino. (Yoh. 18:10) Hakko hashshanni Pheexiroosi waajjino daafira jaalasi Yesuusa sase hige kaadino. (Maq. 14:66-72) Hakkiinni Pheexiroosi hururame wiꞌlino.—Mat. 26:75.

7. Yesuusi reyotenni kaihu gedensaanni Pheexiroosi hiittenne faro afiꞌrino?

⁷ Yesuusi konne hexxo mudhino rosaanchosi tuge diagurino. Isi reyotenni kaihu gedensaanni, baxillesi leellishanno gede Pheexiroosira faro faninosi. Yesuusi, Pheexiroosi umosi heeshshi asse geꞌreewosi towaatanno gede koyisinosi. (Yoh. 21:15-17) Pheexiroosino tennera maahoyye yiino. Yerusaalamete Phenxeqosxete ayyaani barra umo qullaawu ayyaaninni buuranturi giddo mittu Pheexiroosiiti.

8. Pheexiroosi Antsookiyaho loosinoti jawa soꞌro hiittenneeti?

⁸ Pheexiroosi buuramino Kiristaancho ikkihu gedensaanni nafa, laanfesi qeeꞌlate sharrama hasiissinosi. Dagate wido ikkinohunna barciminokkihu Qornelewoosi 36 M.D. qullaawu ayyaaninni buurami woyite, Pheexiroosi hakko no; tini, “Maganu manna mallaadannokkita” hattono Dagate wido ikkino manni Kiristaanu songo miila ikka dandaannota leellishshannote. (Soq. 10:34, 44, 45) Pheexiroosi hakkuyi gedensaanni, Dagate wido ikkino manni ledo sagale ita hanafino; kuni isi hakkuyira albaanni horo asse egenninokkireeti. (Gal. 2:12) Ikkirono, mitu Ayihudete wido ikkino Kiristaani Ayihudootunna Dagate wido ikkino manni mitteenni ita dihasiissannonsa yee hedanno. Hatto yee hedannohu mitu manni Antsookiya dayita, Pheexiroosi Dagate wido ikkitino roduuwisi ledo sagale ita agurino; isi hatto assinohu Ayihudete wido ikkino Kiristaani koffi yaanno yee hede ikkara dandaanno. Soqqamaasinchu Phaawuloosi, Pheexiroosi assinore afiti mannu baalu albaanni boroorinosi. (Gal. 2:13, 14) Pheexiroosi togoo soꞌro loosinoha ikkirono hexxo dimudhino. Iso kaaꞌlinosiri maatiyya?

PHEEXIROOSI HEXXO MUDHANNOKKI GEDE KAAꞌLINOSIRI MAATI?

9. Yohaannisi 6:68, 69 Pheexiroosi ammanaminoha ikkinota luphi assite kultannohu hiittoonniiti?

⁹ Pheexiroosi ammanaminoho; isi aye coyino hexxo mudhanno gede assasira diwodhino. Lawishshaho Yesuusi mitte yannara rosaanosira huwatate qarrisannore coyiꞌri woyite, Pheexiroosi ammanaminoha ikkinota leellishino. (Yohaannisi 6:68, 69 nabbawi.) Batinyu manni, Yesuusi hatto yee coyiꞌrinohu mayyaate hedeetiro xaꞌme buuxa agure iso harunsa agurino. Pheexiroosi kayinni hatto diassino. Isi “hegere heeshsho qaali” noosihu Yesuusa calla ikkinota huwatino.

10. Yesuusi Pheexiroosi ammanannota leellishinohu hiittoonniiti? (Misileno lai.)

¹⁰ Yesuusi Pheexiroosi tuge diagurinosi. Isi uullate aana heeꞌrinohu jeefote hashsha Pheexiroosinna wole rosaanosi hunte hadhannosita afino. Ikkirono Yesuusi, Pheexiroosi galagale higannotanna ammaname heeꞌrannota addaxxannota coyiꞌrino. (Luq. 22:31, 32) Yesuusi ‘Ayyaanu qixxaawa maalu kayinni daafuraamo’ ikkinota huwatino. (Maq. 14:38) Pheexiroosi iso egenninokkita kule kaadisihu gedensaanni nafa, Yesuusi konne soqqamaasinchosi hexxo mudhe tuge diagurinosi. Yesuusi reyotenni kaihu gedensaanni Pheexiroosira leellino; tenne yannara Pheexiroosi callisi nooha ikkara dandaanno. (Maq. 16:7; Luq. 24:34; 1 Qor. 15:5) Tini, konne hexxo mudhino soqqamaasincho jawaachishshinositi dihuluullissannote!

11. Yesuusi Pheexiroosira Yihowa kaaꞌlannosita buuxisinosihu hiittoonniiti?

¹¹ Yesuusi Pheexiroosira Yihowa kaaꞌlannosita buuxisinosi. Reyotenni kainohu Yesuusi, Pheexiroosinna wole soqqamaasine xaano maalaletenni qulxuꞌme amaddanno gede asse kaaꞌlinonsa. (Yoh. 21:4-6) Tini maalale Pheexiroosi, Yihowa hasiisannosiha maalaamittete coye aannosita buuxanno gede assitinositi dihuluullissannote. Hakkiinni Pheexiroosi, Yesuusi ‘balaxxe Maganu Gashshoote’ hasidhannorira Yihowa hasiisannonsare wonshannonsata coyiꞌrino hedo qaaginoha ikkara dandaanno. (Mat. 6:33) Kuni baalu Pheexiroosi qulxuꞌme woshshaadate looso ikkikkinni sabbakate looso balaxisiisanno gede kaaꞌlinosi. Isi 33 M.D. Phenxeqosxete ayyaani barra worbimmatenni sabbakkino; tini lowo kume ikkanno manni dancha duduwo macciishshe adhanno gede kaaꞌlitino. (Soq. 2:14, 37-41) Pheexiroosi hakkuyi gedensaanni Samaariyu manninna Dagate wido ikkino manni, Kiristoosi daafira rosannonna isi harunsaano ikkanno gede kaaꞌlino. (Soq. 8:14-17; 10:44-48) Yihowa Pheexiroosi horoonsiꞌre duuchunku gari manni Kiristaanu songo daanno gede assino.

NINKE MAA RONSEEMMO?

12. Laanfenke qeeꞌlate sharrammanni heeꞌnoommoha ikkiro, Pheexiroosi lawishshi kaaꞌlannonkehu hiittoonniiti?

¹² Yihowa hexxo mudhineemmokki gede kaaꞌlannonke. Roorenkanni mite laanfenke qeeꞌlate lowo diro sharrammanni keeshshinoommoha ikkiro, hexxo mudhinammora dandiineemmo. Mito woyite, ninke laanfe Pheexiroositenni roortinohu gede assine hendammora dandiineemmo. Ikkirono Yihowa hexxo mudhineemmokki gede jawaante aankera dandaanno. (Far. 94:17-19) Lawishshaho, mittu rodii halaale macciishshara albaanni lowo diro labballu ledo foorannoho. Hakkiinni isi heeshshosi woꞌmunni woꞌma biddi assiꞌre Qullaawu Maxaafi yaanno garinni heeꞌra hanafi. Ikkirono xaa geeshsha mito woyite busha yorto waaddannosi. Isi hexxo mudhannokki gede kaaꞌlinosiri maati? Togo yiino: “Yihowa jawaachishinoe. Yihowa ayyaani kaaꞌlonni rosoommo halaali garinni heeꞌra dandeemmota huwatoommo. Yihowa horoonsiꞌranni nooe; qoleno guuntete xeꞌne nooeha ikkummorono woꞌmanka woyite jawaachishannoe.”

13. Soqqamaasinete Looso 4:13, 29, 31 kultanno garinni Pheexiroosi lawishsha harunsa dandiineemmohu hiittoonniiti? (Misileno lai.)

¹³ Xaa geeshsha ronsummonte gede Pheexiroosi manna waajjino daafira lame sase hige lowo soꞌro loosino. Ikkirono Pheexiroosi jawaante afiꞌrate huuccatto assiꞌrihu gedensaanni worba ikkasi leellishannore assino. (Soqqamaasinete Looso 4:13, 29, 31 nabbawi.) Ninkeno waajja qeeꞌla dandiineemmo. Hanni Jarmanete Naazi gashshooti yannara heeꞌrinohu Horisti yinanni wedellichira iillinosire laꞌno. Isi rosu mine rosaanonna rosiisanno waajjino daafira hatto yaa soꞌro ikkitinota afinoha ikkirono lame sase hige “Hitileri gatisannonke!” yiino. Annisinna amasi iso boroorantenni worba ikkanno gede kaaꞌlasira ledosi Yihowa huuccidhino. Maatesi kaaꞌlitinosihuranna Yihowa addaxxino daafira Horisti gedensoonni kaajje uurrate jawaante afiꞌrino. Isi gedensoonni, “Yihowa horo tuge diagurinoe” yiino.c

14. Songote cimeeyye hexxo mudhitinore jawaachisha dandiitannohu hiittoonniiti?

¹⁴ Yihowanna Yesuusi hexxo mudhite tugge diagurtannonke. Pheexiroosi, Kiristoosa kaadihu gedensaanni, mitte doodha hasiissinosi. Isi facci asse agurannonso ammaname Kiristoosi rosaancho ikke heeꞌra ikka? Yesuusi Pheexiroosi ammana baꞌannokki gede Yihowa eeggifate huuccino. Yesuusi tenne huuccatto daafira Pheexiroosira kulino; hattono isi gedensoonni ammanate roduuwasi jawaachisha dandaannota addaxxannota kulinosi. (Luq. 22:31, 32) Pheexiroosi gedensoonni Yesuusi yiinosire hedasi jawaachishshinositi dihuluullissannote! Ninkeno mitto lowo geeshsha hasiisanno doorsha doodhineemmo woyite, Yihowa isira ammanamme heeꞌra dandiineemmota buuxisate songote cimeeyye horoonsiꞌrara dandaanno. (Efe. 4:8, 11) Lowo diro songote cimeessa ikke soqqaminohu Pooli yinanni rodii roduuwa konni garinni sheshifachishate woꞌnaalanno. Isi hexxo mudhitino roduuwa, Yihowa halaalu minira abbinonsahu hiittoonniitiro heddanno gede kulannonsa. Hakkiinni isi Yihowa baxilli bagamannokkiha ikkino daafira, Yihowa hexxo mudhe agurannonsakkita buuxxanno gede assannonsa. Isi jeefote togo yiino: “Batinyu hexxo mudhitino roduuwi, Yihowa kaaꞌlonni ammanante isira soqqantanna laoommo.”

15. Pheexiroosinna Horisti woꞌnaalshi Maatewoosi 6:33 yitannori halaale ikkinota leellishannohu hiittoonniiti?

¹⁵ Yihowa Pheexiroosiranna wole soqqamaasinera maalaamittete hasiisannonsare uyinsante gede, ninkeno Gashshootesi balaxisiinseemmoha ikkiro maalaamittete hasiisannonkere oye towaatannonke. (Mat. 6:33) Aleenni kullihu Horisti Layinkihu Alamete Oli gedensaanni suwisaancho ikke soqqamate hedino. Ikkirono isi angate anje noosiha ikkino daafira, woꞌma yanna soqqamaancho ikke soqqamanni heeꞌrate hasiisannosi woxe afiꞌrannoronna teꞌee huluullamino. Isi ma assiyya? Woradu aliidi laꞌꞌaanchi towaanyo yannara hattee lamala woꞌma soqqamanni sayise Yihowa fonqole laꞌꞌate murciꞌrino. Lamalate jeefora woradu aliidi laꞌꞌaanchi aye soyinoro kulloonnikki poosta uyisita dhagge assiꞌrino. Hakko poosti giddo haammata agana suwisaancho ikke soqqamanno woyitira ikkannosi geeshshi woxi no. Kuni woxi Horisti Yihowa hasiisannosire wonshanni noosita buuxanno gede assinosi. Isi hakkuyi gedensaanni heeshshosi diro woꞌma Maganu Gashshoote balaxisiisanni heeꞌrino.—Mil. 3:10.

16. Pheexiroosi lawishshanna isi borreessino xagge xiinxalla kaaꞌlitannonke yineemmohu mayiraati?

¹⁶ Pheexiroosi, ‘Anewiinni hoꞌli’ yii woyite Yesuusi isiwiinni hoꞌlinokki daafira lowo geeshsha hagiidhinoti dihuluullissannote! Kiristoosi, Pheexiroosi ammanamino soqqamaasincho ikkanno gedenna Kiristaanaho kaajja lawishsha ikkanno gede agurikkinni qajeelsinosi. Konni qajeelshi daafira kultanno xaggenni ninke baalunku lowo roso ronseemmo. Pheexiroosi, konni rosi giddo gamanna wole umi xibbi diro heedhino songora soyinote lame sokkara borreessino. Aananno birxichira, tenne sokkara kulloonniha mito qaagiishshanna xaa yannara konne qaagiishsha loosu aana hosiisa dandiineemmohu hiittoonniitiro ronseemmo.