Yihowa “Kaajjishannoꞌne”—Hiittoonni?

1. Hundi yannara Maganu soqqamaano jawaante afidhinohu hiittoonniiti?

MAGANU QAALI ammanamino manna duucha woyite worbuullu gede asse kulanno. Ikkirono insa giddo roore jawaatoota ikkitinorira nafa jawaatoota ikkitinoha lawinonsakki woyiti no. Lawishshaho Moote Daawiti “jawaatu ilaali gede” ikkinohu gede asse hedino woyiti no; wole yannara kayinni ‘masino’. (Far. 30:7) Saamsooni Maganu ayyaani wolqa oyennasi wolu manninni roore wolqaataamo ikkinoha ikkirono, Maganu ayyaani kaaꞌla hoogisiro kayinni ‘wolqasi baꞌeenna wolu manni gedeeha ikkannota’ afino. (Eje. 14:5, 6; 16:17) Kuri ammanantino mannooti jawaatoota ikkitinohu Yihowa wolqa uyinonsa daafira callaati.

2. Phaawuloosi wolqiweelinotanna wolqa afiꞌrinota coyiꞌrinohu mayiraati? (2 Qorontoosi 12:9, 10)

² Soqqamaasinchu Phaawuloosino Yihowa aanno wolqa hasiissannosita huwatino. (2 Qorontoosi 12:9, 10 nabbawi.) Ninke giddo batinye waadannonte gede Phaawuloosi dhibbu waadinosi. (Gal. 4:13, 14) Isira gara ikkinore assa qarra ikkitinosi woyiti no. (Rom. 7:18, 19) Qoleno isi yaadinonna waajjino woyiti no. (2 Qor. 1:8, 9) Ikkirono Phaawuloosi wolqiweeli woyite wolqa afiꞌrino. Hiittoonni? Yihowa Phaawuloosira wolqa uyinosi. Hattono jawaata assinosi.

3. Konni birxichira hiikkuri xaꞌmuwara dawaro afiꞌneemmo?

³ Yihowa ninkeno jawaachishannonketa kule qaale eino. (1 Phe. 5:10) Kayinni ninke assa hasiissannonkere assinummokkinni Yihowa jawaante aannonke yine dihendeemmo. Lawishshaho itatto sagale shiqinshoonniheha ikkiro tenne sagale angakkinni adhite ita hasiissannohe. Hatto assakki tenne sagalenni woꞌma horo afiꞌratto gede kaaꞌlitannohe. Hatteente gede Yihowa hasiissannonke wolqa aate qixxaawinoho; kayinni tenne wolqa afiꞌrate ninkeno assa hasiissannonkeri no. Yihowa ninke jawaachishate maa qixxeessino? Ninke tenne wolqa afiꞌrate maa assa hasiissannonke? Qullaawu Maxaafi giddo kulloonnihu sasu mannira yaano masaalaanchu Yoonaasira, Yesuusi ama Maariyaamiranna soqqamaasinchu Phaawuloosira Yihowa jawaante uyinonsa gara xiinxalline kuri xaꞌmuwara dawaro afiꞌneemmo. Qoleno, Yihowa soqqamaanosi xaa yanna geeshsha hakko garinni jawaachishanni noonsahu hiittoonniitiro laꞌneemmo.

HUUCCATTO ASSIDHINENNA XIINXALLITINE JAWAANTE AFIDHE

4. Yihowa aanno jawaante afiꞌra dandiineemmohu hiittoonniiti?

⁴ Yihowa aanno wolqa afiꞌra dandiineemmoti mitte doogo huuccattotenni isiwa shiqate. Yihowa “jawa wolqa” oyenke huuccattonkera dawara qolanno. (2 Qor. 4:7) Qoleno Qaalesi nabbambenna hiincine jawaante afiꞌra dandiineemmo. (Far. 86:11) Qullaawu Maxaafi giddo nooti Yihowa sokka ‘wolqa afidhinote.’ (Ibi. 4:12, NW) Yihowa huucciꞌratto woyitenna Qaalesi nabbawatto woyite cincate kaaꞌlitannoheta, hagiirrikki baꞌꞌannokki gede assitannota woy uyinoonniheha shota ikkinokki looso umo fushshate kaaꞌlitannohe jawaante afiꞌratto. Hanni Yihowa masaalaanchu Yoonaasira jawaante uyinosi gara laꞌno.

5. Masaalaanchu Yoonaasira jawaante hasiissinosihu mayiraati?

⁵ Masaalaanchu Yoonaasira jawaante hasiissinosi. Isi Yihowa uyinosiha shota ikkinokki looso agure xooqino. Konninni kainohunni isinna markaawete ledosi noo manni lowo dambali kaeenna reyite hoogge gattino. Markaawete giddo noo manni iso baaru giddo tugita iso jawu qulxuꞌmichi egemmino; hakko tunsote qulxuꞌmichu godowi giddo heeꞌre isi lowo geeshsha waajjino. Hakka woyite Yoonaasira mayi macciishshaminosiha lawannohe? Umi qara isi reyemmo yee hedinoha ikkara dandaanno. Hattono Yihowa facci asse agurinoe yee hedinoha ikkara dandaanno. Yoonaasi lowo geeshsha yaadinoti dihuluullissannote.

6. Yoonaasi 2:1, 2, 7 kultanno garinni Yoonaasi qulxuꞌmichu godowira heeꞌre jawaante afiꞌranno gede kaaꞌlinosiri maati?

⁶ Yoonaasi qulxuꞌmichu godowi giddo heeꞌre jawaante afiꞌrate maa assino? Yihowa huucciꞌrino. (Yoonaasi 2:1, 2, 7 nabbawi.) Isi Yihowara hajajaminokkiha ikkirono umosi heeshshi asse maaro eꞌꞌe huucciꞌrino huuccatto Yihowa macciishshannosita addaxxino. Qoleno Yoonaasi Qullaawa Borro hiincino. Hatto yineemmohu mayiraati? Yoonaasi maxaafa fooliishsho lamete isi huucciꞌrino huuccattora noo qaallanna yaatto giddo batinye Faarsote maxaafira noote ledo mittu garite. (Lawishshaho, Yoonaasi 2:2, 5, Faarso 69:1; 86:7 ledo heewisiisi.) Yoonaasi konne Qullaawa Borro gafa seekke afinoti dihuluullissannote. Qoleno isi qarru giddo heeꞌre tenne Qullaawa Borro hiincasi Yihowa kaaꞌlannosita addaxxanno gede assitinosi. Yihowa Yoonaasi gatisinosi; hattono Yoonaasi gedensoonni Yihowa aannosi looso loosate qixxaawino.—Yon. 2:10–3:4.

7-8. Mittu Tayiwaanete heeꞌranno rodii qarru iillisi yannara jawaante afiꞌrinohu ma garinniiti?

⁷ Addi addi qarri iillannonke woyite Yoonaasi lawishshi kaaꞌlankera dandaanno. Lawishshaho Tayiwaanete heeꞌrannoha Zhimingib yinanni rodoo buutote dhibbi waadannosi. Qoleno isi Yihowa addaxxino daafira maatesi tiyyidhe gibbannosita dandee saꞌꞌa hasiissinosi. Isi huuccatto assiꞌrenna xiinxalle Yihowa aanno jawaante afiꞌrino. Zhimingi togo yiino: “Qarru amadannoe woyite lowo geeshsha yaadeemmo daafira hojju xiinxallo assiꞌrate wodanaaꞌma qarra ikkitannoe.” Ikkirono isi hexxo dimudhino. Isi lede togo yiino: “Umo Yihowa huucciꞌreemmo. Hakkiinni, maccate eerifoone wodhe Maganu Mangiste faarsuwa macciishsheemmo. Mito woyite isinni wodanaaꞌmammo geeshsha huuroꞌya ajishe faarseemmo. Hakkiinni xiinxalla hanafeemmo.”

⁸ Zhimingi hojju xiinxallo assiꞌrasi hedinokki garinni jawaante afiꞌranno gede kaaꞌlitinosi. Lawishshaho iso darre gombeennasi xaalla beedho afiꞌre noo yannara duume mundeete seele ajjinosi daafira akimitte mundee adha hasiissannosita kultinosi. Darre gombasira albaanni noo hashsha Zhimingi isinte gede dhiwanteenna darre gomboonnise rodoo daafira kulanno woꞌnaalsha nabbawino. Tenne rodooti duume mundeete seele isitenni roore ajjinoha ikkirono ise mundee diadhitino hattono hurtino. Kuni woꞌnaalshi Zhimingi ammaname heeꞌranno gede jawaante ikkinosi.

9. Qarru wolqa baꞌꞌatto gede assihero maa assa dandaatto? (Misileno lai.)

⁹ Qarru amadeennahe lowo geeshsha yaadootto daafira giddokkita Yihowara hasaapha qarra ikkite egentinohe? Woy xiinxallate horo wolqa hoogge egennootto? Yihowa nootto gara seekke afannota deꞌooti. Hakko daafira harancho huuccatto huucciꞌrittoro nafa Yihowa hasiise noohere aannoheta addaxxa dandaatto. (Efe. 3:20) Daafurootto woy xissiisiꞌrootto daafira nabbawa woy xiinxalla qarra ikkituhero, qoonqotenni qaddaꞌnoonniha Qullaawa Maxaafa woy Qullaawu Maxaafi aana xintantino borruwanke macciishshate woꞌnaali. Qoleno faarsuwanke giddonni mitte macciishsha woy jw.org aana noo viidiyubba giddonni mitte laꞌꞌa kaaꞌlitahera dandiitanno. Yihowa huuccidhe hattono isi qixxeessinote ayyaanaamittete qixxaawo widoonni huuccattokkira dawaro qolanno gara wodanchite isi jawaachishannohe gede assiꞌra dandaatto.

AMMANATE RODUUWIꞌNE JAWAACHISHSHAꞌNERA DANDIITANNO

10. Ammanate roduuwinke jawaachishshannonkehu hiittoonniiti?

¹⁰ Yihowa ninke jawaachishate ammanate roduuwanke horoonsiꞌrara dandaanno. Insa fonqolu iillannonke woyite woy uyinoonninkeha shota ikkinokki looso umo fushsha qarra ikkitannonke woyite ‘jawaachishshannonke.’ (Qol. 4:10, 11) Roorenkanni ‘qarru barra iillitannonke’ jaalla hasiissannonke. (Law. 17:17) Wolqa baꞌneemmo woyite ammanate roduuwinke maalaamittetenninna ayyaanaamittetenni kaaꞌlitankera hattono sheshifachishshankera dandiitanno. Hanni Yesuusi ama Maariyaami wolootu jawaachishshinose gara laꞌno.

11. Maariyaamira jawaante hasiissinosehu mayiraati?

¹¹ Maariyaamira jawaante hasiissinose. Hanni ise sokkaasinchu Gabirieeli shota ikkinokki looso uyisehu gedensaanni mageeshshi geeshsha yaaddinoro hedi. Maariyaami mine assidhinokkiha ikkirono godobbanno. Ise hakkuyira albaanni qaaqquulle lossidhe diegentino; ikkirono xa albillitte Buuramino Moote ikkanno qaaqqo towaattaraati. Ise seemo ikkitino daafira adhasera huucciꞌrinohu Yooseefira konne coye baala mayite kultanno?—Luq. 1:26-33.

12. Luqaasi 1:39-45 kultanno garinni Maariyaami hasiissannose jawaante afidhinohu hiittoonniiti?

¹² Maariyaami konne uyinoonniseha rosaminokkihanna shota ikkinokki looso umo fushshate hasiissannose jawaante afidhinohu hiittoonniiti? Ise woloota kaaꞌlo xaꞌmidhino. Lawishshaho Gabirieeli uyinoonnise loosi daafira mitore lede kulannose gede xaꞌmidhino. (Luq. 1:34) Hakkiinni ise fiixase Elsaabeexi laꞌara “ilaalaame Yihudu gobbara” noo katama hadhino. Hakkira haꞌrase kaaꞌlitinose. Elsaabeexi Maariyaami galattinose; hattono ise Yihowa ayyaani kakkayiseennase Maariyaami iltanno qaaqqi daafira jawaachishshanno masaalo coyidhino. (Luqaasi 1:39-45 nabbawi.) Maariyaami Yihowa “Wolqasinni jawaata looso loosino” yitino. (Luq. 1:46-51) Sokkaasinchu Gabirieelinna Elsaabeexi widoonni Yihowa Maariyaami jawaachishinose.

13. Boliiviyaho heedhannota mitte rodoo ammanate roduuwase kaaꞌlo xaꞌmiꞌrase baꞌraassinosehu hiittoonniiti?

¹³ Maariyaami gede ninkeno ammanate roduuwinke jawaachishshannonke. Boliiviyaho heedhannote Dasuuri yinanni rodoora togoo jawaante hasiissinose. Annase hurannokki dhibbi amadeenna baasa dhiwame hospitaale eita ise dandaamise deerrinni iso towaatate murcidhino. (1 Xim. 5:4) Tini kayinni woꞌmanka woyite shota diꞌꞌikkitinose. Ise, “Konni garinni heeꞌra didandeemma yee duucha hige hedoomma” yitino. Dasuuri kaaꞌlo xaꞌmidhinoyya? Umi qara dixaꞌmidhino. Ise togo yitino: “Roduuwa qarrisa dihasiꞌroomma. ‘Hasiisannoere asse kaaꞌlannoehu Yihowaati’ yee hedoomma. Kayinni gedensoonni, wolootunniwa gambo giwe iillinoe qarra callaꞌya tirate sharramanni noommata wodanchoomma.” (Law. 18:1) Dasuuri mite jaallasera sokke borreessite iillinosere xawisse kulate murcidhino. Ise togo yitino: “Ammanate roduuwiꞌya jawaachishshinoe gara xawise kula nafa didandeemma. Insa sagale haadhe hospitaale daggino, hattono jawaachishshanno qummeeshshuwa nabbabbinoe. Calluwanke ikkinoommokkita afa lowo geeshsha hagiirsiissannote. Ninke halaꞌlado Yihowa maate widooti; ammanate roduuwinke hasiisannonkere assite kaaꞌlitannonke, qarrammeemmo woyite marartannonke hattono ammanamme Yihowara ledonsa soqqammanni heeꞌneemmo gede kaaꞌlitannonke.”

14. Songote cimeeyye kaaꞌlo xaꞌmiꞌra hasiissannonkehu mayiraati?

¹⁴ Yihowa songote cimeeyye horoonsiꞌreno jawaachishannonke. Isi ninke jawaachishatenna fooliishshiishate insa elto asse horoonsiꞌranno. (Isa. 32:1, 2) Hakko daafira yaachishanno coyi iillannohe woyite yaaddokki songote cimeeyyera hasaaphi. Insa kaaꞌlitannohe woyite maahoyye yii. Yihowa insa widoonni jawaachishahera dandaanno.

ALBILLITTETE HEXXONKE JAWAANTE IKKITANNONKE

15. Baalunku Kiristaanira noonsa hexxo maati?

¹⁵ Qullaawu Maxaafi kulanno hexxo jawaante ikkitannonke. (Rom. 4:3, 18-20) Ninke Kiristaanaho aye waaga baanteno afiꞌnannikkiti hegerera heeꞌrate hexxo noonke; mitu Kiristaanira iima heeꞌrate hexxo noonsa; mitu Kiristaanira qole gannate ikkitino uullara heeꞌrate hexxo noonsa. Hexxonke qarra dandiine saꞌneemmo gede, dancha duduwo dudumbeemmo gedenna songote giddo uyinanninkeha addi addi looso loonseemmo gede jawaante ikkitannonke. (1 Tes. 1:3) Tini hexxo soqqamaasincho Phaawuloosino jawaachishshinosi.

16. Soqqamaasinchu Phaawuloosira jawaante hasiissinosihu mayiraati?

¹⁶ Phaawuloosira jawaante hasiissinosi. Isi Qorontoosi Kiristaanira borreessino sokkara isonooto shiimurinni hiiqqamannohu doru uduunnichi ledo heewisiisino. Iso ‘miincoonnisi, garu bainosi, xiimboonnisi hattono ganne tungoonnisi.’ Isi reye hooge gatino woyiti nafa no. (2 Qor. 4:8-10) Phaawuloosi tenne hedo borreessinohu misiyoone ikke sayikkimeeshsho haꞌri woyiteeti. Phaawuloosira hakkunni gedensaannino lowo qarri iillinosi. Iso mannu gamba yee fule siꞌꞌinosi, amadinosi, markaawete haꞌranna markaawe hiiqqaqqantino hattono usurroonnisi.

17. Layinki Qorontoosi 4:16-18 kultanno garinni Phaawuloosira iillinosi qarra dandee saꞌꞌanno gede jawaante ikkinosiri maati?

¹⁷ Phaawuloosi hexxosi illachishe iillinosi qarra dandee saꞌꞌate jawaante afiꞌrino. (2 Qorontoosi 4:16-18 nabbawi.) Isi Qorontoosi Kiristaanira ‘gobbayidi manninatisi baꞌꞌanni haꞌrannoha ikkirono, tini wolqa baꞌꞌanno gede assitasira wodhannokkita coyiꞌrino. Phaawuloosi albillittete hexxosi illachishino. Isi iima afiꞌrannoha hegere heeshsho baꞌraaꞌra adhate iillannosi qarra baala dandee saꞌꞌate murciꞌrino. Isi tenne hexxosi hiincasi ‘barru barrunkunni haarooꞌmanno’ gede assitinosi.

18. Albillittete hexxo Tihoomirinna maatesi jawaachishshinohu hiittoonniiti?

¹⁸ Bulgaariyaho heeꞌrannoha Tihoomiri yinanni rodoo albillittete hexxosi jawaachishshinosi. Shiimu diri albaanni maaꞌnu rodiisi Zidirabiko hedeweelcho danotenni reyino. Hakko daafira Tihoomiri lowo geeshsha xissiisiꞌrino. Isinna maatesi tenne xisso dandiite saꞌꞌate reyino manni kaꞌꞌanno woyite ikkannore heddino. Isi togo yiino: “Lawishshaho Zidirabiko ledo mama xaandeemmoro, hiittoo sagale qixxeessineemmosiro, isi reyotenni kaꞌꞌanno woyite umo ayeoo koyinseemmoro, hattono goofimarchu yanna daafira maa kulleemmosiro hasaambeemmo.” Tihoomiri maatesi hexxonsa illachishansa iillinonsa qarra dandiite saꞌꞌate jawaante afidhanno gede assitinonsatanna Yihowa rodoosi reyotenni kayisanno yanna geeshsha cincite agadhitanno gede kaaꞌlitinonsata coyiꞌrino.

19. Hexxokki kaajjishiꞌrate ma assa dandaatto? (Misileno lai.)

¹⁹ Hexxokki kaajjishiꞌra dandaattohu hiittoonniiti? Lawishshaho hexxokki hegerera uullate aana heeꞌra ikkituro, Qullaawu maxaafi Gannatete daafira kulannore nabbawi hattono hiinci. (Isa. 25:8; 32:16-18) Haaro alamera heeshsho hiittoota ikkitannoro hedi. Hakko noottohu gede assite hedi. Ayeoonni xaadattoro, hiittoo huuro macciishshattoronna hakka woyite mayi macciishshamannohero hedi. Konni garinni hiinca dandaatto gede, borruwankera fultinota gannate ikkitino uulla leellishshanno misilla woy Haaro Alame Dagganno, Yanna Gambissino, hattono Hatte Yanna Hedi yitannota muuziiqu viidiyo lai. Haaro alamera heeꞌneemmo heeshsho woꞌmanka woyite hendeemmoha ikkiro, xa iillannonke qarri ‘shiimanna saꞌꞌannoha’ ikkinota qaangeemmo. (2 Qor. 4:17) Yihowa uyinohe hexxo widoonni jawaachishannohe.

20. Wolqa baꞌneemmo woyite nafa wolqa afiꞌra dandiineemmohu hiittoonniiti?

²⁰ Wolqa baꞌnoommoha lawannonke woyite nafa Maganu wolqa aannonke. (Far. 108:13) Yihowa, jawaante afiꞌrate hasiisannohere wonanni balaxe qixxeessinohe. Hakko daafira uyinoonnihe looso umo fushshate, iillannohe qarra dandiite saꞌꞌate woy hagiirrikki baꞌꞌannokki gede assiꞌrate kaaꞌlahera giddokkita Yihowara kulte huucciꞌri; hattono hojju xiinxallo assidhe isi biddishsha hasiꞌri. Ammanate roduuwikki kaaꞌlitannohe woyite maahoyye yii. Hexxokki xabbe leeltannohe gede assiꞌri. Hatto assittoro, ‘cincatenni baalanka coye dandiite qixxaawoottoha ikkatto gede Mootichu jawa wolqasinni jawaante baala aannohe.’—Qol. 1:11.