Kalaqama Laꞌine Albinni Roore Yihowa Daafira Rosse

1. Iyyoobi Yihowa albinni roore afanno gede kaaꞌlinosi coyi giddo mittu maati?

IYYOOBI mannu ledo duucha hige hasaawino; Maganu Yihowa ledo hasaawino hasaawi kayinni lowo geeshsha baxxinoho. Konni hasaawi yannara Yihowa Iyyoobi mito dhagge ikkanno kalaqama laꞌꞌanno gede kulinosi; tini Iyyoobi Yihowa hayyicha ikkinota huwatanno gedenna soqqamaanosira hasiisannonsare aannonsata albinni roore addaxxanno gede assitannosi. Lawishshaho, Maganu saada towaatannota Iyyoobi qaaganno gede assinosi; hakko daafira Maganu Iyyoobino towaatannosi. (Iyo. 38:39-41; 39:1, 5, 13-16) Iyyoobi kalaqama lae Maganisi akatta daafira lowore rosino.

2. Mito woyite Yihowa kalaqinore laꞌneemmo faro afiꞌra qarra ikkitankera dandiitannohu mayiraati?

² Ninkeno Yihowa kalaqinore xiinxalline isi daafira albinni roore rosa dandiineemmo. Ikkirono hatto assa woꞌma woyite shota ikkitannonke yaa diꞌꞌikkino. Heeꞌneemmohu katamaho ikkiro, barru baala Yihowa kalaqino kalaqama laꞌneemmota gari faro afiꞌra hoongammora dandiineemmo. Heeꞌneemmohu katamaho ikka hoogiro nafa, kalaqama laꞌꞌate gari yanna dinonke yine hendammora dandiineemmo. Hakko daafira hanni yanna gaaꞌmine kalaqama laꞌꞌate sharrama hasiissannonkehu mayiraatiro laꞌno. Qoleno Yihowanna Yesuusi kalaqama horoonsidhe rosiissinohu hiittoonniitironna ninkeno kalaqama laꞌne roore rosate maa assa dandiineemmoro laꞌneemmo.

KALAQAMA SEEKKINE LAꞌꞌA HASIISSANNONKEHU MAYIRAATI?

3. Yihowa, Addaami kalaqama lae hagiidhara hasiꞌrannota leellishannori maati?

³ Yihowa umi manchi isi kalaqino kalaqama lae hagiidhara hasiꞌrino. Maganu Addaami kalaqi woyite biifado gannatera worinosi; hattono gannate towaatannonna halashshanno gede looso uyinosi. (Kal. 2:8, 9, 15) Hanni Addaami muꞌro mudhannanna daraaro daraartanna lai woyite mageeshshi geeshsha hagiidhinoro hedi. Edeni gannate towaata Addaamira lowo qoossooti! Qoleno Yihowa Addaami addi addi saadara suꞌma fushshanno gede kulinosi. (Kal. 2:19, 20) Yihowa hasiꞌroommero saadate suꞌma umisi fushsha dandaanno; ikkirono konne looso Addaamira uyino. Addaami saadate suꞌma fushshara albaanni saadanna akatansa seekke lainoti dihuluullissannote. Addaami konne looso lowo geeshsha baxinoti dihuluullissannote. Tini isi Yihowa hayyicha ikkinotanna isi kalaqino kalaqami baxisannohanna biifado ikkinota huwatanno gede kaaꞌlitinositino dihuluullissannote.

4. (a) Kalaqama seekkine laꞌneemmo gede assannonkehu mittu korkaati maati? (b) Yihowa kalaqinori giddo atera roore dhagge ikkannoheri maati?

⁴ Kalaqama seekkine laꞌneemmo gede assannonkehu mittu korkaati Yihowa hatto assinammora hasiꞌranno daafiraati. Isi, “Iimira gordo higgine laꞌe!” yee koyisinonke. Hakkiinni, “Laꞌinanni beeddahe kalaqinohu ayeti?” yee xaꞌmino. Tenne xaꞌmo dawaro diteeꞌlitinote. (Isa. 40:26) Yihowa gordoho calla ikkikkinni, baattote aananna baaru giddono lowoha dhagge ikkanno kalaqama kalaqino; konne kalaqama laꞌne isi daafira lowore ronseemmo. (Far. 104:24, 25) Hanni Maganu ninke kalaqinonke gara hedi! Isi kalaqamu biinfille laꞌne hagiidhineemmo gede asse kalaqinonke. Qoleno isi kalaqinohu addi addi coyinni hagiidhineemmo gede, laꞌꞌate, macciishshate, kisate, qamasatenna suꞌniissate dandoo oye kalaqinonke.

5. Roomu Sokka 1:20 kultanno garinni Yihowa kalaqinore seekkine laꞌꞌa kaaꞌlitannonkehu hiittoonniiti?

⁵ Qullaawu Maxaafi kalaqama seekkine laꞌneemmo gede assannonkeha wole korkaatano kulanno. Kalaqama laꞌne Yihowa akatta daafira ronseemmo. (Roomu Sokka 1:20 nabbawi.) Lawishshaho Yihowa kalaqinore laꞌe, isi hakkonne coye dhagge ikkanno garinni kalaqino gara hedi. Kuni kalaqami Yihowa hayyo dileellishanno? Qoleno hanni inteemmote addi addi sagale daafira hedi. Tinino Maganu mannu ooso mageeshshi geeshsha baxannoro leellishshanno. Kalaqino coyinni Yihowa akatta huwanteemmo woyite, albinni roore iso anfeemmo; hattono isiwa roore shinqeemmo. Hanni xa, Yihowa mannu oosora kaaꞌlanno roso rosiisate kalaqama horoonsiꞌrinota mite doogga laꞌno.

MAGANU KALAQAMA HOROONSIꞌRE UMISI DAAFIRA ROSIISINONKE

6. Bayichunni bayicho hadhanno cea laꞌne maa rosa dandiineemmo?

⁶ Yihowara hirqino yanna noosi. Diru kiiro Ammajje agani jeeforanna Onkoleessu agani mereerimira Israeelete manni qoꞌlaante aliyyera higge bubbanna laꞌꞌa dandaanno. Maganu Israeelete mannira, “Qoꞌlaante, hawado darante hadhe, arro galagalte higganno yanna egentino” yiinonsa. (Erm. 8:7) Yihowa tenne ceara bayichunni bayicho buubbanno yanna hirqinonte gede, yoote barra abbateno yanna murino. Xaa yannara mittu bayichunni wole bayicho hadhanno cea laꞌneemmo woyite, Yihowa hirqino ‘yannara’ tenne busha alame hunannota addaxxa dandiineemmo.—Imb. 2:3.

7. Cea buubbanno gara laꞌꞌanke maa buuxissannonke? (Isayaasi 40:31)

⁷ Yihowa soqqamaanosira wolqa aannonsa. Yihowa mannisi daafuranno woyite woy hexxo mudhanno woyite jawaante oye “allamurchu gede qoolunni buubbanno” gede assannonsata masaalaanchu Isayaasi widoonni kule qaale eino. (Isayaasi 40:31 nabbawi.) Israeele allamuru mittoreno qarramikkinni iima hige buuwanna duucha higge laꞌanno; allamuru iima hige buuwannohu ayyare iima qolte dukkannonsa daafiraati. Tini, Yihowa tenne ceara wolqa uyinte gede ninkerano wolqa aannonketa qaangeemmo gede assitannonke! Jajjabba cea gordoho iima higge buubbanna laꞌneemmo woyite, Yihowa iillinonke qarra dandiine saꞌneemmo gede jawaante aannonketa qaangeemmo.

8. Iyyoobi Maganu kalaqinore lae maa rosino? Ninke tennenni maa ronseemmo?

⁸ Yihowa addaxxinanni Maganooti. Yihowa Iyyoobi iso albinni roore addaxxanno gede kaaꞌlinosi. (Iyo. 32:2; 40:6-8) Maganu Iyyoobi ledo hasaawi woyite batinyu kalaqami daafira lawishshaho, beeddahete daafira, gomichu daafira hattono banqote daafira kulinosi. Qoleno Yihowa saadate daafira lawishshaho boowilchunna farashshu daafira kulinosi. (Iyo. 38:32-35; 39:9, 19, 20) Kuri coyibba baala Maganunnita dhagge ikkitanno wolqa calla ikkikkinni, baxillesinna hayyosi leellishshanno. Kuni hasaawi Iyyoobi albinni roore Yihowa addaxxanno gede assinosi. (Iyo. 42:1-6) Hatteente gede ninkeno kalaqama laꞌneemmo woyite Yihowa taalle nookki hayyo noosihanna ninkenni roore wolqaataamo ikkinota qaangeemmo. Isi qarranke baala hoola dandaanno; qoleno hoolanno. Tini iso albinni roore addaxxineemmo gede kaaꞌlitannonke.

YESUUSI MANNAHO ANNISI DAAFIRA ROSIISATE KALAQAMA HOROONSIꞌRINO

9-10. Arrishshonna xeenu Yihowa daafira maa rosiisannonke?

⁹ Yesuusi kalaqamu daafira seekke afino. Isi “qara loosaasincho” ikkino daafira Annisi kalqete alame kalaqi woyite Iso kaaꞌlate qoosso afiꞌrino. (Law. 8:30, NW) Yesuusi uullate aana noo yannara rosaanosira Annisi daafira rosiisate kalaqama horoonsiꞌrino. Hanni isi rosiisinoha mito roso laꞌno.

¹⁰ Yihowa baalanka manna baxanno. Yesuusi Ilaalu Sibikate yannara rosaanosi batinyu manni mulluri gede asse laꞌꞌannoha lame kalaqama illachishshanno gede rosiisinonsa: insano arrishshotenna xeenaho. Kuri lamunku coyi heeshshotenni heeꞌrate lowo geeshsha hasiisannoho. Yihowa kuri coyibba isira soqqamannokki mannira hoꞌla dandaanno. Ikkirono isi shaqqillunni baalunku mannira xeenanna arrishsho aanno. (Mat. 5:43-45) Yesuusi konne roso horoonsiꞌre rosaanosira Yihowa baalanka manna banxammora hasiꞌrannota rosiisinonsa. Arrishsho eꞌanno woyite heeꞌranno biinfillenna xeena shoranna laꞌneemmo woyite Yihowa baalanka manna baxannota qaangeemmo. Isi lawishshi ninkeno baalunku mannira sabbanke baxille leellinsheemmo gede assannonke.

11. Iimi cea laꞌꞌa jawaachishshannonkehu hiittoonniiti?

¹¹ Yihowa hasiisannonkeha maalaamittete coye aannonke. Qoleno Yesuusi hakkiicho Ilaalu Sibikate yannara togo yiino: “Hanni Iima buubbanno cea laꞌe; insa diwixidhanno; dimixxitanno; gootaaraho diwodhitanno. Ikkollana gordu Anniꞌne itisannonsa.” Yesuusi, “Kiꞌne cea lowo geeshsha diroortinanni?” yee xaꞌmi yannara isi rosiisanna macciishshanni noo manni cea iimaanni buubbanna lainoha ikkara dandaanno. (Mat. 6:26) Tini Yihowa hasiisannonkeha maalaamittete coye aannonketa buuxissannonke! (Mat. 6:31, 32) Kalaqamu daafira kulannohu kuni rosi xaa yannara noore ammanantinore Yihowa soqqamaanono jawaachishannoho. Ispeenete gobbara heedhannoti mitte wedellitte suwisaancho heeꞌrate injaanno mine afidhinokki daafira hexxo mudhitino. Kayinni ise cea gummanna gora xinqidhanna laꞌuhu gedensaanni jawaante afidhino. Ise togo yitino: “Yihowa tenne cea towaatannota afaꞌya isi aneno towaatannoeta qaageemma gede assitinoe.” Tini rodoo mulenni heedhanno mine afidhinoti dihuluullissannote.

12. Maatewoosi 10:29-31 kultanno garinni gurrae laꞌne Yihowa daafira maa rosa dandiineemmo?

¹² Ninke mittu mittunku Yihowa albaanni waagu noonkereeti. Yesuusi soqqamaasinesi sabbakkara soyara albaanni, mannu giwannonsata waajjitannokki gede kaaꞌlinonsa. (Maatewoosi 10:29-31 nabbawi.) Isi insa jawaachishate Israeelete gobbara batinyu manni afino cea yaano gurraichote daafira kulino. Hatte yannara tenne cea shiimu waagira hirranni. Isi kayinni rosaanosira togo yiinonsa: “Gordu Anniꞌne afikkinni kayinni mitticho gurraicho nafa uulla diubbanno.” Isi lede, “Batinye gurrae kiꞌne roortinanni” yiino. Konni garinni Yesuusi insa mittu mittunku Yihowa albaanni waagu noonsare ikkitinota huwattanno gede kaaꞌlinonsa; hakko daafira insa darte waajjitanno gede assannonsari dino. Yesuusi rosaano katamahonna qachuwate sabbakkanni gurrae laꞌꞌanno woyite isi rosiisinonsa roso qaaggannoti dihuluullissannote. Hakko daafira kiꞌneno shiimmaadda cea laꞌinanni woyite, mittu mittunku Yihowa albaanni waagu nooꞌne daafira ‘batinye gurrae roortinannita’ qaagge. Yihowa kaaꞌlannoꞌne daafira kiꞌneno mannu giwannoꞌneta waajja dihasiissannoꞌne.—Far. 118:6.

KALAQAMA LAꞌNE ALBINNI ROORE MAGANU DAAFIRA ROSA DANDIINEEMMOHU HIITTOONNIITI?

13. Kalaqama laꞌne ronseemmo gede kaaꞌlannonkeri maati?

¹³ Kalaqama laꞌne Yihowa daafira wole batinye roso rosa dandiineemmo. Hiittoonni? Umihunni kalaqama seekkine laꞌꞌate yanna gaaꞌma hasiissannonke. Hakkiinni, kalaqama laꞌne Yihowa daafira maa ronseemmoro heda hasiissannonke. Hatto assa woꞌmanka woyite shota ikkitanno yaa diꞌꞌikkino. Kaamerooni gobbara heedhannoti Geeraaldini yinanni rodoo togo yitino: “Lophoommahu katamaho ikkino daafira kalaqama seekke laꞌꞌate sharrama hasiissannoeta huwatoomma.” Alfonso yinannihu mittu cimeessino togo yiino: “Yihowa kalaqinore seekke laꞌꞌatenna kalaqamu Yihowa daafira maa rosiisannonkero hiincate yanna gaaꞌma hasiissannoeta huwatoommo.”

14. Daawiti Yihowa kalaqinore hiince maa rosino?

¹⁴ Daawiti Maganu kalaqinori daafira seekke hedino. Isi Yihowa togo yiino: “Angakki looso gordo, basensara woroottore agananna beeddahe laꞌnanni woyite, isire hedattora isi mannu ayeti?” (Far. 8:3, 4) Daawiti hashsha gordoho beeddahe lae calla dhagge assiꞌre diagurino. Qoleno isi beeddahe lae Maganu daafira rosinore hiincino. Daawiti Yihowa bayira Magano ikkinota rosino. Wole yannara Daawiti amasi godowi giddo lophino gara hiincino. Isi kuri coyibba hiinciti Yihowa hayyo albinni roore dhagge assiꞌrino.—Far. 139:14-17.

15. Kalaqama laꞌe Yihowa akatta huwatootto gara leellishanno lawishsha kuli. (Faarso 148:7-10)

¹⁵ Ninkeno Daawiti gede kalaqama laꞌne seekkine hiincineemmore afiꞌra qarra diꞌꞌikkitannonke. Qooxeessinkera noore laꞌnummoro batinye Yihowa akatta leellishannore wodanchineemmo. Lawishshaho arrishsho giwaadhinanni woyite arrishshote iibbilli Yihowa wolqa leellishanno gara huwatte. (Erm. 31:35) Cea mine miꞌnitanna laꞌinanni woyite Yihowa hayyo hedde. Woshichu buttuꞌlichi farrisi ledo godoꞌlanna laꞌinanni woyite, Yihowa hagiirraamo Magano ikkinotanna ninkeno hagiidhinammora hasiꞌrannota qaagge. Qoleno mitte ama qaaqqise ledo godoꞌlitanna laꞌinanni woyite baxillisi daafira Yihowa galatte. Yihowa kalaqinori baalu jawuno shiimuno, mule noohuno xeertote noohuno iso guwisanno daafira Yihowa daafira ronseemmo gede assannonkehu batinyu coyi noonke.—Faarso 148:7-10 nabbawi.

16. Maa assate murciꞌra hasiissannonke?

¹⁶ Maganinke gedee hayyichi, baxillaanchinna wolqaataami dino; isi kalaqinohu baalunku coyi biifadoho. Kalaqama laꞌne kurinna wole batinye akattasi wodancha dandiineemmo. Baalunku kalaqama laꞌne hagiidhatenna Yihowa daafira rosate yanna gaaꞌmino. Hatto assinummoro Kalaqaanchinkewa albinni roore shinqeemmo. (Yai. 4:8) Aananno birxichira, annuwunna amuuwu kalaqama horoonsidhe oosonsa Yihowawa shiqqanno gede kaaꞌla dandiitanno gara ronseemmo.